༄༅། །དབུ་མ་རྩ་བ་ཤེས་རབ་ཀྱི་རྣམ་པར་བཤད་པ་ཡང་དག་ལྟ་བའི་འོད་ཟེར་ཞེས་བྱ་བ་བཞུགས་སོ།།
དབུ་མ་རྩ་བ་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ཞེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །རབ་འབྱམས་ཞིང་གི་རྒྱལ་བ་ཐམས་ཅད་ལ། །ཐུགས་སྐྱེད་རྒྱ་མཚོ་འདོམས་པའི་ཡབ་གྱུར་ཀྱང་། །རྒྱལ་སྲས་གཞོན་ནུའི་ཚུལ་འཛིན་འཇམ་པའི་དབྱངས། །སྙིང་གི་པདྨོར་བཞུགས་ནས་བདག་ཡིད་སྐྱོབས། །ཡེ་ཤེས་མེ་ཡིས་ཤེས་བྱའི་བུད་ཤིང་མ་ལུས་བསྲེགས་པས་ཞི། །ཞི་སྐུ་དཔག་བསམ་ཤིང་ལྟར་གསལ་བ་འཇིག་རྟེན་འབྱོར་པའི་རྒྱུ། །རྒྱུ་མཐུན་སྐུ་ནི་བ་སྤུའི་ཁུང་བུར་དུས་གཅིག་བགྲང་ཡས་སྤྲུལ། །སྤྲུལ་པ་མཆོག་གིས་ཞི་ལམ་སྟོན་མཛད་ཐུབ་དབང་དེ་ལ་འདུད། །བློ་གྲོས་རྒྱ་མཚོའི་དབུས་གནས་ཡང་དག་ལྟ་བའི་འོད་ཟེར་གྱིས། །ཀུན་བཏགས་ལྷན་སྐྱེས་ཡིད་ཀྱི་མུན་པ་མ་ལུས་རབ་བསལ་སྟེ། །གསུང་གི་མདའ་ཚོགས་སྲིད་པ་གསུམ་ལས་རྒྱལ་ཐབས་ལེགས་མཛད་པ། །ཀླུ་སྒྲུབ་སངས་རྒྱས་གཉིས་པ་དེ་ལ་སྤྱི་བོས་ཕྱག་བགྱིད་དོ། །གང་གི་ལེགས་གསུང་ཟླ་བའི་འོད་ཟེར་གྱིས། །ཀླུ་སྒྲུབ་དགོངས་པ་དྲི་མེད་ཀུནྡའི་ཚལ། །གསལ་བར་མཛད་པའི་གྲགས་པ་ལྷམ་མེ་བ། །དོན་དམ་གཟིགས་པ་དེ་ལ་མགོས་ཕྱག་འཚལ། །བློ་གྲོས་པདྨོའི་འདབ་བརྒྱ་ཁ་ཕྱེ་ནས། །ཟབ་དོན་སྦྲང་རྩིས་སྐལ་བཟང་བུང་བའི་ཚོགས། །ཚིམ་པར་མཛད་པའི་རྣམ་དཀར་ཕྲིན་ལས་ཅན། །ཡོངས་འཛིན་མཁས་པའི་ཚོགས་ལའང་ཕྱག་འཚལ་ནས། །གང་ཞིག་རྟོགས་ན་སྲིད་པ་འཇིག་བྱེད་ཅིང་། །ངེས་ལེགས་བྱང་ཆུབ་གསུམ་གྱི་སྒོ་འབྱེད་པའི། །དབུ་མའི་བསྟན་བཅོས་ཀུན་གྱི་གཞིར་གྱུར་པ། །ཤེས་རབ་ཅེས་བྱའི་རྣམ་བཤད་འབྲི་བར་སྤྲོ། །འདིར་མཐོ་རིས་ཀྱི་ཐེམ་སྐས་ལ་བརྟེན་ནས་ཐར་པའི་གྲོང་ཁྱེར་དུ་འཇུག་པར་འདོད་པ་དག་གིས་གཞི་ངེས་འབྱུང་གི་བསམ་པས་བསྐུལ་བའི་ཚུལ་ཁྲིམས་ལ་གནས་ཤིང་། ལྟ་བ་ཐོས་བསམ་གྱིས་གཏན་ལ་ཕབ་པའི་དོན་རྩེ་གཅིག་ཏུ་བསྒོམ་པའི་བསམ་གཏན་དང་ལྡན་པས་བདེན་པ་བཞིའི་གནས་ཚུལ་ལ་འབད་པར་བྱ་བ་ཡིན་ཏེ། ཅི་སྐད་དུ། སློབ་དཔོན་ཉིད་ཀྱི་ཞལ་སྔ་ནས། །ཐར་པ་བདག་ལ་རག་ལས་འདི་ལ་ནི། །གཞན་གྱིས་གྲོགས་བགྱིར་ཅི་ཡང་མ་མཆིས་སོ། །ཐོས་དང་ཚུལ་ཁྲིམས་བསམ་གཏན་ལྡན་པ་ཡིས། །བདེན་པ་རྣམ་པ་བཞི་ལ་འབད་པར་མཛོད། །ཅེས་གསུངས་སོ། །ལྟ་བ་དེ་ལ་ཡང་འཇིག་རྟེན་པའི་ལྷན་སྐྱེས་ཀྱི་བློས་ཆོས་དང་གང་ཟག་རང་བཞིན་གྱིས་ཡོད་པར་ལྟ་བ་དང་། ཕྱི་རོལ་པས་ཕུང་པོ་ལས་དོན་གཞན་པའི་གང་ཟག་ཡོད་པར་ལྟ་བ་ནས་རྣམ་རིག་པས་གཉིས་མེད་ཀྱི་ཤེས་པའམ་དེ་བཞིན་ཉིད་ཡོད་པར་ལྟ་བའི་བར་ནི་འདིར་དགག་པར་བྱ་བའམ་སྤང་བར་བྱ་བ་ཡིན་ཏེ། བྱང་ཆུབ་སེམས་འགྲེལ་ལས། སངས་རྒྱས་རྣམས་ཀྱིས་བྱང་ཆུབ་སེམས། །བདག་དང་ཕུང་སོགས་རྣམ་རིག་གི །རྟོག་པ་རྣམས་ཀྱིས་མ་བསྒྲིབས་ཤིང་། །རྟག་ཏུ་སྟོང་ཉིད་མཚན་ཉིད་བཞེད། །ཅེས་དང་། གཞུང་འདིར། རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱུང་བར་གསུང་། །ཞེས་དང་། ལྟ་བ་ཐམས་ཅད་སྤང་བའི་ཕྱིར། །དམ་པའི་ཆོས་ནི་སྟོན་མཛད་པ། །ཞེས་གསུངས་པས་སོ། །དེས་ན་བླང་བྱ་མ་ནོར་བའི་ལྟ་བ་ནི། གང་ཞིག་མ་རྟོགས་ན་འཁོར་བའི་ཆོས་ཀྱི་གཞི་བྱེད། ཚུལ་བཞིན་རྟོགས་ན་མྱ་ངན་ལས་འདས་པའི་ཆོས་ཀྱི་གཞི་བྱེད་ལ། ཤེས་བྱ་ཤེས་བྱེད་ལ་སོགས་པའི་སྤྲོས་པ་ཞི་ཞིང་སྣང་ཙམ་རྒྱུན་མི་ཆད་པས་མེད་བཞིན་དུ་སྣང་བ་སྒྱུ་མ་དང་མཚུངས་པར་དཔྱད་ན་གཞིའམ་རྩ་བ་གང་ཡང་མི་རྙེད་ཅིང་། བྱེད་ལས་སྲིད་པ་འཇིག་པར་བྱེད་པ་ལ་གདུལ་བྱའི་ངོར་སྟོང་པ་ཉིད་ཀྱི་ཐ་སྙད་དུ་བཞག་པ་དེ་ཉིད་ཡིན་ཏེ། ཇི་སྐད་དུ། དེ་ཕྱིར་ཆོས་རྣམས་ཀུན་གྱི་གཞི། །ཞི་ཞིང་སྒྱུ་མ་དང་མཚུངས་པ། །གཞི་མེད་སྲིད་པ་འཇིག་བྱེད་པའི། །སྟོང་ཉིད་འདི་ནི་རྟག་ཏུ་བསྒོམ། །ཅེས་གསུངས་པས་སོ། །འདི་ལ་ཡང་། དགག་བྱ་སྐྱེ་སོགས་བཀག་ནས་སྐྱེ་བ་མེད་དོ། །སྟོང་པ་ཉིད་དོ། །ཞེས་དང་། བདག་མེད་དོ་ཞེས་དགག་པའི་རྣམ་པ་ཅན་བསྒོམ་པ་ནི་མཐར་འཛིན་པ་ཡིན་པས་ཤིན་ཏུ་སྨད་དེ། ཇི་སྐད་དུ། སྐྱེ་མེད་དང་ནི་སྟོང་ཉིད་དང་། །བདག་མེད་ཞེས་བྱར་སྟོང་པ་ཉིད། །བདག་ཉིད་དམན་པ་གང་བསྒོམ་པ། །དེ་དེ་སྒོམ་པར་བྱེད་པ་མིན། །ཞེས་གསུངས་པས་སོ། །དེས་ན་སྟོང་ཉིད་ཚུལ་བཞིན་དུ་བསྒོམ་པ་ལ་དབུ་མའི་བཀའ་དང་། བསྟན་བཅོས་ཐོས་བསམ་གྱིས་གཏན་ལ་ཕབ་དགོས་ཤིང་། སོ་སོ་སྐྱེ་བོས་བསྟན་བཅོས་ལ་མ་ལྟོས་པར་བཀའི་དགོངས་པ་རང་དབང་དུ་མི་རྟོགས་པས་བསྟན་བཅོས་ལ་བརྟེན་དགོས་ལ་དེ་ཡང་། མཁའ་འགྲོས་བྱིན་གྱིས་བརླབས་པའི་གྲུབ་ཐོབ་ཁྱད་པར་ཅན་དང་། རྒྱལ་བས་ལུང་བསྟན་པའི་པཎྜི་ཏ་ཁྱད་པར་ཅན་གྱིས་མཛད་པའི་བསྟན་བཅོས་ལ་བརྟེན་ནས་བཀའི་དགོངས་པ་རྟོགས་པར་འགྱུར་ཏེ། དཔལ་བརྩེ་བ་ཆེན་པོའི་ཞལ་ནས། ལུང་བསྟན་གྱུར་པ་ཀླུ་སྒྲུབ་ལ་སོགས་སམ། །མཁའ་འགྲོས་བྱིན་བརླབས་བིརྺ་པ་ལ་སོགས། །གྲུབ་ཐོབ་རྣམས་ཀྱི་མན་ངག་ལ་བརྟེན་ནས། །རྗེས་འཇུག་སྐྱེ་བོས་བཀའ་རྣམས་རྟོགས་པར་འགྱུར། །ཞེས་གསུངས་སོ། །འདིར་ནི་ཡོད་པ་དང་། མེད་པའི་ཕྱོགས་འཇིག་ཅིང་བླ་ན་མེད་པའི་ཐེག་པ་འཇིག་རྟེན་དུ་རྒྱས་པར་མཛད་པར་རྒྱལ་བས་ལུང་བསྟན་པ་ནི་མགོན་པོ་ཀླུ་སྒྲུབ་ཡིན་ཏེ། སྤྲིན་ཆེན་པོའི་མདོ་ལས། ཀུན་དགའ་བོ་ལི་ཙ་བྱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི་ནི་ང་ཡོངས་སུ་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་ཀླུ་ཞེས་བྱ་བའི་དགེ་སློང་དུ་གྱུར་ནས་ངའི་བསྟན་པ་རྒྱས་པར་རབ་ཏུ་བསྟན་ཏེ། མཐར་གྱིས་དང་བའི་འོད་ཅེས་བྱ་བའི་འཇིག་རྟེན་གྱི་ཁམས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་མངོན་པར་རྫོགས་པར་སངས་རྒྱས་པར་འགྱུར་རོ། །ཞེས་དང་། ལང་ཀར་གཤེགས་པ་ལས། བློ་གྲོས་ཆེན་པོས། བདེ་གཤེགས་མྱ་ངན་འདས་གྱུར་ནས། །བསྟན་པ་སུ་ཡིས་འཛིན་འགྱུར་ལགས། །ཞེས་ཞུས་པའི་ལན་དུ། བདེ་གཤེགས་མྱ་ངན་འདས་གྱུར་ནས། །བསྟན་པ་འཛིན་པར་འགྱུར་བ་ནི། །དུས་དག་འདས་ཏེ་བྱུང་བ་ནི། །བློ་གྲོས་ཆེན་པོ་ཁྱོད་ཤེས་བྱོས། །ལྷོ་ཕྱོགས་བེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་བོད་པ་སྟེ། །ང་ཡི་བསྟན་པ་འཇིག་རྟེན་ན། །ཡོད་དང་མེད་པའི་ཕྱོགས་འཇིག་པ། །བླ་མེད་ཐེག་པ་རབ་བསྟན་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །ཞེས་དང་། འཇམ་དཔལ་རྩ་བའི་རྒྱུད་ལས། ང་ནི་མྱ་ངན་འདས་འོག་ཏུ། །ལོ་ནི་བཞི་བརྒྱ་ལོན་པ་ན། །བསྟན་པ་འདི་ལ་ཕན་བརྩོན་པ། །དགེ་སློང་ཀླུ་སྒྲུབ་ཞེས་བྱ་འབྱུང་། །རྨ་བྱ་ཞེས་པའི་རིག་པ་བསྒྲུབས། །ཁམས་དོན་བསྟན་བཅོས་དུ་མ་དང་། །དངོས་མེད་དོན་གྱི་དེ་ཉིད་རིག །ལོ་ནི་དྲུག་བརྒྱ་འཚོ་བར་འགྱུར། །ལུས་དེ་བོར་བར་གྱུར་ནས་ནི། །བདེ་བ་ཅན་དུ་འགྲོ་བར་འགྱུར། །དེ་ཡི་རྗེས་ཐོགས་ཉིད་དུ་ནི། །སངས་རྒྱས་ཉིད་དུ་ངེས་པར་འགྲུབ། །ཅེས་དང་། རྔ་བོ་ཆེའི་མདོ་ལས། ཀུན་དགའ་བོ་ལི་ཙ་བྱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི་ང་ཡོངས་སུ་མྱ་ངན་ལས་འདས་ནས་ལོ་བརྒྱད་ཅུ་ལོན་པ་ན་དགེ་སློང་བློ་འཆང་ཞེས་བྱ་བར་འགྱུར་ཏེ། རྔ་བོ་ཆེའི་མདོ་འདི་འཛིན་པར་འགྱུར། ཞེས་པ་དང་། ཡང་ང་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་དགེ་སློང་འཚོ་བྱེད་ཅེས་བྱ་བར་གྱུར་ནས་ངའི་བསྟན་པ་རབ་ཏུ་རྒྱས་པར་འགྱུར་ཞེས་པ་ལ་སོགས་པ་མང་དུ་གསུངས་སོ། །དེ་ལྟར་རྒྱལ་བས་ལུང་བསྟན་ཅིང་ས་དང་པོ་རབ་ཏུ་དགའ་བ་བརྙེས་པའི་སློབ་དཔོན་དེས་བསྟན་བཅོས་ཇི་ལྟར་མཛད་པའི་ཚུལ་ལ་སྔ་རབས་པ་དག རྒྱུ་ཕ་རོལ་ཏུ་ཕྱིན་པའི་ཐེག་པ་གསལ་བར་བྱེད་པ་དང་། འབྲས་བུ་རྡོ་རྗེའི་ཐེག་པ་གསལ་བར་བྱེད་པ་དང་། དེ་གཉིས་དོན་གཅིག་ཏུ་སྟོན་པ་གསུམ་ལས། དང་པོ་ལ་ཡང་གསུམ་སྟེ། ལྟ་བ་གཙོ་བོར་སྟོན་པ་དབུ་མ་རིག་པའི་ཚོགས་དྲུག་དང་། སྤྱོད་པ་གཙོ་བོར་སྟོན་པ་ལ་རྒྱས་པར་བྱང་ཆུབ་ཀྱི་ཚོགས། འབྲིང་མདོ་ཀུན་ལས་བཏུས་པ། བསྡུས་པ་བཤེས་པའི་སྤྲིང་ཡིག་སྟེ་གསུམ་དང་། ལྟ་སྤྱོད་ཆ་མཉམ་པར་སྟོན་པ་རྒྱལ་པོ་ལ་གཏམ་བྱ་བ་རིན་པོ་ཆེའི་ཕྲེང་བའོ། །ཞེས་ཀྱང་འཆད་མོད་ཀྱི། སྟོང་ཉིད་རིག་པས་བསྒྲུབ་པ་དབུ་མ་རིག་པའི་ཚོགས་ལྔ་དང་། དེ་ཉིད་གསུངས་པའི་སྒོ་ནས་སྟོན་པ་ལ་བསྟོད་པ་བསྟོད་པའི་ཚོགས་དང་། རང་གི་བཤེས་རྒྱལ་པོ་བདེ་སྤྱོད་བཟང་པོ་ལ་གཏམ་དུ་བྱ་བ་བཤེས་པའི་སྤྲིང་ཡིག་དང་། རིན་ཆེན་ཕྲེང་བ་སྟེ། སའི་སྟེང་དུ་སེང་གེའི་སྒྲ་ལན་གསུམ་བསྒྲགས་པར་གྲགས་པའི་བསྟན་བཅོས་ཐམས་ཅད་ཀྱི་རྩ་བའམ། གཞིའམ། ལུས་ལྟ་བུར་གྱུར་པ་ནི་དབུ་མ་རྩ་བའི་ཚིག་ལེའུར་བྱས་པ་ཤེས་རབ་ཅེས་བྱ་བ་འདི་ཉིད་ཡིན་ལ། འདི་འཆད་པ་ལ་དོན་གསུམ་སྟེ། སྒྱུར་བྱེད་དམ་པའི་ཀླད་ཀྱི་དོན། རྩོམ་བྱེད་དམ་པའི་གཞུང་གི་དོན། བསྒྱུར་བ་མཐར་ཕྱིན་མཇུག་གི་དོན་ནོ། །དང་པོ་ལ་གཉིས་ཏེ། མཚན་གྱི་དོན། འགྱུར་གྱི་ཕྱག་གོ །དང་པོ་ལ་གཉིས་ཏེ། མཚན་བསྒྱུར་བ་དང་། མཚན་བཤད་པའོ། །དང་པོ་ནི། སྤྱིར་རྒྱ་གར་ན། པྲ་ཀྲྀ་ཏ་སྟེ་ཡུལ་སོ་སོའམ། རང་བཞིན་ནམ། ཕལ་པའི་སྐད་དང་། དེ་ཉིད་ཟུར་ཆག་པ་ཨ་བ་བྷྲཾ་ཤ་སྟེ་ཟུར་ཆག་གི་སྐད་གཉིས་ནི་རྒྱ་གར་རང་གི་སྐད་ཡིན་ལ། པི་ཤ་ཙི་ནི་ཤ་ཟའི་སྐད་དང་། སཾ་སྐྲྀ་ཏ་ནི་བྱིངས་དང་རྐྱེན་ལེགས་པར་སྦྱར་བས་ན་ལེགས་སྦྱར་ཏེ་ལྷའི་སྐད་ཡིན་ཀྱང་འཕགས་ཡུལ་དུ་དར་བས་རྒྱ་གར་གྱི་སྐད་ཀྱི་མིང་གིས་བཏགས་པའོ། །དེ་ལྟར་བཞི་ལས། འདིར་སཾ་སྐྲྀ་ཏའི་སྐད་དུ། པྲཛྙཱ་ནི་ཤེས་རབ། ན་མ་ནི་ཅེས་བྱ་བའམ་མིང་། མཱུ་ལ་ནི་རྩ་བ། མ་དྷྱེ་མ་ཀ་ནི་དབུ་མ། ཀཱ་རི་ཀཱ་ནི་ཚིག་ལེའུར་བྱས་པའོ། །གཉིས་པ་ནི། མཐའ་གཉིས་སྤངས་པའི་དབུ་མ་སྟོན་པས་ན་དབུ་མ་སྟེ། བརྗོད་བྱ་ལས་བཏགས་པའོ། །སློབ་དཔོན་རང་ཉིད་ཀྱི་དབུ་མའི་བསྟན་བཅོས་རྣམས་སམ། རྗེས་འཇུག་གི་དབུ་མའི་བསྟན་བཅོས་རྣམས་ཀྱི་རྩ་བར་གྱུར་པས་ན་རྩ་བ་སྟེ། ཡོན་ཏན་ལས་བཏགས་པའོ། །གཞུང་ཚིགས་བཅད་དུ་ཡོད་པས་ན་ཚིག་ལེའུ་བྱས་པ་སྟེ། རྗོད་བྱེད་ལས་བཏགས་པའོ། །བདག་མེད་རྟོགས་པའི་ཤེས་རབ་བསྐྱེད་པས་ན་ཤེས་རབ་སྟེ། བྱེད་ལས་ལས་བཏགས་པའོ། །གཉིས་པ་ནི། དཀོན་མཆོག་གསུམ་ལ་ཕྱག་འཚལ་ལོ། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །སློབ་དཔོན་འཕགས་པ་ཀླུ་སྒྲུབ་ལ་ཕྱག་འཚལ་ལོ། །ཞེས་འབྱུང་བའི་པ་ར་མ་ནི་འདི་ལ་དོན་དམ་པའི་ཆོས་མངོན་པ་རྣམ་པར་གཞག་པ་ཞེས་འབྱུང་ཞིང་། ལྷག་པ་ཤེས་རབ་ཀྱི་བསླབ་པ་བརྗོད་བྱའི་གཙོ་བོར་སྟོན་པས་ན་ལོ་པཎ་བཀས་བཅད་ཀྱི་ཕྱག་ཡིན་ཅིང་སྔ་ཕྱི་གཉིས་ནི་འདོད་པའི་ལྷ་ལ་ཕྱག་འཚལ་བ་ཡིན་པས་གང་འདོད་ཡིན་ནོ། །གཉིས་པ་རྩོམ་བྱེད་དམ་པའི་གཞུང་གི་དོན་ལ་གསུམ་སྟེ། ལྟ་བ་སྟོན་པའི་སྒོ་ནས་མཆོད་པར་བརྗོད། བསྟན་བྱའི་ལྟ་བ་དེ་ཉིད་གཏན་ལ་དབབ། བཀའ་དྲིན་རྗེས་སུ་དྲན་པའི་སྒོ་ནས་ཕྱག་བྱ་བའོ། །དང་པོ་ལ་གཉིས་ཏེ། དངོས་སུ་བརྗོད་པ་མཆོད་བརྗོད་ཀྱི་དོན་དུ་བཤད་པ། ཤུགས་ལས་བསྟན་པ་དགོས་འབྲེལ་གྱི་དོན་དུ་བཤད་པའོ། །དང་པོ་ལ་གསུམ་སྟེ། དགོས་པའི་དོན། བསྡུས་པའི་དོན། ཚིག་གི་དོན་ནོ། །དང་པོ་ལ་གསུམ་སྟེ། སྤྱིར་ཡུལ་ཁྱད་པར་ཅན་ལ་མཆོད་བརྗོད་བྱས་པའི་དང་། བསྟན་བཅོས་རྩོམ་པའི་སླད་དུ་བྱས་པའི་དང་། གཞུང་ཡི་གེར་བཀོད་པའི་དགོས་པའོ། །དང་པོ་ནི། སྤྱིར་སྟོན་པ་ལ་མཆོད་བརྗོད་བྱས་པས་ཚོགས་གཉིས་རྫོགས་ནས་བྱང་ཆུབ་ཀྱི་རྒྱུ་ཡོངས་སུ་བཟུང་བའོ། །གཉིས་པ་ནི། ཕྱི་ནང་གི་བར་ཆད་ཞི་བས་རྩོམ་པ་མཐར་ཕྱིན་པའོ། །གསུམ་པ་ནི། སྐྱེ་བོ་དམ་པ་རྣམས་ཀྱི་མཛད་སྤྱོད་སྐྱོང་བར་འགྱུར་བའོ། །འདི་ལ་ཉིད་ཀྱིས་དམ་པའི་སྤྱོད་པ་མཛད་པས་རྩོམ་པ་པོ་བདག་ཉིད་དམ་པར་ཤེས་ནས་དེས་བརྩམས་པའི་བསྟན་བཅོས་ལ་གཞན་དག་འཇུག་པར་འགྱུར་བ་དང་། རྩོམ་པའི་སྔོན་དུ་རང་དད་པའི་ལྷ་ལ་མཆོད་པར་བརྗོད་པས་བསྟན་བཅོས་འདི་ཉིད་དགོས་པ་གྱ་ནོམ་པ་དང་ལྡན་པར་ཤེས་ནས་གཞན་དག་འཇུག་པར་འགྱུར་བ་དང་། བསྟན་བཅོས་ཉན་བཤད་བྱེད་པ་རྣམས་ཀྱིས་མཆོད་བརྗོད་ཉན་འཆད་བྱས་པས་དེ་མཐར་ཕྱིན་པར་འགྱུར་བ་དང་། གཞན་དག་ལ་ཡང་བྱ་བ་ཁྱད་པར་ཅན་གྱི་སྔོན་དུ་དཀོན་མཆོག་ལ་མཆོད་བརྗོད་བྱས་ནས་འཇུག་པ་བསླབ་པར་འགྱུར་བ་དང་། མཆོད་བརྗོད་ཉིད་མཐོང་བ་དང་། འདོན་པ་ལ་སོགས་པ་བྱས་པས་བསོད་ནམས་ཐོབ་པའི་སྒོ་ནས་གདུལ་བྱ་གཞན་རྗེས་སུ་འཛིན་པ་དང་གསུམ་ཡོད་དོ། །དེ་ལྟར་ཡང་སློབ་དཔོན་ཉིད་ཀྱིས། བསྟན་བཅོས་བྱེད་པས་སྟོན་པ་ལ། །མཆོད་པར་བརྗོད་པ་འབྲས་མེད་མིན། །བསྟན་བཅོས་དང་ནི་སྟོན་པ་ལ། །གུས་པ་བསྐྱེད་ཕྱིར་གཞན་དུ་མིན། །ཞེས་གསུངས་སོ། །གཉིས་པ་བསྡུས་དོན་ནི། གང་གིས་དང་། གང་ལ་དང་། ཅི་ལྟར་མཆོད་པར་བརྗོད་པ་དང་གསུམ་མོ། །གསུམ་པ་ཚིག་གི་དོན་ནི་ཕྱག་འཚལ་ཞེས་པ་བཤད་པའི་གཞིར་བླངས་ཏེ། དེ་ལ་གང་གིས་དང་། གང་ལ་དང་། ཅི་ལྟར་ཕྱག་འཚལ་བ་གསུམ་ལས། དང་པོ་ནི། རྩོམ་པ་པོ་སློབ་དཔོན་ཀླུ་སྒྲུབ་བདག་གིས་ཞེས་པ་དོན་གྱིས་ཐོབ་བོ། །གཉིས་པ་ལ་གསུམ་སྟེ། ངོ་བོ་དང་། མཆོག་ཏུ་གྱུར་པ་དང་། དེའི་རྒྱུ་མཚན་ནོ། །དང་པོ་ནི། སྐྱབས་འོས་དཀོན་མཆོག་གི་གཙོ་བོ་རྫོགས་པའི་སངས་རྒྱས་དེ་ལ་ཞེས་པ་སྟེ། སྤྱིར་སངས་རྒྱས་ཀྱི་སྒྲ་ཐེག་པ་གསུམ་གྱི་དགྲ་བཅོམ་གསུམ་ཀ་ལ་འཇུག་ཀྱང་། རྫོགས་པའི་ཞེས་སྨོས་པས་སྤངས་རྟོགས་མ་རྫོགས་པ་ཉན་རང་ལས་ཁྱད་པར་དུ་འཕགས་པ་བཅུ་གཅིག་ཀུན་ཏུ་འོད་ལ་གནས་པའོ། །གཉིས་པ་ནི། དེ་ཁྱད་པར་གྱི་ཆོས་གང་དང་ལྡན་སྙམ་པ་ལ་སྨྲ་རྣམས་ཀྱི་དམ་པ་ཞེས་པ་སྟེ། དེ་ལ་སྨྲ་བ་ནི་རང་གིས་རྟོགས་པའི་དོན་གཞན་ལ་སྟོན་པ་ཡིན་ལ། དེ་ཡང་སྨྲ་བ་པོ་འཇིག་རྟེན་པ་དང་། ཕྱི་རོལ་དང་། སངས་རྒྱས་པའི་སྟོན་པ་གཞན་ལས་ཀུན་སློང་ཐུགས་རྗེ་ཉིད་དང་། ངོ་བོ་སྙན་ཞིང་འཇམ་པ་ཉིད་དང་། བརྗོད་བྱ་བདེན་པ་ཉིད་དང་། འབྲས་བུ་ཕན་པ་ཉིད་དང་། གདུལ་བྱ་ལ་མཚམས་པ་ཉིད་དང་། དུས་སུ་འབྱུང་བ་ཉིད་དང་། དྲི་བོ་ཅོག་ལུང་སྟོན་པ་ཉིད་དེ། ཁྱད་པར་བདུན་གྱིས་ཁྱད་པར་དུ་འཕགས་པས་དམ་པར་གྱུར་པའོ། །དེ་ཉིད་ཀྱིས་ན་སྨྲ་བའི་སེང་གེ་དང་། སྨྲ་བའི་ཟླ་བ་དང་། སྨྲ་བའི་ཁྱུ་མཆོག་དང་། སྨྲ་བའི་རྒྱལ་པོ་ཞེས་ཀྱང་གསུངས་སོ། །གསུམ་པ་ནི་གང་བསྟན་པས་སྨྲ་བ་རྣམས་ཀྱི་དམ་པར་གྱུར་ཅེ་ན། གང་གིས་རྟེན་ཅིང་འབྲེལ་བར་འབྱུང་བ་བསྟན་པས་སྨྲ་བ་རྣམས་ཀྱི་དམ་པར་གྱུར་ཅེས་སྦྱར་ཏེ། འདི་ལ་བསྟན་བྱ་རྟེན་འབྲེལ་གྱི་རང་བཞིན་དང་། དེ་བསྟན་པས་སྨྲ་བ་རྣམས་ཀྱི་དམ་པར་འགྱུར་བའི་ཚུལ་དང་། དེ་བསྟན་པའི་དགོས་པ་དང་གསུམ་ལས། དང་པོ་ལ་ཡང་གསུམ་སྟེ། ཁྱད་པར་གྱི་གཞི། ཁྱད་པར་གྱི་ཆོས་གཞི་དང་། ཆོས་ཀྱི་གཅིག་དང་ཐ་དད་བསམ་པའོ། །དང་པོ་ནི། རྟེན་ཅིང་འབྲེལ་བར་འབྱུང་བའི་སྐད་དོད་ལ་ལེགས་སྦྱར་གྱི་སྐད་ལ། པྲ་ཏཱི་ཏྱ། ས་མུཏྤཱ་ད་ཞེས་པ་ཡོད་ལ། འདི་ལ་སྒྲ་བསྒྲུབ་པ་དང་། སྒྲ་བཤད་པ་དང་། ལུགས་གཞན་དགག་པ་དང་གསུམ་ལས། དང་པོ་ནི། ཨིཎ་འགྲོ་བ་ལའོ་ཞེས་པའི་བྱིངས་བཞག ཎ་ཡིག་ནི། པན་ལ་ཨིཎ་ཨིང་དག་གི་ག་མིའོ། །ཞེས་པའི་ཁྱད་པར་གྱི་དོན་ཡིན་པས་དབྱི། ཉེར་བསྒྱུར་པྲ་ཏི་སྔོན་དུ་བཞག ཨ་ལམ་ཁ་ལུ་དག་ལ་དགག་པ་ལ་ཀྟྭཱ་ཡང་ནའོ། །མིང་ལས་སོ། །བྱེད་པ་པོ་གཅིག་དག་གི་སྔ་མའི་དུས་ལའོ། །ཞེས་པས་ཀྟྭཱའི་རྐྱེན་བྱིན། ཀ་ཡིག་ནི་ཀ་ལ་ཡཎ་བཞིན་ཡང་སྟེ། ཞེས་པའི་དོན། བསྡུས་བ་ལ་འབྱུང་བ་ལ་ན་གཉིས་མིན་པའི་ཀྟྭཱའི་ཡབ་བོ། །ཞེས་པས་ཏྭ་ཡབ་ཏུ་བཏང་། བ་ཡིག་ནི་བྱིངས་ཀྱི་མཐའ་ས་རྗེས་སུ་འབྲེལ་བ་ལ་ཏའོ། །ཞེས་པའི་དོན་ཡིན་པས་དབྱི། དེ་ཉིད་ཀྱི་ཕྱིར་ཏ་ཨཱ་ག་མ། ཏིའི་ཨི་ཡིག་རིམ་པ་ལས་མ་འདས་པར་འཕྲལ། མཚུངས་པ་འདྲ་བའི་ཡི་གེ་ལ་རིང་པོར་འགྱུར་ཏེ་ཕ་རོལ་ལའང་དབྱིའོ། །ཞེས་པས་ཨི་སྔ་མ་རིང་པོ། ཕྱི་མ་དབྱི། རྟགས་ཀྱི་དོན་གྱི་ཚིག་ལ་རྣམ་དབྱེ་དང་པོའོ། །ཞེས་པས་རྣམ་དབྱེ་དང་པོའི་གཅིག་ཚིག་སི་བྱིན། གཞན་ལས་འཇིག་གོ །མི་ཟད་པ་ལས་ཀྱང་ངོ་། །ཞེས་པས་སི་འཇིག་སྟེ། ཀྟྭཱའི་རྐྱེན་ནི་མི་ཟད་པ་ཡིན་པའི་ཕྱིར་རོ། །གསལ་བྱེད་དབྱངས་མེད་པ་ཕ་རོལ་གྱི་ཡི་གེར་དྲངས་པས། པྲ་ཏཱི་ཏྱ་ཞེས་པའོ། །ཡང་། པ་ར་འགྲོ་བ་ལའོ་ཞེས་པའི་ཁམས་ལ་ཉེར་བསྒྱུར་ས་མ་དང་ཨུཏ་སྔོན་དུ་བཞག ཁམས་མཐའི་ཨ་ཡིག་བརྗོད་པའི་དོན་ཡིན་པས་དབྱི། པད། བཙ། བིཤ། པྲྀཤ། ཨུཙ་རྣམས་ལས་གྷཉའོ། །ཞེས་པས་གྷཉ་རྐྱེན་དུ་བྱིན། ཉ་ཡིག་ནི། གྲུབ་པ་ཉ་ཎ་རྗེས་སུ་འབྲེལ་པ་ལ་ཨི་ཙ་གཞན་དུའོ། །ཞེས་པའི་ཁྱད་པར་གྱི་དོན་ཡིན་པས་དབྱི། དེ་ཉིད་ཀྱི་ཕྱིར་ཨིན་ཨིཙ་ཨཊ་རྣམས་ཀྱི་ཨའི་ཨུ་པ་དྷཱ་རིང་པོ་ཏེ་ནཱ་མི་རྣམས་ཀྱིའང་འཕེལ་བའོ། །ཞེས་པས་པའི་ཨ་རིང་པོར་སོང་། གྷའི་ཨ་ཡིག་རིམ་པ་ལས་མ་འདས་པར་འཕྲལ། གྷ་ཡིག་ནི་ཙ་ཛ་དག་གི་དྷུ་ཊ་གྷ་རྗེས་སུ་འབྲེལ་བ་ལ་ཀ་གདག་གོ །ཞེས་པའི་ཁྱད་པར་གྱི་དོན་ཡིན་པས་དབྱི། རྟགས་ཀྱི་དོན་གྱི་ཚིག་ལ་རྣམ་དབྱེ་དང་པོའོ། །ཞེས་པས་སི་བྱིན། སིའི་ཨི་ཡིག་ནི་སི་ལ་ནུའོ། །ཞེས་པའི་ཁྱད་པར་གྱི་དོན་ཡིན་པས་དབྱི། རེ་ཕ་དང་ས་དག་གི་རྣམ་པར་བཅད་པའོ་ཞེས་པས། ས་རྣམ་བཅད། གསལ་བྱེད་དབྱངས་མེད་ཕ་རོལ་གྱི་ཡི་གེར་དྲངས་པས། ས་མུཏྤཱ་དཿཞེས་པའོ། །གཉིས་པ་ནི། པྲ་ཏཱི་ཏྱ་ས་མུཏྤཱ་དཿཞེས་པའི། པྲ་ཏི་ཕྲད་པའི་དོན་དང་། ཨི་ཏི་འགྲོ་བའི་དོན་ལ་འཇུག་པ་ལས། འདིར་ཉེར་བསྒྱུར་གྱི་བྱིངས་ཟིལ་གྱིས་མནན་ནས། པྲ་ཏཱི་ཏྱ། ཞེས་པས་ཕྲད་པ་ཉིད་ལ་འཇུག་སྟེ། སྐད་ཀྱི་བྱིངས་ནི་སྟོབས་ལྡན་ཡང་། །ཉེ་བར་བསྒྱུར་བས་ཟིལ་མནན་འགྱུར། །གངྒཱའི་ཆུ་ནི་མངར་མོད་ཀྱི། །རྒྱ་མཚོའི་ཆུ་ཡིས་ཇི་བཞིན་ནོ། །ཞེས་གསུངས་པ་ལྟར་རོ། །ཀྟྭཱའི་ལུས་འགྱུར་ཡ་ནི། ཅིང་ངམ། ཏེའམ། ནས་ཞེས་པའི་ཚིག་ཕྲད་ཀྱི་དོན་ནོ། །སཾ་ནི་ཡང་དག་པ་སོགས་དང་། ཨུ་ཏ་ནི་ཤིན་ཏུ་སོགས་དང་། པཱ་ད་འགྲོ་བ་སོགས་དོན་དུ་མ་ལ་འཇུག་ཀྱང་། ས་མུཏྤཱ་ད། ཞེས་པ། ས་མུཏ་གང་ན་ཡོད་པའི་པཱ་དའི་སྒྲ་ནི་འབྱུང་བ་ཉིད་ལ་འཇུག་སྟེ། དེ་ལྟར་ན་ཕྲད་ཅིང་འབྱུང་བའམ། ཕྲད་དེ་འབྱུང་བའམ། ཕྲད་ནས་འབྱུང་བ་ཞེས་བྱ་བའི་དོན་ཏོ། །གལ་ཏེ་བྱིངས་ལ་ཨིཎ་བཞག་པ་དང་། ཨི་ཏི་འགྲོ་བའི་དོན་ནོ་ཞེས་པ་ལ་འབྲེལ་མེད་དོ་སྙམ་ན། སྐྱོན་མེད་དེ། ཨི་ཏི་ཞེས་པ་ཨི་ཎ་འགྲོ་བ་ལའོ། །ཞེས་པའི་བྱིངས་ཀྱི་མིང་ཡིན་པའི་ཕྱིར། དཔེར་ན། ཛུ་ཧོ་ཏི། ཞེས་པ་ནི་ཧུ་སྦྱིན་པ་དང་། ལེན་པ་དག་ལའོ། །ཞེས་པའི་བྱིངས་ཀྱི་མིང་ཡིན་པ་དང་། ཨིརྟི་ཞེས་པ་རྀ་འགྲོ་བ་དང་། པརྟི་ཞེས་པ་བྲྀ་འགྲོ་བ་ལའོ། །ཞེས་པའི་བྱིངས་ཀྱི་མིང་ཡིན་པ་བཞིན་ནོ། །གསུམ་པ་ལ་གཉིས་ཏེ། འགྲེལ་མཛད་གཞན་གྱི་ལུགས་དགག་པ་དང་། ལེགས་ལྡན་བྱེད་ཀྱི་ལུགས་དགག་པའོ། །དང་པོ་ལ་གཉིས་ཏེ། འདོད་པ་བརྗོད་པ་དང་། དེ་སུན་འབྱིན་པའོ། །དང་པོ་ནི་ཁ་ཅིག ཨི་ཎ་འགྲོ་བའི་བྱིངས་ལ་པྲ་ཏི་སྔོན་དུ་བཞག ཎ་རྗེས་སུ་འབྲེལ། གཞན་ལས་ཀྱང་མཐོང་ངོ་། །ཀྭི་པའིའོ། །ཞེས་པས་ཀྭི་པའི་རྐྱེན་བྱིན། ཀ་ཡིག་ནི་ཀ་ལ་ཡ་ཎ་གཞན་ཡང་སྟེ་ཡ་ལ་བརྗོད་པ་བོར་བའོ། །ཞེས་པའི་དོན་པ་ཡིག་ནི། བྱིངས་ཀྱི་མཐའ་པ་རྗེས་སུ་འབྲེལ་པ་ལ་ཏའོ། །ཞེས་པའི་དོན་དེ་ཉིད་ཀྱི་ཕྱིར། ཏ་ཨཱ་ག་མ་བྱིན། བི་ཡིག་ནི་སྦྱར་བ་མིན་པའི་ཝིའི་དབྱིའོ། །ཞེས་པས་དབྱི། ཨུཏ་དང་གོ་སོགས་ལས་ཡ་ཏའོ། །ཞེས་པས་དེ་ཕན་གྱི་ཡཏ་རྐྱེན་དུ་བྱིན། ཏ་ཡིག་ནི་ཏའི་དེའི་དུས་ཀྱིའོ། །ཞེས་པའི་ཁྱད་པར་གྱི་དོན་ཡིན་པས་དབྱི། ཡང་ན། དེར་ལེགས་པ་ལའང་ཡའོ། །ཞེས་པས། དེ་ཕན་གྱི་ཡ་རྐྱེན་དུ་བྱིན། རྟགས་ཀྱི་དོན་གྱི་ཚིག་ལ་རྣམ་དབྱེ་དང་པོའོ། །ཞེས་པས་སི་བྱིན། སིའི་ཡིག་རྗེས་འབྲེལ། ས་རྣམ་བཅད་དུ་བཏང་། སྔར་བཞིན་མཚམས་སྦྱར་བས། པྲ་ཏཱི་ཏྱཿ ས་མུཏྤཱ་ད་སྔར་ལྟར་སྦྱིན། མིང་རྣམས་ཀྱི་སྦྱོར་བའི་དོན་ནི་བསྡུ་བའོ། །དེར་གནས་རྣམ་དབྱེ་རྣམས་དབྱི་བར་བྱའོ། །ཞེས་པས་ཚིག་སྡུད་བྱས་ནས་རྣམ་དབྱེ་ཕྱིས་པས། པྲ་ཏཱི་ཏྱ་ས་མུཏྤཱ་ད། ཞེས་པ་སྟེ་པྲ་ཏི་ནི་ཟློས་པ་སྟེ། སོ་སོ་སོ་སོ་དང་། ཨི་ཏི་ནི་འགྲོ་བ་དང་། ཆས་པ་དང་། འཇིག་པའི་དོན་དང་། ཡ་ནི་རུང་བའམ། འོས་པ་སྟེ་སོ་སོ་སོ་སོར་འགྲོ་ཞིང་འཇིག་པ་དང་ལྡན་པ་རྣམས་ཀྱི་འབྱུང་བ་ཞེས་བྱ་བའི་དོན་ཏོ། །ཞེས་འཆད་པར་བྱེད་དོ། །གཉིས་པ་ལ་གཉིས་ཏེ། སྒྲ་བཤད་ཚུལ་མི་འཐད་པ་དང་། སྒྲ་སྒྲུབ་ཚུལ་མི་འཐད་པའོ། །དང་པོ་ནི། པྲ་ཏཱི་ཏྱ། ས་མུཏྤཱ་ད་ཞེས་པའི་སྒྲའི་དོན་དེ་ལྟར་ཡིན་པ་མི་འཐད་དེ། དགེ་སློང་དག་ངས་ཁྱེད་ལ་རྟེན་ཅིང་འབྲེལ་པར་འབྱུང་བ་བསྟན་པར་བྱའོ། །སུས་རྟེན་ཅིང་འབྲེལ་བར་འབྱུང་བ་མཐོང་བ་དེས་ཆོས་མཐོང་ངོ་། །ཞེས་རྟེན་འབྲེལ་གྱི་སྒྲ་སྤྱིར་འཇུག་པའི་སྐབས་དེར། རྒྱུ་དེ་དང་དེ་ལ་བརྟེན་ནས་འབྲས་བུ་དེ་དང་དེ་འབྱུང་ཞེས་པའི་ཚུལ་གྱིས་རྟེན་འབྲེལ་གྱི་སྒྲ་ཟློས་པ་ལ་འཆད་པ་རིག་ནའང་། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ཞེས་བྱེ་བྲག་ཏུ་བཀར་ནས་འཆད་པའི་སྐབས་དེར། ཟློས་པའི་དོན་དུ་མི་འཐད་པའི་ཕྱིར་ཏེ། རྒྱུ་མིག་དང་། འབྲས་བུ་རྣམ་པར་ཤེས་པ་གཅིག་བྱེ་བྲག་ཏུ་བཀར་ནས་བསྟན་པའི་ཕྱིར་རོ། །གལ་ཏེ་སེམས་ཅན་མང་པོ་ཡོད་པ་བཞིན་དུ་དེའི་མིག་དང་མིག་གི་རྣམ་པར་ཤེས་པ་ཡང་མང་པོ་ཡོད་པས་སྐབས་དེར་ཡང་ཟློས་པའི་དོན་དུ་འཐད་དོ་ཞེ་ན། དེས་ཀྱང་སྐྱོན་སྤོང་མི་ནུས་ཏེ། མིག་གཅིག་ལ་བརྟེན་ནས་མིག་གི་རྣམ་པར་ཤེས་པ་གཅིག་སྐྱེ་བ་ཁས་ལེན་དགོས་ལ། དེའི་ཚེ་ཟློས་པའི་དོན་དུ་མི་རུང་བའི་ཕྱིར་རོ། །གཉིས་པ་ནི། ཙཀྵུ་པྲ་ཏཱི་ཏྱ་རཱུ་པན་ཞེས་པ་ལ། རྣམ་དབྱེ་བདུན་པའི་གཅིག་ཚིག་ངི་བྱིན། ངིའི་ཨི་ཡིག་རིམ་པ་ལས་མ་འདས་པར་འཕྲལ། ང་རྗེས་འབྲེལ། ར་ཥི་རའི་ཡི་གེ་རྣམས་ལས་མཐའ་མིན་པའི་ནའི་ཎ་སྟེ། ཞེས་པས་ན་ཎར་སོང་། གསལ་བྱེད་དབྱངས་མེད་ཕ་རོལ་གྱི་ཡི་གེར་དྲངས་པས་ཎི། དེའི་ཚིག་གྲོགས་མི་ཟད་པའི་ཙ་དང་། ཙཀྵུརྦི་ཛྙཱ་ན་ཞེས་པ་ལ། རྣམ་དབྱེ་དང་པོའི་གཅིག་ཚིག་སི་བྱིན། མ་ནིང་ལས་སི་ཨཾ་དག་གི་དབྱི་སྟེ་དེ་ལ་བརྗོད་པའང་མ་ཡིན་ནོ། །ཞེས་པས་སི་དབྱི། ཨ་ཡིག་ལས་སམ་བུ་དྷི་མིན་པ་ལ་མུའང་ངོ་། །ཞེས་པས་མུ་ཨཱ་ག་མ་བྱིན། ཨུ་ཡིག་ནི་ཨཱ་ག་མ་ཨུཏ་རྗེས་སུ་འབྲེལ་པ་དབྱངས་མཐའ་ལས་ཕ་རོལ་ཏུའོ། །ཞེས་པའི་དོན་ཡིན་པས་དབྱི། འཇིག་རྟེན་པའི་ཉེ་བར་སྤྱོད་པ་ལས་འཛིན་པ་གྲུབ་བོ། །ཞེས་པས་མ་རྗེས་སུ་ང་རོར་བཏང་། དེའི་ཚིག་གྲོགས་ཨུཏྤཱ་ད་ཞེས་པ་སྦྱར་བས། ཙཀྵུ་པྲ་ཏཱི་ཏྱ་རཱུ་པ་ཎི་ཙ་ཙཀྵུརྦི་ཛྙཱ་ནཾ་ཨུཏྤཱ་ད། ཞེས་པ་ནི། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ཞེས་པ་ཡིན་ལ། དེ་ལ་ཁྱེད་ལྟར་ན་ཏྱ་ཞེས་པའི་ཕ་རོལ་ན་སི་བྱིན་པའི་རྣམ་དབྱེ་མངོན་པར་ཐལ་ཏེ། དེ་མི་ཟད་པ་ལས་འཇིག་པ་ཡང་མ་ཡིན། ཚིག་སྡུད་བྱས་ནས་ཕྱིས་པ་ཡང་མིན་པའི་ཕྱིར་ཏེ། རྟགས་དང་པོ་ཁས་བླངས་ཏེ། ཏྱའི་ཡ་ཡིག་དེ་ཕན་གྱི་རྐྱེན་དུ་འདོད་པའི་ཕྱིར་རོ། །གཉིས་པ་གྲུབ་སྟེ། རཱུ་པ་ནི་ཞེས་པའི་ཚིག་གིས་བར་ཆོད་པའི་ཕྱིར་དང་། བདུན་པའི་རྣམ་དབྱེ་དང་། མ་ནིང་ལ་སི་མུ་བྱས་པའི་རྣམ་དབྱེ་མངོན་པའི་ཕྱིར་རོ། །དེས་ན་ཁྱེད་ལྟར་ན་པྲ་ཏཱི་ཏྱཾ་རཱུ་པ་ཎི་ཞེས་མ་ནིང་ལ་སི་མུ་བྱས་པའི་རྣམ་དབྱེའི་རྗེས་མངོན་པར་ཁས་ལེན་དགོས་སོ། །གཉིས་པ་ལ་འདོད་པ་བརྗོད་པ་དང་། དེ་དགག་པ་གཉིས་ལས། དང་པོ་ནི། སློབ་དཔོན་ལེགས་ལྡན་བྱེད་ན་རེ། ཁ་ཅིག་པྲ་ཏཱི་ཟློས་པའི་དོན་ནོ། །ཨི་ཏི་ཕྲད་པའི་དོན་ནོ། །ཞེས་ཟེར་རོ། །ཞེས་པའི་སངས་རྒྱས་བསྐྱངས་ཀྱི་འདོད་པ་བརྗོད་ནས། དེ་ནི་མི་འཐད་དེ། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ཞེས་པའི་སྐབས་དེར་ཕྲད་པའི་དོན་བཤད་དུ་མེད་པའི་ཕྱིར་རོ། །དེས་ན་འདི་ཡོད་ན་འདི་འབྱུང་། འདི་སྐྱེས་པའི་ཕྱིར་འདི་སྐྱེས་ཏེ། ཞེས་པའི་ཚུལ་གྱིས་རྐྱེན་འདི་ཙམ་དང་ལྡན་པ་ནི་རྟེན་ཅིང་འབྲེལ་བར་འབྱུང་བའོ། །ཞེས་འཆད་པར་བྱེད་དོ། །གཉིས་པ་ལ་གཉིས་ཏེ། གཞན་གྱི་ཕྱོགས་སྔ་བསུ་བ་ལ་མི་མཁས་པ་དང་། རང་ལུགས་བཞག་པ་ལ་མི་མཁས་པའོ། །དང་པོ་ནི། སློབ་དཔོན་སངས་རྒྱས་བསྐྱངས་ཀྱི་བཞེད་པ་དེ་ལྟར་མིན་ཏེ། པྲ་ཏི་ཕྲད་པའམ། བརྟེན་པའམ། ལྟོས་པའི་དོན་དང་། ཨི་ཏི་འགྲོ་བའི་དོན་དང་། དེ་གཉིས་སྡོམ་ནས་མི་ཟད་པའི་རྐྱེན་ལྱས་ཀྱི་མཐའ་ཅན་དུ་བྱས་པའི། པྲ་ཏཱི་ཏྱ་ཞེས་པ་ནི། ཕྲད་ནས་སམ། བརྟེན་ནས་སམ། ལྟོས་ནས་ཞེས་པའི་དོན་དུ་བཞེད་པའི་ཕྱིར། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ཞེས་པ་དེར་ཕྲད་པའི་དོན་མེད། ཞེས་པ་དེར་ལུང་དང་རིགས་པའི་སྒྲུབ་བྱེད་མ་བསྟན་པས་དམ་བཅའ་ཙམ་དུ་ཟད་དོ། །གལ་ཏེ་རྣམ་པར་ཤེས་པ་ནི་མིག་དང་ཕྲད་པ་ཡོད་པ་མ་ཡིན་ཏེ། གཟུགས་ཅན་མ་ཡིན་པའི་ཕྱིར། ཁྱབ་སྟེ། གཟུགས་ཅན་རྣམས་ཁོ་ན་ལ་ཕྲད་པ་མཐོང་བའི་ཕྱིར་རོ། །ཞེ་ན་དེ་ཡང་མི་འཐད་དེ། དགེ་སློང་འདིས་ནི་རྒྱུན་དུ་ཞུགས་པའི་འབྲས་བུ་ཐོབ་ཅེས་གཟུགས་ཅན་མིན་པ་ལའང་ཕྲད་པ་བཤད་པའི་ཕྱིར་རོ། །གཉིས་པ་ནི། ཁྱེད་རང་གི་ལུགས་བཞག་པ་དེ་ཡང་མི་འཐད་དེ། པྲ་ཏཱི་ཏྱ་དང་། ས་མུཏྤཱ་དའི་སྒྲའི་དོན་སོ་སོར་མ་བཤད་པའི་ཕྱིར་རོ། །གལ་ཏེ་པྲ་ཏཱི་ཏྱ་ས་མུཏྤཱ་ད་ཞེས་པ་ནི་བཤད་པ་རྒྱུ་མཚན་ཅན་གྱི་སྒྲ་མ་ཡིན་ཏེ། འཇུག་པ་རྒྱུ་མཚན་ཅན་གྱི་འདོད་པའི་རྒྱལ་བའི་སྒྲ་ཡིན་པའི་ཕྱིར། སློབ་དཔོན་གྱིས། འདི་ཡོད་པས་ནི་འདི་འབྱུང་དཔེར། །ཐུང་དུ་ཡོད་ན་རིང་པོ་བཞིན། །ཞེས་གསུངས་པའི་ཕྱིར་ཞེ་ན། ལུང་དེ་ལས་ངེད་ཀྱི་ལུགས་གྲུབ་པ་ཡིན་ཏེ། ཐུང་དུ་དང་ཕྲད་ཐུང་ངུ་ལ་བརྟེན། ཐུང་དུ་ལ་ལྟོས་ནས་རིང་པོར་འབྱུང་བར་བསྟན་པའི་ཕྱིར། བཤད་པ་རྒྱུ་མཚན་ཅན་གྱི་སྒྲ་མིན། ཞེས་པའང་མི་འཐད་དེ། སློབ་དཔོན་གྱིས། དེ་དང་དེ་བརྟེན་གང་འབྱུང་བ། །རང་གི་ངོ་བོ་དེ་མ་སྐྱེས། །ཞེས་བཤད་པ་རྒྱུ་མཚན་ཅན་དུ་གསལ་བར་གསུངས་པའི་ཕྱིར་རོ། །གཉིས་པ་ཁྱད་པར་གྱི་ཆོས་ལ་གསུམ་སྟེ། ཁྱད་ཆོས་བརྒྱད་པོ་སོ་སོའི་ངོ་བོ་ངོས་བཟུང་། བརྒྱད་དུ་གྲངས་ངེས་པའི་ཚུལ། གོ་རིམ་མི་འཐད་པ་སྤང་བའོ། །དང་པོ་ནི། ཤུགས་ལ་ཀུན་རྫོབ་ཏུ་འགག་པ་སོགས་སྒྲུབ་པ་བརྒྱད་པོ་ཁྱད་པར་གྱི་ཆོས་སུ་བསྟན་མོད། འདིར་དངོས་སུ་བསྟན་པ་ནི་འགག་པ་མེད་པ་ལ་སོགས་པ་བཀག་ཆོས་ཀྱི་ཁྱད་པར་བརྒྱད་དོ། །དེ་ལ་བཀག་ཆོས་ཐམས་ཅད་དགག་བྱ་ངོས་བཟུང་བ་ལ་རགས་ལས་པས་འདི་འགག་པ་ནི་བྱེད་པ་དང་ལས་སུ་བསྒྲུབ་པ་མ་ཡིན་གྱི་འགག་པས་ན་འགག་པ་སྟེ། རྫས་སྐད་ཅིག་མར་འཇིག་པའི་བྱ་བའོ། །སྐྱེ་བས་ན་སྐྱེ་བ་ཏེ་སྔར་མེད་གསར་དུ་སྐྱེ་བའོ། །ཆད་པས་ན་ཆད་པ་སྟེ། དངོས་པོའི་རྒྱུན་ཆད་པའོ། །རྟག་པ་ནི་རྒྱུན་མི་འཇིག་པར་གནས་པའོ། །འོང་བ་ནི་ཡུལ་ཐག་རིང་བ་ན་གནས་པ་རྣམས་ཉེ་བར་འོང་བའོ། །འགྲོ་བ་ནི་ཡུལ་ཐག་ཉེ་བ་ན་གནས་པ་རྣམས་རིང་བར་འགྲོ་བའོ། །ཐ་དད་པའི་དོན་ནི་དོན་ངོ་བོའམ་དངོས་པོ་ཐ་དད་པའོ། །དོན་གཅིག་པ་ནི་དོན་ངོ་བོའམ། དངོས་པོ་ཐ་མི་དད་ཅིང་གཅིག་པའོ། །འདི་དག་དོན་དམ་པར་མེད་པ་ཡིན་ནམ། འོན་ཏེ་ཀུན་རྫོབ་ཏུ་ཡང་མེད་པ་ཡིན་ཞེ་ན། འགྲེལ་བྱེད་ཁ་ཅིག རྟག་ཆད་གཉིས་ནི་ཐ་སྙད་དུ་ཡང་མེད་ལ། གཞན་རྣམས་ནི་དོན་དམ་པར་མེད་པ་ཡིན་ཅེས་འཆད་ཀྱང་ཟླ་བའི་བཞེད་པ་ནི་སྐྱེ་འགག་སོགས་བརྒྱད་ཆར་འཇིག་རྟེན་ལྷན་སྐྱེས་ཀྱི་བློ་ལ་སྣང་བ་ནི་ཐ་སྙད་བདེན་པ་ཡིན་ལ། དེ་ཉིད་ལ་རིག་པས་དཔྱད་པའི་ཚེ་མ་རྙེད་པ་ནི་འདིར་དངོས་སུ་བསྟན་པའི་ཁྱད་ཆོས་ཡིན་ཞིང་། དེའི་འོག་ཏུ་སྐྱེ་འགག་སོགས་སུ་སྣང་བ་ནི་སྒྱུ་མ་ལ་སོགས་པ་དང་མཚུངས་པ་མེད་བཞིན་དུ་འཁྲུལ་ངོར་སྣང་བར་བཞེད་དོ། །གལ་ཏེ་དགག་བྱ་བདེན་པའི་སྐྱེ་འགག་སོགས་མ་གྲུབ་མོད། དེ་དག་བཀག་པའི་དགག་ཆོས་ཙམ་ཞིག་ཡོད་དམ་མེད། ཡོད་ན་དོན་དམ་པར་བཀག་པའི་སྤྲོས་པ་གྲུབ་པར་འགྱུར་ལ། མེད་ན་རྟེན་འབྲེལ་ལ་བདེན་པའི་སྐྱེ་འགག་སོགས་གྲུབ་པར་འགྱུར་རོ་ཞེ་ན། འདི་ལ་བློའི་རིམ་པ་གཉིས་ལས། སྐྱེ་འགག་སོགས་དགག་བྱའི་གཙོ་བོར་བྱེད་པའི་ཚེ་བཀག་པ་ཙམ་ཞིག་གྲུབ་པ་ལ་འགལ་བ་མེད་དེ། སྐྱེ་སོགས་དགག་བྱར་བྱས་ནས་སྐྱེ་མེད་སོགས་ལ་ངེས་ཤེས་དྲངས་པའི་སྐབས་ཡིན་པའི་ཕྱིར་རོ། །འོ་ན་བཀག་པ་དེ་ཉིད་གནས་ལུགས་སུ་གྲུབ་བམ་སྙམ་པ་ལ། འདིར་ནི་ཡོད་ཉིད་འགོག་ཡིན་གྱི། །མེད་ཉིད་བསྒྲུབ་པ་མ་ཡིན་ནོ། །ཞེས་དང་། དགག་བྱ་ཡོད་པ་མ་ཡིན་པས། །ཡང་དག་ཏུ་ནི་བཀག་མེད་གསལ། །ཞེས་པའི་ཚུལ་གྱིས་དེ་ཉིད་ལ་དཔྱད་པའི་ཚེ་བཀག་པ་ཉིད་ཀྱང་མ་གྲུབ་སྟེ། དེ་དགག་བྱར་བྱེད་པའི་ཕྱིར་དང་། དཔྱད་པའི་ཚེ་མི་རྙེད་པའི་ཕྱིར་རོ། །གཉིས་པ་ནི། འདིར་བཀག་ཆོས་ཀྱི་ཁྱད་པར་བརྒྱད་ཁོ་ན་སྨོས་པ་ནི། འགྲེལ་པར་མཚོན་པའམ་སྲིད་པ་ཙམ་བགྲངས་པ་མ་ཡིན་གྱི་འདི་དག་ཁོ་ན་གཙོ་བོར་རྩོད་པའི་གནས་སུ་འགྱུར་བའི་ཕྱིར་རོ། །ཞེས་བཤད་པ་ལ། ཁ་ཅིག དེའི་དགོངས་པ་དགག་བྱ་བརྒྱད་པོ་འདི་དག་རྣམ་པ་གསལ་བས་ན་འདི་དག་ལ་མངོན་ཞེན་ཆེ་བའི་ཕྱིར་རྩོད་པའི་གཞིར་གྱུར་ཞེས་འཆད། ཁ་ཅིག་རང་གི་སྡེ་པ་ལ་གྲགས་པའི་སྐྱེ་འགག་གཉིས། གཞན་གྱི་སྡེ་པ་ལ་གྲགས་པའི་རྟག་ཆད་གཉིས། འཇིག་རྟེན་ལ་གྲགས་པའི་ཕྱི་མ་བཞི་གཙོ་ཆེ་བས་དགག་བྱ་བརྒྱད་སྨོས་པ་ཡིན་ནོ། །ཞེས་འཆད་དོ། །གསུམ་པ་ནི། ཆོས་གཅིག་གི་སྐྱེ་གནས་འགག་པ་རིམ་པ་བཞིན་འབྱུང་བས་སྐྱེ་བ་སྔོན་དུ་སྨོས་པར་རིག་གོ་ཞེ་ན། འགག་པ་ལ་སྐྱེ་བ་སྔོན་དུ་འགྲོ་དགོས་མོད་ཀྱི་འབྲས་བུ་སྐྱེ་བ་ལ་ཡང་རྒྱུ་འགག་པ་སྔོན་དུ་འགྲོ་དགོས་པས། སྐྱེ་འགག་ལ་སྔ་ཕྱིའི་གོ་རིམ་ངེས་པ་མེད་པར་བསྟན་པའི་དོན་ཡིན་ཏེ། གལ་ཏེ་སྐྱེ་བ་སྔ་གྱུར་ལ། །རྒ་ཤི་ཕྱི་བ་ཡིན་ཡིན་ན། །སྐྱེ་བ་རྒ་ཤི་མེད་པ་དང་། །མ་ཤི་བར་ཡང་སྐྱེ་བར་འགྱུར། །ཞེས་གསུངས་པ་ལྟར་རོ། །གསུམ་པ་གཞི་དང་ཆོས་ཀྱི་གཅིག་དང་ཐ་དད་བསམ་པ་ནི་སྔ་རབས་པ་དག རྣམ་གྲངས་པ་མ་ཡིན་པའི་དོན་དམ་བདེན་པ་དང་། ཆོས་ཅན་རྟེན་འབྲེལ་ནི་ངོ་བོ་དེ་ཉིད་དང་གཞན་ཉིད་དུ་བརྗོད་དུ་མེད་ལ། རིག་ངོར་སྐྱེ་སོགས་བཀག་པའི་རྣམ་གྲངས་ཀྱི་དོན་དམ་པ་དང་། ངོ་བོ་གཅིག་ལ་ལྡོག་པ་ཐ་དད་ཡིན་ཞེས་གསུངས་ཀྱང་ས་བོན་ལས་མྱུ་གུ་སྐྱེ་བ་ལ་མཐའ་བཞིར་རིག་པས་དཔྱད་པའི་ཚེ་ཆོས་ཅན་རྟེན་འབྲེལ་ཉིད་ཀྱང་མི་རྙེད་པས། འདི་ལ་ཡང་དེ་ཉིད་དང་གཞན་ཉིད་དུ་བརྗོད་དུ་མེད་པ་ཡང་ལེགས་སོ། །གཉིས་པ་དེ་བསྟན་པས་སྨྲ་བ་རྣམས་ཀྱི་དམ་པར་འགྱུར་བའི་ཚུལ་ནི། རྟེན་འབྲེལ་སྤྲོས་པའི་མཐའ་བརྒྱད་དང་བྲལ་བ་དེ་ཉིད་ཤེས་བྱ་ལ་ཁྱབ་པའི་ལུས་ཡིན་པས་བདེན་པར་སྨྲ་བ་དང་། དེ་བསྟན་པས་རྟག་ཆད་ལ་སོགས་པའི་ལྟ་བ་ངན་པ་སེལ་བས་གདུལ་བྱ་ལོག་རྟོག་ཅན་ཚར་གཅོད་པ་དང་། ཉེས་པ་ཐམས་ཅད་ཀྱི་རྩ་བ་གཏི་མུག་གི་གཉེན་པོ་ཡིན་པས་གདུལ་བྱ་མ་རྟོགས་པ་རྗེས་སུ་འཛིན་པར་བྱེད་པ་ཡིན་ལ། དེའི་རྣམ་པ་མ་ལུས་པ་སོ་སོ་རང་གིས་རིག་པའི་ཡེ་ཤེས་ཀྱིས་རིག་ནས་གསུངས་པ་དེ་བཞིན་གཤེགས་པ་ཉག་གཅིག་ཡིན་པའི་ཕྱིར། ཞེས་སྔ་རབས་པ་དག་འཆད་པ་ནི་ཤིན་ཏུ་ལེགས་སོ། །གསུམ་པ་དེ་བསྟན་པའི་དགོས་པ་ནི། དེ་བསྟན་པ་ལ་བརྟེན་ནས་གདུལ་བྱ་རྣམས་ཀྱིས་ཐོས་བསམ་སྒོམ་གསུམ་གྱི་ཤེས་རབ་ཀྱིས་ཉམས་སུ་བླངས་པས་མཉམ་བཞག་སྣང་བ་མེད་པའི་ཤེས་རབ་ཀྱིས་རྟེན་འབྲེལ་སྤྲོས་པའི་མཐའ་བརྒྱད་དང་བྲལ་བ་མཐོང་བ་མེད་པའི་ཚུལ་གྱིས་མཐོང་བ་དང་། རྗེས་ཐོབ་སྣང་བཅས་ཀྱི་ཡེ་ཤེས་ཀྱིས་སྒྱུ་མ་ལྟ་བུའི་ཆོས་ཅན་རྟེན་ཅིང་འབྲེལ་བར་འབྱུང་བ་ཅི་ལྟར་གནས་པ་བཞིན་མངོན་སུམ་དུ་གཟིགས་པས། རྒྱུ་ཤེས་པ་ཤེས་བྱ་དང་། བརྗོད་བྱ་རྗོད་བྱེད་ལ་སོགས་པའི་གཉིས་འཛིན་ཉེ་བར་ཞི་བའི་ས་བཅུའི་ཡེ་ཤེས་ཐོབ་པ་ནི་གནས་སྐབས་ཀྱི་དགོས་པ་ཡིན་ལ། བློ་དེའི་ངོ་ན་རྟེན་འབྲེལ་སྤྲོས་པ་ཉེར་ཞིའི་རང་བཞིན་དུ་འདུག་པས་རྟེན་འབྲེལ་དེ་ཉིད་ལ་ཡང་སྤྲོས་པ་ཉེར་ཞི་ཞེས་བྱའོ། །དེ་ལྟར་གོམས་པས། སངས་རྒྱས་ཀྱི་སར་སེམས་དང་སེམས་ལས་བྱུང་བའི་འཁྲུལ་པ་མ་ལུས་པ་ལོག་པའི་སྒོ་ནས་སྐྱེ་རྒ་ན་འཆི་ལ་སོགས་པ་འབྲས་བུ་མ་ལུས་པ་ཉེ་བར་ཞི་བའི་ཆོས་སྐུ་ཐོབ་པ་ནི་མཐར་ཐུག་གི་དགོས་པའོ། །བློ་དེའི་ངོ་ན་རྟེན་འབྲེལ་དེ་ཉིད་དགག་བྱ་དེ་དག་ཞི་བའི་རང་བཞིན་དུ་གནས་པས་རྟེན་འབྲེལ་དེ་ཉིད་ལ་ཡང་ཞི་བ་ཞེས་བྱའོ། །གསུམ་པ་དེ་ལ་ཇི་ལྟར་ཕྱག་འཚལ་བའི་ཚུལ་ནི། ཕྱག་འཚལ་ལོ་ཞེས་པ་སྟེ་སྒོ་གསུམ་འདུད་པའོ། །གཉིས་པ་ཤུགས་ལས་བསྟན་པ་དགོས་འབྲེལ་གྱི་ངག་བཤད་པ་ལ་དགོས་འབྲེལ་བཞི་ངོས་བཟུང་བ། དེ་ངག་འདིས་ཅི་ལྟར་བསྟན་པའི་ཚུལ། བཞི་ཉིད་དུ་གྲངས་ངེས་པའི་རྒྱུ་མཚན་དང་གསུམ་ལས། དང་པོ་ནི། སྤྱིར་བསྟན་བཅོས་ཀྱི་བརྗོད་བྱ་དང་། དགོས་པ་དང་། དགོས་པའི་དགོས་པ་དང་། འབྲེལ་པ་དང་བཞི་ནི། གཞུང་དེས་གཙོ་བོར་གཏན་ལ་དབབ་བྱ་དང་། གཞུང་དེ་ལ་བརྟེན་ནས་དེ་རྟོག་པ་དང་། དེ་ལས་མཐར་དམིགས་ཡུལ་གྱི་འབྲས་བུ་ཐོབ་པ་དང་། དེ་བསྟན་བཅོས་ལ་རག་ལས་པ་དང་བཞི་ཡིན་ལ། བྱེ་བྲག་ཏུ་བསྟན་བཅོས་འདིའི་དེ་བཞི་ནི་རྟེན་འབྲེལ་སྤྲོས་པའི་མཐའ་བརྒྱད་དང་བྲལ་བ་དང་། གཞུང་འདི་ཙམ་གྱིས་དེ་རྟོགས་པ་དང་། དེ་བསྒོམ་པ་ལས་གནས་སྐབས་ས་བཅུ་དང་། མཐར་ཐུག་སངས་རྒྱས་ཐོབ་པ་དང་། དེ་རིམ་གྱིས་བསྟན་བཅོས་ལ་རག་ལས་པ་རྣམས་ཡིན་ནོ། །གཉིས་པ་ནི། དོན་གཅིག་མིན་ཞེས་པ་ཡན་ཆད་ཀྱིས་བརྗོད་བྱ་དང་། བསྟན་ཞེས་པ་བསྟན་པའི་འབྲས་བུ་རྟོགས་པ་འཕེན་པས་དགོས་པ་དང་། སྤྲོས་པ་ཉེར་ཞི་ཞི་ཞེས་པས་དགོས་པའི་དགོས་པ་དང་། འབྲེལ་པ་ཤུགས་ལ་བསྟན་ཏེ། བཞི་ཀ་ཡང་སྟོན་པ་ལ་བསྟོད་པའི་ངག་གིས་ཤུགས་ལ་བསྟན་པ་ཡིན་ནོ། །གསུམ་པ་ནི། ཅིའི་ཕྱིར་བཞིར་གྲངས་ངེས་ཤེ་ན། བསྟན་བཅོས་ལ་འཇུག་པའི་གེགས་ལོག་རྟོག་ལ་བརྗོད་བྱ་མེད་དམ་སྙམ་པ་དང་། ཡོད་ཀྱང་འདོད་བྱ་མིན་ནམ་སྙམ་པ་དང་། འདོད་བྱ་ཡིན་ཀྱང་འདིས་སྒྲུབ་མི་ནུས་སམ་སྙམ་པ་དང་། སྒྲུབ་ནུས་ཀྱང་འདི་ཉིད་དང་འབྲེལ་པ་མེད་དམ་སྙམ་པའི་ལོག་རྟོག་བཞི་ཡོད་པས་དེ་སེལ་བ་ལ་རྣམ་པ་བཞིར་གྲངས་ངེས་སོ། །གཉིས་པ་བསྟན་བྱའི་ལྟ་བ་དེ་ཉིད་གཏན་ལ་དབབ་པ་ལ་གསུམ་སྟེ། རྟེན་འབྲེལ་ཀྱི་ཁྱད་ཆོས་བཤད་པ། ཁྱད་གཞི་རྟེན་འབྲེལ་བཤད་པ། རྟེན་འབྲེལ་ཁྱད་པར་ཅན་རྟོགས་པའི་ཕན་ཡོན་བཤད་པའོ། །དང་པོ་ལ་གསུམ་སྟེ། ཁྱད་ཆོས་གཙོ་བོ་བཤད་པ། ཁྱད་ཆོས་གཞན་བཤད་པ། དེ་ལ་ཧ་ཅང་ཐལ་བ་སྤང་བའོ། །དང་པོ་ལ་གཉིས་ཏེ། སྐྱེ་བ་དགག་པ། འགྲོ་འོང་དགག་པའོ། །དང་པོ་ལ་གསུམ་སྟེ། རབ་བྱེད་ཀྱི་འབྲེལ། རབ་བྱེད་ཀྱི་གཞུང་། རབ་བྱེད་ཀྱི་མཚན་བསྟན་པའོ། །དང་པོ་ལ་ཟབ་མོ་མདོའི་འབྲེལ་ནི། བཅོམ་ལྡན་འདས་ཉིད་ཀྱི་སློབ་དཔོན་ཀླུ་སྒྲུབ་ཐེག་པ་ཆེན་པོའི་ཚུལ་གསལ་བར་བྱེད་པར་ལུང་བསྟན་པས། འདིའི་རབ་ཏུ་བྱེད་པ་ཐམས་ཅད་ཀྱིས་ཀྱང་ཡུམ་རྒྱས་འབྲིང་བསྡུས་གསུམ་གྱི་སྙིང་པོའི་དོན། ཆོས་ཐམས་ཅད་རང་བཞིན་གྱིས་སྟོང་པ་ཉིད་རིག་པའི་སྒོ་ནས་གཏན་ལ་འབེབས་པར་བྱེད་པ་ཡིན་ལ། བསྟན་བཅོས་ཀྱི་འབྲེལ་ནི་མ་སྐྱེས་པ་ལ་ཁྱད་པར་གྱི་ཆོས་འགག་པ་ལ་སོགས་པ་མི་འཐད་པས། འགག་པ་དང་། ཆད་པ་དང་། རྟག་པ་ཤུགས་ལ་དགག་པར་བྱ་བའི་ཕྱིར་སྐྱེ་བ་འགོག་པ་ཐོག་མར་གསུངས་པ་ཡིན་ནོ། །དེ་ལྟར་རབ་ཏུ་བྱེད་པ་འདིས་རིག་ངོར་སྤྲོས་པའི་མཐའ་བཞི་ཁེགས་པས་ཆོས་ཉིད་དོན་དམ་ནམ་མཁའ་ལྟར་རྟོགས་པ་སྣང་མེད་ཀྱི་ཤེས་རབ་དང་། སྐྱེ་འགག་ལ་སོགས་པར་སྣང་བའི་ཆོས་ཐམས་ཅད་དཔྱད་ན་མི་འཐད་བཞིན་དུ་སྣང་བ་ཀུན་རྫོབ་ཏུ་གྲུབ་པས་ཆོས་ཅན་ཀུན་རྫོབ་སྒྱུ་མ་ལྟར་རྟོགས་པ་སྣང་བཅས་ཀྱི་ཤེས་རབ་བསྐྱེད་པར་བྱེད་པ་ཡིན་ནོ། །ཡང་ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། །ཞེས་པའི་རིམ་པ་ལྟར་ན་ཐོག་མར་སྐྱེ་བ་ཐ་སྙད་བདེན་པ་ཁས་བླངས་ནས་དེ་ཉིད་ལ་རིག་པས་དཔྱད་པའི་ཚེ་སྐྱེ་བ་ཉིད་ཀྱང་མ་རྙེད་པའི་དོན་དམ་བདེན་པ་རྟོགས་པའི་བློ་སྐྱེ་བ་སྟེ། ཚུལ་འདི་དག་ནི་རབ་བྱེད་འོག་མ་ཐམས་ཅད་ལ་ཡང་སྦྱར་བར་བྱའོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་སྒྲུབ་པ་ལ་གཉིས་ཏེ། མཐའ་བཞིའི་སྐྱེ་བ་སྤྱིར་དགག གཞན་ལས་སྐྱེ་བ་བྱེ་བྲག་ཏུ་དགག་པའོ། །དང་པོ་ལ་གསུམ་སྟེ། དམ་བཅའ་བ་སྤྱིར་བསྟན། དེ་རིགས་པས་བསྒྲུབ། བཀག་པ་ལ་སྐྱོན་སྤང་བའོ། །དང་པོ་ནི། བདག་ལས་མ་ཡིན་ཅེས་སོགས་ཚིགས་བཅད་གཅིག་སྟེ། འདི་ལ་དམ་བཅའ་བ་བཞི་པོའི་ཚིག་བཤད་པ། སྐྱེ་བ་འགོག་པའི་དམ་བཅའ་བཞིར་གྲངས་ངེས་པར་བསམ་པ། དབུ་མ་པ་ལ་དམ་བཅའ་མེད་པ་དང་འགལ་བ་སྤང་བ་གསུམ་ལས། དང་པོ་ནི། གཞན་དག་ཕྱེད་ཕྱི་མས་བསྒྲུབ་བྱ་དང་། སྔ་མས་གཏན་ཚིགས་བསྟན་པས་བསྒྲུབ་བྱ་སྒྲུབ་བྱེད་དུ་འཆད་པ་ལྟར་ནི་མ་ཡིན་ཏེ། མཐའ་བཞིའི་སྐྱེ་བ་མེད་པར་གྲུབ་པའི་ཚེ་སྤྱིར་སྐྱེ་བ་ཙམ་ཡང་མེད་པར་གྲུབ་པས་བསྒྲུབ་བྱ་སྒྲུབ་བྱེད་དུ་སྦྱར་པ་དོན་མེད་པའི་ཕྱིར་དང་། ཕྱེད་སྔ་མ་ལ་རྟགས་སུ་སྟོན་པའི་བྱེད་ཚིག་མེད་པས་ཡི་གེའི་དོན་མ་ཡིན་པའི་ཕྱིར་རོ། །དེས་ན་འདིར་ཕྱི་ནང་གི་དངོས་པོ་གང་དག ཡུལ་དང་གྲུབ་མཐའ་གང་ན་ཡང་བདག་ལས་སྐྱེ་བ་ནམ་ཡང་ཡོད་པ་མ་ཡིན་ཞེས་སོགས་ཀྱིས་དམ་བཅའ་བཞི་སྟོན་ཏེ། གང་དག་ནི་བརྟེན་པ་ཕྱི་ནང་གི་དངོས་པོ་བརྗོད་པའི་ཚིག་སྟེ། སུ་དག་ཅེས་པའི་རྣམ་གྲངས་སོ། །གང་ན་ཡང་ནི་རྟེན་གྱི་ཚིག་སྟེ། ཡུལ་ལ་མ་གྲུབ་པའི་མཐའ་འགའ་ཞིག་ན་ཞེས་པའི་དོན་ཏོ། །ནམ་ཡང་ནི་དུས་ཀྱི་ཚིག་སྟེ། གཞར་ཡང་ཞེས་པའི་དོན་ཏོ། །འོ་ན་དགག་ཚིག་སྔ་མ་བཞི་ལས་ལོགས་སུ་ཐ་མའི་དགག་ཚིག་ཅིའི་ཕྱིར་སྟོན་སྙམ་ན། འདི་ལ་རྨ་བྱས་མཐར་གནས་ཀྱི་མ་ཡིན་མི་མངོན་པར་བྱས་ལ་གཞུང་འགའ་ཞིག་ལས། དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་པ་ལྟ། །བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །ཞེས་འདོན་པ་ལྟར་འདོན་པ་བསྒྱུར་བར་བྱ་ཞེས་གསུངས་ཀྱང་། གཞུང་དེ་ལྟར་འདོན་པ་འགའ་ཡང་མི་སྣང་བས། ཕྱེད་ཕྱི་མས་ཕྱེད་སྔ་མ་ལ་མ་ལྟོས་པའི་ཚེ། སྐྱེ་བ་ཙམ་བཀག་པའི་དམ་བཅའ་སྟོན་པའི་ཆེད་དུ་གཞུང་དེ་ལྟར་བཀོད་པ་ཡིན་པར་མངོན་ནོ། །གཉིས་པ་ནི། གྲངས་ཅན་དང་། རང་སྡེ་དངོས་པོར་སྨྲ་བ་དང་། གཅེར་བུ་པ་དང་། རྒྱང་འཕེན་པ་ལ་མཐའ་བཞིའི་སྐྱེ་བ་གྲགས་ཤིང་སྐྱེ་བ་ལ་དངོས་སུ་གྲགས་པའི་ལོག་རྟོག་ལྔ་པ་མེད་པས་དངོས་སུ་གྲགས་པའི་ལོག་རྟོག་འགོག་པ་ལ་བཞི་འཚམས་པས་སམ། གྲུབ་མཐའ་ལ་མ་ཞུགས་པ་ལ་སྐྱེ་བའི་དོགས་པའི་མཐའ་བཞི་ཁོ་ན་མཚམས་པས་དེ་དགག་པའི་དམ་བཅའ་ཡང་བཞིར་མཛད་པ་ཡིན་ཏེ། སྐྱེ་བ་ཙམ་ལ་རྒྱུ་ལ་ལྟོས་མི་ལྟོས་གཉིས། ལྟོས་པ་ལ་རྒྱུ་ཙམ་ལ་འབྲས་བུ་དང་། རྫས་ཐ་དད་དང་། རྫས་གཅིག་པ་གཉིས་སུ་ངེས་པས་འབྲས་བུ་དང་རྫས་གཅིག་པ་ཁོ་ནའི་དང་། ཐ་དད་པ་ཁོ་ནའི་དང་། དེ་གཉིས་ཀ་ལས་སྐྱེ་བའི་དོགས་པ་གསུམ་སྲིད་ཅིང་། དོགས་པ་གཞན་མི་སྲིད་པའི་ཕྱིར་རོ། །གསུམ་པ་ནི་དེ་ལྟར་དམ་བཅའ་བཞི་སྟོན་ན་རྩོད་བཟློག་ལས་དབུ་མ་པ་ལ་དམ་བཅའ་མེད་པར་གསུངས་པ་དང་འགལ་ལོ་སྙམ་ན། འདིའི་ལན་ལ། པ་ལོས། དམ་བཅའ་མེད་པར་གསུངས་པ་ནི་ཡོངས་གཅོད་སྒྲུབ་པའི་དམ་བཅའ་མེད་པ་ཡིན་གྱི། རྣམ་བཅད་དགག་པའི་དམ་བཅའ་ཙམ་ཡང་མེད་པ་མ་ཡིན་པས། མི་འགལ་ལོ་ཞེས་དང་། བྱང་ཡེས་རྣམ་བཅད་དགག་པའི་དམ་བཅའ་ཡང་ཕ་རོལ་གྱི་ལོག་རྟོག་དགག་པར་འདོད་ནས་དེའི་ངོར་བྱས་པ་ཡིན་གྱི་དབུ་མ་པ་རང་ལ་དགག་པའི་དམ་བཅའ་ཙམ་ཡང་མེད་དོ་ཞེས་པ་དང་། བྱང་བརྩོན་གྱིས། དོན་དམ་པར་དགག་སྒྲུབ་ཀྱི་དམ་བཅའ་གང་ཡང་མེད་ལ། ཀུན་རྫོབ་ཙམ་དུ་འདིར་སྐབས་སུ་བབ་པ་རྣམ་བཅད་དགག་པའི་དམ་བཅའ་ཙམ་དང་། སྤྱིར་ཡོངས་གཅོད་སྒྲུབ་པའི་དམ་བཅའ་ཡང་ཡོད་པ་མི་འགལ་ལོ་ཞེས་པའི་སྨྲ་བ་གསུམ་སྣང་བ་ལས། དང་པོ་ལ་ནི། མ་རིག་ནས་བརྩམས་རྒ་ཤི་ཡི། །མཐར་ཐུག་ཡན་ལག་བཅུ་གཉིས་ཀྱི། །རྟེན་ནས་འབྱུང་བའི་སྐྱེ་བ་ཡང་། །ཁོ་བོས་རྨི་ལམ་སྒྱུ་འདྲར་འདོད། །ཅེས་སོགས་གཞི་དང་། གང་ཞིག་བདག་དང་གཞན་རྣམས་ནི། །མྱུར་དུ་བྱང་ཆུབ་ཐོབ་འདོད་ན། །དེ་ཡི་རྩ་བ་བྱང་ཆུབ་སེམས། །ཞེས་སོགས་ལམ་དང་། ཉེས་པ་ཀུན་ལས་རྣམ་གྲོལ་ཞིང་། །ཡོན་ཏན་ཐམས་ཅད་ལྡན་པ་པོ། །སེམས་ཅན་ཀུན་གྱི་གཉེན་གཅིག་པུ། །ཞེས་སོགས་འབྲས་བུའི་སྐབས་སུ་ཡང་ཡོངས་གཅོད་སྒྲུབ་པའི་དམ་བཅའ་མང་དུ་གསུངས་པས་གནོད་དོ། །གཉིས་པ་ལ་ནི། ཅི་སྐད་བཤད་པ་རྣམས་དང་། དགག་བྱ་ཅི་ཡང་མེད་པས་ན། །ང་ནི་ཅི་ཡང་མི་འགོག་གོ །ཞེས་སོགས་རྣམ་བཅད་དགག་པའི་དམ་བཅའ་མང་དུ་གསུངས་པས་གནོད་ཅིང་། སྐབས་འདིར་མཐའ་བཞིའི་སྐྱེ་བ་དགག་པའི་དམ་བཅའ་མ་བསྟན་ན། སྒྲུབ་བྱེད་ཀྱང་མ་བསྟན་པས་བརྗོད་བྱ་ཅིའང་མེད་པར་འགྱུར་ལ། བསྟན་ན་བཞི་པོ་གྲུབ་མཐའ་སྨྲ་བ་སུ་ཞིག་གིས་ཁས་བླངས་པ་ཡིན་སྨྲ་དགོས་སོ། །ལུགས་གསུམ་པ་ཡང་དམ་བཅའི་རང་ལྡོག་ནས་དོན་དམ་པར་མེད་ཅིང་ཀུན་རྫོབ་ཏུ་ཡོད་པའི་དོན་དུ་སྣང་བས་ཕྱོགས་སྔ་མའི་དོགས་པ་མི་ཁེགས་ཏེ། མཐའ་བཞིའི་སྐྱེ་བ་དགག་པའི་དམ་བཅའ་ཀུན་རྫོབ་ཙམ་དུ་ཁས་བླངས་པ་གཞིར་བཞག་ནས་དོགས་པ་བཀོད་པ་ཡིན་གྱི་ཀུན་རྫོབ་དང་དོན་དམ་མ་ཕྱེད་ནས་བཀོད་པ་མ་ཡིན་པས་ད་དུང་ཀུན་རྫོབ་ཙམ་དུ་དམ་བཅའ་ཡོད་མེད་གཉིས་གསུངས་པའི་དོགས་པ་སྤོང་དགོས་པའི་ཕྱིར། གནད་ཀྱི་དོན་ནི་སྤྱིར་དབུ་མ་པ་ལ་ཐ་སྙད་བདེན་པ་རྣམ་པར་གཞག་པའི་ཚེ་དགག་སྒྲུབ་ཀྱི་དམ་བཅའ་གཉིས་ཀ་ཡོད་ཅིང་། དེ་དག་རང་རྒྱུད་དུ་ཡང་ཁས་ལེན་ཏེ། ཆོས་ཅན་མཐུན་སྣང་དུ་གྲུབ་པའི་སྟེང་དུ་དགག་སྒྲུབ་ཀྱི་ཆོས་ཁས་བླངས་པའི་ཕྱིར་རོ། །དོན་དམ་པ་སྐྱེ་མེད་གཏན་ལ་དབབ་པའི་ཚེ་རང་རྒྱུད་ཀྱི་དམ་བཅའ་གཏན་མེད་དེ། ཆོས་ཅན་མཐུན་སྣང་དུ་གྲུབ་པ་མེད་པས་དེ་ལ་དགག་སྒྲུབ་ཀྱི་ཆོས་གང་ཡང་ཁས་མི་ལེན་པའི་ཕྱིར་ཏེ། རྩོད་བཟློག་ལས། གལ་ཏེ་མངོན་སུམ་ལ་སོགས་པའི། །དོན་གྱིས་འགའ་ཞིག་དམིགས་ན་ནི། །བསྒྲུབ་པའམ་བཟློག་པར་བྱ་ན་དེ། །མེད་ཕྱིར་ང་ལ་ཀླན་ཀ་མེད། །ཅེས་གསུངས་པས་སོ། །འདིར་མཐའ་བཞིའི་སྐྱེ་བ་དགག་པའི་དམ་བཅའ་ཁས་ལེན་པ་ནི། དོན་དམ་བདེན་པ་རྣམ་པར་གཞག་པའི་ཚེ། ཐལ་འགྱུར་གྱི་དམ་བཅའ་ཡིན་པས་མི་འགལ་ཏེ། ཐལ་འགྱུར་གྱི་རིག་པས་ལོགས་ཕྱོགས་ཀྱི་ལོག་རྟོག་བཀག་པའི་སྒོ་ནས་བསྒྲུབ་པར་བྱ་བ་ཡིན་གྱི། སྒྲུབ་བྱེད་རང་རྒྱུད་མེད་པའི་ཕྱིར་རོ། །གཉིས་པ་དེ་རིག་པས་བསྒྲུབ་པ་ནི། དམ་བཅའ་བཞི་པོ་རེ་རེ་ལ་ཡང་ཐོག་མར་སངས་རྒྱས་བསྐྱངས་ཀྱིས་ཐལ་འགྱུར་གྱི་རིག་པ་འབའ་ཞིག་གིས་བསྒྲུབས། དེའི་རྗེས་སུ་ལེགས་ལྡན་བྱེད་ཀྱིས་དེ་བཀག་ནས། རང་རྒྱུད་དགོས་པའི་སྒྲུབ་བྱེད་དང་། དེའི་རྗེས་སུ་ཟླ་བས་དེ་བཀག་ནས་སྔར་གྱི་ཐལ་འགྱུར་གྱི་གཞུང་བསྲང་བར་མཛད་པའི་རིག་པ་གསུམ་གསུམ་ཡོད་པ་ནི་གཞན་དུ་རྒྱས་པར་བཤད་ཟིན་ལ། འདིར་སྐབས་སུ་བབ་པ་ཐལ་འགྱུར་གྱི་རིག་པའི་རྣམ་གྲངས་ཙམ་བརྗོད་ན་བཞི་ལས། དང་པོ་བདག་སྐྱེ་འགོག་པ་ལ། གྲངས་ཅན་པ་དག་སྒྲ་ལ་སོགས་པའི་རྣམ་འགྱུར་རྣམས་དེའི་བདག་ཉིད་དུ་གྱུར་པའི་གཙོ་བོ་ལས་སྐྱེ་བར་སྨྲ་བས། དེ་དགག་པ་ལ་གཉིས་ཏེ། རིག་ངོར་བདག་སྐྱེ་དགག་པ་དང་། འཇིག་རྟེན་གྱི་ངོར་བདག་སྐྱེ་དགག་པའོ། །དང་པོ་ལ་གཉིས་ཏེ། རང་ལས་སྐྱེ་བ་དོན་མེད་པ་དང་། རང་ལས་སྐྱེ་ན་ཧ་ཅང་ཐལ་བའོ། །དང་པོ་ནི། གྲུབ་ཟིན་ན་སྐྱེ་མི་དགོས་པ་སྟེ། སངས་རྒྱས་བསྐྱངས་དང་། ཟླ་བ་གཉིས་ཀྱི་ཐུན་མོང་བའོ། །གཉིས་པ་ལ་བཞི་སྟེ། མ་གྲགས་པའི་དོན་ཐོབ་པ། གྲགས་པའི་དོན་མ་ཐོབ་པ། རྒྱུ་འབྲས་ངོ་བོ་འཆོལ་བར་འགྱུར་བ། རྒྱུ་འབྲས་བློ་ལ་སྣང་ཚུལ་མཚུངས་པར་འགྱུར་བ་རྣམས་ནི་འཇུག་པའི་གཞུང་ཉིད་ལས་ཤེས་པར་བྱའོ། །གཉིས་པ་ནི་འཇིག་རྟེན་གྱི་ཐ་སྙད་དུ་ཡང་བདག་ལས་སྐྱེ་བ་མེད་དེ། རྒྱུ་འགགས་ནས་མ་མཐོང་ཡང་། དེའི་འབྲས་བུ་མཐོང་བས་ན་མ་དཔྱད་པ་འཇིག་རྟེན་པའི་བློས་ཀྱང་དེ་དག་རྫས་གཅིག་ཏུ་མི་འཛིན་པའི་ཕྱིར་རོ། །གཉིས་པ་གཞན་ལས་སྐྱེ་བ་དགག་པ་ལ་རང་གི་སྡེ་པ་ཉན་ཐོས་སྡེ་གཉིས་ཀྱིས་དོན་དམ་པ་གཟུང་འཛིན་གཉིས་ཀྱིས་བསྡུས་པའི་དངོས་པོ་དང་། རྣམ་རིག་པས་གཉིས་མེད་ཀྱི་དངོས་པོ་གཞན་དུ་གྱུར་པའི་རྐྱེན་བཞི་ལས་སྐྱེ་བར་འདོད་ཅིང་། རང་རྒྱུད་པ་དག ཡང་དག་ཀུན་རྫོབ་ཀྱི་བསྡུས་པའི་གཟུང་འཛིན་གཉིས་ཀའམ། གཉིས་མེད་ཀྱི་ཤེས་པ་གཞན་དུ་གྱུར་པའི་རྒྱུ་ལས་སྐྱེ་བར་སྨྲའོ། །འདི་དག་དགག་པ་ལ་ཡང་རིག་ངོར་གཞན་སྐྱེ་དགག་པ་དང་། ཐ་སྙད་དུ་གཞན་སྐྱེ་དགག་པ་གཉིས་ལས། དང་པོ་ལ་གཉིས་ཏེ། རྒྱུ་འབྲས་ལ་རྫས་གཞན་དགག རྫས་གཞན་ལ་སྐྱེ་བ་དགག་པའོ། །དང་པོ་ནི། རྒྱུའི་དུས་ན་ལྟོས་ས་འབྲས་བུའི་བདག་ཉིད་ཀྱི་དངོས་པོ་མ་སྐྱེས་ཤིང་མེད་པས། དེ་ལ་ལྟོས་པའི་གཞན་དུ་གྲུབ་པར་མི་འགྱུར་ཏེ། གཞན་ནི་བྱམས་པ་དང་། ཉེར་སྦས་ལྟར་ཕན་ཚུན་ལྟོས་ནས་འདི་འདི་ལས་གཞན་ཞེས་འཇོག་དགོས་པའི་ཕྱིར་རོ། །གལ་ཏེ་རྒྱུའི་དུས་ན་འབྲས་བུ་མེད་ཀྱང་ཕྱིས་འབྱུང་བའི་འབྲས་བུ་ལ་ལྟོས་ནས་རྒྱུ་གཞན་དུ་འཇོག་གོ་ཞེ་ན། དེ་ལྟར་ན་ལྟོས་ས་བཏགས་པ་བར་གྲུབ་པས། དེ་ལ་ལྟོས་པའི་གཞན་བཏགས་པ་བར་འགྱུར་གྱི་དངོས་པོ་ལས་གཞན་དུ་གྲུབ་པར་མི་འགྱུར་རོ། །གཉིས་པ་ལ་གཉིས་ཏེ། ཧ་ཅང་ཐལ་བས་དགག རྣམ་པར་བརྟགས་ནས་དགག་པའོ། །དང་པོ་ལ་གཉིས་ཏེ། ཐལ་བ་བརྗོད་པ་དང་། དེའི་ལན་དགག་པའོ། །དང་པོ་ནི། འབྲས་བུ་མྱུ་གུ་འདི་གཞན་དུ་གྱུར་པའི་ས་བོན་ལས་སྐྱེ་བ་ལྟར། རྒྱུ་མ་ཡིན་པ་མེ་དང་། སོལ་བ་ལས་ཀྱང་སྐྱེ་བར་འགྱུར་ཏེ། གཞན་ཉིད་དུ་མཚུངས་པའི་ཕྱིར་རོ། །གཉིས་པ་ནི། ཁ་ཅིག་གཞན་དུ་མཚུངས་ཀྱང་རྒྱུར་མ་གྱུར་པའི་གཞན་ལས་མི་འབྱུང་བས་མ་ངེས་སོ་སྙམ་ན། འདིའི་ལན་ལ་རྒྱུ་མཚན་མཚུངས་པའི་མགོ་སྙོམས་དང་། ལྡོག་པ་གཅིག་པའི་དཔུང་འཕུལ་གཉིས་ལས། དང་པོ་ནི། གཞན་དུ་མཚུངས་བཞིན་དུ་གཅིག་ལས་ཡང་དག་པར་སྐྱེ་ལ། གཅིག་ལས་མི་སྐྱེ་བའི་ཁྱད་པར་གྱི་རྒྱུ་མཚན་གང་ཡིན་ཞེས་དྲིས་པས། སྣང་བ་དང་། ནུས་པ་དང་། ཆོས་ཉིད་ཀྱི་ལན་གསུམ་ལས། དང་པོ་ལན་དུ་མི་རུང་བ་ནི། དེ་ལྟར་མངོན་སུམ་གྱིས་མཐོང་བའི་ཕྱིར་རོ་སྙམ་ན། མ་དཔྱད་པའི་བློ་འཁྲུལ་པས་དེ་ལྟར་མཐོང་མོད། དེས་འཕགས་པའི་མཉམ་བཞག་གི་གཟིགས་པ་གཏན་ལ་དབབ་པར་འདོད་ནས། རིག་པས་དཔྱད་པའི་ཚེ་དེ་ལན་དུ་མི་རུང་སྟེ། སྐྱེ་བར་སྣང་ཡང་དངོས་པོ་ལ་སྐྱེ་བར་མི་གྲུབ་པ་ཁྱེད་ཅག་གཉིས་ལ་གྲུབ་པའི་རྨི་ལམ་ལ་སོགས་པ་དང་བརྟགས་པ་མཚུངས་པའི་ཕྱིར་རོ། །གཉིས་པ་ལན་དུ་མི་རུང་བ་ནི། ནུས་པ་ཡོད་པ་དང་། མེད་པས་སྐྱེ་བ་དང་མི་སྐྱེ་བ་དེ་ལྟར་ངེས་པ་ཡིན་ནམ་སྙམ་ན། དེ་ཡང་ལན་དུ་མི་རུང་སྟེ། བློ་འཁྲུལ་པ་ལ་སྣང་བ་ནི་རྨི་ལམ་ལ་སོགས་པ་དང་བརྟགས་པ་མཚུངས་པའི་ཕྱིར་ཏེ། བྱང་ཆུབ་སེམས་འགྲེལ་ལས། རྟེན་མཚུངས་པ་ཡིས་དོན་བྱེད་པ། །རྨི་ལམ་གནོད་པ་བཞིན་མིན་ནམ། །རྨི་ལམ་སད་པའི་གནས་སྐབས་ལ། །དོན་བྱེད་པ་ལ་ཁྱད་པར་མེད། །ཅེས་གསུངས་སོ། །གསུམ་པ་ལན་དུ་མི་རུང་བ་ནི་གཞན་དུ་མཚུངས་ཀྱང་སྐྱེ་མི་སྐྱེ་དངོས་པོའི་ཆོས་ཉིད་དམ། རྟེན་འབྲེལ་གྱི་ཆེ་བ་ཡིན་ནོ་ཞེ་ན། དེ་ཡང་ལན་དུ་མི་རུང་བ་སྟེ། ཆོས་ཉིད་ཡིན་པ་ལ་གནོད་བྱེད་མེད་ཅིང་། སྒྲུབ་བྱེད་ཡོད་པ་ཅིག་དགོས་པ་ལས། བློ་འཁྲུལ་པས་སྐྱེ་བ་དང་མི་སྐྱེ་བར་མཐོང་བས། དངོས་པོ་ལ་སྐྱེ་བ་དང་། མི་སྐྱེ་བ་ཆོས་ཉིད་དུ་མི་འགྲུབ་ཅིང་། དེ་ལས་གཞན་པའི་སྒྲུབ་བྱེད་ཀྱང་མེད་པའི་ཕྱིར་རོ། །དེའི་ཕྱིར་གཞན་དུ་མཚུངས་པ་ལ་ཡང་དག་པར་སྐྱེ་མི་སྐྱེའི་རྒྱུ་མཚན་དཔྱད་ན་སུས་ཀྱང་རྙེད་པ་མ་ཡིན་པས་གཞན་དུ་མཚུངས་པ་རྟགས་སུ་བཀོད་ནས་སྐྱེ་མི་སྐྱེ་མགོ་སྙོམས་པའོ། །གལ་ཏེ་དེ་ལྟར་ན་ལས་ཡིན་པར་མཚུངས་པ་ལ། རྣམ་པར་སྨིན་པ་ངེས་པ་ལ་སོགས་པ་དབུ་མ་པ་ཁྱོད་ཉིད་ཀྱིས་འདོད་པའི་ཀུན་རྫོབ་ཀྱི་ངེས་པ་ཐམས་ཅད་ཀྱང་མི་འཐད་པར་འགྱུར་རོ། །ཞེ་ན། ཁོ་བོ་ཅག་ལ་དཔྱད་ན་རང་གི་མཚན་ཉིད་དུ་ངེས་པ་ཀུན་རྫོབ་ཏུའང་མེད་མོད་ཀྱི། མ་དཔྱད་པ་བློ་འཁྲུལ་པའི་ངོར་ལས་འབྲས་ལ་སོགས་པ་མ་འཆོལ་བར་སྣང་བ་ཙམ་ལ། ཀུན་རྫོབ་ཏུ་ལས་འབྲས་ལ་སོགས་པ་ངེས་པར་བརྗོད་པ་ཡིན་པས་ག་ལ་མཚུངས་ཞེས་པ་ནི། ཅི་ལྟར་ཁྱོད་ཀྱིས་གཞན་དབང་དངོས་འདོད་ལྟར་ཞེས་སོགས་ཀྱི་སྟོན་ཏོ། །གཉིས་པ་ལྡོག་པ་གཅིག་པའི་དཔུང་འཕུལ་ནི་མྱུ་གུ་དེ་གཉིས་ཀ་ལས་གཞན་དུ་མཚུངས་ཀྱང་ས་བོན་ལས་སྐྱེ། མེ་དང་སོལ་བ་ལས་མི་སྐྱེ་བས་ཁྱབ་པ་མ་གྲུབ་བོ་ཞེས་སྨྲ་ན། ཁྱོད་ལ་ཁྱབ་ལྡན་གྱི་རྟགས་མེད་ན། རང་རྒྱུད་ཀྱི་རྟགས་ནུབ་པར་འགྱུར་ཞིང་། ཡོད་ན་གང་ཡིན་ཞེས་དྲི་བར་བྱའོ། །དེ་ལ་གང་དུ་བ་ཙམ་ཡོད་ན་མེ་ཡོད་པས་ཁྱབ། དཔེར་ན་ཚང་བང་བཞིན། ལ་ལའང་དུ་བ་ཙམ་ཡོད་དོ་ཞེས་པ་ལྟ་བུ་ཡིན་ནོ་ཞེ་ན། དེ་ལ་ཡང་དུ་བ་ཙམ་དུ་མཚུངས་པའི་ཚང་བང་གི་དུ་བ་ལ་མེས་ཁྱབ་པ་གྲུབ་ཀྱང་། ལའི་དུ་བ་ལ་མེས་མ་ཁྱབ་པར་དོགས་པས་མ་ངེས་པར་ཅི་ལྟར་མི་འགྱུར། གལ་ཏེ་ཚང་བང་གི་དུ་བ་ཙམ་ལ་མེས་ཁྱབ་པ་གྲུབ་པས། དེ་དང་དུ་བ་ཙམ་དུ་ལྡོག་པ་གཅིག་པའི་དུ་བ་ཙམ་ལ་ཡང་མེས་ཁྱབ་པ་གྲུབ་པར་བརྗོད་ན། འདིར་ཡང་ས་བོན་གྱི་གཞན་ཙམ་ལས། མྱུ་གུ་སྐྱེ་བས་ཁྱབ་པས། དེ་དང་གཞན་ཙམ་དུ་ལྡོག་པ་གཅིག་པའི་མེ་དང་སོལ་བའི་གཞན་ཙམ་ལ་ཡང་མྱུ་གུ་སྐྱེ་བས་ཁྱབ་པར་བརྗོད་པ་ཡིན་པས་ཅིའི་ཕྱིར་མི་འགྲུབ། དེ་ལ་གལ་ཏེ་བ་ལང་གི་སྲོག་ཆགས་ཙམ་ལ་ནོག་ལྐོག་ཤལ་གྱིས་ཁྱབ་པས། དེ་དང་སྲོག་ཆགས་ཙམ་དུ་ལྡོག་པ་གཅིག་པའི་མིའི་སྲོག་ཆགས་ཙམ་ལ་ཡང་ནོག་ལྐོག་ཤལ་གྱིས་ཁྱབ་པར་འགྱུར་བས་ཀུན་རྫོབ་ཀྱི་རྣམ་གཞག་ཐམས་ཅད་མི་རུང་ལ། དེ་ཁྱབ་པ་མ་གྲུབ་པར་བརྗོད་ན་འདིར་ཡང་མཚུངས་སོ་སྙམ་ན། རྒྱུ་མཚན་མཚུངས་པའི་མགོ་སྙོམས་བརྗོད་པ་ནི་རིག་པས་དཔྱད་པའི་སྐབས་ཡིན་ལ། དེའི་ཚེ་གཏན་ཚིགས་ཐམས་ཅད་གཞན་ལ་གྲགས་པ་ཡིན་གྱི་རང་རྒྱུད་དུ་ཁས་མི་ལེན་པས་སྐྱོན་ཐམས་ཅད་ལས་གྲོལ་ལོ། །གཉིས་པ་རྣམ་པར་བརྟགས་ནས་གཞན་སྐྱེ་དགག་པ་ནི། གཞན་དུ་གྱུར་པའི་རྒྱུ་འགགས་པ་ལས་སྐྱེ་ན་རྒྱུ་མེད་དུ་འགྱུར་ལ། མ་འགགས་པ་ལས་སྐྱེ་ན་རྒྱུ་འབྲས་དུས་མཉམ་པར་འགྱུར་རོ། །དེ་བཞིན་དུ་གཞན་ཕྲད་པ་ལས་སྐྱེ་ན་རྒྱུ་འབྲས་དུས་མཉམ་པར་འགྱུར་ལ། མ་ཕྲད་པར་སྐྱེ་ན་འབྲས་བུ་སྐྱེ་བའི་དུས་ན་རྒྱུ་མེད་པས་འབྲས་བུ་རྒྱུ་མེད་ལས་སྐྱེ་བར་འགྱུར་རོ། །གཉིས་པ་ཐ་སྙད་དུ་གཞན་སྐྱེ་དགག་པ་ནི། མ་དཔྱད་པ་འཇིག་རྟེན་པའི་ངོར་ཡང་གཞན་ལས་སྐྱེ་བ་མེད་དེ། འཇིག་རྟེན་གྱིས་རྒྱུ་ལས་འབྲས་བུ་སྐྱེས་པ་ཙམ་ཞིག་མཐོང་གི དེ་དག་རྫས་གཞན་དུ་མཐོང་བ་མེད་པའི་ཕྱིར་ཏེ། དེ་ལས་གཞན་དུ་ན། རྒྱུ་བུའི་ས་བོན་ཙམ་བཏབ་པས། བུ་འདི་བདག་གིས་བསྐྱེད་དོ། །ཞེས་དང་། རྒྱུ་ལྗོན་ཤིང་གི་ས་བོན་ཙམ་བཙུགས་ནས་ཤིང་འདི་ངས་བཙུགས་སོ་ཞེས་མི་རྟོགས་པར་འགྱུར་ཏེ། གང་ཟག་དང་ལྗོན་ཤིང་གཞན་ལྟར། རང་གིས་བསྐྱེད་པ་དང་བཙུགས་པ་དེ་ལས་གཞན་དུ་འཛིན་པའི་ཕྱིར་རོ། །བུ་འདི་བདག་གིས་བསྐྱེད་དོ་ཞེས་དང་། ལྗོན་ཤིང་འདི་བདག་གིས་བཙུགས་སོ་ཞེས་པས། རྒྱུ་འབྲས་གཅིག་ཏུ་ཁས་ལེན་པ་ཡང་མ་ཡིན་ཏེ། བུ་དང་ལྗོན་ཤིང་གི་ས་བོན་ཙམ་ལ་བསམ་ནས་དེ་ལྟར་སྨྲས་ཀྱི་ཕྱིས་ཀྱི་བུ་ཆེན་པོ་དང་། ལྗོན་ཤིང་ཆེན་པོ་དང་པོ་ནས་བསྐྱེད་པར་ཁས་མི་ལེན་པའི་ཕྱིར་རོ། །གསུམ་པ་གཉིས་ཀ་ལས་སྐྱེ་བ་དགག་པ་ནི། གཙོ་བོ་དབང་ཕྱུག་དང་བཅས་པར་སྨྲ་བའི་གྲངས་ཅན་དང་། གཅེར་བུ་པ་དག་འབྲས་བུའི་དངོས་པོ་རྣམས་རང་ལས་སྐྱེ་ཞིང་གཞན་ལས་ཀྱང་སྐྱེ་བས་སྔར་བཤད་པའི་ཉེས་པར་མི་འགྱུར་ཏེ། རང་ཁོ་ན་དང་། གཞན་ཁོ་ན་ལས་སྐྱེ་བར་ཁས་མ་བླངས་པའི་ཕྱིར་རོ། །ཞེས་སྨྲའོ། །དེ་དགག་པ་ལ་སྔར་བཤད་ཀྱི་རིག་པ་དང་། མ་བཤད་པའི་རིག་པ་གཉིས་ལས། དང་པོ་ནི། གཉིས་ལས་སྐྱེ་བའང་རིག་པའི་ངོ་བོ་མ་ཡིན་གང་གི་ཕྱིར། །བཤད་ཟིན་ཉེས་པ་དེ་དག་ཐོག་ཏུ་འབབ་པ་ཡིན་ཕྱིར་རོ། །ཞེས་གསུངས་པ་ལྟར་རོ། །གཉིས་པ་ནི། གལ་ཏེ་རེ་རེས་བྱས་གྱུར་ན། །སྡུག་བསྔལ་གཉིས་ཀས་བྱས་པར་འགྱུར། །ཞེས་འཆད་པར་འགྱུར་བའི་ཚུལ་གྱིས་རང་གཞན་རེ་རེ་ལ་བསྐྱེད་པར་བྱེད་པའི་ནུས་པ་ཡོད་ན་གཉིས་ཀ་ཚོགས་པས་ཀྱང་སྐྱེ་བར་འགྱུར་བ་ཞིག་ན་སྔར་བཤད་པའི་ཚུལ་གྱིས་རང་གཞན་རེ་རེ་ལ་སྐྱེད་པར་བྱེད་པའི་ནུས་པ་མེད་པའི་ཕྱིར། གཉིས་ཀ་ཚོགས་པས་ཀྱང་བསྐྱེད་པ་མི་འཐད་དེ། བྱེ་མ་དག་ལ་ཏིལ་མར་བཞིན་ནོ། །གལ་ཏེ་མིག་དང་གཟུགས་ལ་སོགས་པ་རེ་རེ་ལ་དངོས་སུ་མིག་ཤེས་བསྐྱེད་པའི་ནུས་པ་མེད་ཀྱང་། ཚོགས་པ་ལ་ཡོད་པས་མ་ངེས་སོ་ཞེ་ན། མ་ཡིན་ཏེ། རྒྱུད་དང་ཚོགས་ཞེས་བྱ་བ་ནི། །ཕྲེང་བ་དག་ལ་སོགས་བཞིན་རྫུན། །ཞེས་པའི་ཚུལ་གྱིས་ཚོགས་པ་ཉིད་རྫས་སུ་མེད་པས་ན། དེ་ཁོ་ན་ཉིད་དུ་ནུས་པ་མེད་པའི་མཐུན་ཕྱོགས་ཉིད་ཡིན་པའི་ཕྱིར་དང་། ཐ་སྙད་དུ་ཚོགས་པ་ལ་ནུས་པ་ཡོད་པ་ནི་འདིར་མི་འགོག་པའི་ཕྱིར་རོ། །བཞི་པ་རྒྱུ་མེད་པ་ལས་སྐྱེ་བ་དགག་པ་ནི། ཚུ་རོལ་མཛེས་པ་བ་དག་ད་ལྟར་གྱི་རིག་པ་ཙམ་དང་། བདེ་སྡུག་སྐྱེ་བ་སྔ་མའི་རིག་པ་ཙམ་དང་། དགེ་མི་དགེའི་ལས་ལས་བྱུང་བ་མ་ཡིན་གྱི། འཇིག་རྟེན་འདིའི་འབྱུང་བ་འདུས་ཙམ་དང་། མཐུན་རྐྱེན་གྱི་ཚོགས་པ་ཙམ་ལས་བྱུང་བ་ཡིན་ནོ་ཞེས་མ་མཐོང་བའི་རྒྱུ་མེད་པར་སྨྲ་ལ། དཔྱོད་པ་པ་དག ཉི་ཤར་ཆུ་བོ་ཐུར་དུ་འབབ་པ་དང་། །སྲན་ཟླུམ་ཚེར་མ་གཟིངས་རིང་རྣོ་བ་དང་། །རྨ་བྱའི་མདོག་དབྱིབས་ལ་སོགས་ཆོས་རྣམས་ཀུན། །སུས་ཀྱང་མ་བཀོད་རང་གི་ངང་གིས་འབྱུང་། །ཞེས་མཐོང་བའི་རྒྱུ་ཡང་མེད་པར་སྨྲའོ། །འདི་དགག་པ་ལ། སངས་རྒྱས་བསྐྱངས་ཀྱིས་དངོས་པོ་རྣམས་རྒྱུ་མེད་པར་སྐྱེ་བར་མི་འཐད་དེ། རྟག་ཏུ་ཐམས་ཅད་ལས་ཐམས་ཅད་སྐྱེ་བར་ཐལ་བའི་ཕྱིར་རོ། །ཞེས་རེས་འགའ་བ་མ་ཡིན་པར་ཐལ་བའི་རིག་པ་གསུངས་ལ། སློབ་དཔོན་ཟླ་བས་དེའི་སྟེང་དུ། འབྲས་བུའི་ཆེད་དུ་རྒྱུ་ལ་འབད་པ་དོན་མེད་པར་ཐལ་བ་དང་། ཤེས་པའི་གཟུང་ཡུལ་དུ་མི་སྣང་བར་ཐལ་བ་གཉིས་བསྣན་ཏེ་གསུམ་དུ་མཛད་དོ། །གསུམ་པ་བཀག་པ་ལ་སྐྱོན་སྤང་བ་ལ་གཉིས་ཏེ། ལུང་དང་འགལ་བ་སྤང་བ་དང་། མཐའ་བཞིའི་སྐྱེ་བ་བཀག་པས་ཀུན་རྫོབ་ཏུ་སྐྱེ་བ་མི་འཐད་པའི་རྩོད་པ་སྤང་བའོ། །དང་པོ་ནི། དེ་ལྟར་རྟེན་འབྲེལ་སྤྲོས་པའི་མཐའ་བརྒྱད་དང་བྲལ་བར་རྣམ་པར་གཞག་ན། མདོ་ལས། མ་རིག་པའི་རྐྱེན་གྱིས་འདུ་བྱེད་རྣམས་སོ། །ཞེས་པ་ལ་སོགས་པ་རྟེན་ཅིང་འབྲེལ་བར་འབྱུང་བ་ལ་དགག་བྱ་སྐྱེ་བ་ལ་སོགས་པ་ཡོད་པར་གསུངས་པ་དང་འགལ་ལོ་ཞེ་ན་མི་འགལ་ཏེ། མདོ་གཞན་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །ཞེས་སྐྱེ་བ་མེད་པར་གསུངས་པ་གཉིས་ཀྱི་དགོངས་པ་བཙལ་དགོས་ལ། དེའི་ཚེ་སྐྱེ་སོགས་མེད་པ་ངེས་དོན་དང་། སྐྱེ་སོགས་ཡོད་པ་དྲང་དོན་དུ་གྲུབ་པའི་ཕྱིར་ཏེ། བློ་གྲོས་མི་ཟད་པའི་མདོ་ལས་དྲང་ངེས་ཀྱི་ཁྱད་པར་བརྒྱད་གསུངས་པའི་གཙོ་བོ་བདེན་པ་གཉིས་ཀྱི་སྒོ་ནས་འཇོག་པ་དེ་ཉིད་འདིར་ཁས་ལེན་པའི་སྐབས་ཡིན་པའི་ཕྱིར་རོ། དེ་ལྟར་བྱས་ན་མཆོད་བརྗོད་ཀྱི་དངོས་བསྟན་སྤྲོས་པའི་མཐའ་བརྒྱད་དང་བྲལ་བ་ངེས་དོན་དང་། འགག་པ་ཡོད་པ་སྐྱེ་བ་ཡོད་པ་ཞེས་སོགས་དགག་བྱ་བརྒྱད་པོ་ཐ་སྙད་དུ་ཡོད་པ་དྲང་དོན་དུ་གྲུབ་ལ། རབ་བྱེད་ཉི་ཤུ་རྩ་བདུན་གྱི་བརྗོད་བྱ་སྐྱེ་བ་ནས་ལྟ་བའི་བར་ཉི་ཤུ་རྩ་བདུན་རིག་པས་དཔྱད་པའི་ཚེ་མ་རྙེད་པ་ནི་ངེས་དོན་དང་། ཐ་སྙད་ཙམ་དུ་ཐམས་ཅད་ཀྱང་ཡོད་པ་ནི་དྲང་དོན་དུ་གྲུབ་བོ། །གཉིས་པ་ནི། ཁྱོད་ཀྱིས་བདེན་པ་གཉིས་ཆར་དུ་ཡང་མཐའ་བཞིའི་སྐྱེ་བ་བཀག་ཅིང་། སྐྱེ་བའི་མཐའ་ལྔ་པ་ཡང་མི་སྲིད་པས་ཀུན་རྫོབ་ཏུ་ཡང་སྐྱེ་བ་མི་འཐད་པར་འགྱུར་རོ་ཞེ་ན། སྔར་བཤད་པའི་ཚུལ་གྱིས་མཐའ་བཞིར་དཔྱད་ན། ཀུན་རྫོབ་ཏུ་ཡང་སྐྱེ་བ་མི་འཐད་པས། རང་གི་མཚན་ཉིད་ཀྱིས་གྲུབ་པའི་སྐྱེ་བ་མེད་ཀྱང་མ་དཔྱད་པའི་བློ་ངོར་རྒྱུ་དང་རྐྱེན་ལ་བརྟེན་ནས་སྐྱེ་བར་སྣང་བ་ཙམ་ལ་ཐ་སྙད་རྒྱུན་མི་བཅད་པའི་ཕྱིར་ཀུན་རྫོབ་ཏུ་རྟེན་ཅིང་འབྲེལ་བར་འབྱུང་བ་ཞེས་རྣམ་པར་གཞག་སྟེ། ཇི་སྐད་དུ། སློབ་དཔོན་ཉིད་ཀྱིས་སྡུག་བསྔལ་བདག་གིས་བྱས་པ་དང་། །གཞན་གྱིས་བྱས་དང་གཉིས་ཀས་བྱས། །རྒྱུ་མེད་པར་ནི་རྟོག་གེ་འདོད། །ཁྱོད་ཀྱིས་བརྟེན་ནས་འབྱུང་བར་འདོད། །ཅེས་གསུངས་སོ། །བོད་ཁ་ཅིག མྱུ་གུ་མཐའ་བཞིར་སྐྱེ་བ་བདེན་པ་གཉིས་ཆར་དུ་ཡང་མི་འཐད་ཅིང་། སྐྱེ་བ་ཙམ་ནི་འདོད་དགོས་པས། སྐྱེ་བའི་དོགས་པ་མཐའ་བཞིར་མ་ངེས་སོ་ཞེས་སྨྲ་བ་ནི་དོན་དམ་རྣམ་པར་གཞག་པའི་གནས་སྐབས་དང་། ཀུན་རྫོབ་རྣམ་པར་གཞག་པའི་གནས་སྐབས་མ་ཕྱེད་པའི་གཏམ་མོ། །གཉིས་པ་གཞན་སྐྱེ་བྱེ་བྲག་ཏུ་དགག་པ་ལ་གཉིས་ཏེ། བསྟན་བཅོས་ལ་གྲགས་པའི་གཞན་སྐྱེ་དགག འཇིག་རྟེན་ལ་གྲགས་པའི་གཞན་སྐྱེ་དགག་པའོ། །དང་པོ་ལ་གཉིས་ཏེ། འདོད་པ་བརྗོད་པ། སུན་འབྱིན་བཤད་པའོ། །དང་པོ་ནི། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་པའི་ཚུལ་གྱིས། གཞན་སྡེའི་འདོད་པ་རྣམས་རང་སྡེ་དངོས་པོར་སྨྲ་བ་དག་གིས་ཀྱང་བཀག་ཟིན་པ་དང་། སྐབས་གཞན་དུ་འཕྲོས་ནས་བཀག་པ་ཉིད་ཀྱི་གོ་ཆོད་པར་དགོངས་ནས་འདིར་མ་གསུངས་ལ། འདིར་རང་གི་སྡེ་པ་དག་འདི་སྐད་དུ་མཐའ་གསུམ་ལས་སྐྱེ་བ་བཀག་པ་ནི་རིག་མོད་ཀྱི་གཞན་ལས་སྐྱེ་བ་དགག་པ་ཤིན་ཏུ་ཆེས་མི་རིག་སྟེ། བཅོམ་ལྡན་འདས་ཉིད་ཀྱིས་ཆོས་མངོན་པའི་མདོ་ལས། འབྲས་བུའི་དངོས་པོ་རྣམས་བསྐྱེད་པར་བྱེད་པ་འབྲས་བུ་ལས་གཞན་དུ་གྱུར་པའི་རྐྱེན་རྣམས་ནི་བཞི་གསུངས་པའི་ཕྱིར་ཏེ། འབྲས་བུའི་ངོ་བོ་བསྒྲུབ་པར་བྱེད་པ་མྱུ་གུའི་ས་བོན་དང་། མིག་ཤེས་ཀྱི་རྒྱུ་ཀུན་གཞི་ལ་ཡོད་པ་དེའི་ས་བོན་ལྟ་བུ་རྒྱུའི་རྐྱེན་དང་། གང་ལ་དམིགས་ནས་སེམས་སེམས་བྱུང་དེའི་རྣམ་པ་ཅན་དུ་བསྐྱེད་པའི་ཡུལ་དམིགས་པའི་རྐྱེན་དང་། རྒྱུ་འགགས་མ་ཐག་པ་འབྲས་བུ་ཕྱི་མའི་གོ་འབྱེད་པ་དེ་མ་ཐག་པའི་རྐྱེན་དང་། རྐྱེན་གསུམ་ལས་གཞན་པའི་དངོས་པོ་གང་ཞིག་ཡོད་ན་དེ་འབྱུང་དུ་རུང་བ་བདག་པོ་ཡང་ནི་སྔ་མ་དེ་དག་བཞིན་འབྲས་བུ་ལ་ཕན་འདོགས་པའི་རྐྱེན་ཡིན་ནོ། །བཞི་པོ་འདི་དག་ཏུ་མ་འདུས་པའི་དབང་ཕྱུག་ལ་སོགས་པ་ནི་རྐྱེན་མ་ཡིན་པས་རྐྱེན་ལྔ་པ་ནི་ཡོད་པ་མ་ཡིན་ནོ། །འདིར་རྐྱེན་ཞེས་པ་ཡང་རྒྱུ་དང་རྐྱེན་གཉིས་ཀྱི་ཟླས་ཕྱེ་བའི་རྐྱེན་ཁོ་ན་མ་ཡིན་གྱི་རྒྱུ་ཐམས་ཅད་རྐྱེན་བཞིར་བསྡུས་པ་སྟེ། གྲུབ་པའི་མཐའ་ལས། རྒྱུ་ཞེས་བྱ་བ་རྒྱུ་ལྔ་ཡིན། །སེམས་དང་སེམས་བྱུང་སྐྱེས་པ་རྣམས། །ཐ་མ་མིན་མཚུངས་དེ་མ་ཐག །དམིགས་པ་ཆོས་རྣམས་ཐམས་ཅད་དེ། །བྱེད་རྒྱུ་ཞེས་བྱ་བདག་པོར་བཤད། །ཅེས་འབྱུང་བ་ལྟར་རོ། །དེས་ན་ཕྱི་ནང་གི་དངོས་པོ་ཐམས་ཅད་གཞན་དུ་གྱུར་པའི་རྐྱེན་བཞི་ལས་སྐྱེ་བ་ཡིན་ནོ་ཞེས་ཟེར་རོ། །གཉིས་པ་ལ་བཞི་སྟེ། རྐྱེན་དོན་གཞན་ལས་སྐྱེ་བ་དགག བྱ་བ་དོན་གཞན་ལས་སྐྱེ་བ་དགག རྒྱུ་རྐྱེན་གྱི་མཚན་ཉིད་སྤྱིར་དགག རྐྱེན་བཞི་སོ་སོའི་མཚན་ཉིད་བྱེ་བྲག་ཏུ་དགག་པའོ། །དང་པོ་ནི། འགྲེལ་པར་སྐྱེ་བའི་སྔོན་རོལ་དུ་ཡོད་པར་གྱུར་ན་ནི་ཞེས་དུས་ཀྱིས་བདུན་པ་ལ་བཤད་པ་ལྟར་ན། མྱུ་གུ་ལ་སོགས་པ་འབྲས་བུའི་དངོས་པོ་རྣམས་ཀྱི་རང་བཞིན་ནི་ཆོས་ཅན། རྐྱེན་ལ་སོགས་པ་སྟེ། རྒྱུ་ས་བོན་དང་། རྐྱེན་ཆུ་ལུད་ལ་སོགས་པ་སོ་སོ་བ་དང་འདུས་པ་དག་མ་འགྱུར་བར་ཡོད་པའི་དུས་ན། ཡོད་པ་མ་ཡིན་ཏེ། མ་སྐྱེས་པའི་ཕྱིར་རོ། །དེས་ན་རྐྱེན་གྱི་ཆོས་འབྲས་བུའི་བདག་གི་དངོས་པོ་ཡོད་པ་ཙམ་མ་ཡིན་ན། རྐྱེན་དག་གཞན་གྱི་དངོས་པོར་ག་ལ་འགྱུར་ཏེ། ལྟོས་ས་མེད་པའི་ཕྱིར། དཔེར་ན་རིང་པོ་མེད་པའི་ཐུང་ངུའམ། ཕ་རོལ་མེད་པའི་ཚུ་རོལ་བཞིན་ནོ། །རྩ་བར་ལ་ཞེས་པ་དངོས་པོའི་བདུན་པ་ལ་བཤད་པ་ལྟར་ན། མྱུ་གུ་ལ་སོགས་པ་འབྲས་བུའི་དངོས་པོ་རྣམས་ཀྱི་རང་བཞིན་ཆོས་ཅན། རྐྱེན་ལ་སོགས་པ་སྟེ། རྒྱུ་རྐྱེན་སོ་སོ་བ་དང་། འདུས་པ་དག་གམ། དེ་ལས་གཞན་འགའ་ཞིག་ལ་ཡང་རུང་སྟེ། འཁར་གཞོང་ལ་རྒྱ་ཤུག་ལྟར་ཡོད་པ་མ་ཡིན་ཏེ། དེ་དག་ལ་སྣང་རུང་མ་དམིགས་པའི་ཕྱིར་རོ། །དེས་ན་རྐྱེན་ལ་སོགས་པ་ལ་འབྲས་བུའི་བདག་གི་དངོས་པོ་ཡོད་པ་མ་ཡིན་ན། དེ་རྐྱེན་ལ་སོགས་པ་གཞན་ལས་འབྱུང་ཞིང་སྐྱེ་བར་ག་ལ་འགྱུར་ཏེ། བྱེ་མ་དག་ལས་ཏིལ་མར་བཞིན་ནོ། །འདི་ལ་སློབ་དཔོན་ལེགས་ལྡན་འབྱེད་ཀྱིས་ཕྱེད་སྔ་མས་བདག་སྐྱེ་འགོག་པ་དང་། ཕྱེད་ཕྱི་མས་གཞན་སྐྱེ་འགོག་པར་བཤད་པ་ནི་ཕྱོགས་སྔའི་སྐབས་དང་མི་འགྲིག་ཅིང་། བདག་གི་དངོས་པོ་ཡོད་མིན་ན་ཞེས་པའི་ཚིག་དོན་དང་ཡང་མ་འབྲེལ་ལོ། །གཉིས་པ་ནི་བྱེ་བྲག་སྨྲ་བ་དག་གཞན་དུ་གྱུར་པའི་རྐྱེན་ཉིད་ལས་སྐྱེ་བ་མ་ཡིན་གྱི། འོན་ཀྱང་རྐྱེན་གྱིས་བསྒྲུབས་པའི་བྱ་བ་དོན་གཞན་ལས་སྐྱེ་བ་ཡིན་ནོ་སྙམ་ན། དེ་ལྟར་ན་བྱ་བ་རྐྱེན་རྒྱུར་ལྡན་པའམ། མི་ལྡན་པ་ལས་སྐྱེ། དང་པོ་ལྟར་ན་འབྲས་བུའི་དངོས་པོ་ཆོས་ཅན། བྱ་བ་རྐྱེན་དང་ལྡན་པ་ལས་སྐྱེ་བ་མ་ཡིན་ཏེ། ཁྱོད་སྐྱེས་པ་ལ་བྱ་བ་དོན་མེད་ཅིང་། མ་སྐྱེས་པ་ལ་རྟེན་མེད་པས་བྱ་བ་མེད་ལ། སྐྱེས་མ་སྐྱེས་ལས་མ་གཏོགས་པའི་སྐྱེ་བཞིན་པ་ལ་ཡང་བྱ་བ་མེད་པའི་ཕྱིར་དུས་གསུམ་དུ་དཔྱད་ན་བྱ་བ་རྐྱེན་དང་ལྡན་པ་མེད་པའི་ཕྱིར་རོ། །གཉིས་པ་ལྟར་ན། དེ་ཆོས་ཅན་བྱ་བ་རྐྱེན་དང་མི་ལྡན་པ་ལས་སྐྱེ་བ་མ་ཡིན་ཏེ། མ་དཔྱད་པའི་སྣང་ངོ་ཙམ་དུ་ཡང་རྐྱེན་དང་མི་ལྡན་པའི་བྱ་བ་མེད་པའི་ཕྱིར་རོ། །འོ་ན་རྐྱེན་ཉིད་ཀྱིས་བསྐྱེད་པར་བྱེད་དོ་སྙམ་ན། འབྲས་བུའི་དངོས་པོ་ཆོས་ཅན། བྱ་བ་དང་ལྡན་མི་ལྡན་དཔྱད་ན་རྐྱེན་ཉིད་ཀྱིས་བསྐྱེད་པ་མ་ཡིན་ཏེ། འབྲས་བུ་བསྐྱེད་པའི་བྱ་བ་དང་མི་ལྡན་ན་རྐྱེན་གྱི་རྣམ་འཇོག་གི་རྒྱུ་མེད་པས་རྐྱེན་ཉིད་མ་ཡིན་ལ། འོན་ཏེ་ན་བྱ་བ་དང་ལྡན་པའི་རྐྱེན་ཡོད་ན། དེས་བསྐྱེད་པར་འགྱུར་བ་ཞིག་ན་ཡང་། བྱ་བ་རྐྱེན་དང་ལྡན་པ་འབྲས་བུའི་དུས་གསུམ་ལ་དཔྱད་ནས་བཀག་ཟིན་པའི་ཕྱིར་རོ། །གསུམ་པ་ནི། དེ་ལྟར་དཔྱད་པས་ཅི་ཞིག་བྱ། ཅི་སྐད་བཤད་པའི་མིག་དང་གཟུགས་ལ་སོགས་པའི་རྐྱེན་བཞི་པོ་འདི་དག་ལ་བརྟེན་ནས། རྣམ་ཤེས་དང་མྱུ་གུ་ལ་སོགས་པ་སྐྱེ་བས་ན། དེའི་ཕྱིར་འདི་དག་འདིའི་རྐྱེན་དུ་བརྗོད་ཅིང་གྲགས་སོ་ཞེ་ན། རྐྱེན་བཞི་པོ་ཆོས་ཅན། ཇི་སྲིད་མཐུན་རྐྱེན་གྱི་ཚོགས་པ་མ་ཚང་བས་སམ། འགལ་རྐྱེན་གྱིས་ཆོད་པའི་ཚེ་འབྲས་བུ་མི་སྐྱེ་བ་དེ་སྲིད་དུ་འདི་དག་འབྲས་བུའི་རྐྱེན་མིན་པ་ཅི་ལྟར་མ་ཡིན་ཏེ་རྐྱེན་མ་ཡིན་པར་ཐལ། རྐྱེན་གྱི་རྣམ་འཇོག་གི་རྒྱུ་བསྐྱེད་པའི་བྱ་བ་དང་མི་ལྡན་པའི་ཕྱིར། དོན་དེ་ཉིད་འབྲས་ཕྱོགས་ནས་དཔྱད་པ་ནི་ཡང་རྐྱེན་དེ་དག་གིས་འབྲས་བུ་སྐྱེད་པར་བྱེད་ན་འབྲས་བུ་སྔར་མེད་པའམ་ཡོད་པ་ཞིག་བསྐྱེད་དྲང་། དེ་ལས་འབྲས་བུ་མེད་པའི་དོན་ལ་ཡང་རྐྱེན་ནི་རུང་བ་མ་ཡིན་ཏེ། འབྲས་བུ་མེད་ན་བུ་མེད་པའི་ཕ་ལྟར་གང་གི་རྐྱེན་དུ་འགྱུར་ཏེ། རྟེན་མེད་པའི་ཕྱིར་རོ། །འབྲས་བུ་སྔར་ཡོད་པའི་དོན་ལ་ཡང་རྐྱེན་ནི་རུང་བ་མ་ཡིན་ཏེ། འཁར་གཞོང་ལ་རྒྱ་ཤུག་ལྟར་གྲུབ་ཟིན་པ་བསྒྲུབ་མི་དགོས་པས་རྐྱེན་གྱིས་ཅི་ཞིག་བྱ་སྟེ་དོན་མེད་པའི་ཕྱིར་རོ། །བཞི་པ་ལ་བཞི་སྟེ། རྒྱུ་རྐྱེན་ཀྱི་མཚན་ཉིད་དགག དམིགས་རྐྱེན་གྱི་མཚན་ཉིད་དགག དེ་མ་ཐག་རྐྱེན་གྱི་མཚན་ཉིད་དགག བདག་རྐྱེན་གྱི་མཚན་ཉིད་དགག་པའོ། །དང་པོ་ནི། དེ་ལྟ་ནའང་བཅོམ་ལྡན་འདས་ཀྱིས་སྒྲུབ་པར་བྱེད་པ་ནི་རྒྱུའོ། །ཞེས་པ་ལ་སོགས་པ་རྐྱེན་བཞི་པོ་སོ་སོའི་མཚན་ཉིད་གསུངས་པས་དེ་དག་རང་བཞིན་གྱིས་ཡོད་པས་ཡིན་ནོ། །ཞེ་ན། གལ་ཏེ་བསྒྲུབ་བྱ་འབྲས་བུ་འགའ་ཞིག་གྲུབ་ན། དེའི་ངོ་བོ་སྒྲུབ་པར་བྱེད་པ་རྒྱུའི་རྐྱེན་ཡོད་པར་འགྱུར་བ་ཞིག་ན་ཡང་གང་གི་ཚེ་བསྒྲུབས་བྱ་འབྲས་བུའི་ཆོས་ནི་སྔ་ནས་ཡོད་པའི་གྲུབ་པ་ལ་ཅི་ལྟར་འབྲས་བུའི་ངོ་བོ་སྒྲུབ་པར་བྱེད་པའི་རྒྱུའི་རྐྱེན་ཞེས་བྱ་སྟེ། གྲུབ་ཟིན་པའི་ཕྱིར་རོ། །དེ་བཞིན་དུ་མེད་པ་དང་ཡོད་མེད་གཉིས་ཀ་མི་འགྲུབ་པ་དེའི་ཚེ་ཅི་ལྟར་འབྲས་བུའི་ངོ་བོ་སྒྲུབ་པར་བྱེད་པའི་རྒྱུ་ཞེས་བྱ་སྟེ་བསྒྲུབ་པར་མི་ནུས་པ་དང་འགལ་ཞིང་གཉིས་ཀ་ལ་བཀོད་པའི་སྐྱོན་དུ་འགྱུར་བའི་ཕྱིར་རོ། །འབྲས་བུ་སྒྲུབ་བྱེད་ཀྱི་རྒྱུར་མ་གྲུབ་པ་དེ་ལྟ་ཡིན་ན། རྒྱུའི་རྐྱེན་གྱི་མཚན་ཉིད་ཡོད་པས་རྒྱུ་ཡིན་ནོ་ཞེས་སྨྲ་བ་དེ་མི་རིག་གོ་ཞེས་པའོ། །གཉིས་པ་ནི། ཅི་དམིགས་བྱེད་ཡོད་པའམ། མེད་པ་ལ་དམིགས་བྱའི་རྐྱེན་རྟོགས། དང་པོ་འགོག་པ་ནི། ཕྱེད་སྔ་ཕྱི་གོ་བཟློག་སྟེ། ཅི་སྟེ་འབྲས་བུ་སེམས་དང་སེམས་ལས་བྱུང་བ་ཡོད་པའི་ཆོས་ནི་ཆོས་ཅན། དམིགས་པའི་རྐྱེན་ལ་ལྟོས་པའི་ཡོད་པར་ག་ལ་འགྱུར་ཏེ་དམིགས་བྱ་མེད་ན་སྟེ་དེའི་སྔ་རོལ་ན་ཡོད་ཟིན་པའི་ཕྱིར་རོ། །དེས་ན་དམིགས་བྱེད་ཡེ་ནས་ཡོད་པའི་ཆོས་འདི་དམིགས་པའི་རྐྱེན་མེད་པ་ཁོ་ན་ལ་ཁྱོད་ཀྱིས་རང་དགས་དམིགས་བྱའི་རྐྱེན་དང་བཅས་པར་ཉེ་བར་བསྟན་པར་ཟད་དོ། །ཞེས་པའོ། །དམིགས་བྱེད་མེད་པའི་དམིགས་རྐྱེན་འགོག་པ་ནི། འབྲས་བུ་དམིགས་བྱེད་མེད་པའི་ཆོས་འདི་དམིགས་བྱའི་རྐྱེན་མེད་པ་ཁོ་ན་ཡིན་པར་གྱུར་པ་ལ། ཁྱོད་ཀྱིས་དམིགས་བྱའི་རྐྱེན་དང་བཅས་པ་ཁོ་ནར་བསྟན་པ་ཡིན་ནོ། །དེ་ཉིད་ཅི་སྟེ་ཞེ་ན། ཆོས་འདི་དམིགས་མེད་ན་སྟེ་དམིགས་པར་བྱེད་པའི་ཆོས་མེད་པའི་ཕྱིར། དེའི་དམིགས་བྱ་ཡོད་པར་ག་ལ་འགྱུར་ཞེས་པའོ། །གསུམ་པ་ནི། རྒྱུ་འགགས་མ་ཐག་པ་འབྲས་བུ་འབྱུང་བའི་དེ་མ་ཐག་པའི་རྐྱེན་ཡིན་པ་མི་རིག་སྟེ། མྱུ་གུ་ལ་སོགས་པ་འབྲས་བུའི་ཆོས་རྣམས་སྐྱེས་པ་མ་ཡིན་ན་སྟེ། མ་སྐྱེས་པ་དེ་སྲིད་དུ་ས་བོན་ལ་སོགས་པ་རྒྱུའི་ཆོས་རྣམས་འགག་པ་འཐད་པར་མི་འགྱུར་བས་འབྲས་བུ་མ་སྐྱེས་པར་རྒྱུ་མི་འགག་པ་དེའི་ཕྱིར། འོན་ཏེ་འབྲས་བུ་མ་སྐྱེས་པར་རྒྱུ་འགག་ན་ཡང་འབྲས་བུ་ཕྱི་མ་སྐྱེ་བའི་རྐྱེན་ཡང་གང་ཞིག་ཡིན་ཏེ། མ་ཡིན་པར་ཐལ། འགགས་པ་ནི་མེད་པ་ཡིན་པའི་ཕྱིར་རོ། །བཞི་པ་ནི། རྐྱེན་གསུམ་ལས་གཞན་པའི་དངོས་པོ་འདི་ཡོད་ན་འབྲས་བུ་འདི་འབྱུང་བ་ཞེས་བྱ་བ་དེ་བདག་རྐྱེན་གྱི་མཚན་ཉིད་ནི་འཐད་པ་མ་ཡིན་ཏེ། གང་གི་ཕྱིར་ཡོད་པ་ཉིད་གྲུབ་པའམ་ཡོད་པ་མ་ཡིན་ན་སྟེ། འདི་ཡོད་པས་ཞེས་པ་རྒྱུའི་ཡོད་པ་དང་། འདི་འབྱུང་ཞེས་པ་འབྲས་བུའི་ཡོད་པས་བསྡུས་པའི་དངོས་པོ་རྣམས་རྟེན་ཅིང་འབྲེལ་བར་འབྱུང་བ་ཡིན་པས་གཟུགས་བརྙན་ལྟར་རང་བཞིན་མེད་པའི་ཕྱིར་རོ། །གཉིས་པ་འཇིག་རྟེན་ལ་གྲགས་པའི་གཞན་སྐྱེ་དགག་པ་ལ་འཇིག་རྟེན་པ་དང་། རྟོག་གེ་བ་ཁ་ཅིག གཞན་སྐྱེའི་སྒྲུབ་བྱེད་ཀྱི་རིག་པས་ཅི་ཞིག་བྱ། མྱུ་གུ་དང་སྣམ་བུ་ལ་སོགས་པ་རང་ལས་གཞན་པའི་ས་བོན་དང་། སྣལ་མ་དང་། ཐགས་ཟངས་ལ་སོགས་པ་ལས་སྐྱེ་བ་མཐོང་བས་གཞན་ལས་སྐྱེ་བ་ཡོད་དོ་ཞེས་སྨྲའོ། །འདིའི་ལན་ལ་འཇུག་པར་ཐོག་མར་བདེན་པ་གཉིས་ཀྱི་རྣམ་དབྱེ་བཤད་ནས། འཇིག་རྟེན་པའི་གཞན་ལས་སྐྱེ་བ་མཐོང་བ་ཉིད་ཀྱང་མི་འགྲུབ་ལ། མཐོང་ན་ཡང་དེ་ནི་ཀུན་རྫོབ་བདེན་པའི་རྣམ་གཞག་ཡིན་པས་གཞན་སྐྱེ་མེད་པ་དོན་དམ་བདེན་པའི་རྣམ་གཞག་ལ་མི་གནོད་ཅེས་རྒྱས་པར་འཆད་ཅིང་། འདིར་ནི་དོན་དམ་བདེན་པའི་རྣམ་གཞག་དེ་ཉིད་རིག་པས་བསྒྲུབས་པ་ལ་གསུམ་སྟེ། འབྲས་བུ་རྐྱེན་ལ་ཡོད་མེད་བརྟགས་ནས་དགག འབྲས་བུ་རྐྱེན་གྱི་རང་བཞིན་ཡིན་མིན་བརྟགས་ནས་དགག དེ་གཉིས་ཀའི་གྲུབ་དོན་བསྡུ་བའོ། །དང་པོ་ནི། འབྲས་བུ་དེ་དག་རྐྱེན་ལ་ཡོད་པའམ་མེད་པ་ཞིག་སྐྱེ། དང་པོ་ལྟར་ན་རྐྱེན་དེ་དག་ལ་འབྲས་བུ་དེ་ཡོད་ན་དེ་ལས་སྐྱེ་བར་འགྱུར་བ་ཞིག་ན་ཡང་། རྐྱེན་དེ་རྣམས་ཉིད་སོ་སོ་བ་ལ་འབྲས་བུར་འདོད་པ་དེ་དག་ནི་མེད་པ་ཉིད་དེ། འབྲས་བུ་གཅིག་རྐྱེན་དུ་མ་ལ་ཡོད་ན་འབྲས་བུ་དུ་མར་འགྱུར་བའི་ཕྱིར་དང་། སྣང་རུང་མ་དམིགས་པའི་ཕྱིར་རོ། །རྐྱེན་དེ་དག་རྣམས་འདུས་པ་ལ་ཡང་འབྲས་བུ་མེད་པ་ཉིད་དེ། རེ་རེ་བ་ལ་མེད་པའི་ཕྱིར། གཉིས་པ་ལྟར་ན། འབྲས་བུ་མྱུ་གུའམ་སྣམ་བུ་དེ་ནི་རྐྱེན་སྣལ་མ་དང་། ས་བོན་ལ་སོགས་པ་ལས་ཅི་ལྟར་སྐྱེ་སྟེ། སྐྱེ་བ་མེད་པར་ཐལ། རྐྱེན་རྣམས་ལ་ནི་གང་མེད་པ་སྟེ། རྐྱེན་དེ་རྣམས་ལ་མེད་པའི་ཕྱིར་རོ། །ཁྱབ་པ་མ་གྲུབ་ཅེས་ནི་བརྗོད་པར་མི་ནུས་ཏེ། ཅི་སྟེ་འབྲས་བུ་མྱུ་གུ་དང་། སྣམ་བུ་དེ་ནི་རྐྱེན་ས་བོན་དང་སྣལ་མ་ལ་སོགས་པ་མེད་པར་ཡང་རྐྱེན་དེ་དག་ལས་སྐྱེ་བར་འགྱུར་ན། རྐྱེན་མ་ཡིན་པ་མེ་དང་འཇག་མ་ལ་སོགས་པ་ལས་ཀྱང་འབྲས་བུ་དེ་དག་རྒྱུ་མཚན་ཅིའི་ཕྱིར་སྐྱེ་བར་མི་འགྱུར་ཏེ། འབྲས་བུ་མེད་པ་ཉིད་དུ་མཚུངས་པའི་ཕྱིར་རོ། །གཉིས་པ་ནི། ཡང་འབྲས་བུ་རྐྱེན་གྱི་རང་བཞིན་ཡིན་པའམ་མ་ཡིན་པ་ཞིག་སྐྱེ། དེ་ལ་གྲངས་ཅན་པ་དག་མྱུ་གུ་དང་སྣམ་བུ་ལ་སོགས་པ་ས་བོན་དང་། སྣལ་མ་ལ་སོགས་པའི་རང་བཞིན་ཡིན་པ་སྐྱེ་བས་འབྲས་བུ་རྐྱེན་ལ་ཡོད་དམ་མེད་སྙམ་པའི་བསམ་པ་ཡང་མི་འཇུག་གོ་སྙམ་ན། རྐྱེན་དེ་རྣམས་ལ་བདག་གི་ངོ་བོའམ་རང་བཞིན་ཡོད་པ་མིན་ཏེ། ཡུལ་དུས་ཀྱི་ཆ་ཤས་དུ་མ་ཡོད་དགོས་པའི་རང་གི་ཆ་ཤས་ལ་བརྟེན་ནས་བཏགས་པ་ཙམ་ཡིན་པའི་ཕྱིར་རོ། །དེས་ན་རྐྱེན་རྣམས་ཆོས་ཅན། འབྲས་བུ་གང་ཡིན་པ་དེ་ནི་ཅི་ལྟར་ན་རྐྱེན་གྱི་རང་བཞིན་ཡིན་ཏེ་མ་ཡིན་པར་ཐལ། རྐྱེན་རྣམས་ཉིད་བདག་ཉིད་དངོས་མིན་ལས་ཏེ་རང་བཞིན་དུ་མ་གྲུབ་པའི་ཕྱིར། མོ་གཤམ་གྱི་བུ་བཞིན་ནོ། །ཡང་གཉིས་པ་ལྟར་རྐྱེན་དེ་དག་གི་རང་བཞིན་མ་ཡིན་པ་ཞིག རྐྱེན་དེ་དག་ལས་སྐྱེའོ་སྙམ་ན། རྐྱེན་མིན་རང་བཞིན་འབྲས་བུ་ནི། ཡོད་པ་མིན་ཏེ་མྱུ་གུ་དང་སྣམ་བུ་ལ་སོགས་པ་རྐྱེན་ས་བོན་དང་། སྣལ་མའི་རང་བཞིན་དུ་མེད་ན། རྐྱེན་མ་ཡིན་པས་མེ་དང་འཇག་མ་ལ་སོགས་པའི་རང་བཞིན་དུ་འགལ་བའི་ཕྱིར་རོ། །གསུམ་པ་ནི། གལ་ཏེ་འབྲས་བུ་མེད་པ་རྐྱེན་ལས་སྐྱེ་ན། རྐྱེན་མ་ཡིན་པ་ལས་ཀྱང་སྐྱེ་བར་འགྱུར་རོ། །ཞེས་ཁྱོད་ཀྱི་སྨྲས་པ་ཡིན་ཏེ། དེས་ན་རྐྱེན་དང་རྐྱེན་མིན་གྱི་ངེས་པ་ཡོད་པས། དེའི་ལྟོས་ས་འབྲས་བུ་ཡང་ཡོད་དོ་སྙམ་ན། འབྲས་བུ་དེ་ལ་ལྟོས་པའི་རྐྱེན་མིན་དང་། རྐྱེན་ཡོད་པར་ག་ལ་འགྱུར་ཏེ་མེད་པར་ཐལ། ཁོ་བོ་ཅག་གིས་དེ་སྐད་དུ་བརྗོད་པ་ནི་འཇིག་རྟེན་ལ་གྲགས་པ་ཙམ་གྱི་དབང་དུ་བྱས་པ་ཡིན་གྱི། རྣམ་པར་དཔྱད་ན་འབྲས་བུ་རྐྱེན་ལ་ཡོད་མེད་དང་། འབྲས་བུ་རྐྱེན་གྱི་རང་བཞིན་ཡིན་མིན་གྱི་སྐྱེ་བ་བཀག་པའི་ཚུལ་གྱིས་འབྲས་བུ་མེད་པས་ནའོ། །གཉིས་པ་ལུང་དང་སྦྱར་བ་ནི། ཅི་སྐད་དུ། འཕགས་པ་དཀོན་མཆོག་འབྱུང་གནས་ཀྱི་མདོ་ལས། གང་ནའང་སྟོང་པ་རིག་པ་མེད་པ་ནི། །ནམ་མཁའ་བར་སྣང་བྱ་ཡི་རྗེས་དང་མཚུངས། །གང་ནའང་ངོ་བོ་ཉིད་འགའ་ཡོད་མིན་པ། །དེ་ནི་ནམ་ཡང་གཞན་གྱི་རྒྱུར་མི་འགྱུར། །གང་གི་ངོ་བོ་ཉིད་ནི་མི་རྙེད་པ། །རང་བཞིན་མེད་དེ་ཇི་ལྟར་གཞན་གྱི་རྐྱེན། །རང་བཞིན་མེད་པར་གཞན་གྱིས་ཅི་ཞིག་བསྐྱེད། །རྒྱུ་དེ་བདེ་བར་གཤེགས་པས་བསྟན་པ་འོ། །ཐམས་ཅད་ཆོས་ཀྱང་མི་གཡོ་བརྟན་པར་གནས། །མི་འགྱུར་འཚེ་བ་མེད་ཅིང་ཞི་བ་སྟེ། །ཇི་ལྟར་ནམ་མཁའ་ཤེས་པ་མེད་པ་སྟེ། །དེ་ལ་མི་ཤེས་འགྲོ་བ་རྨོངས་པར་འགྱུར། །ཇི་ལྟར་རི་བོ་དག་ནི་མི་སྒུལ་བ། །དེ་བཞིན་ཆོས་རྣམས་རྟག་ཏུ་སྐྱོད་མི་ནུས། །འཆི་འཕོ་མེད་ཅིང་སྐྱེ་བ་མེད་པ་ཡི། །ཆོས་རྣམས་དེ་ལྟར་རྒྱལ་བས་རབ་ཏུ་བསྟན། །ཞེས་བྱ་བ་ལ་སོགས་པ་དང་། དེ་བཞིན་དུ། ཆོས་གང་སྐྱེ་བ་མེད་ཅིང་འབྱུང་བ་མེད། །འཆི་འཕོ་མེད་ཅིང་རྒ་བར་འགྱུར་བ་མེད། །མི་ཡི་སེང་གེ་ཡིས་ནི་དེར་སྟོན་ཅིང་། །སེམས་ཅན་བརྒྱ་ཕྲག་དག་ནི་དེ་ལ་བཀོད། །གང་ལ་ངོ་བོ་ཉིད་ནི་གང་ཡང་མེད། །གཞན་ཡང་མ་ཡིན་དུས་ཀྱང་མ་རྙེད་པ། །ནང་ན་མ་ཡིན་ཕྱི་རོལ་དག་ན་ཡང་། །མི་རྙེད་དེ་དག་ལ་ནི་མགོན་པོས་བཀོད། །བདེ་བར་གཤེགས་པས་ཞི་བའི་འགྲོ་གསུངས་ཀྱང་། །འགྲོ་བ་གང་ཡང་རྙེད་པར་མི་འགྱུར་ཏེ། །དེ་དག་འགྲོ་ལ་གྲོལ་བར་རྣམ་པར་གསུངས། །གྲོལ་ནས་སེམས་ཅན་མང་པོ་གྲོལ་བར་མཛད། །ཞེས་གསུངས་པ་རྣམས་ཀྱི་དོན་རིགས་པས་བསྒྲུབ་པའོ། །གསུམ་པ་རབ་བྱེད་ཀྱི་མཚན་བསྟན་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་རྐྱེན་བརྟག་པ་ཞེས་བྱ་བ་སྟེ་རབ་ཏུ་བྱེད་པ་དང་པོའི་རྣམ་པར་བཤད་པའོ།། ༈ །།གཉིས་པ་འགྲོ་འོང་དགག་པ་ལ་གསུམ་ལས། དང་པོ་ལ་རབ་བྱེད་ཀྱི་འབྲེལ་ནི། དེ་ལྟར་རྐྱེན་བརྟག་པར་རྟེན་ཅིང་འབྲེལ་བར་འབྱུང་བ་སྐྱེ་བ་མེད་པར་བསྟན་པ་ཉིད་ཀྱིས་འགྲོ་བ་མེད་པ་ལ་སོགས་པ་ཤུགས་ལ་གྲུབ་ཀྱང་འཇིག་རྟེན་ན་གྲགས་པ་གཙོ་ཆེ་བའི་འགྲོ་འོང་མེད་པ་དངོས་སུ་གྲུབ་པར་བྱ་བའི་ཕྱིར་ཕ་རོལ་ལ་རབ་ཏུ་གྲགས་པའི་འཐད་པ་བརྗོད་དགོས་སོ་སྙམ་པ་ལ་འགྲོ་འོང་རང་ལྡོག་ནས་དངོས་སུ་དགག་པར་བྱ་བའི་ཕྱིར་རབ་ཏུ་བྱེད་པ་འདི་གསུངས་སོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གཉིས་ཏེ། འགྲོ་འོང་འགོག་པའི་རིག་པ་རྒྱས་པར་བཤད། རིག་པ་བསྡུས་སྟེ་བསྟན་པའོ། །དང་པོ་ལ་ལྔ་སྟེ། ལས་ལ་དུས་གསུམ་དུ་བརྟགས་ནས་དགག བྱེད་པ་པོ་ལ་རྣམ་གྲངས་གསུམ་དུ་བརྟགས་ནས་དགག འགྲོ་འོང་ཡོད་པའི་སྒྲུབ་བྱེད་དགག འགྲོ་བའི་བྱ་བ་དང་འགྲོ་བ་པོ་གཅིག་དང་ཐ་དད་བརྟགས་ནས་དགག འགྲོ་བའི་བྱ་བ་གཅིག་དང་ཐ་དད་བརྟགས་ནས་དགག་པའོ། །དང་པོ་ལ་གཉིས་ཏེ། ལམ་གསུམ་ལ་འགྲོ་བ་སྤྱིར་དགག་པ། བགོམ་བཞིན་པའི་ལམ་ལ་འགྲོ་བ་བྱེ་བྲག་ཏུ་དགག་པའོ། །དང་པོ་ནི། འགྲོ་བའི་བྱ་བ་ནི་ལས་དང་བྱེད་པ་པོས་བསྒྲུབ་པ་ཡིན་པས་དེ་ལ་ལས་དང་བྱེད་པ་པོ་གཉིས་ཀྱིས་ཁྱབ་དགོས་ལ། དེ་ཡང་ལམ་ནི་བྱ་བའམ། འགྲོ་བ་འཇུག་པའི་གཞི་ལས་ཉིད་ཡིན་ཏེ། དེ་ལ་འགྲོ་བའི་བྱ་བ་འགགས་པ་སོང་བ་དང་། མ་སྐྱེས་པ་མ་སོང་བ་དང་། སྐྱེས་ལ་མ་འགགས་པ་བགོམ་བཞིན་པའི་ལམ་དང་གསུམ་ལས་མེད་པས། དེ་ལ་རེ་ཞིག་སོང་བའི་ལམ་ལ་ནི་མི་འགྲོ་སྟེ། འགྲོ་བའི་བྱ་བ་འགགས་ནས་མེད་པའི་ཕྱིར་རོ། །མ་སོང་བའི་ལམ་ལ་ཡང་འགྲོ་བ་མེད་དེ། འགྲོ་བའི་བྱ་བ་མ་སྐྱེས་ནས་མེད་པའི་ཕྱིར་རོ། །བགོམ་བཞིན་པའི་ལམ་ལ་ཡང་མེད་དེ། སོང་དང་མ་སོང་ལས་མ་གཏོགས་པའི་བགོམ་བཞིན་པར་ཤེས་པའམ་དམིགས་པར་མི་འགྱུར་བའི་ཕྱིར་རོ། །གཉིས་པ་ལ་གཉིས་ཏེ། འདོད་པ་བརྗོད། དེ་དགག་པའོ། །དང་པོ་ནི། སོང་བ་དང་མ་སོང་བ་ལ་འགྲོ་བ་མེད་ཀྱི་བགོམ་པ་ལ་ནི་འགྲོ་བ་ཡོད་པ་ཉིད་དེ། གང་གི་ཕྱིར་གཡོ་བ་དེ་ཡང་བགོམ་པ་ལ་ཡོད་པ་དེའི་ཕྱིར་རོ། །དེའི་ཁྱབ་པ་བསྒྲུབ་པ་ནི་འགྲོ་བ་པོ་ཡུལ་གང་ན་སྔར་གྱི་མཚན་ཉིད་ཅན་གྱི་གཡོ་བ་ཡོད་པ་དེ་ན་འགྲོ་བ་ཡང་དམིགས་པའི་ཕྱིར། ཕྱོགས་ཆོས་བསྒྲུབ་པ་ནི་སྤྱིར་གཡོ་བ་ཙམ་མངོན་སུམ་གྱིས་དམིགས་ཤིང་དེ་འགག་པས་སོང་བ་ལ་ཡང་ཡོད་པ་མིན། མ་སྐྱེས་པས་མ་སོང་བ་ལ་ཡང་ཡོད་པ་མིན་པའི་ཕྱིར། གཞན་འོས་མེད་པས་བགོམ་པ་ཁོ་ན་ལ་ཡོད་པར་གྲུབ་བོ་སྙམ་ན། གཉིས་པ་ལ་གསུམ་སྟེ། ལས་ཚིག་དོན་དང་བཅས་ན་བྱ་ཚིག་དོན་གྱིས་སྟོང་། བྱ་ཚིག་དོན་དང་བཅས་ན་ལས་ཚིག་དོན་གྱིས་སྟོང་། གཉིས་ཀ་དོན་དང་བཅས་ན་ཧ་ཅང་ཐལ་བར་འགྱུར་བའོ། །དང་པོ་ནི། འགྲོ་བ་པོ་ལྷ་བྱིན་ལྟ་བུ་གཅིག་ཡུལ་གཞན་དུ་འགྲོ་བ་ན་འགྲོ་བའི་བྱ་བ་གཅིག་ལས་མེད་པས་བྱ་བ་གཅིག་པོ་དེ་བགོམ་པ་ཞེས་པའི་ལས་ཀྱི་ཚིག་དང་འབྲེལ་ན་བགོམ་པ་ལ་འགྲོ་ཞེས་པའི་ངག་བརྗོད་བྱའི་དོན་དང་ལྡན་པ་ཡིན་པར་ནི་ཅི་ལྟ་བུར་ན་འཐད་པར་འགྱུར་ཏེ་མི་འགྱུར་བར་ཐལ། འགྲོ་བའི་བྱ་བ་གཅིག་པོ་དེ་ནི་བགོམ་པ་ཞེས་པའི་ཚིག་གི་དོན་དུ་སོང་ཞིང་བྱ་བ་གཉིས་པ་ཡང་མེད་པའི་ཕྱིར་རོ། །འགྲོ་བའི་བྱ་བ་བགོམ་པ་ཞེས་པའི་ལས་ཚིག་དང་འབྲེལ་དགོས་པ་ཅི་སྟེ་སྙམ་ན། གང་གི་ཚེ་སྟེ་གང་གི་ཕྱིར་ན་འགྲོ་བའི་བྱ་བ་མེད་པའི་བགོམ་པ་ཞེས་པ་ལས་ཀྱི་ཚིག་ལ་བརྗོད་བྱའི་དོན་དང་ལྡན་པ་འཐད་པ་མེད་པའི་ཕྱིར་རོ། །གཉིས་པ་ནི། འགྲོ་ཞེས་པའི་ཚིག་འགྲོ་བའི་བྱ་བ་དང་འབྲེལ་བས་ཉེས་པ་དེར་མི་འགྱུར་རོ་སྙམ་ན། རྒོལ་བ་གང་གིས་འགྲོ་བའི་བྱ་བ་དང་མི་ལྡན་པས་བགོམ་པ་མིང་ཙམ་དུ་གྱུར་པ་ལ་འགྲོ་བ་ཞེས་པའི་བྱ་ཚིག་ལ་འགྲོ་བའི་བྱ་བ་ཡོད་པར་འདོད་པའི་ཕྱོགས་དེ་ལ་བགོམ་པ་ཞེས་པའི་ལས་ཀྱི་ཚིག་ལ་འགྲོ་ཞེས་པའི་ཚིག་གི་དོན་མེད་པར་ཐལ་བར་འགྱུར་ཏེ། གང་གི་ཕྱིར་འགྲོ་བའི་བྱ་བ་ནི་གཅིག་ལས་མེད་ལ། དེ་བགོམ་པ་མིང་ཙམ་དུ་གྱུར་པ་ལ་འགྲོ་ཞེས་པའི་བྱ་ཚིག་དང་འབྲེལ་བ་ཡིན་པའི་ཕྱིར། གསུམ་པ་ནི། བགོམ་པ་ཞེས་པའི་ལས་ཚིག་དང་། འགྲོ་ཞེས་པའི་བྱ་ཚིག་གཉིས་ཀ་ལ་འགྲོ་བའི་བྱ་བ་ཡོད་པས་ཉེས་པ་དེ་གཉིས་ཀར་མི་འགྱུར་རོ་སྙམ་ན། དེ་ལྟར་བགོམ་པ་ཞེས་པའི་ལས་ཀྱི་ཚིག་དང་། འགྲོ་ཞེས་པའི་བྱ་ཚིག་གཉིས་ཀ་ལ་དོན་ཡོད་ན་ནི། འགྲོ་བ་པོ་གཅིག་ལ་འགྲོ་བའི་བྱ་བ་གཉིས་སུ་ཐལ་བར་འགྱུར་ཏེ། འགྲོ་བའི་བྱ་བ་གང་གིས་བགོམ་པའི་ཐ་སྙད་དུ་འཇོག་པ་དེ་དང་ནི་བགོམ་པར་གྱུར་པ་དེ་ལ་ཡུལ་གཞན་དུ་ཕྱིན་པའི་འགྲོ་བའི་བྱ་བ་གང་ཡིན་པ་གཉིས་སུ་འགྱུར་བའི་ཕྱིར། འགྲོ་བའི་བྱ་བ་གཉིས་པོ་འདིར་ཐལ་བར་འགྱུར་བར་འདོད་ན། དེ་འདོད་པ་མི་ནུས་ཏེ། དེ་ལྟར་ན་འགྲོ་བ་པོའང་གཉིས་སུ་ཐལ་བར་འགྱུར་བའི་ཕྱིར་རོ། །འགྲོ་བའི་བྱ་བ་གཉིས་ཡོད་ཀྱང་འགྲོ་བ་པོ་གཉིས་མེད་ཞེས་ཀྱང་བརྗོད་པར་མི་ནུས་ཏེ། སྤྱིར་བྱ་བ་ཐམས་ཅད་ལས་དང་། བྱེད་པ་པོ་གཉིས་ཀྱིས་བསྒྲུབ་པ་ཡིན་པས་གང་གི་ཕྱིར། འགྲོ་བ་པོའམ་བྱེད་པ་པོ་མེད་པ་ནི་འགྲོ་བའི་བྱ་བ་ཡོད་པ་འཐད་པར་མི་འགྱུར་བའི་ཕྱིར་རོ། །གལ་ཏེ་འགྲོ་བ་པོ་གཅིག་ལ་དུས་གཅིག་གི་ཚེ་འགྲོ་བའི་བྱ་བ་གཉིས་ཡོད་པར་མི་འགལ་ཏེ། བྱེད་པ་པོ་ལྷ་བྱིན་ལྟ་བུ་གཅིག་ལ་དུས་གཅིག་གི་ཚེ་ལྟ་བ་དང་། སྨྲ་བ་དང་། འཇུག་པ་ལ་སོགས་པའི་བྱ་བ་དུ་མ་དང་ལྡན་པ་མཐོང་བའི་ཕྱིར་རོ་སྙམ་ན། དེའི་ལན་དུ་འགྲེལ་པར། མ་ཡིན་ཏེ། གང་གི་ཕྱིར་ནུས་པ་བྱེད་པ་པོ་ཡིན་གྱི་རྫས་ནི་མ་ཡིན་ལ། བྱ་བ་ཐ་དད་པས་དེའི་སྒྲུབ་བྱེད་ནུས་པ་ཡང་ཐ་དད་པར་གྲུབ་པ་ཡིན་ཏེ། འཇུག་པའི་བྱ་བས་སྨྲ་བ་པོར་འགྱུར་བ་ནི་མ་ཡིན་ནོ། །ཞེས་པ་དང་། གཞན་ཡང་གཅིག་དུས་གཅིག་ཏུ་བྱ་བ་འདྲ་བ་གཉིས་ཀྱི་བྱེད་པ་པོ་ཉིད་ཡིན་པར་ཡང་མ་མཐོང་སྟེ། དེའི་ཕྱིར་འགྲོ་བ་པོ་གཅིག་ལ་འགྲོ་བ་གཉིས་པ་མེད་དོ་ཞེས་པའི་ལན་གཉིས་མཛད་པ་ལ། རྨ་བྱས། སྔ་མ་ལྟར་ན་འགྲོ་བ་པོ་གང་ཟག་གི་རྫས་གཅིག་ལ་ཡང་འགྲོ་བའི་ནུས་པ་གཉིས་ཡོད་པས་འགྲོ་བའི་བྱ་བ་གཉིས་ཀྱང་མི་འགལ་བས་སྐབས་དོན་འགྲོ་བ་པོ་གང་ཟག་གི་རྫས་གཅིག་ལ་དུས་གཅིག་གི་ཚེ་འགྲོ་བའི་བྱ་བ་གཉིས་དགག་པར་མི་ནུས་པས་ལན་ཕྱི་མ་ཉིད་ལེགས་པར་སེམས་སོ་ཞེས་གསུངས་ཀྱང་། འགྲེལ་ཚིག་སྔ་མའི་དོན་བསྟན་བཅོས་རྩ་བར་འགྲོ་བ་པོ་ཞེས་པ་བྱེད་པ་པོ་ལ་འཇོག་དགོས་པས། བྱེད་པ་པོ་གཅིག་ལ་བྱ་བ་གཉིས་པ་མེད་པའི་ཕྱིར་ན་ལྟ་བ་དང་། སྨྲ་བ་ལ་སོགས་པའི་བྱ་བ་རིགས་མི་འདྲ་བ་དུ་མ་བྱེད་པའི་ཚེ་རྫས་གང་ཟག་བྱེད་པ་པོ་མ་ཡིན་གྱི་ནུས་པ་བྱེད་པ་པོ་ཡིན་པས་ལྟ་བའི་ནུས་པས་ལྟ་བའི་བྱ་བ་ཁོ་ན་བྱེད། སྨྲ་བའི་ནུས་པས་སྨྲ་བའི་བྱ་བ་ཁོ་ན་བྱེད་ཞེས་པའི་དོན་ཡིན་གྱི་གང་ཟག་གི་རྫས་གཅིག་ལ་ཡང་འགྲོ་བའི་ནུས་པ་གཉིས་ཡོད་པས་འགྲོ་བའི་བྱ་བ་གཉིས་ཀྱང་མི་འགལ་བ་དོན་མ་ཡིན་པས། སྐབས་དོན་ལས་ཉམས་པར་ག་ལ་འགྱུར། འགྲེལ་ཚིག་ཕྱི་མའི་དོན། བྱེད་པ་པོ་གང་ཟག་ལ་འཇོག་པའི་ཚེ་བྱེད་པ་པོ་གཅིག་ལ་བྱ་བ་རིགས་འདྲ་གཉིས་མེད་པས། རྩ་བར། འགྲོ་བ་གཉིས་སུ་ཐལ་འགྱུར་ན། །འགྲོ་བ་པོ་ཡང་གཉིས་སུ་འགྱུར། །ཞེས་པ་དང་མི་འགལ་ལ། བྱེད་པ་པོ་གཅིག་ལ་བྱ་བ་རིགས་མི་འདྲ་བ་དུ་མ་ཡོད་པ་ནི་མ་བཀག་ཅེས་པའི་དོན་ཏོ། །གཉིས་པ་བྱེད་པ་པོ་ལ་རྣམ་གྲངས་གསུམ་དུ་བརྟགས་ནས་དགག་པ་ལ་གསུམ་སྟེ། འགྲོ་བའི་བྱ་བ་དང་འགྲོ་བ་པོ་ཕན་ཚུན་ལྟོས་གྲུབ་ཏུ་བསྟན། རྣམ་གྲངས་གསུམ་གྱི་གང་ཟག་འགྲོ་བ་སྤྱིར་དགག འགྲོ་བཞིན་པ་འགྲོ་བ་བྱེ་བྲག་ཏུ་དགག་པའོ། །དང་པོ་ནི། གལ་ཏེ་འགྲོ་བའི་བྱ་བ་བྱེད་པ་པོ་འགྲོ་བ་པོ་མེད་པར་གྱུར་ན་འགྲོ་བའི་བྱ་བ་འཐད་པར་མི་འགྱུར་ཏེ་བྱ་བ་བྱེད་པ་པོ་ལ་ལྟོས་པའི་ཕྱིར། འགྲོ་བའི་བྱ་བ་མེད་ན་ཡང་འགྲོ་བ་པོའམ་བྱེད་པ་པོ་ཡོད་པ་ཉིད་དུ་ག་ལ་འགྱུར་ཏེ། བྱེད་པ་པོ་བྱ་བ་ལ་ལྟོས་པའི་ཕྱིར་རོ། །གཉིས་པ་ནི། དེ་ལྟར་འགྲོ་བའི་བྱ་བ་ལ་འགྲོ་བ་པོས་ཁྱབ་པ་དེ་འགྲོ་བའི་བྱ་བ་དང་ལྡན་པ་འགྲོ་བ་པོར་གྱུར་པ་ཞིག་འགྲོའམ། འགྲོ་བའི་བྱ་བ་དང་མི་ལྡན་པ་འགྲོ་བ་པོ་མ་ཡིན་པ་ཞིག་འགྲོའམ། དེ་གཉིས་ལས་མ་གཏོགས་པའི་གཞན་ཞིག་འགྲོ། དང་པོ་ལྟར་ན་དེ་ལ་རེ་ཤིག་འགྲོ་བ་པོར་གྱུར་པ་ནི་མི་འགྲོ་སྟེ་དེ་ལྟར་ན་འགྲོ་བའི་བྱ་བ་གཉིས་དགོས་པ་ལས་འགྲོ་བའི་བྱ་བ་གཉིས་མེད་པའི་ཕྱིར་རོ། །འགྲོ་བ་པོ་མིན་པ་ཡང་མི་འགྲོ་སྟེ། འགྲོ་བའི་བྱ་བ་དང་བྲལ་བའི་ཕྱིར་རོ། །འགྲོ་བ་པོ་ལས་ཀྱང་གཞན། འགྲོ་བ་པོ་མིན་པ་ལས་ཀྱང་གཞན་པའི་གསུམ་པ་གང་ཞིག་འགྲོ་བར་འགྱུར་ཏེ། གཉིས་པོ་དངོས་འགལ་ཡིན་པས་ཕུང་པོ་གསུམ་པ་མི་སྲིད་པའི་ཕྱིར་རོ། །གསུམ་པ་ལ་གསུམ་སྟེ། བྱ་ཚིག་དོན་དང་བཅས་ན་བྱེད་ཚིག་དོན་གྱིས་སྟོང་། བྱེད་ཚིག་དོན་དང་བཅས་ན་བྱ་ཚིག་དོན་གྱིས་སྟོང་། གཉིས་ཀ་དོན་དང་བཅས་ན་ཧ་ཅང་ཐལ་བར་འགྱུར་བའོ། །དང་པོ་ནི། འགྲོ་བ་པོ་ཡིན་མ་ཡིན་གཉིས་ཀ་ལས་ཀྱང་གཞན་པ་མི་འགྲོ་བ་བདེན་མོད་ཀྱི་འགྲོ་བ་པོ་ཉིད་འགྲོའོ་སྙམ་ན། རེ་ཤིག་འགྲོ་བ་པོ་འགྲོ་ཞེས་པའི་ངག་དོན་ལྡན་ཡིན་པར་ནི་ཅི་ལྟར་འཐད་པ་ཉིད་དུ་འགྱུར་ཏེ། གང་གི་ཚེ་སྟེ་གང་གི་ཕྱིར་འགྲོ་བ་པོ་ལྷ་བྱིན་གཅིག་ལ་འགྲོ་བའི་བྱ་བ་གཅིག་ལས་མེད་ལ་དེ་འགྲོ་ཞེས་པའི་ཚིག་གི་དོན་དུ་སོང་བས་འགྲོ་བའི་བྱ་བ་མེད་པར་ནི་འགྲོ་བ་པོའི་ཚིག་དོན་ལྡན་དུ་འཐད་པར་མི་འགྱུར་བའི་ཕྱིར། གཉིས་པ་ནི། འགྲོ་བའི་བྱ་བ་དེ་འགྲོ་བ་པོ་ཞེས་པའི་ཚིག་གི་དོན་དུ་སོང་བས་ཉེས་པ་དེར་མི་འགྱུར་རོ་སྙམ་ན། རྒོལ་བ་གང་གི་ཕྱོགས་ལ་འགྲོ་བ་པོ་འགྲོ་བའི་བྱ་བ་དང་འབྲེལ་བར་འདོད་པ་དེ་ལ་འགྲོ་བ་མེད་པའི་འགྲོ་བ་པོ་ཞེས་པའི་འགྲོ་བ་པོའི་སྒྲ་ནི་བྱ་བའི་དོན་ལ་འཇུག་པས་འགྲོ་ཞེས་པ་བྱ་བའི་སྒྲ་ལ་འགྲོ་བའི་བྱ་བ་མེད་པར་ཐལ་བར་འགྱུར་ཏེ། འགྲོ་བ་པོ་ཞེས་པ་བྱེད་པ་པོའི་སྒྲ་བརྗོད་བྱའི་དོན་འགྲོ་བའི་བྱ་བ་གཅིག་པོ་དེ་དང་འབྲེལ་བར་འདོད་པའི་ཕྱིར་རོ། །གསུམ་པ་ནི། འགྲོ་བའི་བྱ་བ་དེ་འགྲོ་བ་པོ་ཞེས་པའི་ཚིག་དང་། འགྲོ་བ་ཞེས་པའི་ཚིག་གཉིས་ཀ་དང་འབྲེལ་བས་ཉེས་པ་དེར་མི་འགྱུར་རོ་སྙམ་ན། དེ་ལྟར་ན་གལ་ཏེ་འགྲོ་བའི་བྱ་བ་དེ་འགྲོ་བ་པོ་ཞེས་པ་དང་། འགྲོ་ཞེས་པའི་ཚིག་གཉིས་ཀ་དང་འབྲེལ་བར་འགྱུར་ན་འགྲོ་བའི་བྱ་བ་གཉིས་སུ་ཐལ་བར་འགྱུར་ཏེ། འགྲོ་བའི་བྱ་བ་གང་གིས་ལྷ་བྱིན་འགྲོ་བ་པོའི་ཐ་སྙད་དུ་འཇོག་ཅིང་མངོན་པ་དང་། འགྲོ་བའི་བྱ་བ་དེ་དང་ལྡན་པས་འགྲོ་བ་པོར་གྱུར་ནས་གང་འགྲོ་བའི་བྱ་བ་གཉིས་ཡོད་པའི་ཕྱིར། འདོད་པར་མི་ནུས་པ་ནི་སྔར་བཞིན་ནོ། །གསུམ་པ་འགྲོ་འོང་ཡོད་པའི་སྒྲུབ་བྱེད་དགག་པ་ལ་ལྔ་སྟེ། རྒྱུ་རྩོམ་པ་དགག ལས་ལམ་དགག གཉེན་པོ་གནས་པ་དགག འབྲས་བུ་ལྡོག་པ་དགག གནས་པ་ཡོད་པའི་སྒྲུབ་བྱེད་དགག་པའོ། །དང་པོ་ལ་གཉིས་ཏེ། ལས་ཁས་བླངས་ཀྱང་རྩོམ་པ་མ་གྲུབ་པ། ལས་ཁས་མ་བླངས་པས་རྩོམ་པ་མ་གྲུབ་པའོ། །དང་པོ་ནི། གལ་ཏེ་འགྲོ་བའི་བྱ་བ་ནི་རང་བཞིན་གྱི་ཡོད་དེ། དེའི་རྩོམ་པ་ཡོད་པའི་ཕྱིར་རོ་སྙམ་ན། དེ་ལ་སོང་བའི་ལམ་ལ་ནི་འགྲོ་བའི་རྩོམ་པ་མེད་དེ། འགྲོ་བའི་རྩོམ་པ་འགག་ཟིན་པའི་ཕྱིར་རོ། །མ་སོང་བའི་ལམ་ལ་ཡང་འགྲོ་བའི་རྩོམ་པ་མེད་དེ། འགྲོ་བ་རྩོམ་ན་མ་སོང་བར་འགལ་བའི་ཕྱིར་རོ། །བགོམ་བཞིན་པའི་ལམ་ལ་ཡང་འགྲོ་བའི་རྩོམ་པ་ཡོད་པ་མ་ཡིན་ཏེ། སོང་མ་སོང་ལས་མ་གཏོགས་པའི་བགོམ་བཞིན་པ་མ་དམིགས་པའི་ཕྱིར། དེས་ན་ལམ་གང་དུ་འགྲོ་བ་རྩོམ་པར་བྱེད་དེ་མི་འཐད་པར་ཐལ། ལམ་གསུམ་ཆར་དུ་ཡང་འགྲོ་བའི་རྩོམ་པ་མེད་པའི་ཕྱིར། གཉིས་པ་ནི། འགྲོ་བ་རྩོམ་པ་ལ་མངོན་དུ་བརྩམ་བྱའི་ལས་གྲུབ་དགོས་པ་ལས་འགྲོ་བ་རྩོམ་པའི་སྔ་རོལ་ན་ལམ་གང་དུ་འགྲོ་བ་རྩོམ་པར་འགྱུར་བ་འགྲོ་བའི་བྱ་བ་འགག་པ་སོང་བའི་ལམ་མེད་ཅིང་། བྱ་བ་ད་ལྟར་བ་དང་ལྡན་པ་བགོམ་བཞིན་པའི་ལམ་ཡང་མེད་ལ། མ་སོང་བའི་ལམ་ཡང་འགྲོ་བ་རྩོམ་པ་ག་ལ་ཡོད་དེ། འགྲོ་བའི་བྱ་བ་མ་བརྩམས་ཤིང་མ་སྐྱེས་པའི་ཕྱིར་རོ། །གཉིས་པ་ནི། འགྲོ་བའི་བྱ་བ་ནི་རང་བཞིན་དུ་ཡོད་པ་ཉིད་དེ། དེའི་ལས་ལམ་གསུམ་པོ་སྔར་དངོས་སུ་མ་བཀག་པས་རང་བཞིན་དུ་ཡོད་པའི་ཕྱིར་རོ་སྙམ་ན། སྔར་བཤད་པའི་ཚུལ་གྱིས་འགྲོ་བའི་རྩོམ་པ་རྣམ་པ་ཐམས་ཅད་དུ་རིགས་ངོར་སྣང་ཞིང་མངོན་པ་མེད་པ་ཉིད་ཡིན་པའི་ཕྱིར་ན་འགྲོ་བའི་རྩོམ་པ་འགགས་པ་སོང་བའི་ལམ་ཅི་ཞིག་དང་། སྐྱེས་ལ་མ་འགག་པ་བགོམ་བཞིན་པའི་ལམ་ཅི་ཞིག་དང་། མ་སྐྱེས་པ་མ་སོང་བའི་ལམ་ཅི་ཞིག་རྣམ་པར་བརྟག་པར་བྱ་སྟེ། འབྲེལ་ཡུལ་འགྲོ་རྩོམ་མེད་ན་དེ་ལ་ལྟོས་པའི་ལམ་གསུམ་མི་རུང་བའི་ཕྱིར་རོ། །གསུམ་པ་ནི། འགྲོ་བའི་བྱ་བ་ནི་རང་བཞིན་གྱི་ཡོད་པ་ཉིད་དེ། དེའི་གཉེན་པོ་གནས་པ་རང་བཞིན་གྱིས་ཡོད་པའི་ཕྱིར་སྙམ་ན། རེ་ཤིག་འགྲོ་བ་པོ་མི་སྡོད་དེ། ཕན་ཚུན་འགལ་བའི་ཕྱིར་རོ། །འགྲོ་བ་པོ་ཡིན་པ་ཡང་སྡོད་པ་མིན་ཏེ། འགྲོ་བ་པོ་མིན་པ་ནི་གནས་པ་ཉིད་ཡིན་པས་དེ་ལ་གནས་པའི་བྱ་བ་གཉིས་མེད་པའི་ཕྱིར་རོ། །འགྲོ་བ་པོ་དང་འགྲོ་བ་པོ་མིན་པ་ལས་གཞན་པའི་གང་ཟག་གསུམ་པ་གང་ཞིག་སྡོད་པར་འགྱུར་ཏེ། དེ་གཉིས་དངོས་འགལ་ཡིན་པས་དགག་ཕྱོགས་ཀྱི་ཕུང་གསུམ་མི་སྲིད་པའི་ཕྱིར་རོ། །གལ་ཏེ་མཐའ་ཕྱི་མ་གཉིས་པོ་མི་སྡོད་ཀྱང་འགྲོ་བ་པོ་ཉིད་སྡོད་དོ་སྙམ་ན། རེ་ཤིག་འགྲོ་བ་པོ་སྡོད་དོ་ཞེས་ཅི་ལྟར་འཐད་པ་ཉིད་དུ་འགྱུར་ཏེ་མི་འཐད་པར་ཐལ། གང་གི་ཚེ་འགྲོ་བའི་བྱ་བ་མེད་པར་ནི་འགྲོ་བ་པོའི་ཚིག་དོན་ལྡན་དུ་འཐད་པར་མི་འགྱུར་བ་དེས་ན་སྡོད་ཚིག་དོན་དང་ལྡན་ཡང་འགྲོ་བ་པོའི་ཚིག་དོན་གྱིས་སྟོང་པའི་ཕྱིར་རོ། །བཞི་པ་ནི། འགྲོ་བའི་བྱ་བ་རང་བཞིན་གྱིས་ཡོད་པ་ཉིད་དེ། འབྲས་བུ་དེ་ལས་ལྡོག་པ་ཡོད་པའི་ཕྱིར་རོ་སྙམ་ན། སོང་དང་མ་སོང་ལས་མ་གཏོགས་པའི་བགོམ་བཞིན་པའི་ལམ་ལ་འགྲོ་བ་ལས་ལྡོག་པར་མི་འགྱུར་ཏེ། དེ་མ་དམིགས་པའི་ཕྱིར། སོང་བའི་ལམ་དང་མ་སོང་བའི་ལམ་ལ་འགྲོ་བ་ལས་ཀྱང་ལྡོག་པར་འགྱུར་བ་མིན་ཏེ། གང་ལས་ལྡོག་པར་འགྱུར་བའི་འགྲོ་བའི་བྱ་བ་འགགས་པ་དང་། མ་སྐྱེས་ནས་མེད་པའི་ཕྱིར། ལྔ་པ་ནི། འགྲོ་བའི་གཉེན་པོ་གནས་པ་ཉིད་རང་བཞིན་གྱི་ཡོད་དེ། དེའི་འགྲན་ཟླ་འགྲོ་བ་ཡོད་པའི་ཕྱིར་དང་། རྒྱུ་རྩོམ་པ་ཡོད་པའི་ཕྱིར་དང་། འབྲས་བུ་དེ་ལས་བཟློག་པ་ཡོད་པའི་ཕྱིར་རོ་སྙམ་ན། གནས་པའི་སྒྲུབ་བྱེད་དུ་བཀོད་པའི་གནས་པའི་གཉེན་པོ་འགྲོ་བ་དགག་པ་ཡང་ནི་སྔར་འགྲོ་བའི་གཉེན་པོ་གནས་པ་དགག་པ་དང་མཚུངས་ཏེ། སྔར་རེ་ཤིག་འགྲོ་བ་པོ་མི་སྡོད་དེ་ཞེས་སོགས་བཤད་པ་དེ་ཉིད་འདིར་རེ་ཤིག་གནས་པོ་མི་འགྲོ་སྟེ། གནས་པ་པོ་མིན་འགྲོ་བ་མིན། །ཞེས་སོགས་སུ་འདོན་པ་བསྒྱུར་བས་དགག་ནུས་པའི་ཕྱིར་རོ། །གནས་པའི་རྒྱུ་རྩོམ་པའམ་འཇུག་པ་དགག་པ་ཡང་ནི་སྔར་འགྲོ་བའི་རྒྱུ་རྩོམ་པ་དགག་པ་དང་མཚུངས་ཏེ། སྔར་སོང་ལ་འགྲོ་བའི་རྩོམ་མེད་དེ་ཞེས་སོགས་བཤད་པ་དེ་ཉིད། འདིར་གནས་ལ་གནས་པའི་རྩོམ་མེད་དེ་ཞེས་སོགས་སུ་འདོན་པ་བསྒྱུར་བས་དགག་ནུས་པའི་ཕྱིར། གནས་པའི་སྒྲུབ་བྱེད་དུ་བཀོད་པའི་ལྡོག་པ་དགག་པ་ཡང་ནི་སྔར་འགྲོ་བ་ལས་ལྡོག་པ་དགག་པ་དང་མཚུངས་ཏེ། སྔར་བགོམ་ལས་ལྡོག་པར་མི་འགྱུར་ཏེ། སོང་དང་མ་སོང་ལས་ཀྱང་མིན། །ཞེས་བཤད་པ་དེ་ཉིད་འདིར། གནས་བཞིན་པ་ལས་མི་ལྡོག་ཏེ། །གནས་དང་མི་གནས་ལས་ཀྱང་མིན། །ཞེས་འདོན་པ་བསྒྱུར་བས་དགག་ནུས་པའི་ཕྱིར་རོ། །བཞི་པ་འགྲོ་བའི་བྱ་བ་དང་། འགྲོ་བ་པོ་གཅིག་དང་ཐ་དད་བརྟགས་ནས་དགག་པ་ལ་གསུམ་སྟེ། དམ་བཅའ་མདོར་བསྟན། འཐད་པ་རྒྱས་པར་བཤད། གྲུབ་པའི་དོན་བསྡུ་བའོ། །དང་པོ་ནི། འགྲོ་བའི་བྱ་བ་དེ་དང་རྟེན་འགྲོ་བ་པོ་གཉིས་དེ་ཉིད་ཡིན་ནོ་ཞེས་ཀྱང་བྱར་མི་རུང་ལ། འགྲོ་བའི་བྱ་བ་དང་ནི་རྟེན་འགྲོ་བ་པོ་ངོ་བོ་གཞན་ཉིད་ཅེས་ཀྱང་བྱར་མི་རུང་ངོ་། །གཉིས་པ་ནི་ཅི་ལྟར་མི་རུང་ཞེ་ན། དེ་ཉིད་ཡིན་ཞེས་བྱ་བར་མི་རུང་སྟེ། གལ་ཏེ་འགྲོ་བའི་བྱ་བ་གང་ཡིན་པ་དེ་ཉིད་འགྲོ་བ་པོ་ཡིན་པར་གྱུར་ན། སྤྱིར་བྱེད་པ་པོ་དང་ལས་ཉིད་ཀྱང་གཅིག་པ་ཉིད་དུ་ཐལ་བར་འགྱུར་བའི་ཕྱིར་རོ། །གཞན་ཉིད་ཡིན་ཞེས་ཀྱང་བྱར་མི་རུང་སྟེ། གལ་ཏེ་འགྲོ་བའི་བྱ་བ་དང་། འགྲོ་བ་པོ་ངོ་བོ་གཞན་པ་ཉིད་དུ་རྣམ་པར་བརྟགས་ན་རྟེན་འགྲོ་བ་པོ་མེད་པའི་འགྲོ་བའི་བྱ་བ་དང་། འགྲོ་བའི་བྱ་བ་མེད་པའི་འགྲོ་བ་པོ་ཡོད་པར་འགྱུར་ན་དེ་དག་མི་རུང་བའི་ཕྱིར་རོ། །གསུམ་པ་ནི། དེ་ཉིད་དང་གཞན་ཉིད་དུ་བརྗོད་དུ་མེད་ཀྱང་རང་བཞིན་གྱིས་ཡོད་དོ་ཞེས་ཀྱང་བརྗོད་པར་མི་ནུས་ཏེ། སྔར་བཤད་པའི་ཚུལ་གྱིས་འགྲོ་བ་དང་། འགྲོ་བ་པོ་གང་དག་དངོས་པོ་གཅིག་པ་དང་། དངོས་པོ་གཞན་པ་ཉིད་དུ་ནི། གྲུབ་པར་འགྱུར་བ་ཡོད་མིན་ན། །དེ་གཉིས་རང་བཞིན་གྱིས་གྲུབ་པ་ཅི་ལྟར་ཡོད་དེ་དེ་མི་འཐད་པར་ཐལ། དངོས་འགལ་ལ་དགག་ཕྱོགས་དང་སྒྲུབ་ཕྱོགས་ཀྱི་ཕུང་པོ་གསུམ་པ་མི་འཐད་པའི་ཕྱིར་རོ། །ལྔ་པ་འགྲོ་བའི་བྱ་བ་གཅིག་དང་ཐ་དད་བརྟགས་ནས་དགག་པ་ནི་གལ་ཏེ་སྨྲ་བ་པོ་ཚིག་སྨྲའོ། །བྱེད་པ་པོ་བྱ་བ་བྱེད་དོ་ཞེས་པ་ལྟར། འགྲོ་བའི་བྱ་བ་ཡང་འགྲོ་བ་པོའི་བྱ་བའི་ལས་སུ་ཡོད་པ་ཡིན་ནོ་སྙམ་ན། དེ་ལྟར་འགྲོ་བ་པོས་འགྲོ་བའི་བྱ་བ་བྱེད་ན་རང་ཉིད་འགྲོ་བ་པོར་མཚོན་པའི་བྱ་བ་བྱེད་དམ། དེ་ལས་གཞན་པའི་འགྲོ་བའི་བྱ་བ་བྱེད། དེ་ལ་དང་པོ་འགྲོ་བའི་བྱ་བ་གང་གིས་ལྷ་བྱིན་འགྲོ་བ་པོར་མངོན་ཞིང་མཚོན་པའི་འགྲོ་བའི་བྱ་བ་དེ་ནི། དེས་འགྲོ་ཞིང་བྱེད་པ་མིན་ཏེ། གང་གི་ཕྱིར་ན་རང་ཉིད་འགྲོ་བ་པོར་མཚོན་པའི་འགྲོ་བའི་བྱ་བའི་སྔ་རོལ་དུ་འགྲོ་བ་པོ་གྲུབ་པར་གྱུར་ན་སྔར་གྲུབ་པའི་འགྲོ་བ་པོ་གང་ཞིག ཡུལ་གྲོང་དང་གྲོང་ཁྱེར་ལ་སོགས་པ་གང་དུ་འགྲོ་བའི་བྱ་བ་བྱེད་པར་འགྱུར་བ་ཞིག་རིགས་པར་འགྱུར་ན་ཡང་རང་ཉིད་འགྲོ་བ་པོར་མཚོན་པའི་འགྲོ་བའི་བྱ་བ་དེའི་སྔ་རོལ་དུ་འགྲོ་བ་པོ་ཉིད་མེད་པའི་ཕྱིར་ཏེ། འགྲོ་བའི་བྱ་བ་ལ་མ་ལྟོས་པའི་འགྲོ་བ་པོ་མེད་པས་སོ། །གཉིས་པ་འགྲོ་བའི་བྱ་བ་གང་གིས་ལྷ་བྱིན་འགྲོ་བ་པོར་མངོན་ཞིང་མཚོན་པའི་འགྲོ་བའི་བྱ་བ་དེ་ལས་གཞན་པ་ཡང་འགྲོ་བ་པོ་དེས་འགྲོ་ཞིང་བྱེད་པ་མིན་ཏེ། གང་གི་ཕྱིར་ལྷ་བྱིན་ལྟ་བུ་འགྲོ་བ་པོ་གཅིག་པུ་ལ་རང་ཉིད་འགྲོ་བ་པོར་མཚོན་པའི་བྱ་བ་དང་། དེ་ལས་གཞན་པའི་འགྲོ་བའི་བྱ་བ་གཉིས་མི་འཐད་པའི་ཕྱིར་རོ། །གཉིས་པ་རིག་པ་བསྡུས་སྟེ་བསྟན་པ་ནི། འགྲོ་བ་པོ་ཡིན་པར་གྱུར་པ་ནི་འགྲོ་བའི་ལམ་རྣམ་པ་གསུམ་དུ་འགྲོ་བའི་བྱ་བ་མི་བྱེད་དེ། བྱེད་པ་པོ་དང་ལས་དང་བྱ་བ་གསུམ་ཆར་གྱི་སྒོ་ནས་བཀག་ཟིན་པའི་ཕྱིར་རོ། །འགྲོ་བ་པོ་མ་ཡིན་པར་ནི་གྱུར་ཏེ་ཡང་འགྲོ་བའི་ལས་རྣམ་པ་གསུམ་དུ་འགྲོ་བའི་བྱ་བ་མི་བྱེད་དེ། གསུམ་ཆར་བཀག་ཟིན་པའི་ཕྱིར་རོ། །འགྲོ་བ་པོ་ཡིན་པ་དང་མ་ཡིན་པར་གྱུར་པ་དེ་ཡང་འགྲོ་བའི་ལམ་རྣམ་པ་གསུམ་དུ་འགྲོ་བའི་བྱ་བ་མི་བྱེད་དེ། བཀག་ཟིན་པའི་ཕྱིར་རོ། །དེའི་ཕྱིར་འགྲོ་བའི་བྱ་བ་དང་། འགྲོ་བ་པོ་དང་། བགྲོད་པར་བྱ་བའི་ལས་ལམ་གསུམ་ཀ་ཡང་རང་བཞིན་གྱིས་ཡོད་པ་མ་ཡིན་ནོ། །གཉིས་པ་ནི། ཇི་སྐད་དུ་འཕགས་པ་བློ་གྲོས་མི་བཟད་པས་བསྟན་པའི་མདོ་ལས། བཙུན་པ་ཤ་ར་དྭ་ཏིའི་བུ་འོང་བ་ཞེས་བྱ་བ་དེ་ནི་བསྡུ་བའི་ཚིག་གོ །བཙུན་པ་ཤ་ར་དྭ་ཏིའི་བུ་འགྲོ་བ་ཞེས་བྱ་བ་དེ་ནི་བསལ་བའི་ཚིག་གོ །གང་ལ་བསྡུ་བའི་ཚིག་མེད་པ་དང་། བསལ་བའི་ཚིག་མེད་པ་དེ་ལ་འོང་བ་ཡང་མེད་འགྲོ་བ་ཡང་མེད་དོ། །འོང་བ་དང་འགྲོ་བ་མེད་པ་ནི་འཕགས་པ་རྣམས་འགྲོ་བའོ་ཞེས་དང་། ས་བོན་ཡོད་ན་མྱུ་གུ་ཇི་བཞིན་ཏེ། །ས་བོན་གང་ཡིན་མྱུ་གུ་དེ་ཉིད་མིན། །དེ་ལས་གཞན་མིན་དེ་ཡང་མ་ཡིན་ཏེ། །དེ་ལྟར་རྟག་མིན་ཆད་མིན་ཆོས་ཉིད་དོ། །ཞེས་བྱ་བ་དང་། རྒྱ་ལས་རྒྱ་ཡི་འབུར་ནི་སྣང་མོད་ཀྱི། །རྒྱ་དེ་འཕོས་པར་དམིགས་པ་ཡང་ཡོད་མིན། །དེ་ལ་དེ་མེད་གཞན་ལ་མ་ཡིན་ཏེ། །དེ་ལྟར་འདུས་བྱས་རྟགས་མིན་ཆད་པ་མེད། །ཞེས་བྱ་བ་དང་། མེ་ལོང་ངོས་དང་འབྲུ་མར་སྣོད་རྣམས་ལ། །བུད་མེད་ཁ་བཞིན་བརྒྱན་པས་བལྟས་པ་ན། །བྱིས་པ་དེ་ནི་དེ་ལ་ཆགས་སྐྱེད་ནས། །འདོད་པ་ཚོལ་བའི་ཕྱིར་ཡང་ཤིན་ཏུ་རྒྱུག །བཞིན་ནི་དེ་ཡང་འཕོ་བ་མ་ཡིན་ཏེ། །གཟུགས་བརྙན་ལ་ནི་ནམ་ཡང་བཞིན་མི་རྙེད། །རྨོངས་པ་དེ་དག་འདོད་ཆགས་བསྐྱེད་པ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་གསུངས་སོ། །ཇི་སྐད་དུ། འཕགས་པ་ཏིང་ངེ་འཛིན་གྱི་རྒྱལ་པོ་ལས་ཀྱང་། དེ་ཚེ་སྡིག་མེད་སྟོབས་བཅུ་ལྡན་པ་ཡི། །རྒྱལ་བ་དེ་ནི་ཏིང་འཛིན་མཆོག་འདི་འཆད། །སྲིད་པའི་འགྲོ་བ་རྨི་ལམ་ལྟ་བུ་སྟེ། །འདི་ལ་སུ་ཡང་མི་སྐྱེ་འཆི་བ་མེད། །སེམས་ཅན་མི་དང་སྲོག་ཀྱང་མི་རྙེད་དེ། །ཆོས་འདི་རྣམས་ནི་དབུ་བ་ཆུ་ཤིང་འདྲ། །སྒྱུ་མ་ལྟ་བུ་ནམ་མཁའི་གློག་འདྲ་སྟེ། །ཆུ་ཡི་ཟླ་བ་འདྲ་ཞིང་སྨིག་རྒྱུ་ཡིན། །མི་འགའ་འཇིག་རྟེན་འདིར་ཡང་ཤི་ནས་ནི། །འཇིག་རྟེན་གཞན་དུ་འཕོ་ཞིང་འགྲོ་མེད་ཀྱང་། །ལས་བྱས་རྣམས་ནི་ནམ་ཡང་ཆུད་མི་ཟ། །འཁོར་བ་ན་ཡང་དཀར་ནག་འབྲས་བུ་སྨིན། །རྟག་པ་མ་ཡིན་ཆད་པར་མི་འགྱུར་ཏེ། །ལས་བསགས་མེད་ཅིང་གནས་པ་དག་ཀྱང་མེད། །དེ་ཡང་བྱས་ནས་རེག་པ་མི་འགྱུར་མིན། །གཞན་གྱིས་བྱས་པ་མྱོང་བར་འགྱུར་བའང་མེད། །ཐམས་ཅད་ཡོད་པའང་མ་ཡིན་མེད་པ་མིན། །འདི་ན་ལྟ་གནས་འཇུག་པ་དག་པ་མིན། །སེམས་ཅན་སྤྱོད་པ་རབ་ཞི་འཇུག་པ་མེད། །སྲིད་གསུམ་རྨི་ལམ་དང་འདྲ་སྙིང་པོ་མེད། །མྱུར་དུ་འཇིག་ཅིང་མི་རྟག་སྒྱུ་མ་བཞིན། །འོང་བ་མེད་ཅིང་འདི་ན་འགྲོ་བའང་མེད། །རྒྱུན་རྣམས་རྟག་ཏུ་སྟོང་ཞིང་མཚན་མ་མེད། །བདེ་གཤེགས་སྤྱོད་ཡུལ་རྒྱལ་བའི་ཡོན་ཏན་ནི། །སྐྱེ་མེད་ཞི་བ་མཚན་མ་མེད་པའི་གནས། །སྟོབས་དང་གཟུངས་རྣམས་དང་ནི་སྟོབས་བཅུའི་སྟོབས། །འདི་ནི་སངས་རྒྱས་ཁྱུ་མཆོག་གྱུར་པའི་མཆོག །དཀར་པོའི་ཆོས་མཆོག་ཡོན་ཏན་བསགས་པ་སྟེ། །ཡོན་ཏན་ཡེ་ཤེས་སྟོབས་དང་གཟུགས་མཆོག་དང་། །རྫུ་འཕྲུལ་རྣམ་པར་འཕྲུལ་བ་བྱ་བའི་མཆོག །མངོན་ཤེས་མཆོག་ལྔ་ཐོབ་པ་དམ་པའི་ཚུལ། །ཞེས་སོགས་རྒྱ་ཆེར་གསུངས་པ་ལྟ་བུའོ། །དེ་བཞིན་དུ་ཚེ་དང་ལྡན་པ་དག་གར་དོང་། གང་ནས་ལྷགས། དེ་དག་གིས་སྨྲས་པ། བཙུན་པ་རབ་འབྱོར་གང་དུ་ཡང་འགྲོ་བ་མེད་པ་དང་། གང་ནས་ཀྱང་འོང་བ་མེད་པའི་ཕྱིར། བཅོམ་ལྡན་འདས་ཀྱིས་ཆོས་བསྟན་ཏོ། །ཞེས་སོགས་གསུངས་པ་རྣམས་ཀྱི་དོན་དངོས་སུ་འགྲོ་འོང་དོན་དམ་པ་བཀག་པ་དང་། ཤུགས་ལ་ཀུན་རྫོབ་སྒྱུ་མ་ཙམ་དུ་འགྲོ་འོང་ཐ་སྙད་དུ་ཡོད་པའི་བདེན་གཉིས་ཟུང་འཇུག་བསྟན་པར་ཤེས་པར་བྱའོ། །གསུམ་པ་རབ་བྱེད་ཀྱི་མཚན་བསྟན་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་འགྲོ་འོང་བརྟགས་པ་ཞེས་བྱ་བ་རབ་ཏུ་བྱེད་པ་གཉིས་པའི་རྣམ་པར་བཤད་པའོ།། ༈ །།གཉིས་པ་ཁྱད་ཆོས་གཞན་བཤད་པ་ལ་ལྔ་སྟེ། རྟེན་འབྲེལ་ཆོས་ཀྱི་བདག་གིས་སྟོང་པ། གང་ཟག་གི་བདག་གིས་སྟོང་པ། དངོས་པོའི་རང་བཞིན་གྱིས་སྟོང་པ། དུས་ཀྱིས་སྟོང་པ། སྲིད་པའི་རྒྱུན་གྱིས་སྟོང་པའོ། །དང་པོ་ལ་གཉིས་ཏེ། ཆོས་བདག་གི་ངོ་བོ་དགག དེའི་སྒྲུབ་བྱེད་དགག་པའོ། །དང་པོ་ལ་གསུམ་སྟེ། སྐྱེ་མཆེད་རང་བཞིན་གྱིས་གྲུབ་པ་དགག ཕུང་པོ་རང་བཞིན་གྱིས་གྲུབ་པ་དགག ཁམས་རང་བཞིན་གྱིས་གྲུབ་པ་དགག་པའོ། །དང་པོ་ལ་གསུམ་ལས། དང་པོ་རབ་བྱེད་ཀྱི་འབྲེལ་ནི། དེ་ལྟར་འགྲོ་བ་དང་། འགྲོ་བ་པོ་དང་། བགྲོད་པར་བྱ་བ་བཀག་མོད་ཀྱི་དེ་ལྟ་ན་ཡང་ལྟ་བ་དང་། ལྟ་བ་པོ་དང་། བལྟ་བྱ་ལ་སོགས་པ་ཕྱི་ནང་གི་སྐྱེ་མཆེད་རྣམས་ནི་ཆོས་མངོན་པ་ལས་གསུངས་པས་རང་བཞིན་གྱིས་ཡོད་པ་ཡིན་ནོ་སྙམ་ན། དེ་དག་རང་བཞིན་གྱིས་གྲུབ་པ་དགག་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་དཔྱད་པ་ལ་ཡང་གཉིས་ཏེ། འདོད་པ་བརྗོད། སུན་འབྱིན་བཤད་པའོ། །དང་པོ་ནི། ཉན་ཐོས་སྡེ་པ་དག་ལྟ་བ་དང་། བལྟ་བྱ་ལ་སོགས་པ་ཕྱི་ནང་གི་སྐྱེ་མཆེད་རྣམས་ནི་རང་བཞིན་གྱིས་ཡོད་པ་ཡིན་ཏེ། ཆོས་མངོན་པའི་མདོ་ལས། ལྟ་བ་མིག་དང་། ཉན་པ་རྣ་བ་དང་། སྣོམ་པ་སྣ་དང་། མྱོང་བར་བྱེད་པ་ལྕེ་དང་། རེག་པར་བྱེད་པ་ལུས་དང་། སེམས་པར་བྱེད་པ་ཡིད་ཅེས་པ་ནི་བྱེ་བྲག་ཏུ་སྨྲ་བ་འདོད་ལ། མདོ་སྡེ་པ་ནི་ལྟ་བ་མིག་གི་རྣམ་ཤེས་སོགས་སུ་འདོད་དེ། ནང་གི་སྐྱེ་མཆེད་དབང་པོ་དྲུག་སྟེ། དེ་དག་གི་སྤྱོད་ཡུལ་ལྟ་བར་བྱ་བའི་གཟུགས་ལ་སོགས་པ་ཕྱིའི་སྐྱེ་མཆེད་དྲུག་གསུངས་པའི་ཕྱིར་ཞེས་འདོད་དོ། །གཉིས་པ་ལ་གཉིས་ཏེ། ལྟ་བ་འགོག་བྱེད་ཀྱི་རིག་པ་རྒྱས་པར་བཤད། རིག་པ་དེ་ཆོས་གཞན་ལ་བསྒྲེ་བའོ། །དང་པོ་ལ་གཉིས་ཏེ། མིག་ལྟ་བ་ཡིན་པ་དགག་པ། ཤེས་པ་ལྟ་བ་ཡིན་པ་དགག་པའོ། །དང་པོ་ལ་གཉིས་ཏེ། རང་མ་མཐོང་བའི་རྟགས་ཀྱིས་དགག ལྟ་བའི་རང་བཞིན་ཡིན་མིན་བརྟགས་ཏེ་དགག་པའོ། །དང་པོ་ལ་བཞི་སྟེ། ཕྱོགས་ཆོས་བསྒྲུབ། གཏན་ཚིགས་འགོད། མ་ངེས་པ་སྤོང་། དོན་བསྡུ་བའོ། །དང་པོ་ནི། བྱེ་བྲག་ཏུ་སྨྲ་བ་འདོད་པའི་ལྟ་བ་མིག་གི་དབང་པོ་དེ་རང་གི་བདག་ཉིད་ནི་དེ་ལ་ལྟ་བ་མ་ཡིན་པ་ཉིད་དེ། རང་ལ་རང་གི་ལྟ་བའི་བྱ་བ་འགལ་བའི་ཕྱིར་དང་། དེ་མ་དམིགས་པའི་ཕྱིར་རོ། །གཉིས་པ་ནི། གང་ཞིག་མིག་གི་དབང་པོ་དེ་ཆོས་ཅན། གཞན་གཟུགས་དག་ལ་ཅི་ལྟར་ལྟ་སྟེ་མི་ལྟ་བར་ཐལ། བདག་ཉིད་ལ་མི་ལྟ་བའི་ཕྱིར། བུམ་པ་བཞིན། གསུམ་པ་ནི། རང་ལ་མི་ལྟ་ཡང་གཞན་ལ་ལྟ་བ་མི་འགལ་ཏེ། མེས་རང་མི་བསྲེག་ཀྱང་གཞན་བུད་ཤིང་བསྲེག་པ་བཞིན་ནོ་སྙམ་ན། རང་ལ་མི་ལྟ་ཡང་གཞན་ལ་ལྟ་བ་རབ་ཏུ་བསྒྲུབ་པའི་ཕྱིར། མེས་རང་མི་བསྲེག་ཀྱང་། གཞན་བསྲེག་པའི་དཔེས་ནི་དོན་དེ་སྒྲུབ་པར་ནུས་པ་མ་ཡིན་ཏེ། སྔར་སོང་བ་དང་། མ་སོང་བ་དང་། བགོམ་པ་ལ་འགྲོ་བའི་བྱ་བ་བཀག་པའི་རིག་པ་ཡིས། དཔེ་དེ་དང་ནི་དོན་ལྟ་བ་དང་བཅས་པ་ལ་ལན་བཏབ་ཅིང་སུན་དབྱུང་བ་ཡིན་པའི་ཕྱིར་ཏེ། རེ་ཞིག་བསྲེག་པ་མི་བསྲེག་ཏེ་ཞེས་སོགས་བསྲེག་བྱའི་ལས་བུད་ཤིང་དང་། རེ་ཤིག་བལྟ་བ་མི་བལྟ་སྟེ་ཞེས་སོགས་བལྟ་བྱའི་ཡུལ་གཟུགས་ལ་དུས་གསུམ་དུ་དཔྱད་པ་དང་། རེ་ཤིག་བསྲེག་པོ་མི་བསྲེག་སྟེ་ཞེས་སོགས་སྲེག་པར་བྱེད་པ་པོའི་མེ་དང་། རེ་ཤིག་ལྟ་པོ་མི་བལྟ་སྟེ་ཞེས་སོགས་ལྟ་བར་བྱེད་པ་པོ་མིག་ལ་རྣམ་གྲངས་གསུམ་དུ་བརྟགས་ན་དཔེ་དང་དོན་གཉིས་ཀ་མི་འགྲུབ་པའི་ཕྱིར་རོ། །བཞི་པ་ནི། དེའི་ཕྱིར་མིག་དེ་ནི་གཟུགས་ལ་བལྟ་བས་བལྟ་བར་བྱེད་པ་པོ་ཡིན་ཞེས་བྱ་བ་དེ་ནི་ཅི་ལྟར་རིགས་པར་འགྱུར་ཏེ། གང་གི་ཚེ་རང་གཞན་གཉིས་ཀ་ལ་ཅུང་ཟད་མི་ལྟ་བ་དེ་ནི་ལྟ་བར་བྱེད་པ་མ་ཡིན་པའི་ཕྱིར་རོ། །གཉིས་པ་ནི། གཞན་ཡང་མིག་གཟུགས་ལ་བལྟ་བར་རྟོག་ན་ལྟ་བའི་བྱ་བ་དང་བཅས་པ་ལྟ་བའི་རང་བཞིན་ཞིག་གམ། དེ་དང་བྲལ་བ་ལྟ་བའི་རང་བཞིན་མ་ཡིན་པ་ཞིག་བལྟ་ཞེས་རྟོག་དྲང་། དེ་ལ་མིག་ལྟ་བའི་རང་བཞིན་ཅན་ནི་གཟུགས་ལ་བལྟ་བ་ཉིད་མ་ཡིན་ཏེ། དེ་ལ་བལྟ་བའི་བྱ་བ་གཉིས་མེད་པའི་ཕྱིར་རོ། །གཉིས་པ་ལྟར་མིག་བལྟ་བའི་རང་བཞིན་ཅན་མིན་པ་ཡང་མི་བལྟ་བ་ཉིད་དེ་ལྟ་བའི་བྱ་བ་དང་བྲལ་བའི་ཕྱིར་སོར་མོའི་རྩེ་མོ་བཞིན་ནོ། །གཉིས་པ་ཤེས་པ་བལྟ་བ་ཡིན་པ་དགག་པ་ལ་གསུམ་སྟེ། སྔར་བཤད་རིག་པས་དགག རིག་པ་གཞན་གྱིས་དགག དོན་བསྡུ་བའོ། །དང་པོ་ནི། མདོ་སྡེ་པ་ལ་སོགས་པ་དག་མིག་ལྟ་བའི་བྱེད་པ་པོ་མ་ཡིན་མོད་ཀྱི་ལྟ་བའི་བྱེད་པ་ཡིན་ལ། བྱེད་པ་དེས་གཟུགས་ལ་ལྟ་བ་པོ་ནི་རྣམ་པར་ཤེས་པའམ་བདག་ཡིན་ནོ་ཞེ་ན། སྔར་མིག་གི་དབང་པོ་གཟུགས་ལ་བལྟ་བའི་བྱེད་པ་པོར་འདོད་པ་དགག་པ་ཉིད་ཀྱིས་རྣམ་པར་ཤེས་པའམ་བདག་གཟུགས་ལ་ལྟ་བ་པོར་འདོད་པ་ལ་ཡང་སྐྱོན་རྣམ་པར་བཤད་པར་ཤེས་པར་བྱ་སྟེ། ལྟ་པོ་རང་གི་བདག་ཉིད་ནི། །ཞེས་སོགས་འདོན་པ་བསྒྱུར་བས་དགག་ནུས་པའི་ཕྱིར་རོ། །གཉིས་པ་ནི། གཞན་ཡང་ལྟ་བ་པོ་རྣམ་ཤེས་ལ་སོགས་པ་ཡོད་ན་ལྟ་བའི་བྱ་བ་ལ་ལྟོས་པའམ་མ་ལྟོས་པ་ཞིག་ཡོད་དྲང་། དེ་ལ་ལྟ་བའི་བྱ་བ་མ་སྤངས་པ་སྟེ། བྱ་བ་ལ་ལྟོས་པ་དང་བཅས་པ་ལྟ་བ་པོ་ཉིད་ཡོད་པ་མིན་ཏེ། ལྟོས་པ་པོ་ཉིད་མེད་པ་དང་། ཡོད་ན་ལྟོས་པ་དོན་མེད་པས་ལྟ་བ་པོ་མ་གྲུབ་པ་དང་། གྲུབ་ན་ལྟ་བ་ལ་ལྟོས་པར་མི་འཐད་པའི་ཕྱིར་རོ། །གཉིས་པ་ལྟར་བལྟ་བའི་བྱ་བ་སྤངས་པ་སྟེ། བལྟ་བ་ལ་མ་ལྟོས་པར་གྱུར་ཀྱང་ལྟ་བ་པོར་མི་རུང་སྟེ། ལྟ་བ་པོ་རྣམ་འཇོག་གི་རྒྱུ་མེད་པའི་ཕྱིར་རོ། །དེ་ལྟར་ལྟ་བ་པོ་བཀག་ཀྱང་བལྟ་བྱའི་ལས་དང་། བལྟ་བའི་བྱེད་པ་གཉིས་ཡོད་དོ་སྙམ་ན་སྔར་བཤད་པའི་ཚུལ་གྱིས་ལྟ་བ་པོ་མེད་པའི་ཕྱིར་ན་དེ་ལ་ལྟོས་པའི་བལྟ་བྱའི་ལས་གཟུགས་དང་། བལྟ་བའི་བྱེད་པ་མིག་གི་དབང་པོ་དེ་དག་ག་ལ་ཡོད་དེ་དེ་དག་ཕན་ཚུན་ལྟོས་ནས་གྲུབ་པ་ཡིན་པའི་ཕྱིར་རོ། །གསུམ་པ་ནི། དེ་ལྟ་ན་ཡང་། ཅི་ལྟར་ཕ་དང་མ་དག་ལ། །བརྟེན་ནས་བུ་ནི་འབྱུང་བཤད་པ། །དེ་བཞིན་མིག་དང་གཟུགས་བརྟེན་ནས། །རྣམ་པར་ཤེས་པ་འབྱུང་བར་རྟེན་འབྲེལ་གྱི་མདོ་ལས་བཤད་པས་མིག་གི་རྣམ་པར་ཤེས་པ་དང་། རེག་པ་དང་། ཚོར་བ་དང་། སྲེད་པ་བཞི་ཡོད་པས་བལྟ་བའི་བྱ་བ་དང་། བྱེད་པ་གཉིས་ཀྱང་ཡོད་དོ་སྙམ་ན། བལྟ་བའི་བྱ་བ་དང་། བྱེད་པ་གཉིས་ཀྱི་རྣམ་པར་ཤེས་པ་ལ་སོགས་པ་བཞི་རང་བཞིན་དུ་ཡོད་པ་མ་ཡིན་ཏེ། སྔར་བཤད་པའི་ཚུལ་གྱིས་བལྟ་བྱ་གཟུགས་དང་། བལྟ་བའི་བྱེད་པ་མིག་གི་དབང་པོ་གཉིས་མེད་པའི་ཕྱིར། དེས་ན་དེ་དག་གི་འབྲས་བུ་ཉེ་བར་ལེན་པ་དང་། སྲིད་པ་དང་། སྐྱེ་བ་དང་། རྒ་ཤི་བཞི་པོ་ཅི་ལྟ་བུར་ན་ཡོད་པར་འགྱུར་ཏེ། རྒྱུ་རྣམ་ཤེས་ལ་སོགས་པ་བཀག་ཟིན་པའི་ཕྱིར་རོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི། ལྟ་བས་ཉན་དང་སྣོམ་པ་དང་། །མྱོང་བར་བྱེད་དང་རིག་བྱེད་ཡིན། །ཉན་པ་པོ་དང་མཉན་ལ་སོགས་རང་བཞིན་གྱིས་གྲུབ་པ་ལ་ཡང་སྐྱོན་རྣམ་པར་བཤད་པར་ཤེས་པར་བྱ་སྟེ། ཉན་དེ་རང་གི་བདག་ཉིད་ནི། །དེ་ལ་ཉན་པ་མ་ཡིན་ཉིད། །ཞེས་སོགས་ཐམས་ཅད་མཚུངས་པའི་ཕྱིར་རོ། །གཉིས་པ་ལུང་དང་སྦྱར་བ་ནི། བཅོམ་ལྡན་འདས་ཀྱིས། མིག་གིས་གཟུགས་རྣམས་མི་མཐོང་ཞིང་། །ཡིད་ཀྱིས་ཆོས་རྣམས་མི་ཤེས་ཏེ། །གང་དུ་འཇིག་རྟེན་མི་འཇུག་པ། །འདི་ནི་བདེན་པའི་མཆོག་ཡིན་ནོ། །གང་དུ་རྐྱེན་འཚོགས་པས་མཐོང་བར། །འདྲེན་པ་རབ་ཏུ་སྟོན་མཛད་པའི། །ས་དེ་དོན་དམ་འཛིན་པ་ནི། །ཉེ་བར་བཏགས་པར་ཆུད་པར་འགྱུར། །ཞེས་བྱ་བ་དང་། དེ་བཞིན་དུ། མིག་དང་གཟུགས་ལ་བརྟེན་ནས་ནི། །མིག་གི་རྣམ་ཤེས་འདི་སྐྱེ་ཡང་། །གཟུགས་ནི་མིག་ལ་བརྟེན་མ་ཡིན། །གཟུགས་ནི་མིག་ལ་འཕོ་བ་མིན། །བདག་མེད་མི་སྡུག་ཆོས་འདི་དག །སླར་ཡང་སྡུག་དང་བདག་ཅེས་བརྟགས། །མེད་ལ་ལོག་པར་བརྟགས་པ་སྟེ། །དེ་ལས་མིག་གི་རྣམ་ཤེས་འབྱུང་། །རྣམ་ཤེས་འགག་དང་འབྱུང་བ་ལས། །རྣམ་ཤེས་ཟད་དང་འཕེལ་བར་མཐོང་། །འགའ་ཡང་འགྲོ་འོང་མེད་སྟོང་དང་། །རྒྱུ་འདྲར་རྣལ་འབྱོར་པ་ཡིས་མཐོང་། །ཞེས་གསུངས་སོ། །དེ་བཞིན་དུ། འཕགས་པ་ཉེ་བར་འཁོར་གྱི་ཞུས་པ་ལས་ཀྱང་། མིག་ནི་ཐམས་ཅད་ལྡན་ན་མཐོང་འགྱུར་ཏེ། །མིག་གིས་གཟུགས་རྣམས་མཐོང་བ་གང་ཡིན་པའང་། །མཚན་མོ་རྐྱེན་རྣམས་མེད་ན་མཐོང་མི་འགྱུར། །དེ་ཕྱིར་ལྡན་དང་བྲལ་བ་རྣམ་རྟོག་ཡིན། །མིག་ནི་སྣང་ལ་བརྟེན་ཏེ་ཡིད་འོང་དང་། །ཡིད་དུ་མི་འོང་སྣ་ཚོགས་གཟུགས་མཐོང་བས། །དེ་ལྟར་ལྡན་ལས་བརྟེན་ཏེ་མཐོང་བས་ན། །དེ་ཕྱིར་མིག་གིས་ནམ་ཡང་མཐོང་བ་མེད། །ཡིད་དུ་འོང་བའི་སྒྲ་གྲག་གང་ཡིན་པ། །དེ་ཡང་ནམ་ཡང་ནང་དུ་ཞུགས་པ་མེད། །དེ་འགྲོ་དམིགས་སུ་ཡོད་པ་མ་ཡིན་ཏེ། །རྟོག་པའི་དབང་གིས་སྒྲ་རྣམས་འབྱུང་བ་ཡིན། །ཞེས་གསུངས་སོ། །དེ་བཞིན་དུ། གླུ་དང་གར་དང་རོལ་མོའི་སྒྲ་ཡང་གཟུང་བྱ་མིན། །རྨི་ལམ་ལྟ་བུར་མི་མཁས་རྨོངས་དང་ཆགས་པའི་རྒྱུ། །མི་མཁས་ཀུན་ཏུ་རྟོག་ལ་ཞེན་རྣམས་བརླག་འགྱུར་ཞིང་། །སྐྱེ་བོ་བྱིས་པ་ཉོན་མོངས་བྲན་བཞིན་བདག་གྱུར་ཏམ། །ཞེས་གསུངས་པ་རྣམས་ཀྱི་དོན་རིག་པས་དཔྱད་ན་ཕྱི་ནང་གི་སྐྱེ་མཆེད་མི་རྙེད་པའི་དོན་དམ་བདེན་པ་དང་། ཀུན་རྫོབ་སྒྱུ་མ་ཙམ་དུ་སྐྱེ་མཆེད་ཐ་སྙད་དུ་ཁས་ལེན་པའི་བདེན་གཉིས་ཟུང་འཇུག་བསྟན་པར་ཤེས་པར་བྱའོ། །གསུམ་པ་ནི་དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་དབང་པོ་བརྟགས་པ་ཞེས་བྱ་བ་སྟེ་རབ་ཏུ་བྱེད་པ་གསུམ་པའི་རྣམ་པར་བཤད་པའོ།། ༈ །།གཉིས་པ་ཕུང་པོ་རང་བཞིན་གྱིས་གྲུབ་པ་དགག་པ་ལ་གསུམ་ལས། དང་པོ་རབ་བྱེད་ཀྱི་འགྲེལ་ནི། དེ་ལྟར་ཕྱི་ནང་གི་སྐྱེ་མཆེད་རྣམས་བཀག་མོད་ཀྱི་ཆོས་མངོན་པ་ལས། འདུས་བྱས་གང་ཞེ་ན་ཕུང་པོ་ལྔའོ། །ཞེས་གསུངས་པའི་ཕུང་པོ་ལྔ་རང་བཞིན་གྱིས་ཡོད་ལ། དེ་ན་དེའི་ཁོངས་སུ་འདུས་པས་སྐྱེ་མཆེད་རྣམས་ཀྱང་རང་བཞིན་གྱིས་ཡོད་དོ་སྙམ་ན། ཕུང་པོ་རང་བཞིན་གྱིས་མ་གྲུབ་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། གཟུགས་ཀྱི་ཕུང་པོ་འགོག་བྱེད་རྒྱས་པར་བཤད། རིག་པ་དེ་ཆོས་གཞན་ལ་བསྒྲེ། རྩོད་ལན་གྱི་གནད་ཁྱད་པར་ཅན་བསྟན་པའོ། །དང་པོ་ལ་གསུམ་སྟེ། རྒྱུ་འབྲས་ཀྱི་གཟུགས་ཕན་ཚུན་ལྟོས་གྲུབ་ཏུ་བསྟན་པ། དེ་གཉིས་ཕན་ཚུན་ཡོད་མེད་བརྟགས་ཏེ་དགག ཕན་ཚུན་འདྲ་མི་འདྲ་བརྟགས་ཏེ་དགག་པའོ། །དང་པོ་ལ་གཉིས་ཏེ། དམ་བཅའ་མདོར་བསྟན། འཐད་པ་རྒྱས་པར་བཤད་པའོ། །དང་པོ་ནི། འདིར་གཟུགས་ཀྱི་རྒྱུ་ནི་འབྱུང་བ་དང་། གཟུགས་ནི་འབྲས་བུའི་གཟུགས་ལ་བྱ་སྟེ། གཟུགས་ཀྱི་རྒྱུ་འབྱུང་བ་ནི་མ་གཏོགས་པར་དེ་ལས་ངོ་བོ་ཐ་དད་པའི་འབྲས་བུའི་གཟུགས་དབང་པོ་ལྔ་དང་། དོན་ལྔ་སྟེ་བཅུའམ། ཆོས་ཀྱི་སྐྱེ་མཆེད་པའམ། རྣམ་པར་རིག་བྱེད་མ་ཡིན་པ་དང་བཅས་པ་ནི་དམིགས་པར་མི་འགྱུར་རོ། །དེ་བཞིན་དུ་འབྲས་བུའི་གཟུགས་ཞེས་བྱ་བ་མ་གཏོགས་པར་དེ་ལས་ངོ་བོ་ཐ་དད་པའི་གཟུགས་ཀྱི་རྒྱུ་འབྱུང་བ་ཡང་མི་སྣང་ངོ་ཞེས་པ་གཉིས་ནི་དམ་བཅའ་སྟེ། སྒྲུབ་བྱེད་འོག་ནས་སྟོན་ནོ། །གཉིས་པ་ནི། གལ་ཏེ་གཟུགས་ཀྱི་རྒྱུ་ནི་མ་གཏོགས་པར་འབྲས་བུའི་གཟུགས་ཡོད་ན་འབྲས་བུའི་གཟུགས་ནི་རྒྱུ་མེད་པར་ཐལ་བར་འགྱུར་ཏེ། རང་གི་རྒྱུ་ལས་གཞན་དུ་གྲུབ་ཟིན་པའི་ཕྱིར་བུམ་པ་དང་སྣམ་བུ་བཞིན་ནོ། །འདོད་པར་མི་ནུས་ཏེ། གཟུགས་ལ་སོགས་པའི་དོན་གང་ཡང་རྒྱུ་མེད་པ་ནི་ཡུལ་དུས་གང་ན་ཡང་མེད་པའི་ཕྱིར་རོ། །གལ་ཏེ་འབྲས་བུའི་གཟུགས་ནི་མ་གཏོགས་པར་གཟུགས་ཀྱི་རྒྱུ་ཞིག་ཡོད་པར་འདོད་ན་ནི། རྒྱུ་དེ་འབྲས་བུ་ལ་ལྟོས་པ་མེད་པར་འགྱུར་ཏེ། དེ་ལས་ངོ་བོ་ཐ་དད་ཡིན་པའི་ཕྱིར། འདོད་པར་མི་ནུས་ཏེ། འབྲས་བུ་ལ་ལྟོས་པ་མེད་པའི་རྒྱུ་མེད་པའི་ཕྱིར་ཏེ། འདི་ནི་འདིའི་རྒྱུ་ཡིན་ནོ་ཞེས་རྒྱུའི་ཐ་སྙད་དུ་འཇོག་པ་འབྲས་བུ་ལ་ལྟོས་དགོས་པའི་ཕྱིར་རོ། །གཉིས་པ་ལ་གསུམ་སྟེ། འབྲས་བུ་ཡོད་མེད་ཀྱི་རྒྱུ་དགག རྒྱུ་ཡོད་མེད་ཀྱི་འབྲས་བུ་དགག གྲུབ་པའི་དོན་བསྡུ་བའོ། །དང་པོ་ནི། ཡང་གཟུགས་ཀྱི་རྒྱུ་ཞིག་ཡོད་ན་འབྲས་བུའི་གཟུགས་ཡོད་པའམ། མེད་པ་ལ་རྒྱུ་ཞིག་ཡོད་རྟོག་དྲང་། དེ་ལ་འབྲས་བུའི་གཟུགས་ཡོད་ན་ཡང་གཟུགས་ཀྱི་ནི་རྒྱུ་ཡང་འཐད་པར་མི་འགྱུར་བ་ཉིད་དེ། འབྲས་བུ་གྲུབ་ཟིན་ན་དེ་ལ་རྒྱུ་དོན་མེད་པའི་ཕྱིར་རོ། །འབྲས་བུའི་གཟུགས་མེད་ན་ཡང་གཟུགས་ཀྱི་ནི་རྒྱུ་ཡང་འཐད་པར་མི་འགྱུར་བ་ཉིད་དེ། རྟེན་མེད་པས་སྐྱེ་བའི་བྱ་བ་མི་འཇུག་པའི་ཕྱིར་རོ། །གཉིས་པ་ནི། དེ་བཞིན་དུ་འབྲས་བུའི་གཟུགས་ཀྱང་རྒྱུ་ཡོད་པའམ་མེད་པ་ཞིག་ལ་འབྲས་བུར་འགྱུར་རྟོག་དྲང་། དང་པོ་ནི་མི་རུང་སྟེ། སྔར་དེ་ལ་རྒྱུ་མེད་པ་ཉིད་དུ་བཤད་ཟིན་པའི་ཕྱིར་རོ། །གཉིས་པ་དེ་ལ་རྒྱུ་མེད་པ་ཡི་གཟུགས་དག་དཔྱད་ན་འཐད་པར་མི་རུང་ཞིང་། མ་དཔྱད་པ་སྣང་ངོར་ཡང་རུང་མིན་ཉིད་དེ། གཟུགས་དེ་རེས་འགའ་བར་མཐོང་བའི་ཕྱིར་རོ། །གསུམ་པ་ནི། དེ་ཁོ་ན་ཉིད་རྟོགས་པར་འདོད་པའི་རྣལ་འབྱོར་པས། གཟུགས་ཀྱི་ཁྱད་པར་གྱི་ཆོས་ཀྱི་རྣམ་པར་རྟོག་པར་སྡུག་མི་སྡུག་དང་། ཐོགས་བཅས་ཐོགས་མེད་དང་། བསྟན་ཡོད་བསྟན་མེད་དང་། དུས་གསུམ་དང་སྔོ་སེར་ལ་སོགས་པ་འགའ་ཡང་རྣམ་པར་བརྟགས་པར་མི་བྱ་སྟེ། རྒྱུ་འབྲས་ཀྱི་གཟུགས་རིག་པས་དཔྱད་ན་མེད་པས་ཁྱད་པར་གྱི་གཞི་མ་གྲུབ་པའི་ཕྱིར་རོ། །གསུམ་པ་ནི། གཞན་ཡང་གཟུགས་ཀྱི་རྒྱུ་འདིས་འབྲས་བུ་འདྲ་བའམ། མི་འདྲ་བ་ཞིག་སྒྲུབ་པར་བྱེད་དྲང་། དེ་ལ་འབྲས་བུ་དང་འདྲ་བ་ཞེས་བྱ་བ་ཡང་འཐད་པ་མ་ཡིན་ཏེ། རྒྱུ་འབྲས་ཀྱི་གཟུགས་མཚན་ཉིད་ཐ་དད་པའི་ཕྱིར་རོ། །འབྲས་བུའི་གཟུགས་རྒྱུའི་གཟུགས་དང་མི་འདྲ་བ་ཞིག་བསྐྱེད་དོ་ཞེས་བྱ་བ་ཡང་འཐད་པ་མ་ཡིན་ཏེ། དེ་ལྟར་ན་སྲིད་པས་ཞི་བ་བསྐྱེད་པར་ཐལ་བའི་ཕྱིར་རོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི་ཚོར་བ་དང་ཚོར་བའི་རྒྱུ་རིག་པ་དང་། འདུ་ཤེས་དང་དེ་དང་ལྷན་ཅིག་འབྱུང་བའི་རྣམ་པར་ཤེས་པ་དང་། འདུ་བྱེད་དང་དེའི་རྒྱུ་མ་རིག་པ་དང་། སེམས་རྣམ་པར་ཤེས་པ་དང་། དེ་དང་ལྷན་ཅིག་འབྱུང་བའི་འདུ་བྱེད་ལ་སོགས་པའི་རྒྱུ་འབྲས་རྣམས་གཅིག་དང་ཐ་དད་དུ་དཔྱད་ན་མི་འཐད་པ་ལ་སོགས་པ་རྣམ་པ་དག་ནི་ཐམས་ཅད་དུ། གཟུགས་ཉིད་ཀྱིས་ནི་རིམ་པ་དང་མཚུངས་ཏེ། ཚོར་བའི་རྒྱུ་ནི་མ་གཏོགས་པར། །ཚོར་བ་དམིགས་པར་མི་འགྱུར་རོ། །ཞེས་སོགས་འདོན་པ་བསྒྱུར་བར་བྱ་བ་ཡིན་པའི་ཕྱིར་རོ། །དེ་བཞིན་དུ་མཚན་ཉིད་དང་མཚན་གཞི་དང་། ཡན་ལག་དང་ཡན་ལག་ཅན་ལ་སོགས་པའི་དངོས་པོ་ཐམས་ཅད་ཀྱང་གཟུགས་ཉིད་ཀྱིས་ནི་རིམ་པ་དང་མཚུངས་ཏེ། མཚན་ཉིད་གཞི་ནི་མ་གཏོགས་པར། །མཚན་ཉིད་དམིགས་པར་མི་འགྱུར་རོ། །ཞེས་སོགས་འདོན་པ་བསྒྱུར་བར་བྱ་བ་ཡིན་པའི་ཕྱིར། གསུམ་པ་རྩོད་ལན་གྱི་གནད་ཁྱད་པར་ཅན་བསྟན་པ་ནི། རེ་ཤིག་གཞན་ཕྱོགས་སུན་འབྱིན་པའི་ཐབས་ཁྱད་པར་ཅན་ལ་དངོས་པོར་སྨྲ་བའི་སྒྲུབ་བྱེད་ཐམས་ཅད་བསྒྲུབ་བྱ་དང་མཚུངས་པས་འགོག་པ་སྟེ། འདི་ལྟར་སྟོང་པ་ཉིད་དུ་སྨྲ་བའི་དབུ་མ་པས། གཟུགས་རང་བཞིན་གྱིས་ཡོད་པ་ཅི་ཕྱིར་ཞེས་སྒྲུབ་བྱེད་བརྩད་པ་བྱས་པའི་ཚེ་དངོས་པོར་སྨྲ་བ་གང་ཞིག ཚོར་བ་ལ་སོགས་པ་རང་བཞིན་གྱིས་ཡོད་པའི་ཕྱིར། ཞེས་ལན་འདེབས་སྨྲ་བར་བྱེད་པ་དེ་ཡིས་ལན་དེ་དག་ཐམས་ཅད་ལེགས་པར་བཏབ་པ་མིན་ཏེ། ཚོར་བ་ལ་སོགས་པ་རང་བཞིན་གྱིས་ཡོད་པ་ཡང་བསྒྲུབ་བྱ་གཟུགས་རང་བཞིན་གྱིས་ཡོད་པ་དང་། གཅིག་དང་ཐ་དད་ལ་སོགས་པའི་དཔྱད་པ་མཚུངས་པའི་ཕྱིར། རང་ཕྱོགས་ལ་སྐྱོན་སྤོང་བའི་ཐབས་ཁྱད་པར་ཅན་ལ་དབུ་མ་པས་སྟོང་པ་ཉིད་ཀྱི་སྒོ་ནས་བཤད་པ་བྱས་པའི་ཚེ་རང་གི་སློབ་མའམ། དངོས་པོར་སྨྲ་བ་གང་ཞིག་རང་བཞིན་གྱིས་མེད་ན་ཐ་སྙད་དུའང་མེད་པར་འགྱུར་རོ་ཞེས་སོགས་སྐྱོན་འདོགས་སྨྲ་བར་བྱེད་པ་དེ་ཡིས་དེ་དག་ཐམས་ཅད་སྐྱོན་བརྟགས་པ་མིན་ཏེ། སྒྱུ་མ་དང་། སྨིག་རྒྱུ་ལ་སོགས་པའི་དཔེས་ཐ་སྙད་དུ་ཡོད་ཀྱང་རང་བཞིན་གྱིས་མེད་པ་བསྒྲུབ་པར་བྱ་བ་དང་མཚུངས་པར་འགྱུར་བའི་ཕྱིར་རོ། །འདིར་འགྲེལ་པར། ཚོར་བ་ལ་སོགས་པ་རྣམས་ཀྱི་ཡོད་པ་ཡང་བསྒྲུབ་བྱ་གཟུགས་ཀྱི་ཡོད་པ་དང་མཚུངས་པར་རིག་པར་བྱའོ། །ཞེས་གསུངས་པ་ལ་བརྟེན་ནས་གཟུགས་ཀྱི་གནས་ཚུལ་ལ་དཔྱད་པའི་ཚེ། གཟུགས་ཉིད་བདེན་པ་གཉིས་ཆར་དུ་མེད་པར་མཁས་ལེན་པ་བཞིན་དུ། དེའི་ཚེ་ཚོར་བ་སོགས་ཀྱང་བདེན་པ་གཉིས་ཆར་དུ་མེད་པར་ཁས་བླངས་པར་བྱ་བ་ནི་མ་ཡིན་ཏེ། གཟུགས་ཀྱི་གནས་ཚུལ་ལ་དཔྱད་པའི་རིག་པ་དེ་ཉིད་ཚོར་བ་སོགས་ལ་ཡང་བསྒྲེ་དགོས་པའི་དོན་ཡིན་ཞིང་། ཚོར་བའི་གནས་ཚུལ་ལ་དཔྱད་པའི་སྔོན་དུ་ཐ་སྙད་བདེན་པ་ཐབས་སུ་གྱུར་པའི་ཚོར་བ་ཁས་ལེན་དགོས་པའི་ཕྱིར་རོ། །དེ་བཞིན་དུ་རྩོད་བཟློག་ལས། གལ་ཏེ་ཆོས་རྣམས་ཐམས་ཅད་ཀྱི། །རང་བཞིན་ཀུན་ལ་ཡོད་མིན་ན། །ཁྱོད་ཀྱི་ཚིག་ཀྱང་རང་བཞིན་མེད། །རང་བཞིན་བཟློག་པར་མི་ནུས་སོ། །གལ་ཏེ་ཁྱོད་ཚིག་རང་བཞིན་བཅས། །ཁྱོད་ཀྱི་དམ་བཅའ་སྔ་མ་ཉམས། །མི་འདྲ་ཉིད་དེ་དེ་ཡིན་ན། །གཏན་ཚིགས་ཁྱད་པར་བརྗོད་པར་བྱོས། །ཞེས་པའི་ལན་དུ་མྱུ་གུ་རང་བཞིན་གྱིས་མེད་པར་ཁས་བླངས་པའི་ཚེ་དེ་ལྟར་བརྗོད་པའི་ཚིག་ཀྱང་རང་བཞིན་མེད་པར་གསུངས་པ་ལ་ཡང་བློ་ཞིབ་མོས་སྦྱར་བ་བྱ་སྟེ། རིགས་པས་དཔྱད་ནས་མྱུ་གུ་མ་རྙེད་པའི་ཚེ་ཚིག་རང་བཞིན་གྱིས་མེད་པར་ཁས་བླངས་པ་ཡིན་གྱི། ཚིག་ཐ་སྙད་ཏུ་མེད་པར་ཁས་ལེན་པ་མ་ཡིན་པའི་ཕྱིར་ཏེ། རིགས་པ་དེ་ཚིག་གི་གནས་ཚུལ་ལ་བསྒྲེ་བའི་ཚེ་དེའི་སྔོན་དུ་ཐ་སྙད་བདེན་པའི་ཚིག་ཁས་ལེན་དགོས་པའི་ཕྱིར་རོ། །མདོར་ན་མྱུ་གུ་ལ་སོགས་པའི་དངོས་པོ་གང་དང་གང་ལ་དེའི་གནས་ཚུལ་ལ་དཔྱད་པའི་སྔོན་དུ་འཇིག་རྟེན་ཉིད་ལྟོས་བདེན་པའི་ཀུན་རྫོབ་ཁས་བླངས་ནས་དཔྱད་པ་ཞུགས་ནས་མ་རྙེད་པའི་ཚེ་བདེན་པ་གཉིས་ཆར་དུ་ཡང་ཁས་མི་ལེན་ལ། དེའི་འོག་ཏུ་སྣང་ཙམ་བློ་ལ་ཤར་བའི་ཚེ། འཇིག་རྟེན་ཉིད་ལྟོས་ལོག་པའི་ཀུན་རྫོབ་དང་། བདེན་རྫུན་གྱི་ཁྱད་པར་མེད་པས་ཁས་ལེན་པའི་རིམ་པ་གསུམ་འབྱུང་བ་ནི་ཆོས་གཅིག་གི་སྟེང་དུ་བདེན་གཉིས་ཁས་ལེན་ཚུལ་གྱི་གནད་དམ་པ་ཡིན་པས་གཟུ་བོས་དཔྱོད་ཅིག གཉིས་པ་ལུང་དང་སྦྱར་བ་ནི། ཅི་སྐད་དུ། དངོས་པོ་གཅིག་གི་ལྟ་པོ་གང་། །དེ་ནི་ཀུན་གྱི་ལྟ་པོར་བརྗོད། །གཅིག་གི་སྟོང་ཉིད་གང་ཡིན་པ། །དེ་ནི་ཀུན་གྱི་སྟོང་ཉིད་ཡིན། །ཞེས་དང་། འཕགས་པ་ནམ་མཁའ་མཛོད་ཀྱི་ཏིང་ངེ་འཛིན་གྱི་མདོ་ལས་ཀྱང་། ཆོས་གཅིག་གི་ནི་ཆོས་རྣམས་ཐམས་ཅད་སྒྱུ་མ་དང་། །སྨིག་རྒྱུ་དང་འདྲ་གཟུང་བྱར་མེད་ཅིང་གསོག་དང་ནི། །བརྫུན་ཞིང་ཐེར་ཟུག་མེད་པར་རྗེས་སུ་རྟོགས་གྱུར་པ། །དེ་ནི་རིང་པོར་མི་ཐོགས་བྱང་ཆུབ་སྙིང་པོར་འགྲོ། །ཞེས་གསུངས་སོ། །དེ་བཞིན་དུ་ཏིང་ངེ་འཛིན་གྱི་རྒྱལ་པོའི་མདོ་ལས་ཀྱང་། ཇི་ལྟར་ཁྱོད་ཀྱིས་བདག་གི་འདུ་ཤེས་ནི། །ཤེས་པ་དེ་བཞིན་ཀུན་ལ་བློས་སྦྱར་བྱ། །ཆོས་རྣམས་ཐམས་ཅད་དེ་ཡི་ངོ་བོ་ཉིད། །རྣམ་པར་དག་པ་ནམ་མཁའ་ལྟ་བུ་ཡིན། །གཅིག་གིས་ཀྱང་ནི་ཐམས་ཅད་ཤེས། །གཅིག་གིས་ཀྱང་ནི་ཐམས་ཅད་མཐོང་། །ཇི་སྙེད་མང་པོ་བཤད་བྱས་ཀྱང་། །དེ་ལ་དྲེགས་པ་སྐྱེ་བ་མེད། །ཞེས་གསུངས་སོ། །འདི་དག་ནི་གཟུགས་ཕུང་གི་གནས་ཚུལ་ལ་དཔྱད་པའི་རིགས་པ་དེ་ཉིད་ཕུང་པོ་གཞན་རྣམས་ལ་ཡང་བསྒྲེ་བའི་ལུང་དུ་སྣང་སྟེ། བསྟན་ཚུལ་ནི་སྔ་མ་དང་འདྲའོ། །གསུམ་པ་ནི་དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་ཕུང་པོ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཞི་པའི་རྣམ་པར་བཤད་པའོ།། །།གསུམ་པ་ཁམས་རང་བཞིན་གྱིས་གྲུབ་པ་དགག་པ་ལ་གསུམ་ལས། དང་པོ་རབ་བྱེད་ཀྱི་འབྲེལ་ནི། དེ་ལྟར་སྐྱེ་མཆེད་ཕུང་པོ་རྣམས་བཀག་མོད་ཀྱི་རྒྱལ་པོ་ཆེན་པོ་སྐྱེས་བུ་གང་ཟག་འདི་ནི་ཁམས་དྲུག་པའོ། །ཞེས་གང་ཟག་གི་གདགས་གཞིར་གསུངས་པ་དང་། སྔར་དངོས་སུ་མ་བཀག་པས་ཁམས་དྲུག་རང་བཞིན་གྱིས་ཡོད་ལ་སྐྱེ་མཆེད་དང་ཕུང་པོ་ཡང་དེའི་ཁོངས་སུ་འདུས་པས་རང་བཞིན་གྱིས་ཡོད་དོ་སྙམ་པ་ལ་ཁམས་དྲུག་དཔྱད་ན་རང་བཞིན་མེད་པར་བསྟན་པའི་ཕྱིར་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། ནམ་མཁའི་ཁམས་རང་བཞིན་གྱིས་གྲུབ་པ་དགག རིག་པ་དེ་གཞན་ལ་བསྒྲེ། བཀག་པའི་དོན་དུ་ལྟ་བ་སྨད་པའོ། །དང་པོ་ལ་གསུམ་སྟེ། མཚན་གཞི་དང་མཚན་ཉིད་དུ་མ་གྲུབ་པ། དངོས་པོ་དང་དངོས་མེད་དུ་མ་གྲུབ་པ། དེ་གཉིས་ཀའི་དོན་བསྡུ་བའོ། །དང་པོ་ལ་གསུམ་སྟེ། མཚན་གཞིར་མ་གྲུབ་པ། མཚན་ཉིད་དུ་མ་གྲུབ་པ། དོན་བསྡུ་བའོ། །དང་པོ་ལ་གཉིས་ཏེ། མཚན་ཉིད་འཇུག་པ་མེད་པ། དེ་མེད་པས་མཚན་གཞི་མི་འཐད་པའོ། །དང་པོ་ལ་གཉིས་ཏེ། མཚན་ཉིད་ཀྱི་སྔོན་རོལ་ན་མཚན་གཞི་མེད་པས་མཚན་གཞི་མི་འཐད། མཚན་ཉིད་དང་བཅས་མ་བཅས་ལ་མཚན་གཞི་མི་འཐད་པའོ། །དང་པོ་ནི། སྔར་མཚན་གཞི་གྲུབ་ན། དེ་ལ་མཚན་ཉིད་འཇུག་པར་འགྱུར་བ་ཞིག་ན། འདིར་ནམ་མཁའི་མཚན་ཉིད་སྒྲིབ་པ་མེད་པའི་སྔོན་རོལ་ན་མཚན་གཞི་ནམ་མཁའ་ཅུང་ཟད་ཀྱང་གྲུབ་པ་ཡོད་པ་མ་ཡིན་ཏེ། གལ་ཏེ་མཚན་ཉིད་སྒྲིབ་པ་མེད་པ་ལས། མཚན་གཞི་ནམ་མཁའ་སྔ་བར་གྱུར་ན། སྔར་གྲུབ་པའི་ནམ་མཁའ་དེ་མཚན་ཉིད་མེད་པར་ཐལ་བར་འགྱུར་བའི་ཕྱིར་རོ། །དེ་ལྟར་ཐལ་བར་འདོད་པ་ནི་མི་ནུས་ཏེ། མཚན་ཉིད་མེད་པའི་ཆོས་སམ་དངོས་པོ་ནི་ཡུལ་དུས་གང་ན་ཡང་ཡོད་པ་མ་ཡིན་པའི་ཕྱིར་ཏེ། རང་རང་གི་ཐ་སྙད་དུ་འཇོག་པའི་རྒྱུ་མཚན་ཐུན་མོང་མ་ཡིན་པའི་ངོ་བོ་མེད་པའི་ཕྱིར་རོ། །དེ་ལྟར་མཚན་ཉིད་མི་སྒྲིབ་པ་མེད་པའི་མཚན་གཞི་ནམ་མཁའི་དངོས་པོ་སྔར་མེད་ན་མཚན་ཉིད་དེ་མཚན་གཞི་གང་དུ་འཇུག་པར་འགྱུར་ཏེ་རྟེན་མེད་པའི་ཕྱིར་རོ། །གཉིས་པ་ནི། གཞན་ཡང་མཚན་ཉིད་འཇུག་ན་སྔར་ནས་མཚན་ཉིད་དེ་མེད་པའམ། དེ་དང་བཅས་པའམ། དེ་གཉིས་ལས་གཞན་པ་ཞིག་ལ་འཇུག་དྲང་། དེ་ལ་མཚན་ཉིད་དེ་སྔར་མེད་པ་ལ་མཚན་ཉིད་ནི་མི་འཇུག་སྟེ། མཚན་ཉིད་མེད་ན་མཚན་ཉིད་འཇུག་པ་འགལ་བའི་ཕྱིར་རོ། །སྔར་ནས་མཚན་ཉིད་དང་བཅས་པ་ལ་ཡང་འཇུག་པ་མ་ཡིན་ཏེ། དོན་མེད་པ་དང་ཐུག་པ་མེད་པར་འགྱུར་བའི་ཕྱིར་རོ། །མཚན་ཉིད་དང་བཅས་པ་དང་མཚན་ཉིད་མེད་པ་ལས་གཞན་ལ་ཡང་འཇུག་པར་མི་འགྱུར་ཏེ། དེ་གཉིས་དངོས་འགལ་ཡིན་པས་ཕུང་པོ་གསུམ་པ་མི་སྲིད་པའི་ཕྱིར་རོ། །གཉིས་པ་ནི། དེ་ལྟར་མཚན་ཉིད་འཇུག་པ་མེད་མོད། མཚན་གཞི་ནམ་མཁའ་ཡོད་དོ་སྙམ་ན་སྔར་བཤད་པའི་ཚུལ་གྱིས་མཚན་ཉིད་འཇུག་པ་མ་ཡིན་ན། མཚན་གཞི་འཐད་པར་མི་འགྱུར་ཏེ། མཚན་གཞི་ནི་མཚན་ཉིད་ཀྱི་རྟེན་བྱེད་པ་ཡིན་པའི་ཕྱིར་རོ། །གཉིས་པ་ནི། གལ་ཏེ་ཁྱོད་ཀྱིས་མཚན་ཉིད་མཚན་གཞི་ལ་འཇུག་པ་བཀག་པ་ཡིན་གྱི་མཚན་ཉིད་དེ་ཉིད་མ་བཀག་པས་ཡོད་དོ་སྙམ་ན་སྔར་བཤད་པའི་ཚུལ་གྱིས་མཚན་གཞི་ནམ་མཁའ་འཐད་པ་མ་ཡིན་པའི་ཕྱིར་ན། བརྟེན་པ་དེའི་མཚན་ཉིད་ཀྱང་ནི་ཡོད་པ་མ་ཡིན་ཏེ། རྟེན་མེད་པའི་ཕྱིར། གསུམ་པ་ནི། མཚན་ཉིད་འཇུག་པ་མི་འཐད་པ་དེའི་ཕྱིར། མཚན་གཞི་ནམ་མཁའ་ཡོད་པ་མིན་ཏེ། རྟེན་མཚན་གཞི་མེད་པས་དེའི་མཚན་ཉིད་ཡོད་པ་ཉིད་མ་ཡིན་ཞེས་པའོ། །གཉིས་པ་དངོས་པོ་དང་དངོས་མེད་དུ་མ་གྲུབ་པ་ནི། བྱེ་བྲག་ཏུ་སྨྲ་བ་དག་ནམ་མཁའ་འདུས་མ་བྱས་པའི་དངོས་པོར་སྨྲ་བ་ལ་ནམ་མཁའ་ནི་དངོས་པོར་མི་རུང་སྟེ། མཚན་གཞི་མཚན་ཉིད་གཉིས་དང་བྲལ་བའི་ཕྱིར། ཁྱབ་སྟེ། མཚན་གཞི་དང་། མཚན་ཉིད་ལས་མ་གཏོགས་པའི་དངོས་པོ་ཡང་ནི་ཡོད་པ་མ་ཡིན་པའི་ཕྱིར། མདོ་སྡེ་པ་དག ནམ་མཁའ་ནི་དོན་བྱེད་མི་ནུས་པས་དངོས་པོར་མེད་པ་ཉིད་དུ་སྨྲ་བ་ལ་ནམ་མཁའ་ནི་ཆོས་ཅན། དེ་ཁོ་ནར་དངོས་པོར་མེད་པའི་རང་བཞིན་དུ་ཡང་མི་རུང་སྟེ། དགག་བྱ་དངོས་པོར་མེད་པའི་ཕྱིར། ཁྱབ་སྟེ་དགག་བྱ་དངོས་པོ་ཉིད་ཡོད་པ་མ་ཡིན་ན། དེ་བཀག་པའི་བཀག་ཆོས་དངོས་མེད་དེ་དགག་བྱ་གང་གི་བཀག་ཆོས་ཡིན་པར་འགྱུར་ཏེ། དགག་བྱ་མེད་པའི་ཕྱིར། རྨི་ལམ་གྱི་བུ་མེད་པས་དེ་ཤི་བ་མི་བདེན་པ་བཞིན་ནོ། །གལ་ཏེ་དེ་ལྟར་དངོས་པོ་དང་དངོས་མེད་ལ་དཔྱད་པ་པོའི་གང་ཟག་ཡོད་པས་དེའི་དཔྱད་བྱ་དངོས་པོ་དང་དངོས་མེད་གཉིས་ཀྱང་ཡོད་པ་ཡིན་ནོ་ཞེ་ན། དེ་གཉིས་ཀྱི་དཔྱོད་པ་པོ་ཉིད་ཀྱང་ཡོད་པ་མ་ཡིན་ཏེ། གལ་ཏེ་ཡོད་ན་དངོས་པོ་དང་དངོས་མེད་དང་། དེ་གཉིས་ཀའི་མི་མཐུན་ཕྱོགས་སུ་གྱུར་པའི་གང་ཟག་གང་གིས་དཔྱད་བྱ་དངོས་པོ་དང་དངོས་མེད་ཤེས་པའམ་དཔྱད་པར་བྱེད་དྲང་། གསུམ་ཀ་ལྟར་ཡང་མི་འཐད་དེ། སྔར་དངོས་པོ་ཙམ་དང་དངོས་མེད་ཙམ་སྤྱིར་བཀག་པའི་ཕྱིར་དང་། དངོས་འགལ་ལ་དགག་ཕྱོགས་ཀྱི་ཕུང་གསུམ་མི་སྲིད་པའི་ཕྱིར་རོ། །གསུམ་པ་དེ་གཉིས་ཀའི་དོན་བསྡུ་བ་ནི། མཚན་ཉིད་འཇུག་པ་མི་འཐད་པ་དེའི་ཕྱིར་ནམ་མཁའ་མཚན་གཞི་མིན་ལ། མཚན་གཞི་མེད་པ་དེའི་ཕྱིར་དེའི་མཚན་ཉིད་ཡོད་པ་མིན་ཅིང་། དེ་གཉིས་མེད་པའི་ཕྱིར་དེ་དངོས་པོ་མིན་ལ་དགག་བྱ་དངོས་པོ་མེད་པ་དེའི་ཕྱིར་དེ་དངོས་མེད་མ་ཡིན་ཞེས་སྦྱར་བར་བྱའོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི་ས་ལ་སོགས་པ་ཁམས་ལྔ་པོ་དག་ཀྱང་ནམ་མཁའ་ལ་དཔྱད་པ་དང་མཚུངས་ཏེ། ས་ཡི་མཚན་ཉིད་སྔ་རོལ་ན། །ས་ནི་ཅུང་ཟད་ཡོད་མ་ཡིན། །ཞེས་སོགས་ཐམས་ཅད་སྔ་མ་ལྟར་སྦྱར་བར་བྱ་བ་ཡིན་པའི་ཕྱིར་རོ། །གསུམ་པ་བཀག་པའི་དོན་དུ་ལྟ་བ་སྨད་པ་ནི་མ་རིག་པའི་རབ་རིབ་ཀྱིས་བློའི་མིག་ཉམས་པའི་བློ་ཆུང་གང་དག་ཕྱི་ནང་གི་དངོས་པོ་ཀུན་རྫོབ་པ་རྣམས་ལ་ཡང་དག་པར་ཡོད་པ་ཉིད་དང་། དེ་བཀག་པའི་མེད་པ་ཉིད་དུ་ལྟ་བའི་གང་ཟག་དེ་ཡིས་ནི་ལྟ་བར་བྱ་བ་དོན་དམ་པ་རང་བཞིན་གྱིས་མྱ་ངན་ལས་འདས་པ་སྤྲོས་པ་ཐམས་ཅད་ཉེ་བར་ཞི་བ་དང་། ཞི་བ་མཐར་ཐུག་པ་མི་མཐོང་སྟེ། དགག་བྱ་སྤྲོས་པའི་མཐའ་ལ་བལྟས་པས་སྤྲོས་བྲལ་ལྟ་བའི་མིག་དང་མི་ལྡན་པའི་ཕྱིར། དམུས་ལོང་བཞིན་ནོ། །གཉིས་པ་ལུང་དང་སྦྱར་བ་ནི། ཏིང་ངེ་འཛིན་གྱི་རྒྱལ་པོའི་མདོ་ལས། ཡོད་དང་མེད་ཅེས་བྱ་བ་གཉིས་ཀ་མཐའ། །དག་དང་མ་དག་འདི་ཡང་མཐའ་ཡིན་ཏེ། །དེ་ཕྱིར་གཉིས་ཀའི་མཐའ་ནི་རྣམ་སྤངས་ནས། །མཁས་པས་དབུས་ལའང་གནས་པར་ཡོང་མི་བྱེད། །ཡོད་དང་མེད་ཅེས་བྱ་བར་རྩོད་པ་སྟེ། །དག་དང་མ་དག་འདི་ཡང་རྩོད་པ་ཡིན། །རྩོད་པར་གྱུར་པས་སྡུག་བསྔལ་ཞི་མི་འགྱུར། །རྩོད་པ་མེད་པར་གྱུར་པས་སྡུག་བསྔལ་འགག །ཞེས་གསུངས་ཏེ། འདིས་དངོས་པོ་དང་དངོས་མེད་དུ་གྲུབ་པ་དགག་བྱའི་མཐར་ཐུག་ཏུ་བྱས་ནས་བདེན་གཉིས་ཟུང་འཇུག་བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་ཁམས་བརྟག་པ་ཞེས་བྱ་བ་རབ་ཏུ་བྱེད་པ་ལྔ་པའི་རྣམ་པར་བཤད་པའོ།། །།གཉིས་པ་ཆོས་བདག་གི་སྒྲུབ་བྱེད་དགག་པ་ལ་གསུམ་སྟེ། འདོད་ཆགས་དང་ཆགས་པ་དགག འདུས་བྱས་ཀྱི་མཚན་ཉིད་དགག བྱེད་པ་པོ་དང་ལས་དགག་པའོ། །དང་པོ་ལ་གསུམ་ལས། དང་པོ་རབ་བྱེད་ཀྱི་འབྲེལ་ནི། དེ་ལྟར་སྐྱེ་མཆེད་དང་། ཕུང་པོ་དང་། ཁམས་དག་བཀག་མོད་ཀྱི་དེ་དག་ནི་རང་བཞིན་གྱིས་ཡོད་པ་ཉིད་དེ། དེའི་རྟེན་ཅན་གྱི་ཀུན་ནས་ཉོན་མོངས་པ་དམིགས་པའི་ཕྱིར་རོ། །རྟེན་མེད་ན་བརྟེན་པ་མེད་དེ། མོ་གཤམ་གྱི་བུ་དང་བུ་མོའི་ཉོན་མོངས་པ་བཞིན་ནོ། །ཡང་འདོད་ཆགས་ལ་སོགས་པ་ཀུན་ནས་ཉོན་མོངས་པ་གང་ལ་དམིགས་ནས་སྐྱེ་བའི་རྒྱུ་ནི་ཡོད་པ་ཡིན་ཏེ། མདོ་ལས། དགེ་སློང་དག་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྟག་པར་ལྟུང་བ་ནི་མིག་གིས་གཟུགས་རྣམས་མཐོང་ནས་ཡིད་བདེ་བའི་གནས་སུ་མངོན་པར་ཞེན་པར་འགྱུར་རོ། །དེ་མངོན་པར་ཞེན་པར་གྱུར་ནས་འདོད་ཆགས་བསྐྱེད་པར་བྱེད་དོ། །ཆགས་པར་གྱུར་ནས་ལུས་དང་ངག་དང་ཡིད་ཀྱིས་འདོད་ཆགས་ལས་བྱུང་བའི་ལས་མངོན་པར་འདུ་བྱེད་པར་འགྱུར་རོ་ཞེས་སོགས་རྒྱ་ཆེར་གསུངས་པས་སོ་སྙམ་ན། དེ་དག་ནི་དྲང་བའི་དོན་ཡིན་གྱི་རྣམ་པར་དཔྱད་ན་འདོད་ཆགས་ལ་སོགས་པ་རང་བཞིན་གྱིས་མ་གྲུབ་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་ལ་གཉིས་ལས། དང་པོ་རིག་པས་བསྒྲུབ་པ་ལ་གཉིས་ཏེ། འདོད་ཆགས་དང་ཆགས་པ་རང་བཞིན་གྱིས་གྲུབ་པ་དགག རིག་པ་དེ་ཆོས་གཞན་ལ་བསྒྲེ་བའོ། །དང་པོ་ལ་གསུམ་སྟེ། འདོད་ཆགས་དང་ཆགས་པ་སྔ་ཕྱིར་གྲུབ་པ་དགག ལྷན་ཅིག་ཏུ་གྲུབ་པ་དགག དོན་བསྡུ་བའོ། །དང་པོ་ལ་གཉིས་ཏེ། ཆགས་པ་སྔར་ཡོད་ཀྱི་འདོད་ཆགས་དགག འདོད་ཆགས་སྔར་ཡོད་ཀྱི་ཆགས་པ་དགག་པའོ། །དང་པོ་ནི། འདིར་འདོད་ཆགས་ནི་སེམས་ལས་བྱུང་བའི་ཉོན་མོངས་པ་ཡིན་ལ་ཆགས་པ་ནི་ཆོས་མངོན་པ་ལས་འདོད་ཆགས་ཀྱི་མིང་གི་རྣམ་གྲངས་དང་། བྱམས་ཆོས་དག་ལས་མངོན་པར་ཞེན་པའི་བློ་ཙམ་ལ་བཤད་ཀྱང་། འདིར་ནི་འདོད་ཆགས་དང་མཚུངས་ལྡན་གྱི་གཙོ་སེམས་སུ་བྱས་ནས་བརྟག་པ་སྟེ། འདོད་ཆགས་རང་བཞིན་གྱིས་ཡོད་ན་ཆགས་པ་སྔར་ཡོད་པའམ་མེད་པ་ཞིག་ལ་རྟོག་དྲང་། དང་པོ་ལྟར་ན། གལ་ཏེ་འདོད་ཆགས་ཀྱི་སྔ་རོལ་ན་འདོད་ཆགས་མེད་པའི་ཆགས་པ་ཞིག་ཡོད་ན། རྟེན་ཆགས་པ་གཙོ་སེམས་དེ་ལ་བརྟེན་ནས་བརྟེན་པ་སེམས་བྱུང་འདོད་ཆགས་ཡོད་དུ་རུང་བས་ཆགས་པ་སྔར་ཡོད་པའི་ཕྱིས་འདོད་ཆགས་ཡོད་པར་འགྱུར་བ་ཞིག་ན་ཡང་། འདོད་ཆགས་མེད་པའི་ཆགས་པ་ནི་སྲིད་པ་ཡང་མ་ཡིན་ཏེ། འཕགས་པ་དགྲ་བཅོམ་པ་རྣམས་ལ་ཡང་ཆགས་པ་ཡོད་པར་འགྱུར་བའི་ཕྱིར་རོ། །གཉིས་པ་ལྟར་ན་རྟེན་ཆགས་པ་སྔར་ཡོད་པར་མ་གྱུར་ན་ཡང་བརྟེན་པ་འདོད་ཆགས་ཡོད་པར་ག་ལ་འགྱུར་ཏེ། རྟེན་མེད་པའི་ཕྱིར། ཤིང་ཐོག་མེད་ན་དེའི་སྨིན་པ་མེད་པ་བཞིན་ནོ། །གཉིས་པ་ནི། དེ་ལྟར་འདོད་ཆགས་མེད་མོད་ཆགས་པ་ཡོད་དོ་ཞེས་ཀྱང་བརྟག་པར་མི་ནུས་ཏེ། ཆགས་པ་སྔར་ཡོད་མེད་ཀྱི་འདོད་ཆགས་མི་འཐད་པའི་རིམ་པ་འདི་ཉིད་རྟེན་ཆགས་པ་ལ་ཡང་བརྟེན་པ་འདོད་ཆགས་ནི་སྔར་ཡོད་པ་ལ་འདོད་དམ། འོན་ཏེ་མེད་ཀྱང་འདོད་ཅེས་དཔྱད་ན་གལ་ཏེ་ཆགས་པའི་སྔ་རོལ་ན་ཞེས་སོགས་འདོན་པ་བསྒྱུར་བས་མི་འཐད་པར་མཚུངས་པའི་ཕྱིར་རོ། །གཉིས་པ་ལྷན་ཅིག་ཏུ་གྲུབ་པ་དགག་པ་ལ་གཉིས་ཏེ། ཕན་ཚུན་ལྟོས་མེད་དུ་ཐལ་བས་དགག་པ། གཅིག་དང་ཐ་དད་ལ་ལྟོས་ནས་དགག་པའོ། །དང་པོ་ནི་བྱེ་བྲག་སྨྲ་བ་ནི་དེ་གཉིས་སྔ་ཕྱིར་འབྱུང་བ་མ་ཡིན་གྱི། ལྷན་ཅིག་འབྱུང་གང་ཕན་ཚུན་འབྲས། །ཞེས་པའི་ཚུལ་གྱིས་ལྷན་ཅིག་ཏུ་འབྱུང་བའི་རྒྱུ་འབྲས་ཡིན་པས་རང་བཞིན་གྱིས་ཡོད་དོ་ཞེ་ན། འདོད་ཆགས་དང་ནི་ཆགས་པ་དག ལྷན་ཅིག་ཉིད་དུ་སྐྱེ་མི་སྲིད་དེ། རྒྱུ་མཚན་འདི་ལྟར་ལྷན་ཅིག་ཏུ་འབྱུང་ན་རྭ་གཡས་གཡོན་ལྟར་འདོད་ཆགས་དང་ཆགས་པ་དག་ཕན་ཚུན་ལྟོས་པ་མེད་པར་འགྱུར་བའི་ཕྱིར་རོ། །གཉིས་པ་ལ་གཉིས་ཏེ། གཅིག་དང་ཐ་དད་ལ་ལྷན་ཅིག་སྤྱིར་དགག ཐ་དད་ལ་ལྷན་ཅིག་བྱེ་བྲག་ཏུ་དགག་པའོ། །དང་པོ་ནི། རེ་ཤིག་འདོད་ཆགས་དང་ཆགས་པ་གཉིས་ངོ་བོ་གཅིག་པའམ། ཐ་དད་པ་ཞིག་ལ་ལྷན་ཅིག་རྟོག་དྲང་། དང་པོ་ལྟར་ན་དེ་གཉིས་ལ་ལྷན་ཅིག་ཉིད་མེད་དེ། ངོ་བོ་གཅིག་པ་ཉིད་ཀྱི་ཕྱིར་རོ། །ཁྱབ་སྟེ། ལྷན་ཅིག་པ་ལ་འདི་ཉིད་འདི་དང་ལྷན་ཅིག་ཞེས་ཐ་དད་པས་ཁྱབ་པས་ན་དེ་ཉིད་དེ་དང་ལྷན་ཅིག་ཏུ་རུང་བ་མིན་པའི་ཕྱིར་རོ། །གཉིས་པ་ལྟར་ན་ཅི་སྟེ་ངོ་བོ་ཐ་དད་པ་ཉིད་ཡིན་ན་ཡང་ལྷན་ཅིག་ཉིད་དུ་ཅི་ལྟར་འགྱུར་ཏེ། ལྷན་ཅིག་ལ་དངོས་པོ་ཐ་དད་ཡུལ་དུས་གཅིག་ཏུ་ཚོགས་པ་དགོས་པས་དངོས་པོ་ཐ་དད་ཡུལ་དུས་གཅིག་པར་འགལ་བའི་ཕྱིར་རོ། །གཞན་ཡང་དེ་གཉིས་ཧ་ཅང་ཐལ་བས་དགག་པ་ནི་གལ་ཏེ་ངོ་བོ་གཅིག་པོ་ཞིག་ལ་ལྷན་ཅིག་འདོད་ན། གྲོགས་གཞན་མེད་པར་ལྷ་བྱིན་གཅིག་པོ་གནས་པ་ཡང་ལྷན་ཅིག་པ་དེར་འགྱུར་རོ། །ཡང་གལ་ཏེ་ངོ་བོ་ཐ་དད་པ་ལ་ལྷན་ཅིག་འདོད་ན་ཤར་ནུབ་ཀྱི་རིའི་རྟ་དང་བ་ལང་ལྟར་ཕན་ཚུན་གྲོགས་སུ་གནས་པ་མེད་པར་ཡང་ལྷན་ཅིག་པར་དེར་འགྱུར་རོ། །གཉིས་པ་ལ་གསུམ་སྟེ། ཐ་དད་མ་གྲུབ་པས་ལྷན་ཅིག་མི་གྲུབ་པ། ཐ་དད་གྲུབ་ན་ལྷན་ཅིག་བརྟག་པ་དོན་མེད་པ། བསྒྲུབ་བྱ་སྒྲུབ་བྱེད་དུ་བྱས་ན་རྟོགས་པ་ཕན་ཚུན་བརྟེན་པར་ཐལ་བའོ། །དང་པོ་ནི། གལ་ཏེ་ངོ་བོ་ཐ་དད་ལ་ལྷན་ཅིག་འདོད་ན་དེ་ཡང་མི་འཐད་དེ། འདོད་ཆགས་དང་ཆགས་པ་དག་ཕན་ཚུན་ལྟོས་མེད་ཀྱི་ཐ་དད་དུ་གྲུབ་པ་དེས་ན་དེ་གཉིས་ལྷན་ཅིག་ཏུ་འགྱུར་བ་ཞིག་ན་ཡང་གཅིག་གོ་འདོད་ཆགས་དང་ཆགས་པ་དག་ཕན་ཚུན་ལྟོས་མེད་ཀྱི་ཐ་དད་དུ་འགྱུར་རམ་སྟེ་མ་གྲུབ་པའི་ཕྱིར་རོ། །གཉིས་པ་ནི། གལ་ཏེ་ཐ་དད་པ་མ་གྲུབ་པ་ལ་ལྷན་ཅིག་མི་རུང་བས་འདོད་ཆགས་དང་ཆགས་པ་དག་ཕན་ཚུན་ལྟོས་མེད་ཀྱི་ཐ་དད་ཉིད་དུ་གྲུབ་པར་འདོད་པར་གྱུར་ན་དེ་གཉིས་རང་བཞིན་གྱིས་ཡོད་པར་བསྒྲུབ་པའི་ཕྱིར་དུ་ལྷན་ཅིག་ཉིད་དུ་ནི་ཅིའི་ཕྱིར་ན་ཡོངས་སུ་རྟོག་པར་བྱེད་དེ། སྔར་དེ་གཉིས་སྔ་ཕྱིར་མི་རུང་བས་རང་བཞིན་མེད་དོ་ཞེས་བསྟན་པ་ལ་དེ་གཉིས་ལྷན་ཅིག་ཏུ་ཡོད་པས་རང་བཞིན་དུ་ཡོད་དོ་ཞེས་ཀྱང་སྨྲས། ཕྱིས་ཕན་ཚུན་ལྟོས་མེད་ཀྱི་ཐ་དད་དུ་མ་གྲུབ་པ་ལ་ལྷན་ཅིག་མི་རུང་ཞེས་བསྟན་པ་ལ་ཕན་ཚུན་ལྟོས་མེད་ཀྱི་ཐ་དད་དུ་གྲུབ་པར་ཡང་སྨྲས་པའི་ཕྱིར་རོ། །གསུམ་པ་ནི་ལྷན་ཅིག་དོན་མེད་པར་མི་འགྱུར་ཏེ། དེ་ལ་མ་ལྟོས་པར་ཐ་དད་ཉིད་གྲུབ་པར་མ་གྱུར་པས་ཐ་དད་དུ་བསྒྲུབ་པ་དེའི་ཕྱིར་ལྷན་ཅིག་དེའི་སྒྲུབ་བྱེད་དུ་འདོད་ན་ནི། ལྷན་ཅིག་རབ་ཏུ་སྒྲུབ་པར་བྱེད་པའི་ཕྱིར། ཐ་དད་པ་ཉིད་དེའི་སྒྲུབ་བྱེད་དུ་ཡང་འདོད་དམ་སྟེ། འདོད་རིག་པར་ཐལ། གཅིག་ཉིད་ལྷན་ཅིག་ཉིད་མེད་དེ། །ཞེས་པའི་ཚུལ་གྱིས་ཐ་དད་པར་མ་གྲུབ་པ་ལ་ལྷན་ཅིག་ཉིད་མི་རུང་བས་སོ། །འདོད་ན། ཐ་དད་དངོས་པོ་གང་ཡོད་ན་ལྷན་ཅིག་དངོས་པོ་འདོད་པར་བྱེད་དེ། ཐ་དད་ལ་ལྟོས་ནས་ལྷན་ཅིག་མི་འགྲུབ་སྟེ། སྒྲུབ་བྱེད་ཐ་དད་ཉིད་ཀྱང་བསྒྲུབ་བྱ་ལྷན་ཅིག་ལ་ལྟོས་པས་ན་སྒྲུབ་བྱེད་ཐ་དད་ཀྱི་དངོས་པོར་སྔར་མ་གྲུབ་པས་བསྒྲུབ་བྱ་ལྷན་ཅིག་པའི་དངོས་པོར་འགྲུབ་པར་མི་འགྱུར་བའི་ཕྱིར། གསུམ་པ་དོན་བསྡུ་བ་ནི། འདོད་ཆགས་དང་ནི་ཆགས་པ་དག ལྷན་ཅིག་དང་ལྷན་ཅིག་མ་ཡིན་པར་མི་འགྲུབ་སྟེ། སྔར་བཤད་པའི་ཚུལ་དེ་ལྟར་རོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི། འདོད་ཆགས་དེ་རྟེན་ཆགས་པ་དང་ལྷན་ཅིག་དང་། ལྷན་ཅིག་མ་ཡིན་པར་མ་གྲུབ་པ་དེ་བཞིན་དུ་ཞེ་སྡང་ལ་སོགས་པ་ལྟོས་བཅས་ཀྱི་ཆོས་རྣམས་ཀུན་རྟེན་སྡང་བ་ལ་སོགས་པ་རང་རང་གི་ལྟོས་ས་དང་ལྷན་ཅིག་དང་། ལྷན་ཅིག་མ་ཡིན་པར་མི་འགྲུབ་པས་བརྟེན་ནས་འབྱུང་བའི་ཆོས་ཐམས་ཅད་རང་བཞིན་སྟོང་པ་ཉིད་དུ་གྲུབ་སྟེ། གལ་ཏེ་ཞེ་སྡང་སྔ་རོལ་ན། །ཞེ་སྡང་མེད་པའི་སྡང་ཡོད་ན། །ཞེས་སོགས་ཐམས་ཅད་ལ་མཚུངས་པའི་ཕྱིར་རོ། །གཉིས་པ་ལུང་དང་སྦྱར་བ་ནི། དེ་ཉིད་ཀྱི་ཕྱིར་བཅོམ་ལྡན་འདས་ཀྱིས། གང་འདོད་ཆགས་པ་དང་། གང་ལ་འདོད་ཆགས་པ་དང་། གང་གིས་འདོད་ཆགས་པ་དང་། གང་ཞེ་སྡང་བ་དང་། གང་ལ་ཞེ་སྡང་བ་དང་། གང་གིས་ཞེ་སྡང་བ་དང་། གང་གཏི་མུག་པ་དང་། གང་ལ་གཏི་མུག་པ་དང་། གང་གིས་གཏི་མུག་པར་འགྱུར་བའི་ཆོས་དེ་དེས་ཡང་དག་པར་རྗེས་སུ་མི་མཐོང་ཞིང་ཆོས་དེ་མི་དམིགས་སོ། །དེས་ཆོས་དེ་ཡང་དག་པར་རྗེས་སུ་མ་མཐོང་ཞིང་མ་དམིགས་པས་འདོད་ཆགས་མེད་པ། ཞེ་སྡང་མེད་པ། གཏི་མུག་མེད་པ། སེམས་ཕྱིན་ཅི་མ་ལོག་པ། མཉམ་པར་བཞག་པ་ཞེས་བྱའོ། །བརྒལ་བ་ཕ་རོལ་ཏུ་ཕྱིན་པ་ཞེས་བྱའོ། །བདེ་བར་སོན་པ་ཞེས་བྱའོ། །མི་འཇིགས་པ་ཐོབ་པ་ཞེས་བྱ་བ་ནས་ཟག་པ་ཟད་པ་ཞེས་བྱའོ། །ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་ཕྱིན་པའི་དགེ་སྦྱོང་ཞེས་བྱའོ། །ཞེས་བྱ་བའི་བར་དུ་རྒྱ་ཆེར་གསུངས་སོ། །དེ་བཞིན་དུ། གང་དག་འདོད་ཆགས་ཞེ་སྡང་རྒྱགས་དང་གཏི་མུག་གི །ངོ་བོ་ཀུན་རྟོག་གིས་སྐྱེད་ལོག་པར་ཞུགས་ཤེས་ནས། །རྣམ་པར་རྟོག་པ་མི་བྱེད་ཆགས་བྲལ་མི་འགྱུར་བའི། །བགོམ་པ་དེ་དག་གནས་ནི་དངོས་པོ་ཐམས་ཅད་ཡིན། །ཞེས་གསུངས་ཏེ། བསྟན་ཚུལ་ནི་སྔ་མ་ལྟར་ཤེས་བར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས་འདོད་ཆགས་དང་ཆགས་པ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་དྲུག་པའི་རྣམ་པར་བཤད་པའོ།། །།གཉིས་པ་འདུས་བྱས་ཀྱི་མཚན་ཉིད་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི་ཕུང་ཁམས་སྐྱེ་མཆེད་འདུས་བྱས་ཀྱི་རང་བཞིན་ཅན་དག་ནི་ཡོད་པ་ཉིད་དེ། སྤྲིན་ཆེན་པོའི་མདོ་ལས། དགེ་སློང་དག་གསུམ་པོ་འདི་དག་ནི་འདུས་བྱས་ཀྱི་མཚན་ཉིད་དག་སྟེ། འདུས་བྱས་ནི་སྐྱེ་བ་དང་། འཇིག་པ་དང་། གནས་པ་ལས་གཞན་དུ་འགྱུར་བ་ཡང་མངོན་ནོ། །ཞེས་གསུངས་པས་དེ་དག་འདུས་བྱས་སུ་མཚོན་པའི་མཚན་ཉིད་སྐྱེ་གནས་འཇིག་པ་རང་བཞིན་གྱིས་ཡོད་པས་སོ་སྙམ་པ་ལ། དེ་དག་རང་བཞིན་གྱིས་གྲུབ་པ་དགག་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། འདུས་བྱས་རང་བཞིན་གྱིས་གྲུབ་པ་དགག དེས་འདུས་མ་བྱས་ཁེགས་པར་བསྟན་པ། བཀག་པའི་དོན་ལ་ལུང་འགལ་སྤང་བའོ། །དང་པོ་ལ་གཉིས་ཏེ། མཚན་ཉིད་སྐྱེ་གནས་འཇིག་གསུམ་དགག དེས་མཚན་གཞི་འདུས་བྱས་ཁེགས་པར་བསྟན་པའོ། །དང་པོ་ལ་གཉིས་ཏེ། ཐུན་མོང་དུ་དགག སོ་སོར་དགག་པའོ། །དང་པོ་ལ་གསུམ་སྟེ། འདུས་བྱས་ཡིན་མིན་བརྟགས་ནས་དགག རེ་རེ་བ་དང་ཚོགས་པ་གང་གིས་མཚོན་བརྟགས་ནས་དགག མཚན་ཉིད་གཞན་ཡོད་མེད་བརྟགས་ནས་དགག་པའོ། །དང་པོ་ནི། བྱེ་བྲག་ཏུ་སྨྲ་བ་དག བུམ་པ་ལྟ་བུ་འདུས་བྱས་སུ་མཚོན་པ་ལ་སྐྱེ་བ་དང་། གནས་པ་དང་། འཇིག་པ་གསུམ་དེའི་མཚན་ཉིད་དུ་གནས་ཤིང་། མཚན་གཞི་ལས་ངོ་བོ་གཞན་དུ་གྱུར་པའི་སྐྱེ་སོགས་ཡིན་པར་ཡང་སྨྲའོ། །དེ་ལྟར་ན་སྐྱེ་བ་འདུས་བྱས་སམ་འདུས་མ་བྱས་གང་དེའི་མཚན་ཉིད་དུ་རྟོག་དྲང་། དེ་ལ་གལ་ཏེ་སྐྱེ་བ་འདུས་བྱས་ཡིན་ན། བུམ་པ་ལྟར་དེ་ལ་ཡང་སྐྱེ་བ་ལ་སོགས་པའི་མཚན་ཉིད་གསུམ་དང་ལྡན་པར་འགྱུར་ཏེ། དེ་འདུས་བྱས་ཡིན་པའི་ཕྱིར། འདོད་མི་ནུས་ཏེ། དེ་ལྟར་ན་འདུས་བྱས་ཀྱི་མཚན་གཞིར་འགྱུར་བས་དེ་མཚན་ཉིད་ཡིན་པ་ཉམས་པའི་ཕྱིར་རོ། །ཅི་སྟེ་སྐྱེ་བ་འདུས་མ་བྱས་ཡིན་ན། དེ་ཅི་ལྟར་འདུས་བྱས་ཀྱི་མཚན་ཉིད་ཡིན་ཏེ། ནམ་མཁའ་ལྟར་མཚན་གཞི་འདུས་བྱས་ལ་མི་སྲིད་པའི་ཕྱིར་རོ། །ལྷག་མ་གཉིས་པོ་ལའང་གལ་ཏེ་གནས་པ་འདུས་བྱས་ན་ཞེས་སོགས་སྦྱར་བར་བྱའོ། །གཉིས་པ་ནི། ཆོས་གསུམ་པོ་རེ་རེ་བའམ་འདུས་པ་ཞིག་དེའི་མཚན་ཉིད་དུ་རྟོག་དྲང་། དང་པོ་ལྟར་ན་སྐྱེ་བ་ལ་སོགས་པ་གསུམ་པོ་སོ་སོ་སྟེ་རེ་རེ་བ་ཡིས་འདུས་བྱས་ཀྱི་མཚན་ཉིད་བྱ་བར་ནི་ནུས་པ་མ་ཡིན་སྟེ། ཆོས་གཉིས་དང་བྲལ་བས་འདུས་མ་བྱས་སུ་འགྱུར་བའི་ཕྱིར་དང་། མ་སྐྱེས་པ་དང་། རང་དུས་སུ་མི་གནས་པ་དང་། རྟག་པ་འདུས་བྱས་སུ་མི་རུང་བའི་ཕྱིར་རོ། །གཉིས་པ་ལྟར་ན་དངོས་པོ་གཅིག་ལ་དུས་གཅིག་ཏུ་དེ་གསུམ་འདུས་པར་ཡང་ནི་ཅི་ལྟར་རུང་བར་འགྱུར་ཏེ། བྱ་བ་འགལ་བའི་ཕྱིར་སྣང་མུན་བཞིན་ནོ། །གསུམ་པ་ལ་གཉིས་ཏེ་ཧ་ཅང་ཐལ་བར་འགོད། དེའི་ཉེས་སྤོང་དགག་པའོ། །དང་པོ་ནི། གཞན་ཡང་གལ་ཏེ་སྐྱེ་བ་དང་། གནས་པ་དང་། འཇིག་པ་རྣམས་ལ་ཡང་འདུས་བྱས་ཀྱི་མཚན་ཉིད་སྐྱེ་གནས་འཇིག་པ་གཞན་ཞིག་ནི་ཡོད་ན་འདུས་བྱས་ཀྱི་མཚན་ཉིད་ཐུག་པ་མེད་པར་འགྱུར་ཏེ། དེ་ལ་ཡང་འདུས་བྱས་ཀྱི་མཚན་ཉིད་གཞན་ཡོད་དགོས་པའི་ཕྱིར་རོ། །གལ་ཏེ་སྐྱེ་སོགས་གསུམ་ལ་མཚན་ཉིད་གཞན་མེད་ན་དེ་དག་འདུས་བྱས་མིན་པར་འགྱུར་ཏེ། འདུས་བྱས་ཀྱི་མཚན་ཉིད་དང་བྲལ་བའི་ཕྱིར། འདོད་ན་འདུས་བྱས་མཚོན་མི་ནུས་པར་འགྱུར་རོ། །གཉིས་པ་ལ་གཉིས་ཏེ། ཐལ་བ་དང་པོའི་ཉེས་སྤོང་དགག་པ། ཐལ་པ་གཉིས་པའི་ཉེས་སྤོང་དགག་པའོ། །དང་པོ་ལ་གཉིས་ཏེ། ཉེས་སྤོང་བརྗོད། དེ་དགག་པའོ། །དང་པོ་ནི། ཁ་ཆེ་བྱེ་བྲག་ཏུ་སྨྲ་བ་ན་རེ། མཚན་ཉིད་སྐྱེ་གནས་འཇིག་པ་ལ་སྐྱེ་བའི་སྐྱེ་བ་སོགས་མཚན་ཉིད་གཞན་གསུམ་ཡོད་པས་ཉེས་པ་གཉིས་པ་མེད་ལ་ཐུག་མེད་དུ་ཡང་མི་འགྱུར་ཏེ། མཚན་ཉིད་སྐྱེ་སོགས་དང་། རྗེས་མཐུན་གྱི་མཚན་ཉིད་རྣམས་ཕན་ཚུན་བསྒྲུབ་པར་བྱེད་པའི་ཕྱིར། འདི་ལྟར་མཚན་གཞི་འདུས་བྱས་དེ་ཉིད་དང་། མཚན་ཉིད་སྐྱེ་སོགས་གསུམ་དང་རྗེས་མཐུན་གྱི་མཚན་ཉིད་སྐྱེ་བའི་སྐྱེ་བ་སོགས་གསུམ་སྟེ་ཆོས་བདུན་ཡོད་པ་ལས་སྐྱེ་བའི་སྐྱེ་བས་རྩ་བའི་སྐྱེ་བ་འབའ་ཞིག་བསྐྱེད་པར་བྱེད་ལ། རྩ་བའི་སྐྱེ་བས་སྐྱེ་བའི་སྐྱེ་བ་ལ་སོགས་པ་རང་ཉིད་ལས་གཞན་པའི་ཆོས་དྲུག་སྐྱེད་པར་བྱེད་པ་ཡིན་ནོ། །དེ་བཞིན་དུ་གནས་པའི་གནས་པས་རྩ་བའི་གནས་པ་ཉིད་དང་། རྩ་བའི་གནས་པས་ཆོས་གཞན་དྲུག་གནས་པར་བྱེད་ལ། འཇིག་པའི་འཇིག་པས་རྩ་བའི་འཇིག་པ་ཉིད་དང་། རྩ་བའི་འཇིག་པས་ཆོས་གཞན་དྲུག་འཇིག་པར་བྱེད་པས་མཚན་ཉིད་གསུམ་དང་། རྗེས་མཐུན་གྱི་མཚན་ཉིད་གསུམ་གྱིས་ཆོས་བདུན་པོ་རེ་རེ་ཡང་དང་པོ་བསྐྱེད། བར་དུ་གནས། ཐ་མར་འཇིག་པར་བྱེད་པས་དེ་དག་འདུས་བྱས་སུ་མཚོན་ཞིང་། གཞི་མཚན་གཉིས་རྫས་ཐ་དད་དང་བྱ་བྱེད་རང་དབང་བར་འདོད་པ་ཡིན་ནོ། །མཛོད་ལས། དེ་དག་སྐྱེ་བའི་སྐྱེ་ལ་སོགས། །དེ་ཆོས་བརྒྱད་དང་གཅིག་ལ་འཇུག །ཅེས་བཤད་པ་ནི་གནས་པ་ལས་གཞན་དུ་འགྱུར་བ་རྒ་བ་ཡིན་པས་དང་། འདིར་གནས་པའི་ཡན་ལག་ཏུ་བསྡུས་ཏེ་མཚན་ཉིད་གསུམ་དུ་བྱས་པ་ཡིན་པས་དོན་གཅིག་གོ །འདིར་འགྲེལ་པར། མཚན་ཉིད་བདུན། རྗེས་མཐུན་པའི་མཚན་ཉིད་བདུན། མཚན་གཞི་དང་ཆོས་བཅོ་ལྔར་ཕྱེ་ནས་དེ་ཆོས་བཅུ་བཞི་དང་གཅིག་ལ་འཇུག་ཅེས་པའི་དོན་དུ་འཆད་པ་ནི་རྩ་བར་མི་སྣང་ངོ་ཞེས་རྨ་བྱ་གསུང་ཡང་འགྲེལ་པར། མང་པོས་བཀུར་བའི་སྡེ་པའི་འདོད་པར་བྱས་ནས། མཚན་གཞི་ཆོས་དེ་ཉིད་དང་། དེའི་མཚན་ཉིད་སྐྱེ་བ་དང་། ལྡན་པ་དང་། གནས་པ་དང་། རྒ་བ་དང་། མི་རྟག་པ་དང་ལྔ། གལ་ཏེ་ཆོས་དེ་ཉོན་མོངས་ཅན་ཞིག་ཡིན་ན། ཉོན་མོངས་ཅན་དེ་ཉིད་དང་། དེའི་ལོག་པའི་རྣམ་པར་གྲོལ་བ་དང་བདུན། འོན་ཏེ་དགེ་བ་ཞིག་ཡིན་ན། དགེ་བ་དེ་ཉིད་དང་། དེའི་ཡང་དག་པའི་རྣམ་པར་གྲོལ་བ་དང་བདུན། གལ་ཏེ་ངེས་པར་འབྱུང་བ་ཞིག་ཡིན་ན། ངེས་འབྱུང་དེ་ཉིད་དང་། དེའི་ངེས་པར་འབྱུང་བ་ཉིད་དང་བདུན། གལ་ཏེ་ངེས་པར་འབྱུང་བ་མ་ཡིན་པ་ཞིག་ཡིན་ན་ནི། ངེས་འབྱུང་མིན་པ་དེ་ཉིད་དང་། དེའི་ངེས་པར་འབྱུང་བ་མ་ཡིན་པ་ཉིད་དང་བདུན་སྟེ། དེ་དག་ནི་མཚན་གཞི་འདུས་བྱས་གང་ཡིན་པ་དེའི་འཁོར་ཡིན་ལ། སྐྱེ་བའི་སྐྱེ་བ་སོགས་ནི་འཁོར་གྱི་འཁོར་ཡིན་པས་འཁོར་དང་བཅས་པའི་དབང་དུ་བྱས་པ་ཡིན་ལ། དེ་དག་བསྡུ་ན། མཛོད་ལས་གསུངས་པ་ལྟར་ཆོས་དགུར་འགྱུར་ཞིང་། དེ་ཡང་བསྡུ་ན་འདིར་བཤད་པ་ལྟར་ཆོས་བདུན་དུ་འགྱུར་བའི་དོན་ཡིན་པས་འགྲེལ་པས་རང་གི་བྱ་བ་བྱས་པ་ཡིན་ནོ། །གཉིས་པ་ལ་གསུམ་སྟེ། སྐྱེ་བའི་སྐྱེ་བས་རྩ་བའི་སྐྱེ་བ་བསྐྱེད་པ་དགག རྩ་བའི་སྐྱེ་བས་སྐྱེ་བའི་སྐྱེ་བ་བསྐྱེད་པ་དགག དེ་གཉིས་ཀའི་ལན་དགག་པའོ། །དང་པོ་ནི། གལ་ཏེ་ཁྱོད་ཀྱི་ལྟར་ན་སྐྱེ་བའི་སྐྱེ་བས་རྩ་བའི་སྐྱེ་བ་བསྐྱེད་པར་བྱེད་ན། ཁྱེད་འདོད་པའི་སྐྱེ་བའི་སྐྱེ་བ་དེས་ཆོས་ཅན། རྩ་བའི་སྐྱེ་བ་དེ་ནི་ཅི་ལྟར་བསྐྱེད་པར་བྱེད་དེ་མི་བྱེད་པར་ཐལ། དེའི་སྔར་མ་གྲུབ་པའི་ཕྱིར། རྟགས་ཁས་བླངས་ཏེ། དེ་རྩ་བའི་སྐྱེ་བ་ལ་ལྟོས་པས། དེའི་སྔར་རྩ་བའི་སྐྱེ་བས་མ་བསྐྱེད་པའི་ཕྱིར་རོ། །གཉིས་པ་ནི། གལ་ཏེ་ཁྱོད་ཀྱི་ལྟར་ན་རྩ་བའི་སྐྱེ་བ་ཡིས་བསྐྱེད་པའི་སྐྱེ་བའི་སྐྱེ་བ་དེ་ཡིས་རྩ་བའི་སྐྱེ་བ་བསྐྱེད་པའི་ཕྱིར་ཉེས་པ་དེ་མེད་དོ་སྙམ་ན། སྐྱེ་བའི་སྐྱེ་བ་དེའི་སྔར་མ་གྲུབ་པའི་རྩ་བའི་སྐྱེ་བ་དེས་ཆོས་ཅན། སྐྱེ་བའི་སྐྱེ་བ་དེ་ནི་ཅི་ལྟར་སྐྱེད་པར་བྱེད་དེ། དེའི་སྔར་མ་གྲུབ་པའི་ཕྱིར་རོ། །གཏན་ཚིགས་ཁས་བླངས་ཏེ། དེ་སྐྱེ་བའི་སྐྱེ་བ་ལ་ལྟོས་པས་སྔར་སྐྱེ་བའི་སྐྱེ་བ་དེས་མ་བསྐྱེད་པའི་ཕྱིར་རོ། །གསུམ་པ་ནི། གལ་ཏེ་ཁོ་བོ་ཅག་དུས་གསུམ་རྫས་སུ་འདོད་པས་མ་འོངས་པ་ན་རྩ་བའི་སྐྱེ་བ་སྐྱེ་བཞིན་པ་ཡོད་པ་དེས་སྐྱེ་བའི་སྐྱེ་བ་བསྐྱེད་པར་བྱེད་ལ། སྐྱེ་བའི་སྐྱེ་བ་དེས་རྩ་བའི་སྐྱེ་བ་མ་འོངས་པ་ན་ཡོད་པ་དེ་ཉིད་སྐྱེད་པར་བྱེད་དེ། ཕན་ཚུན་དབུལ་བ་དང་འདྲེན་པར་བྱེད་པས་ཕ་བུ་ཐོག་ཁར་འགྲོ་བ་བཞིན་ནོ་སྙམ་ན། རྩ་བའི་སྐྱེ་བ་སྐྱེ་བཞིན་པས་སྐྱེ་བའི་སྐྱེ་བ་བསྐྱེད་པར་མི་རིགས་ཏེ། གལ་ཏེ་རང་ཉིད་མ་སྐྱེས་ཤིང་མེད་པ་དེ་ཡིས་མ་སྐྱེས་པ་གཞན་དེ་སྐྱེད་པར་ནི་བྱེད་ནུས་ན་ཁྱོད་ཀྱི་རྩ་བའི་སྐྱེ་བ་སྐྱེ་བཞིན་པ་མ་སྐྱེས་ཤིང་། མེད་པ་དེ་ཡིས་སྐྱེ་བའི་སྐྱེ་བ་དེ་བསྐྱེད་པར་ནི་འདོད་ལ་རག་ན་ཡང་རང་ཉིད་མ་སྐྱེས་ཤིང་མེད་པས་མ་སྐྱེས་པ་གཞན་སྐྱེད་པར་ཡང་མི་ནུས་པའི་ཕྱིར། སྐྱེ་བའི་སྐྱེ་བ་སྐྱེ་བཞིན་པས་རྩ་བའི་སྐྱེ་བ་བསྐྱེད་པ་ལ་ཡང་དེ་བཞིན་དུ་བརྗོད་པར་བྱ་ཞིང་། ལྷག་མ་གཉིས་པོ་ལ་ཡང་གལ་ཏེ་ཁྱོད་ཀྱི་གནས་པའི་གནས། རྩ་བའི་གནས་པ་གནས་བྱེད་ན་ཞེས་སོགས་སྦྱར་བར་བྱའོ། །གཉིས་པ་ལ་གཉིས་ཏེ། ཉེས་སྤོང་བརྗོད། དེ་དགག་པའོ། །དང་པོ་ནི། མདོ་སྡེ་པ་ན་རེ། འདུས་བྱས་ཀྱི་མཚན་ཉིད་སྐྱེ་གནས་འཇིག་པ་ལ། མཚན་ཉིད་སྐྱེ་གནས་འཇིག་པ་གཞན་མེད་པས་ཐུག་མེད་དུ་མི་འགྱུར་ལ། འདུས་མ་བྱས་སུ་ཡང་མི་འགྱུར་ཏེ། ཇི་ལྟར་མར་མེ་སྣང་བའི་རང་བཞིན་ཡིན་པས་རང་དང་གཞན་གཉིས་ཀ་སྣང་བར་བྱེད་པ་དེ་བཞིན་དུ་སྐྱེ་བའི་བྱ་བ་ཡང་སྐྱེ་བའི་རང་བཞིན་ཡིན་པའི་ཕྱིར། རང་དང་གཞན་གྱི་དངོས་པོ་གཉིས་ཀ་བསྐྱེད་པར་བྱེད་པར་ཡིན་པའི་ཕྱིར་རོ། །དེ་བཞིན་དུ་གནས་པས་རང་དང་གཞན་གཉིས་ཀ་གནས་པ་དང་། འཇིག་པས་རང་དང་གཞན་གཉིས་ཀ་འཇིག་པ་ཡང་སྦྱར་བར་བྱའོ་ཞེས་ཟེར་རོ། །གཉིས་པ་ལ་གཉིས་ཏེ། དཔེ་མ་གྲུབ་པ་དང་། དོན་མི་འཐད་པའོ། །དང་པོ་ལ་གཉིས་ཏེ། ཁྱབ་བྱེད་མ་དམིགས་པས་དགག ཧ་ཅང་ཐལ་བས་དགག་པའོ། །དང་པོ་ནི། རྣམ་པར་དཔྱད་ན་མར་མེས་རང་དང་གཞན་སྣང་བར་བྱེད་པའི་དཔེ་མ་གྲུབ་སྟེ། འདི་ལྟར་མར་མེས་ཆོས་ཅན། རང་དང་གཞན་ཅི་ཞིག་སྣང་བར་བྱེད་དེ། རང་དང་གཞན་ལ་མུན་པ་མ་བསལ་བའི་ཕྱིར་ཏེ། སྣང་མུན་ཡུལ་གཅིག་ཏུ་འགལ་བས་མར་མེ་དང་ནི་ཡུལ་གཞན་གང་དག་ལ་མར་མེ་དེ་འདུག་པ་ན་བསལ་བྱའི་མུན་པ་མེད་པའི་ཕྱིར་རོ། །མུན་པ་མ་བསལ་ཡང་སྣང་བྱེད་ཡིན་པ་ཅི་འགལ་སྙམ་ན་དེ་ཡང་མི་འཐད་དེ། འཇིག་རྟེན་དུ་མུན་པ་སེལ་བས་སྣང་བྱེད་དུ་བརྗོད་པ་ཡིན་པའི་ཕྱིར་རོ། །གལ་ཏེ་སྐྱེས་ཟིན་པའི་མར་མེས་མུན་པ་མི་སེལ་ཡང་སྐྱེ་བཞིན་པའི་མར་མེས་རང་དང་གཞན་ལ་མུན་པ་སེལ་བ་ཡིན་ནོ་ཞེ་ན། མར་མེ་སྐྱེ་བཞིན་པས་ཅི་ལྟར་མུན་པ་སེལ་བར་བྱེད་པ་ཡིན་ཏེ། གང་གི་ཚེ་སྟེ་གང་གི་ཕྱིར་ན་མར་མེ་སྐྱེ་བཞིན་པ་མུན་པ་དང་ཕྲད་པ་མེད་པའི་ཕྱིར། གལ་ཏེ་མར་མེས་ཕྲད་པ་མེད་པར་ཡང་མུན་པ་སེལ་བར་བྱེད་པས་ཁྱབ་པ་མ་ངེས་སོ་སྙམ་ན། དེ་ལྟར་ན་འདི་ན་འདུག་པའི་མར་མེ་དེས་ཆོས་ཅན། གླིང་བར་ལ་སོགས་པ་འཇིག་རྟེན་ཀུན་ན་གནས་པའི་མུན་པ་ཐམས་ཅད་བསལ་བར་འགྱུར་ཏེ། མ་ཕྲད་པར་མཚུངས་པའི་ཕྱིར། གཉིས་པ་ནི། གལ་ཏེ་མར་མེ་སྣང་བྱེད་ཡིན་པས་རང་དང་གཞན་གྱི་དངོས་པོ་གཉིས་ཀ་སྣང་བར་བྱེད་པར་འགྱུར་ན་མུན་པའང་ཆོས་ཅན། རང་དང་གཞན་གྱི་དངོས་པོ་གཉིས་ཀ་སྒྲིབ་པར་འགྱུར་བར་ཐེ་ཚོམ་མེད་པར་ཐལ། སྒྲིབ་བྱེད་ཡིན་པའི་ཕྱིར། འདོད་ན་མུན་པས་བདག་ཉིད་སྒྲིབ་པའི་ཕྱིར་དེ་མི་མཐོང་བར་འགྱུར་རོ། །གཉིས་པ་ལ་གཉིས་ཏེ། སྐྱེ་བས་རང་བསྐྱེད་པ་དགག སྐྱེ་བས་གཞན་བསྐྱེད་པ་དགག་པའོ། །དང་པོ་ནི་སྐྱེ་བས་རང་བསྐྱེད་པར་བྱེད་ན་རང་མ་སྐྱེས་པའམ་སྐྱེས་པ་ཞིག་གིས་བསྐྱེད་པར་བྱེད་དྲང་། དང་པོ་ལྟར་ན་སྐྱེ་བ་འདིས་ནི་ཆོས་ཅན། རང་གི་བདག་ཉིད་ཇི་ལྟར་སྐྱེད་པར་བྱེད་དེ་རང་ཉིད་མ་སྐྱེས་པའི་ཕྱིར། ཅི་སྟེ་རང་སྐྱེས་པས་བསྐྱེད་པར་བྱེད་དོ་སྙམ་ན་སྐྱེ་བ་དེ་ཆོས་ཅན། ཅི་ཞིག་སྐྱེད་དུ་ཡོད་དེ་མེད་པར་ཐལ། སྐྱེས་ཟིན་པའི་ཕྱིར་རོ། །གཉིས་པ་ལ་གཉིས་ཏེ། ལས་ལ་དུས་གསུམ་དུ་བརྟག་སྟེ་དགག སྐྱེ་བ་ལ་སྐྱེ་བ་གཞན་ཡོད་མེད་དཔྱད་དེ་དགག་པའོ། །དང་པོ་ལ་གསུམ་སྟེ། དུས་གསུམ་གྱི་ལས་ལ་སྐྱེ་བ་སྤྱིར་དགག སྐྱེ་བཞིན་པ་སྐྱེ་བ་བྱེ་བྲག་ཏུ་དགག དེ་ལ་རྟེན་འབྱུང་མི་རུང་བའི་སྐྱོན་སྤོང་བའོ། །དང་པོ་ནི། སྐྱེ་བའི་བྱ་བ་དེས་འདུས་བྱས་ཀྱི་ཆོས་བུམ་པ་ལྟ་བུ་གཞན་སྐྱེད་ན་དེ་སྐྱེས་པའམ། མ་སྐྱེས་པའམ། སྐྱེ་བཞིན་པ་གཅིག་བསྐྱེད་དྲང་། དེ་ལ་སྐྱེས་དང་མ་སྐྱེས་སྐྱེད་བཞིན་པ། ཅི་ལྟ་བུར་ཡང་མི་སྐྱེད་པ། དེ་ནི་སོང་དང་མ་སོང་དང་། བགོམ་པས་རྣམ་པར་བཤད་པ་ཡིན་ཏེ། དུས་གསུམ་གྱི་དཔྱད་པ་འདིར་ཡང་མཚུངས་པའི་ཕྱིར་རོ། །གཉིས་པ་ནི། གལ་ཏེ་སྐྱེས་མ་སྐྱེས་ལས་གཞན་པའི་བུམ་པ་སྐྱེ་བཞིན་པ་བརྗོད་དེ། སྐྱེ་བའི་བྱ་བ་དང་ལྡན་པའི་ཕྱིར། དེས་ན་དེ་སྐྱེ་བ་དོན་གཞན་གྱིས་བསྐྱེད་པར་བྱེད་དོ་སྙམ་ན། རྟེན་བུམ་པ་མ་སྐྱེས་པས་དེ་ལ་བརྟེན་པའི་བུམ་པ་སྐྱེ་བའི་བྱ་བ་མེད་པ་དེའི་ཚེ་སྐྱེ་བའི་བྱ་བ་ལ་བརྟེན་ནས་ནི་བུམ་པ་སྐྱེ་བཞིན་པ་འདི་ཞེས་ནི་ཅི་ལྟར་བརྗོད་པར་བྱ་སྟེ། གང་གི་ཚེ་སྐྱེ་བའི་བྱ་བ་འགའ་ཞིག་ཡོད་ན་དེ་དང་ལྡན་པས་བུམ་པ་སྐྱེ་བཞིན་པ་འདི་ཞེས་འབྱུང་བར་རིགས་ན་ཡང་སྐྱེ་བ་འདི་ནི་བྱེད་པོ་མེད་པར་རིགས་པའི་ངོ་བོའང་མིན་ཞེས་པའི་ཚུལ་གྱིས་རྟེན་བུམ་པ་མེད་པས་དེ་སྐྱེ་བའི་བྱ་བ་མེད་པའི་ཕྱིར་རོ། །གསུམ་པ་ནི། རང་གི་སྡེ་པ་དག་བཅོམ་ལྡན་འདས་ཀྱིས། འདི་ན་བདག་གམ་སེམས་ཅན་མེད། །ཆོས་འདི་དག་ནི་རྒྱུ་དང་བཅས། །ཞེས་གསུངས་པའི་ཚུལ་གྱིས། མུ་སྟེགས་པས་བརྟགས་པའི་རྟག་གཅིག་རང་དབང་ཅན་གྱི་གང་ཟག་གིས་སྟོང་པའི་རྟེན་ཅིང་འབྲེལ་པར་འབྱུང་བ་མི་རྟག་པར་ཆོས་ཙམ་ཁོ་ནར་བསྟན་པ་ཡིན་ལ། ཁྱོད་ཀྱིས་དེ་བཀག་པས་མེད་པར་སྨྲ་བར་འགྱུར་རོ་ཞེ་ན། ཁོ་བོ་ཅག་གིས་ཁྱོད་འདོད་པའི་རྟེན་འབྲེལ་ངོ་བོ་ཉིད་ཀྱིས་གྲུབ་པ་བཀག་པས་དེ་བཞིན་གཤེགས་པའི་གསུང་བཀག་པ་མ་ཡིན་ཏེ། འདི་ལྟར་རྟེན་ཅིང་འབྲེལ་པར་འབྱུང་བ་གང་ཡིན་པ་དེ་ནི་ངོ་བོ་ཉིད་ཀྱིས་ཞི་བའི་སྟོང་པ་ཉིད་ཡིན་ཏེ། ཅི་སྐད་དུ་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པར་བཤད། །ཅེས་གསུངས་པས་སོ། །དེ་ཉིད་ཀྱི་ཕྱིར་སྐྱེ་བྱ་སྐྱེ་བཞིན་པ་ཉིད་དང་ནི་སྐྱེད་བྱེད་སྐྱེ་བ་ཡང་ནི་རང་བཞིན་གྱིས་ཞི་བ་ཉིད་ཡིན་ཏེ། རྟེན་འབྲེལ་ཡིན་པའི་ཕྱིར། གལ་ཏེ་དུས་གསུམ་རྫས་སུ་ཡོད་པས་སྐྱེ་བཞིན་པའི་བུམ་པའང་མ་འོངས་པ་ན་ཡོད་ལ། དེའི་ཕྱིར་དེ་ལ་སྐྱེ་བའི་བྱ་བ་བརྟེན་པའི་སྒོ་ནས་ད་ལྟར་སྐྱེ་བར་འགྱུར་རོ་སྙམ་ན། གལ་ཏེ་བུམ་པ་ལྟ་བུའི་དངོས་པོ་མ་སྐྱེས་པ་འགའ་ཞིག མ་འོངས་པའི་གནས་སྐབས་གང་ན་ཡོད་པར་འགྱུར་ན། དེ་ལ་སྐྱེ་བའི་བྱ་བ་རྟེན་དུ་རུང་བས་དེ་ནི་སྐྱེ་བར་འགྱུར་བ་ཞིག་ན་མ་འོངས་པའི་དངོས་པོ་དེ་ཅི་ཞིག་སྐྱེ་བར་འགྱུར་ཏེ། རྟེན་མེད་པས་སྐྱེ་བའི་བྱ་བ་འཇུག་པར་འགལ་བའི་ཕྱིར་རོ། །གཉིས་པ་ནི། གལ་ཏེ་ཁྱོད་ཉིད་སྐྱེ་བའི་བྱ་བ་དོན་གཞན་དེ་ཡིས་ནི་བུམ་པ་སྐྱེ་བཞིན་པ་ནི་བསྐྱེད་པར་བྱེད་ན་སྐྱེ་བ་དོན་གཞན་དེ་ནི་སྐྱེ་བ་ལྟར་རང་ངམ་གཞན་གང་ཞིག་གིས་ནི་སྐྱེད་པར་བྱེད། གལ་ཏེ་སྐྱེ་བ་དེ་སྐྱེ་བ་གཞན་ཞིག་གིས་བསྐྱེད་པར་འདོད་ན་ཐུག་པ་མེད་པར་འགྱུར་ཏེ། དེ་བསྐྱེད་པ་ལ་སྐྱེ་བ་གཞན་དགོས་པས་སོ། །ཅི་སྟེ་སྐྱེ་བ་ལ་སྐྱེ་བ་གཞན་མེད་པར་སྐྱེ་ན་དངོས་པོ་གཞན་ཐམས་ཅད་ཀྱང་དེ་བཞིན་དུ་སྐྱེ་བ་དོན་གཞན་མེད་པར་སྐྱེ་བར་འགྱུར་ཏེ། དངོས་པོ་ཡིན་པའི་ཕྱིར། སྐྱེ་བ་བཞིན་ནོ་སྙམ་དུ་དགོངས་སོ། །གཉིས་པ་སོ་སོར་དགག་པ་ལ་གསུམ་སྟེ། སྐྱེ་བ་དགག གནས་པ་དགག འཇིག་པ་དགག་པའོ། །དང་པོ་ལ་གཉིས་ཏེ། རིགས་པ་སྔ་མས་ཁེགས་པ། འགག་བཞིན་པ་ཡིན་མིན་བརྟགས་ནས་དགག་པའོ། །དང་པོ་ནི། རེ་ཞིག་དངོས་པོ་ཡོད་དམ་མེད་པ་ཡང་། །སྐྱེ་བར་རིག་པ་མ་ཡིན་ཞིང་། །ཡོད་མེད་གཉིས་ཀྱང་མ་ཡིན་ཞེས། །གོང་དུ་རྐྱེན་བརྟགས་པར་བསྟན་པ་ཉིད་ཡིན་ཏེ། མེད་དམ་ཡོད་པའི་དོན་ལ་ཡང་། །རྐྱེན་ནི་རུང་བ་མ་ཡིན་ཏེ། །ཞེས་དང་། གང་ཚེ་ཆོས་ནི་ཡོད་པ་དང་། །མེད་དང་ཡོད་མེད་མི་འགྲུབ་པ། །ཞེས་བཤད་ཟིན་པའི་ཕྱིར་རོ། །གཉིས་པ་ནི། སྐྱེ་བ་འདི་དངོས་པོ་དུས་གཉིས་པར་འགག་བཞིན་པའམ། དེ་མ་ཡིན་པ་ཞིག་ལ་རྟོག་དྲང་། དང་པོ་ལྟར་ན། དངོས་པོ་འགག་བཞིན་ཉིད་ལ་ནི། །སྐྱེ་བ་འཐད་པར་མི་འགྱུར་ཏེ། །སྐྱེ་བའི་བྱ་བ་དང་འགལ་བ། །འགག་པའི་བྱ་བ་ཡོད་པའི་ཕྱིར། །གཉིས་པ་ལྟར་ཡང་མི་རུང་སྟེ། གང་ཞིག་དུས་གཉིས་པར་འགག་བཞིན་མ་ཡིན་པ་དེ་ནི་དངོས་པོར་མི་འཐད་པའི་ཕྱིར་རོ། །གཉིས་པ་གནས་པ་དགག་པ་ལ་གསུམ་སྟེ། དུས་གསུམ་དུ་བརྟགས་ནས་དགག འགག་བཞིན་པ་ཡིན་མིན་བརྟགས་ནས་དགག རང་དང་གཞན་གང་གིས་གནས་བརྟགས་ནས་དགག་པའོ། །དང་པོ་ནི། གནས་པའི་བྱ་བ་དོན་གཞན་དེས་འདུས་བྱས་ཀྱི་དངོས་པོ་གནས་པར་བྱེད་ན། དེ་གནས་པའམ། མི་གནས་པའམ། གནས་བཞིན་པ་ཞིག་གནས་པར་བྱེད་དྲང་། དེ་ལ་དངོས་པོ་གནས་པ་ནི་མི་གནས་ཏེ། གནས་པའི་བྱ་བ་འགག་པའི་ཕྱིར་རོ། །དངོས་པོ་མི་གནས་པ་ཡང་གནས་པ་མིན་ཏེ་གནས་པའི་བྱ་བ་མ་སྐྱེས་པའི་ཕྱིར་རོ། །གནས་བཞིན་པ་ཡང་མི་གནས་ཏེ། དེ་གཉིས་ལས་ཐ་དད་པའི་གནས་བཞིན་མེད་པའི་ཕྱིར། གཞན་ཡང་དངོས་པོ་གང་ཞིག་གནས་པར་འགྱུར་ཏེ། མཐའ་བཞིར་དཔྱད་ན་མ་སྐྱེས་པའི་ཕྱིར་རོ། །གཉིས་པ་ནི། དངོས་པོ་འགག་བཞིན་པ་ཉིད་ལ་ནི་གནས་པ་འཐད་པར་མི་འགྱུར་ཏེ། གནས་པ་དང་འགལ་བ་འགག་པའི་བྱ་བ་ཡོད་པའི་ཕྱིར། གང་ཞིག་འགག་བཞིན་པ་མ་ཡིན་པ་ཡང་གནས་པ་མི་རུང་སྟེ། དེ་ནི་དངོས་པོ་མི་འཐད་པའི་ཕྱིར་རོ། །དེས་ན་དངོས་པོ་ཐམས་ཅད་དུས་ཀུན་ཏུ། །རྒ་དང་འཆི་བའི་ཆོས་ཡིན་ན། །གང་དག་རྒ་དང་འཆི་མེད་པར། །གནས་པའི་དངོས་པོ་གང་ཞིག་ཡིན་ཏེ། སྐྱེས་དུས་ཉིད་ན་སྐད་ཅིག་གཉིས་པར་སྡོད་པའི་གནས་པ་གཏན་མི་སྲིད་པའི་ཕྱིར་རོ། །གསུམ་པ་ནི། འདུས་བྱས་ཀྱི་དངོས་པོ་རྣམས་གནས་པ་དོན་གཞན་གྱིས་གནས་པར་བྱེད་ན། གནས་པ་དེ་ཉིད་རང་ངམ་གཞན་གང་གིས་གནས་པར་བྱེད། དེ་ལ་གནས་པ་དེ་གནས་པ་གཞན་དང་ནི་དེ་ཉིད་ཀྱིས་ཀྱང་གནས་པར་བྱེད་མི་རིགས་ཏེ་ཐུག་མེད་དུ་འགྱུར་བ་དང་། རང་ལ་བྱ་བྱེད་འགལ་བའི་ཕྱིར། །ཅི་ལྟར་སྐྱེ་བ་རང་དང་ནི། །གཞན་གྱིས་བསྐྱེད་པ་མ་ཡིན་བཞིན། །ཞེས་པ་སྟེ། གལ་ཏེ་གནས་པ་གཞན་ཞིག་གིས། །དེ་གནས་ཐུག་པ་མེད་པར་འགྱུར། །ཞེས་སོགས། འདོན་པ་བསྒྱུར་བས་མཚུངས་པའོ། །གསུམ་པ་འཇིག་པ་དགག་པ་ལ་དྲུག་སྟེ། དུས་གསུམ་དུ་བརྟགས་ནས་དགག གནས་བཞིན་པ་ཡིན་མིན་བརྟག་སྟེ་དགག གནས་སྐབས་དེ་ཉིད་དང་གཞན་ཉིད་གང་གིས་འགག བརྟགས་སྟེ་དགག ཁྱབ་བྱེད་མ་དམིགས་པས་དགག དངོས་པོར་ཡོད་མེད་བརྟག་སྟེ་དགག རང་དང་གཞན་གང་གིས་འགག་བརྟག་སྟེ་དགག་པའོ། །དང་པོ་ནི། དུས་གསུམ་དུ་དཔྱད་ན་འགག་པ་ནི་འགག་པར་མི་འགྱུར་ཏེ། འགག་པའི་བྱ་བ་འགགས་ནས་མེད་པའི་ཕྱིར་རོ། །མ་འགགས་པ་ཡང་འགག་པར་མི་འགྱུར་ཏེ། འགག་པའི་བྱ་བ་མ་སྐྱེས་པའི་ཕྱིར། འགག་བཞིན་པ་ཡང་སྔ་མ་གཉིས་པོ་དེ་བཞིན་དུ་འགག་པར་འགྱུར་བ་མིན་ཏེ། གཉིས་པོ་ལས་གཞན་པའི་འགག་བཞིན་པ་མི་སྲིད་པའི་ཕྱིར་དང་། འགག་པའི་བྱ་བ་གཉིས་སུ་ཐལ་བའི་ཕྱིར་རོ། །ཡང་མ་སྐྱེས་གང་ཞིག་འགག་པར་འགྱུར་ཞེས་ཏེ་སྔ་མ་བཞིན་དུ་སྦྱར་བར་བྱའོ། །གཉིས་པ་ནི། རེ་ཤིག་དངོས་པོ་གནས་བཞིན་པ་ལ་ནི་འགག་པ་འཐད་པར་མི་འགྱུར་ཏེ། དེ་དང་འགལ་བ་གནས་པའི་བྱ་བ་ཡོད་པའི་ཕྱིར། དངོས་པོ་མི་གནས་པ་ལ་ཡང་འགག་པ་འཐད་པར་མི་འགྱུར་ཏེ། གནས་པ་དང་བྲལ་བ་ཡིན་པའི་ཕྱིར་རོ། །གསུམ་པ་ནི། རྒྱུ་འགག་ནས་འབྲས་བུ་འབྱུང་བར་འདོད་ན། རྒྱུའི་གནས་སྐབས་དེ་ཉིད་ཀྱིས་སམ་གཞན་འབྲས་བུའི་གནས་སྐབས་ཀྱིས་རྒྱུ་འགག་པར་བྱེད་དྲང་། དང་པོ་ལྟར་རྒྱུ་འོ་མ་ལྟ་བུའི་གནས་སྐབས་དེ་ཡིས་ནི་གནས་སྐབས་དེ་ཉིད་འགག་པར་མི་འགྱུར་ཏེ། རང་ལ་བྱ་བྱེད་འགལ་བའི་ཕྱིར་རོ། །གཉིས་པ་ལྟར་འབྲས་བུ་ཞོ་ལྟ་བུའི་གནས་སྐབས་གཞན་གྱིས་ཀྱང་ནི་རྒྱུ་འོ་མའི་གནས་སྐབས་འགག་པར་མི་འགྱུར་ཏེ། ཕན་ཚུན་མ་ཕྲད་པའི་ཕྱིར་རོ། །བཞི་པ་ནི། རྒྱུ་འོ་མ་ལྟ་བུ་ལ་ནི་འགག་པ་ཡོད་པ་ཉིད་དེ། དེའི་འབྲས་བུ་ཞོ་སྐྱེ་བའི་ཕྱིར་རོ་སྙམ་ན། རྒྱུ་འོ་མ་ལ་སོགས་པའི་ཆོས་རྣམས་ཐམས་ཅད་ཀྱི་འགག་པ་ཡང་འཐད་པར་མི་འགྱུར་བར་གསལ་བར་བསྟན་ཏེ། གང་གི་ཚེ་ན་སྔར་འབྲས་བུ་ཞོ་ལ་སོགས་པའི་ཆོས་རྣམས་ཐམས་ཅད་ཀྱི་སྐྱེ་བ་འཐད་པར་མི་འགྱུར་བར་བཤད་ཟིན་པ་དེའི་ཚེའོ། །ལྔ་པ་ནི། ཡང་འགག་པ་དེ་དངོས་པོ་ཡོད་པའམ་མེད་པ་ཞིག་ལ་རྟོག་དྲང་། དེ་ལ་རེ་ཞིག་དངོས་པོ་ཡོད་པ་ལ་འགག་པ་འཐད་པར་མི་འགྱུར་ཏེ། རྟེན་དངོས་པོ་དེ་དགག་པ་དངོས་མེད་དང་གཅིག་ཡིན་ན། དངོས་པོར་མི་འཐད་ཅིང་། ཆོས་འགག་པ་དངོས་མེད་དེ་རྟེན་དངོས་པོ་དང་གཅིག་ཡིན་ན། དངོས་པོ་མེད་པར་མི་འཐད་པའི་ཕྱིར་རོ། །གཉིས་པ་ལྟར་ན་དངོས་པོ་མེད་པར་གྱུར་པ་ལའང་འགག་པར་འཐད་པར་མི་འགྱུར་ཏེ། རྟེན་མེད་པའི་ཕྱིར། དཔེར་ན་མགོ་གཅིག་པའི་གང་ཟག་ལ། མགོ་གཉིས་པ་ལ་ཅི་ལྟར་ནི། བཅད་དུ་མེད་པ་དེ་བཞིན་ནོ། །དྲུག་པ་ནི། ཡང་འགག་པ་དོན་གཞན་དེ་འདུས་བྱས་ཀྱི་ཆོས་རྣམས་ཀྱི་འགག་བྱེད་དུ་འདོད་ན། འགག་པ་དེ་རང་གི་བདག་ཉིད་ཀྱིས་སམ། འགག་པ་གཞན་གྱིས་འགག་པར་བྱེད། དེ་ལ་འགག་པ་རང་གི་བདག་ཉིད་ཀྱིས་འགག་པ་ཡོད་པ་མིན་ཞིང་། འགག་པ་གཞན་གྱིས་ཀྱང་མིན་ཏེ། རང་ལ་བྱ་བྱེད་འགལ་བའི་ཕྱིར་དང་། ཐུག་པ་མེད་པར་ཐལ་བར་འགྱུར་བའི་ཕྱིར། ཅི་ལྟར་སྐྱེ་བ་རང་དང་ནི། །གཞན་གྱིས་བསྐྱེད་པ་མ་ཡིན་པ་བཞིན་ནོ། །གཉིས་པ་དེས་མཚན་གཞི་འདུས་བྱས་ཁེགས་པར་བསྟན་པ་ནི། དེ་ལྟར་འདུས་བྱས་ཀྱིས་མཚན་ཉིད་གསུམ་བཀག་ཀྱང་མཚན་གཞི་གཟུགས་དང་ཚོར་བ་ལ་སོགས་པ་ཕྱི་ནང་གི་དངོས་པོ་རྣམས་ཡོད་དོ་སྙམ་ན་མ་ཡིན་ཏེ། སྔར་བཤད་པའི་ཚུལ་གྱིས། མཚན་ཉིད་སྐྱེ་དང་གནས་དང་འཇིག་པ་རྣམས་རང་བཞིན་གྱིས་མ་གྲུབ་པའི་ཕྱིར་ན་འདུས་བྱས་ཀྱི་མཚན་གཞི་གཟུགས་སོགས་རྣམས་ཀྱང་རང་བཞིན་མེད་པར་གྲུབ་པའི་ཕྱིར་རོ། །གསུམ་པ་དེས་འདུས་མ་བྱས་ཁེགས་པར་བསྟན་པ་ནི། ཅི་སྐད་བཤད་པའི་ཚུལ་གྱིས་དཔྱད་ན། འདུས་བྱས་ཡོད་པ་མ་ཡིན་ལ་དེ་རབ་ཏུ་མ་གྲུབ་པས་འདུས་མ་བྱས་ནི་ཅི་ལྟར་འགྲུབ་སྟེ། དགག་བྱ་བཀག་པའི་བཀག་པ་མི་གྲུབ་པའི་ཕྱིར་ཏེ། ཏིང་ངེ་འཛིན་རྒྱལ་པོའི་མདོ་ལས། འདུས་མ་བྱས་པ་ཀུན་ཏུ་དབེན་པ་སྟེ། །དྲང་སྲོང་དེ་དག་ལ་ནི་རྣམ་རྟོག་མེད། །འགྲོ་བ་ཀུན་ཏུ་འདུས་མ་བྱས་ཐོབ་པས། །ལྟ་བ་དག་པ་འཁོར་མོར་རྣམ་པར་དབེན། །ཞེས་གསུངས་པས་སོ། །དེང་སང་བོད་འདིར་སེམས་ཙམ་པའི་གཞུང་ལུགས་རྣམས་དབུ་མའི་གཞུང་ལུགས་སུ་སྨྲས་ནས་འདུས་མ་བྱས་ཆོས་དབྱིངས་བདེན་པར་གྲུབ་པ་དབུ་མའི་ལྟ་བ་མཐར་ཐུག་ཡིན་ནོ་ཞེས་འཆལ་གཏམ་སྨྲ་བ་དག་གིས་ནི། བཀའ་དང་བསྟན་བཅོས་ཀྱི་གཞུང་འདི་དག་བསམ་པར་བྱ་དགོས་སོ། །གསུམ་པ་བཀག་པའི་དོན་ལ་ལུང་འགལ་སྤང་བ་ནི། དེ་ལྟར་ན་སྤྲིན་ཆེན་པོའི་མདོ་ལས། དགེ་སློང་དག་འདུས་བྱས་ནི་སྐྱེ་བར་ཡང་མངོན། འཇིག་པ་དང་གནས་པ་ལས་གཞན་དུ་འགྱུར་བར་ཡང་མངོན་ནོ། །ཞེས་གསུངས་པ་དང་འགལ་ལོ་སྙམ་ན། དེ་ནི་ངེས་པའི་དོན་དུ་གསུངས་པ་མ་ཡིན་གྱི། རྨི་ལམ་ཅི་ལྟ་བ་བཞིན་དང་། སྒྱུ་མ་བཞིན་དང་། དྲི་ཟའི་གྲོང་ཁྱེར་ལ་སྐྱེ་གནས་འཇིག་པ་མེད་ཀྱང་དེར་སྣང་བ་ཅི་ལྟ་བ་བཞིན་དུ་འདུས་བྱས་ཀྱི་ཆོས་རྣམས་དེ་བཞིན་དུ་ནི་སྐྱེ་བ་དང་། དེ་བཞིན་དུ་གནས་པ་དང་། དེ་བཞིན་དུ་ནི་འཇིག་པ་འཁྲུལ་ངོར་སྣང་བ་ཙམ་ལ་དགོངས་ནས་དྲང་དོན་དུ་གསུངས་པ་ཡིན་པས་མི་འགལ་ལོ། །ཡང་ན་རྨི་ལམ་ཅི་ལྟ་བ་བཞིན་སྐྱེ་བ་དང་ཞེས་སོགས་སོ་སོར་སྦྱར་རོ། །གཉིས་པ་ལུང་དང་སྦྱར་བ་ནི་མདོ་ལས། སྤགས་རྒྱུས་ཤ་རུས་འདུས་པ་འདི་བདག་གི །ཆུང་མ་ཡིན་སྙམ་འདུ་ཤེས་བསྐྱེད་ནས་ནི། །བྱིས་པ་རྨོངས་རྣམས་འདོད་ཆགས་སྐྱེད་བྱེད་ཅིང་། །སྒྱུ་མ་ཇི་བཞིན་བུད་མེད་མི་ཤེས་སོ། །ཅི་ལྟར་བུ་མོ་གཞོན་ནུའི་རྨི་ལམ་ན། །བུ་ཕོ་བྱུང་ཞིང་ཤི་བ་དེ་མཐོང་ནས། །བྱུང་ནས་དགའ་ཞིང་ཤི་ནས་མི་དགའ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཅི་ལྟར་དྲི་ཟའི་གྲོང་ཁྱེར་སྨིག་རྒྱུ་དང་། །སྒྱུ་མ་ཇི་བཞིན་རྨི་ལམ་ཅི་འདྲ་བར། །ཆོས་རྣམས་ཐམས་ཅད་དེ་བཞིན་ཤེས་བྱ་སྟེ། །མཚན་མ་སྒོམ་དང་ངོ་བོ་ཉིད་ཀྱིས་སྟོང་། །ཞེས་གསུངས་ཏེ། དབུ་མ་པ་རང་ལུགས་ཀྱི་ཀུན་རྫོབ་ཁས་ལེན་ཚུལ་དང་། དེ་ཉིད་ལ་ཡང་རིག་པས་དཔྱད་པ་སྔོན་དུ་འགྲོ་དགོས་པས་བདེན་གཉིས་ཟུང་འཇུག་བསྟན་པར་ཤེས་པར་བྱའོ། །དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། སྐྱེ་བ་དང་གནས་པ་དང་འཇིག་པ་བརྟག་པ་ཞེས་བྱ་བ་སྟེ། རབ་ཏུ་བྱེད་པ་བདུན་པའི་རྣམ་པར་བཤད་པའོ།། །།གསུམ་པ་བྱེད་པ་པོ་དང་ལས་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། ཕུང་ཁམས་སྐྱེ་མཆེད་དག་ནི་རང་བཞིན་གྱིས་ཡོད་པ་ཉིད་དེ། མདོ་ལས། མ་རིག་པ་དང་འབྲེལ་བའི་སྐྱེས་བུ་གང་ཟག་འདི་ནི་བསོད་ནམས་དང་། བསོད་ནམས་མ་ཡིན་པ་དང་། མི་གཡོ་བ་མངོན་པར་འདུ་བྱ་བ་འདུ་བྱེད་དོ། །ཞེས་གསུངས་པས། དེའི་རྒྱུ་ལས་དང་། དེའི་བྱེད་པ་པོ་ཡོད་པའི་ཕྱིར་རོ་སྙམ་པ་ལ། དཔྱད་ན་ལས་དང་བྱེད་པ་པོ་མ་གྲུབ་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་བཤད་པ་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། ལས་དང་བྱེད་པ་པོ་རང་བཞིན་གྱིས་གྲུབ་པ་དགག་པ། དེ་གཉིས་ཕན་ཚུན་ལྟོས་གྲུབ་ཏུ་བསྟན་པ། རིག་པ་དེ་ཆོས་གཞན་ལ་བསྒྲེ་བའོ། །དང་པོ་ལ་གཉིས་ཏེ། ཕྱོགས་མཐུན་གྱི་བྱ་བྱེད་དགག་པ། ཕྱོགས་མི་མཐུན་གྱི་བྱ་བྱེད་དགག་པའོ། །དང་པོ་ལ་གཉིས་ཏེ། སོ་སོའི་ཕྱོགས་མཐུན་གྱི་བྱ་བྱེད་དགག་པ། གཉིས་ཀའི་ཕྱོགས་མཐུན་གྱི་བྱ་བྱེད་དགག་པའོ། །དང་པོ་ལ་གཉིས་ཏེ། དམ་བཅའ་འགོད་པ། འཐད་པ་བཤད་པའོ། །དང་པོ་ནི། སྤྱིར་ལས་འགའ་ཞིག་བྱེད་པ་ན་བྱེད་པ་པོ་ལ་བྱེད་པའི་བྱ་བ་དང་ལྡན་པས་བྱེད་པ་པོ་ཡིན་པ་དང་། མི་ལྡན་པས་མ་ཡིན་པ་དང་། གཉིས་ཀའི་བྱེ་བྲག་གིས་གཉིས་ཀར་གྱུར་པ་གསུམ་ལས་གཞན་མི་སྲིད་ལ། ལས་ལ་ཡང་བྱེད་པ་པོའི་བྱ་བ་དང་ལྡན་པས་ལས་ཡིན་པ་དང་། མི་ལྡན་པས་མ་ཡིན་པ་དང་། གཉིས་ཀའི་བྱེ་བྲག་གིས་གཉིས་ཀ་ལས་གཞན་མི་སྲིད་པས་དེ་གསུམ་ལ་བརྟགས་ནས་འགོག་པ་སྟེ། བྱ་བ་དང་ལྡན་པས་བྱེད་པ་པོ་ཡིན་པར་གྱུར་པ་དེ་བྱ་བ་དང་ལྡན་པའི་ལས་སུ་གྱུར་པ་མི་བྱེད་དོ། །བྱ་བ་དང་མི་ལྡན་པས་བྱེད་པ་པོ་མ་ཡིན་པར་གྱུར་པ་ཡང་ལས་སུ་མ་གྱུར་པ་མི་བྱེད་དོ། །ཞེས་པ་གཉིས་ནི་བརྒལ་བའི་དམ་བཅའ་ཡིན་ལ། སྒྲུབ་བྱེད་གཞུང་འོག་མས་སྟོན་ནོ། །གཉིས་པ་ལ་གཉིས་ཏེ། སྒྲུབ་ཕྱོགས་ནས་དགག དགག་ཕྱོགས་ནས་དགག་པའོ། །དང་པོ་ནི། བྱེད་པ་པོ་ཡིན་པར་གྱུར་པ་ཆོས་ཅན། ལས་མི་བྱེད་དེ། རང་ཉིད་བྱེད་པ་པོར་འཇོག་པ་ལས་གཞན་པའི་བྱ་བ་མེད་པའི་ཕྱིར་ཏེ། གལ་ཏེ་ཡོད་ན་དེའི་ལས་དེ་ཡང་བྱེད་པ་པོ་ལ་ལྟོས་པ་མེད་ཅིང་། བྱེད་པ་པོས་མ་བྱས་པའི་ལས་སུ་འགྱུར་ན་དེ་མི་སྲིད་པའི་ཕྱིར་རོ། །ལས་ཡིན་པར་གྱུར་པ་ལ་ཆོས་ཅན། བྱེད་པ་པོས་བྱས་པ་མ་ཡིན་ཏེ། རང་ཉིད་ལས་སུ་འཇོག་པའི་བྱ་བ་ལས་གཞན་པའི་བྱ་བ་མེད་པའི་ཕྱིར་ཏེ། གལ་ཏེ་ཡོད་ན་བྱེད་པ་པོའང་ལས་ལ་ལྟོས་པ་མེད་པར་བྱེད་པ་པོར་ཡང་འགྱུར་ན་དེ་མི་སྲིད་པའི་ཕྱིར། གཉིས་པ་ནི། གལ་ཏེ་བྱ་བ་དང་མི་ལྡན་པའི་བྱེད་པ་པོར་མ་གྱུར་པས་ལས་སུ་མ་གྱུར་པ་བྱེད་ན་ནི་དེ་ཡང་མི་འཐད་དེ། བྱེད་པ་པོའི་ངོས་ནས་བྱེད་པ་པོ་ཡང་རྣམ་འཇོག་གི་རྒྱུ་མེད་པར་འགྱུར་བའི་ཕྱིར་དང་། ལས་ཀྱི་ངོས་ནས་ལས་ལ་རྣམ་འཇོག་གི་རྒྱུ་མེད་པར་འགྱུར་བའི་ཕྱིར། ཐལ་བ་དེ་གཉིས་ཀ་ལ་འདོད་ན། དེ་ལྟར་ལས་དང་བྱེད་པ་པོ་ལ་རྒྱུ་རྐྱེན་མེད་པར་འདོད་ན་ནི། སྤྱིར་རྒྱུས་སྐྱེད་པར་བྱ་བའི་འབྲས་བུ་དང་། འབྲས་བུ་དེ་སྐྱེད་པར་བྱེད་པའི་རྒྱུ་ཡང་འཐད་པར་མི་འགྱུར་ཏེ། རྒྱུ་མཚན་མཚུངས་པའི་ཕྱིར། དེ་ཡང་འདོད་ན། འབྲས་བུ་དང་། དེའི་བྱེད་རྒྱུ་དེ་མེད་ན་ནི་འབྲས་བུ་འབྱུང་བའི་བྱ་བ་དང་། དེ་ལ་དབང་དུ་གྱུར་པའི་བྱེད་པ་པོ་དང་། བྱེད་པ་པོ་འགའ་ཞིག་གིས་འབྲས་བུ་བྱེད་པར་མི་རིག་སྟེ། འབྲས་བུ་དང་རྒྱུ་མེད་པའི་ཕྱིར། དེ་ཡང་འདོད་ན། བྱ་བ་དང་སོགས་ཀྱིས་བསྡུས་པ་བྱེད་པ་པོ་དང་། ལས་དང་བྱེད་པ་མི་རིག་ན་མངོན་པར་མཐོ་བ་དང་། ངེས་པར་ལེགས་པའི་ཆོས་དང་། དེ་ལས་བཟློག་པ་ཆོས་མ་ཡིན་པ་ཡོད་པ་མ་ཡིན་པར་འགྱུར་ལ། ཆོས་དང་ཆོས་མིན་མེད་ན་ནི། དེ་གཉིས་ལས་བྱུང་བའི་འབྲས་བུ་བདེ་བ་དང་སྡུག་བསྔལ་མེད་པར་འགྱུར་རོ། །དེ་ལྟར་ཡང་འདོད་ན། ཆོས་ཀྱི་འབྲས་བུ་དེ་གཉིས་ཀ་མེད་ན། དེ་དག་ཐོབ་པའི་དོན་དུ་ཐར་པ་དང་མཐོ་རིས་སུ་འགྱུར་བའི་འཇིག་རྟེན་ལས་འདས་པ་དང་། འཇིག་རྟེན་པའི་ལམ་བསྒོམ་པ་མི་འཐད་པར་འགྱུར་ཏེ། ཐོབ་བྱའི་འབྲས་བུ་མེད་པའི་ཕྱིར། གཞན་ཡང་རྒྱུ་དང་འབྲས་བུ་མེད་ན། འཇིག་རྟེན་པའི་ཞིང་ལས་ལ་སོགས་པའི་བྱ་བ་དེ་དག་ནི་ཐམས་ཅད་ཀྱང་དོན་མེད་པ་ཉིད་དུ་འགྱུར་ན་དེ་ལྟར་ཡང་མ་ཡིན་པས། འབྲས་བུ་དང་། རྒྱུ་མེད་པར་ཐལ་བ་འདོད་པ་མི་འཐད་དོ་ཞེས་པའོ། །ཐལ་བ་འདི་དག་དང་། འོག་ཏུ། འཕགས་པའི་བདེན་པ་བཞི་པོ་ནི། །ཁྱོད་ལ་མེད་པར་ཐལ་བར་འགྱུར། །ཞེས་སོགས་རྣམས་ནི་བརྗོད་པའི་ཚེ་ཀུན་རྫོབ་དང་དོན་དམ་སོ་སོར་མ་ཕྱེ་བར་བརྗོད་པ་ཡིན་ལ། ཕྱིར་རྒོལ་གྱི་ངོར་ནི་ཡོད་ན་དོན་དམ་པར་ཡོད་པས་ཁྱབ་པས་ཐ་སྙད་དུའང་མེད་པར་ཐལ་བ་འཕེན་ནུས་ཤིང་། སྔར་རྒོལ་གྱི་ངོར་ནི་ཕྱིར་རྒོལ་གྱི་ལོག་རྟོག་གཞོམ་པ་ཙམ་ཡིན་གྱི། ཐལ་བས་འཕངས་པའི་ལོག་ཕྱོགས་ཁས་ལེན་པ་ནི་མ་ཡིན་པར་ཤེས་པར་བྱའོ། །གཉིས་པ་ནི། བྱ་བ་དང་ལྡན་མི་ལྡན་གཉིས་ཀ་ཡིན་པའི་བྱེད་པ་པོར་གྱུར་མ་གྱུར་གཉིས་ཀ་ཡིན་པ་ནི་ཆོས་ཅན། ལས་སུ་གྱུར་མ་གྱུར་གཉིས་ཀ་མི་བྱེད་དེ། བྱེད་པ་པོ་དང་ལས་གཉིས་ཀའི་ཆ་ནས་ཡིན་པར་གྱུར་པ་དང་། མ་ཡིན་པར་གྱུར་པ་བྱེད་པ་པོ་གཅིག་དང་། ལས་གཅིག་ལ་ག་ལ་ཡོད་དེ་ཕན་ཚུན་འགལ་བས་སོ། །གཉིས་པ་ལ་གཉིས་ཏེ། བྱེད་པ་པོ་རེ་རེས་ཕྱོགས་མི་མཐུན་རེ་རེ་བྱེད་པ་དགག་པ། བྱེད་པ་པོ་རེ་རེས་ཕྱོགས་མི་མཐུན་གཉིས་གཉིས་བྱེད་པ་དགག་པའོ། །དང་པོ་ནི། བྱེད་པ་པོར་ནི་གྱུར་པ་ཡིས། ལས་སུ་མ་གྱུར་པ་ནི་མི་བྱེད་དེ། བྱེད་པ་པོར་མ་གྱུར་པས་ཀྱང་ལས་སུ་གྱུར་པ་མི་བྱེད་དེ། ཞེས་པ་ནི་དམ་བཅའ་ཡིན་ལ། དེའི་འཐད་པ་ནི་འདིར་ཡང་སྐྱོན་དེར་ཐལ་བར་འགྱུར་ཞེས་པ་སྟེ། བྱེད་པ་པོར་གྱུར་པ་དང་། ལས་སུ་མ་གྱུར་པ་དང་། བྱེད་པ་པོར་མ་གྱུར་པ་དང་། ལས་སུ་གྱུར་པ་བཞི་ལ་རིམ་པ་ལྟར། ཡིན་པར་གྱུར་ལ་བྱ་བ་མེད། །བྱེད་པོ་མེད་པའི་ལས་སུ་འགྱུར། །ཞེས་དང་། ལས་སུ་མ་གྱུར་བྱེད་ན་ནི། །ལས་ལ་རྒྱུ་ནི་མེད་པར་འགྱུར། །ཞེས་དང་། བྱེད་པོར་མ་གྱུར་བྱེད་ན་ནི། །བྱེད་པ་པོ་ཡང་རྒྱུ་མེད་འགྱུར། །ཞེས་དང་། ཡིན་པར་གྱུར་ལ་བྱ་བ་མེད། །ལས་མེད་བྱེད་པ་པོར་ཡང་འགྱུར། །ཞེས་བཤད་ཟིན་པའི་ཕྱིར་རོ། །གཉིས་པ་ལ་གསུམ་སྟེ། བྱེད་པ་པོར་གྱུར་པས་ཕྱོགས་མི་མཐུན་གཉིས་བྱེད་པ་དགག བྱེད་པ་པོར་མ་གྱུར་པས་ཕྱོགས་མི་མཐུན་གཉིས་བྱེད་པ་དགག གཉིས་ཀས་ཕྱོགས་མི་མཐུན་གཉིས་བྱེད་པ་དགག་པའོ། །དང་པོ་ནི། བྱེད་པ་པོར་ནི་གྱུར་པ་ཡིས། །ལས་ནི་མ་གྱུར་བཅས་པ་དང་། །གྱུར་པ་དང་མ་གྱུར་པ་གཉིས་ཀ་མི་བྱེད་དེ། དེའི་གཏན་ཚིགས་ནི་གོང་དུ་བསྟན་པའི་ཕྱིར་ཏེ། བྱེད་པ་པོར་གྱུར་པའི་ངོས་ནས། ཡིན་པར་གྱུར་ལ་བྱ་བ་མེད། །བྱེད་པོ་མེད་པའི་ལས་སུ་འགྱུར། །ཞེས་སོགས་དཔྱད་དེ་སྦྱར་བར་བྱའོ། །གཉིས་པ་ནི། བྱེད་པ་པོར་ནི་མ་གྱུར་པས། ལས་ནི་མ་གྱུར་པ་དང་བཅས་པ་དང་། གྱུར་པ་དང་མ་གྱུར་པ་གཉིས་ཀ་ཡིན་པ་ནི་མི་བྱེད་དེ། དེའི་གཏན་ཚིགས་ནི་གོང་དུ་བསྟན་པའི་ཕྱིར་ཏེ། བྱེད་པ་པོར་མ་གྱུར་པའི་ངོས་ནས། བྱེད་པོར་མ་གྱུར་བྱེད་ན་ནི། །བྱེད་པ་པོ་ཡང་རྒྱུ་མེད་འགྱུར། །ཞེས་སོགས་དཔྱད་དེ་སྦྱར་བར་བྱའོ། །གསུམ་པ་ནི། བྱེད་པ་པོར་གྱུར་པ་དང་མ་གྱུར་པ་གཉིས་ཀ་ཡིན་པ་ནི་ཆོས་ཅན། ལས་སུ་གྱུར་པ་དང་། མ་གྱུར་པ་གང་ཡང་རུང་བ་སོ་སོར་མི་བྱེད་དེ། འདིར་ཡང་གཏན་ཚིགས་གཉིས་གོང་དུ་བསྟན་པར་ཤེས་པར་བྱ་བ་ཡིན་པའི་ཕྱིར་ཏེ། བྱེད་པ་པོ་གཉིས་ཀ་ཡིན་པ་དང་། ལས་སུ་གྱུར་པ་དང་། ལས་སུ་མ་གྱུར་པ་གསུམ་ལ་རིམ་པ་ལྟར། ཡིན་དང་མ་ཡིན་གྱུར་ཅིག་ལ། །ཕན་ཚུན་འགལ་བས་ག་ལ་ཡོད། །ཞེས་དང་། ཡིན་པར་གྱུར་ལ་བྱ་བ་མེད། །ལས་མེད་བྱེད་པ་པོར་ཡང་འགྱུར། །ཞེས་དང་། ལས་སུ་མ་གྱུར་བྱེད་ན་ནི། །ལས་ལ་རྒྱུ་ནི་མེད་པར་འགྱུར། །ཞེས་བཤད་ཟིན་པའི་ཕྱིར་རོ། །གཉིས་པ་དེ་གཉིས་ཕན་ཚུན་ལྟོས་གྲུབ་ཏུ་བསྟན་པ་ནི། གལ་ཏེ་དེ་ལྟར་ན། ཐུབ་པས། བདག་གིས་བྱས་པའི་ལས་རྣམས་ནི། །བདག་གིས་སོ་སོར་མྱོང་བར་འགྱུར། །ཞེས་སོགས་གསུངས་པ་ཚུལ་འདིས་བཀག་པས། ལས་འབྲས་མེད་པར་ལྟ་བའི་ལོག་པར་ལྟ་བར་འགྱུར་རོ་ཞེ་ན། དེ་ནི་མ་ཡིན་ཏེ། ལས་ལས་འབྲས་བུ་འབྱུང་བའི་ཚུལ་ལ་རིག་པས་དཔྱད་ནས་དོན་དམ་བདེན་པ་རྣམ་པར་གཞག་པའི་སྐབས་དང་། མ་དཔྱད་པར་ཀུན་རྫོབ་ཏུ་ལས་འབྲས་རྣམ་པར་གཞག་པའི་སྐབས་གཉིས་ལས། ཅི་སྐད་བཤད་པ་རྣམས་ནི་དང་པོའི་དབང་དུ་བྱས་ལ། གནས་སྐབས་ཕྱི་མའི་ཚེ་སྒྱུ་མ་ལྟ་བུའི་རྐྱེན་ཉིད་འདི་པ་ཙམ་གྱིས་རྟེན་ཅིང་འབྲེལ་པར་འབྱུང་བ་ཁས་བླངས་པའི་ཕྱིར་ཏེ། ལས་འདིའི་བྱེད་པ་པོ་ཡིན་ནོ་ཞེས་བྱེད་པ་པོ་རྣམ་པར་འཇོག་པ་ལས་ལ་བརྟེན་ནས་བྱས་ཤིང་། བྱེད་པ་པོས་བྱས་བཞིན་པ་ཉིད་ལས་ཡིན་པས། ལས་ཀྱང་བྱེད་པ་པོ་དེ་ཉིད་ལ་བརྟེན་ནས་འབྱུང་བ་ཙམ་ལས་མ་གཏོགས་པ་འགྲུབ་པའི་རྒྱུ་རིག་པས་དཔྱད་ན་འགའ་ཡང་ནི་མ་མཐོང་བའི་ཕྱིར་རོ། །དེས་ན་ཐ་སྙད་དུ་ལས་འབྲས་རྣམ་པར་འཇོག་པའི་ཚེ་རིག་པས་དཔྱད་པར་མི་བྱ་སྟེ། རིག་པས་དཔྱད་ན་ལས་འབྲས་མི་རྙེད་ཅིང་། འདི་ནི་ལས་འབྲས་རྣམ་པར་འཇོག་པའི་གནས་སྐབས་ཡིན་པའི་ཕྱིར་ཞེས་པ་ནི། བདེན་པ་གཉིས་ཀྱི་འཇོག་མཚམས་ཀྱི་གནད་དམ་པར་སྣང་སྟེ། བྱང་ཆུབ་སེམས་འགྲེལ་ལས། ལས་འབྲས་དཔྱད་པར་འདོད་པ་མེད་ཅེས་དང་། སྤྱོད་འཇུག་ལས། འབྲས་བུའི་དོན་དུ་མ་དཔྱད་ཕྱིར། །ཞེས་དང་། འཇུག་པ་ལས། གང་ཕྱིར་དངོས་པོ་འདི་དག་རྣམ་དཔྱད་ན། །དེ་ཉིད་བདག་ཅན་དངོས་ལས་ཚུ་རོལ་དུ། །གནས་རྙེད་མ་ཡིན་དེ་ཕྱིར་འཇིག་རྟེན་གྱི། །ཐ་སྙད་བདེན་ལ་རྣམ་པར་དཔྱད་མི་བྱ། །ཞེས་དང་། ལས་འབྲས་རྣམས་ལ་སེམས་པའང་དགག་པར་མཛད། །ཅེས་གསུངས་པ་རྣམས་ཀྱི་དགོངས་པའོ། །གསུམ་པ་རིག་པ་དེ་ཆོས་གཞན་ལ་བསྒྲེ་བ་ནི། ལས་དང་བྱེད་པ་པོ་ཐ་སྙད་ཙམ་དུ་ཕན་ཚུན་ལྟོས་ནས་གྲུབ་པ་ཡིན་གྱི། རང་བཞིན་གྱིས་གྲུབ་པ་མེད་པ་དེ་བཞིན་དུ་ཉེ་བར་ལེན་པས་ན་ཉེ་བར་ལེན་པ་སྟེ། ཉེ་བར་ལེན་པའི་བྱ་བ་བསྟན་ལ། དེས་ཀྱང་རང་གི་སྒྲུབ་བྱེད་ཉེ་བར་ལེན་པ་བྱེད་པ་པོ་དང་། ཉེ་བར་བླང་བྱའི་ལས་འཛིན་པར་བྱེད་པས། དེ་གཉིས་ཀྱང་ཕན་ཚུན་ལྟོས་ནས་གྲུབ་པ་ཡིན་གྱི་རང་བཞིན་གྱིས་མ་གྲུབ་པར་ཤེས་པར་བྱ་སྟེ། ཁྱབ་བྱེད་སྤྱིར་ལས་དང་བྱེད་པ་པོ་རང་བཞིན་གྱིས་གྲུབ་པ་བསལ་བའི་ཕྱིར་རོ། །དེ་གཉིས་ཁོ་ནར་མ་ཟད་ཀྱི་ལས་དང་བྱེད་པ་པོ་དག་གིས་དངོས་པོ་ལྷག་མ་བསྐྱེད་བྱ་སྐྱེད་བྱེད་དང་། འགྲོ་བ་དང་། འགྲོ་བ་པོ་དང་། བལྟ་བྱ་ལྟ་བྱེད་དང་། མཚན་ཉིད་དང་། མཚན་གཞི་དང་། འབྱུང་བར་བྱ་བ་དང་། འབྱུང་བར་བྱེད་པ་དང་། ཡན་ལག་དང་ཡན་ལག་ཅན་ལ་སོགས་པ་གང་དག་ཀྱང་ཕན་ཚུན་ལྟོས་ནས་གྲུབ་པ་ཡིན་གྱི་རང་བཞིན་གྱིས་མ་གྲུབ་པར་ཤེས་པར་བྱ་སྟེ། རིག་པ་མཚུངས་པའི་ཕྱིར་རོ། །གལ་ཏེ་དངོས་པོ་ལྷག་མ་ཞེས་པའི་ཚིག་གིས་ཉེ་བར་བླང་བྱ་དང་ལེན་པ་པོ་རྟོགས་པར་ནུས་པའི་ཕྱིར། ལོགས་སུ་བཀོད་པ་མི་རིགས་སོ་སྙམ་ན། དེ་ནི་བདེན་མོད་ཀྱི་འོན་ཀྱང་རྣམ་པར་བཅད་པར་བྱ་བ་ལ་གཙོ་བོར་གྱུར་པར་ཤེས་པར་བྱ་བའི་ཕྱིར་ལོགས་སུ་བཀོད་དེ། རབ་བྱེད་ཕྱི་མ་དག་ཏུ་ཡང་འདི་གཉིས་ཁོ་ནའི་བརྟགས་པ་ཕལ་ཆེར་འབྱུང་བར་འགྱུར་རོ། །ཞེས་འགྲེལ་པར་བཤད་དོ། །གཉིས་པ་ལུང་དང་སྦྱར་བ་ནི་བཅོམ་ལྡན་འདས་ཀྱི། སེམས་དམྱལ་འཇིགས་པ་ང་ཡིས་བསྟན་བྱ་སྟེ། །སེམས་ཅན་སྟོང་ཕྲག་དུ་མ་སྐྱོ་བྱས་ཀྱང་། །གང་དག་ཤི་འཕོས་ངན་སོང་རྟག་འགྲོ་བའི། །འགྲོ་བ་དེ་དག་ནམ་ཡང་ཡོད་མ་ཡིན། །གང་དག་རལ་གྲི་མདའ་ཆེན་མཚོན་འབྱིན་པའི། །གནོད་པར་བྱེད་པ་ཡོད་པ་མ་ཡིན་ཏེ། །རྟོག་པའི་དབང་གིས་ངན་སོང་དེ་དག་ན། །ལུས་ལ་འབབ་མཐོང་དེ་ན་མཚོན་ཆ་མེད། །སྣ་ཚོགས་ཡིད་དགའ་མེ་ཏོག་ཁ་བྱེ་ཞིང་། །གསེར་གྱི་ཁང་མཆོག་འབར་བ་ཡིད་འོང་བ། །འདི་ན་དེ་ལ་བྱེད་པོ་འགའ་ཡང་མེད། །དེ་དག་རྟོག་པའི་དབང་གིས་བཞག་པ་ཡིན། །རྟོག་པའི་དབང་གི་འཇིག་རྟེན་རྣམ་བརྟགས་ཏེ། །འདུ་ཤེས་འཛིན་པས་བྱིས་པ་རྣམ་པར་ཕྱེ། །འཛིན་དང་འཛིན་མེད་དེ་ཡང་འབྱུང་བ་མིན། །ཡོངས་སུ་རྟོག་པ་སྒྱུ་མ་སྨིག་རྒྱུ་བཞིན། །ཞེས་གསུངས་ཏེ་བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། བྱེད་པ་པོ་དང་ལས་བརྟག་པ་ཞེས་བྱ་བ་སྟེ། རབ་ཏུ་བྱེད་པ་བརྒྱད་པའི་རྣམ་པར་བཤད་པའོ།། །།གཉིས་པ་རྟེན་འབྲེལ་གང་ཟག་གི་བདག་གིས་སྟོང་པ་ལ་གཉིས་ཏེ། གང་ཟག་གི་བདག་གི་ངོ་བོ་དགག་པ། དེའི་སྒྲུབ་བྱེད་དགག་པའོ། །དང་པོ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་ཉེ་བར་བླང་བྱ་དང་ལེན་པ་པོ་རང་བཞིན་མེད་པར་བསྟན་པ་ནི་མི་རིགས་ཏེ། བླང་བྱའི་སྔར་གྲུབ་པའི་ལེན་པ་པོས་དེ་ཉེ་བར་ལེན་པ་ཡིན་པས་དེ་གཉིས་རང་བཞིན་གྱིས་ཡོད་དོ་སྙམ་པ་ལ་དེ་བཀག་པའི་ཕྱིར་རབ་ཏུ་བྱེད་པ་འདི་སྨོས་སོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་གསུམ་སྟེ། ཉེ་བར་ལེན་པ་པོ་རང་བཞིན་གྱིས་གྲུབ་པ་དགག དེ་ལས་ཉེ་བར་བླང་བྱ་ཁེགས་པར་བསྟན། དེ་གཉིས་ཀའི་དོན་བསྡུ་བའོ། །དང་པོ་ལ་གཉིས་ཏེ། ཕྱོགས་སྔ་མ་བརྗོད། དེ་དགག་པའོ། །དང་པོ་ནི། རང་གི་སྡེ་པ་མང་པོས་བཀུར་བ་ཁ་ཅིག ལས་དང་བྱེད་པོ་བསལ་ཕྱིར་རོ་ཞེས་པ་དེ་མི་རིགས་ཏེ། འདི་ལྟར་ཉེ་བར་བླང་བྱ་ལྟ་བ་དང་ཉན་པ་ལ་སོགས་པ་ནང་གི་སྐྱེ་མཆེད་དྲུག་དང་། ཚོར་བ་དང་། རེག་པ་དང་། སེམས་པ་ལ་སོགས་པ་དབང་དུ་བྱེད་པ་པོའམ། དབང་དུ་བྱས་པའི་བདག་གང་གི་ཡིན་པའི་བདག་དེ། ཉེ་བར་བླང་བྱ་དེ་དག་གི་སྔོན་རོལ་ན་ཡོད་ཅེས་སྨྲའོ། །རྒྱུ་མཚན་ཅི་སྟེ་སྙམ་ན། འདི་ལྟར་བླང་བྱའི་སྔོན་རོལ་ན་ལེན་པ་པོ་བདག་གི་དངོས་པོ་ཡོད་པ་མ་ཡིན་ན། དེས་རྒྱུ་ལས་མ་བསགས་པས་འབྲས་བུ་ལྟ་བ་ལ་སོགས་པ་ཉེ་བར་ལེན་པར་ཅི་ལྟར་འགྱུར་ཏེ། མོ་གཤམ་གྱི་བུས་བསགས་པའི་ནོར་ལེན་པ་བཞིན་ནོ། །དེའི་ཕྱིར་ཉེ་བར་བླང་བྱ་དེ་དག་གི་སྔ་རོལ་ན་དེ་དག་ཉེ་བར་ལེན་པར་བྱེད་པའི་བདག་གི་དངོས་པོ་གནས་པ་དེ་ཡོད་དོ་ཞེས་ཟེར་རོ། །གཉིས་པ་ལ་གསུམ་སྟེ། བླང་བྱ་ཐམས་ཅད་ཀྱི་སྔ་རོལ་ན་ལེན་པ་པོ་ཡོད་པ་དགག བླང་བྱ་རེ་རེའི་སྔ་རོལ་ན་ལེན་པ་པོ་ཡོད་པ་དགག ལྟ་སོགས་ཀྱི་རྒྱུའི་ལེན་པ་པོ་ཡོད་པ་དགག་པའོ། །དང་པོ་ལ་གཉིས་ཏེ། བདག་ཏུ་གདགས་པའི་རྒྱུ་མེད་པས་དགག་པ། བདག་ཏུ་གདགས་པ་རྒྱུ་ལ་མི་ལྟོས་ན་ཧ་ཅང་ཐལ་བས་དགག་པའོ། །དང་པོ་ནི། སྤྱིར་གང་ཟག་ཕུང་པོ་ལ་བརྟེན་པ་དང་། བྱེ་བྲག་ཏུ་ལྟ་བ་པོ་ལ་སོགས་པའི་གང་ཟག་ལྟ་བ་ལ་སོགས་པ་ལ་བརྟེན་ནས་འདོགས་པ་ཡིན་པས། ལྟ་བ་དང་། ཉན་པ་དང་། ལ་སོགས་པ་སྣོམ་པ་དང་། མྱོང་བ་དང་། རེག་པ་དང་། འཛིན་པ་དང་། ཚོར་བ་དང་། ལ་སོགས་པ་རྣམ་པར་ཤེས་པ་དང་། རེག་པ་དང་། སེམས་པ་ལ་སོགས་པ་ཉིད་ཀྱི་ནི་སྔ་རོལ་ནས་དེ་དག་ཉེ་བར་ལེན་པ་པོ་བདག་གི་དངོས་པོ་གང་ན་གནས་པ་དེ་ནི་ལྟ་བ་ལ་སོགས་པའི་ཆོས་གང་གི་ལྟ་བ་པོ་ལ་སོགས་པར་གདགས་པར་བྱ་སྟེ། གདགས་པའི་རྒྱུ་ལྟ་བ་ལ་སོགས་པ་མེད་པའི་ཕྱིར། གཉིས་པ་ལ་གཉིས་ཏེ། ཧ་ཅང་ཐལ་བ་འགོད་པ། འདོད་པ་ལ་གནོད་པ་བསྟན་པའོ། །དང་པོ་ནི། གལ་ཏེ་ཉེ་བར་ལེན་པ་ལྟ་བ་ལ་སོགས་པ་མེད་པར་ཡང་ལེན་པ་པོའི་བདག་དེ་ནི་གནས་པར་གྱུར་ན། ལེན་པ་པོའི་བདག་དེ་མེད་པར་ཡང་ཉེ་བར་ལེན་པ་ལྟ་བ་ལ་སོགས་པའི་ཕུང་པོ་དེ་དག་ནི་ཡོད་པར་འགྱུར་བ་ཐེ་ཚོམ་མེད་དེ། རྒྱུ་མཚན་མཚུངས་པའི་ཕྱིར། ནོར་ལ་མ་ལྟོས་པར་ནོར་གསོག་པ་པོ་སྔར་ཡོད་ན། གསོག་པ་པོ་ལ་མ་ལྟོས་པར་ནོར་ཡང་སྔར་ཡོད་དགོས་པ་བཞིན་ནོ། །གཉིས་པ་ནི། དེ་ལྟར་ཡང་འདོད་པ་ཡིན་ནོ་སྙམ་ན། འདི་ནི་འདིའི་ལེན་པ་པོའོ། །ཞེས་བླང་བྱ་ལྟ་བ་ལ་སོགས་པ་ཅི་ཡིས་ལེན་པ་པོའི་བདག་གང་ཞིག་ཏུ་གསལ་ཞིང་འདོགས་པར་བྱེད་ལ། འདི་ནི་འདིའི་བླང་བྱ་ཡིན་ནོ་ཞེས་ཉེ་བར་ལེན་པ་པོའི་བདག་གང་གིས་བླང་བྱ་ལྟ་བ་ལ་སོགས་པ་ཅི་ཞིག་ཏུ་གསལ་ཞིང་འདོགས་པར་བྱེད་དེ། མི་འཐད་པར་ཐལ། རང་གི་ལྟོས་ས་བླང་བྱ་ལྟ་བ་ལ་སོགས་པ་ཅི་ཡང་མེད་པའི་ལེན་པ་པོའི་བདག་གང་ཞིག་ག་ལ་ཡོད་ཅིང་། ཡང་རང་གི་ལྟོས་ས་ལེན་པ་པོའི་བདག་གང་མེད་པའི་བླང་བྱ་ལྟ་བ་ལ་སོགས་པ་ཅི་ཞིག་ག་ལ་ཡོད་དེ་གཅིག་མེད་པར་ཅིག་ཤོས་ཡོད་པ་མི་སྲིད་པའི་ཕྱིར་རོ། །གཉིས་པ་ལ་གཉིས་ཏེ། འདོད་པ་བརྗོད། སུན་འབྱིན་བསྟན་པའོ། །དང་པོ་ནི། གལ་ཏེ་བདག་ལྟ་བ་ལ་སོགས་པ་ཐམས་ཅད་ཀྱི་སྔ་རོལ་ན་ཡོད་ན་ཉེས་པ་དེར་འགྱུར་བ་ཞིག་ན་ཡང་བདག་གང་ཞིག་དེ་ལྟར་ཡོད་པ་མ་ཡིན་གྱི་ལྟ་བ་ལ་སོགས་པ་རྣམས་ཀྱི་ནང་ནས་གཞན་ལྟ་བ་མེད་པའི་ཚེ་ན་གཞན་ཉན་པ་ཞིག་གིས་བདག་ཏུ་གསལ་ཞིང་འདོགས་པར་བྱེད་པས་བདག་ཏུ་གདགས་པའི་རྒྱུ་མེད་པའི་ཉེས་པ་མེད་དོ་ཞེ་ན། གཉིས་པ་ལ་གཉིས་ཏེ། རིག་པ་སྔ་མས་ཁེགས་པ། རྣམ་པར་བརྟགས་ནས་དགག་པའོ། །དང་པོ་ནི། བདག་དེ་ནི་ལྟ་བ་ལ་སོགས་པ་རེ་རེའི་སྔ་རོལ་ན་ཅི་ལྟར་ཡོད་དེ། གལ་ཏེ་ལྟ་བ་ལ་སོགས་པ་ཐམས་ཅད་ཀྱི་སྔ་རོལ་ན་ཡོད་པ་མིན་པའི་ཕྱིར། ཁྱབ་སྟེ། རེ་རེ་བས་སྔ་བ་ལ་མཐར་ཐམས་ཅད་ལས་སྔ་བས་ཁྱབ་པའི་ཕྱིར་རོ། །གཉིས་པ་ནི། བདག་དེ་ནི་རང་གི་བླང་བྱ་རེ་རེའི་སྔར་ཡོད་པ་མི་རིགས་ཏེ། འདི་ལྟར་གལ་ཏེ་ལྟ་བ་པོའི་བདག་དེ་ཉིད། ཉན་པ་པོའང་དེ་ཡིན་ཅིང་། ཚོར་བ་པོའང་དེ་ཉིད་ཡིན་ན། བླང་བྱ་ལྟ་བ་ལྟ་བུ་རེ་རེའི་སྔ་རོལ་ན་རང་གི་ཉེ་བར་ལེན་པ་པོ་ཡོད་པར་འགྱུར་བ་ཞིག་ན་ཡང་བྱ་བ་ཐ་དད་རིམ་ཅན་གྱི་བྱེད་པ་པོ་གཅིག་ཡིན་པ་དེ་ནི་དེ་ལྟར་མི་རིགས་པས། ལྟ་བའི་སྔར་ཉན་པ་པོ་ཡོད་ཀྱང་ལྟ་བ་པོ་ཡོད་པ་སོགས་མི་རིགས་པའི་ཕྱིར་རོ། །གལ་ཏེ་བྱ་བ་ཐ་དད་རིམ་ཅན་གྱི་བྱེད་པ་པོ་གཅིག་ཉིད་དུ་འགལ་བའི་ཉེས་པ་དེ་སྤོང་བར་འདོད་ནས། ལྟ་བ་པོ་གཞན་ཉིད་ལ་ཉན་པ་པོའང་གཞན། ཚོར་བ་པོའང་གཞན་དུ་འདོད་ན། དེ་དག་ཕན་ཚུན་མི་ལྟོས་པས་ལྟ་བ་པོ་ཡོད་པའི་ཚེ་ཉན་པ་པོ་ལ་སོགས་པ་ཡང་གཞན་དུ་ཡོད་པར་འགྱུར་བ་ཞིག་ན་ཡང་དེ་ནི་མི་རུང་སྟེ། གང་ཟག་གཅིག་ལ་ལྟ་བ་པོ་དང་ཉན་པ་པོ་ལ་སོགས་པའི་བདག་ཀྱང་མང་པོ་ཉིད་དུ་འགྱུར་བའི་ཕྱིར་དང་། དེ་ལྟར་འདོད་ན། འཇིག་རྟེན་སྐྱེ་བ་ན་གང་ཟག་ཉག་གཅིག་སྐྱེའོ། །ཞེས་པའི་ལུང་དང་འགལ་བའི་ཕྱིར་རོ། །གསུམ་པ་ནི། བདག་ནི་ལྟ་བ་ལ་སོགས་པ་ཐམས་ཅད་ཀྱི་སྔ་རོལ་ན་ཡོད་ལ་དེར་གདགས་པ་རྒྱུ་མེད་པ་ཡང་མ་ཡིན་ཏེ། འབྱུང་བ་བཞིའི་གཟུགས་ཡོད་པས་དེ་ལ་གདགས་པའི་ཕྱིར་རོ་ཞེ་ན། ལྟ་དང་ཉན་ལ་སོགས་པ་དང་། །ཚོར་བ་དག་ལ་སོགས་པ་ཡང་། །གང་ལས་འབྱུང་བར་འགྱུར་བའི་རྒྱུ། །མེར་མེར་པོར་ལ་སོགས་པའི་འབྱུང་བ་ཆེན་པོ་དེ་ལ་ཡང་ཉེ་བར་ལེན་པ་པོའི་བདག་དེ་ནི་ཡོད་པ་མ་ཡིན་ཏེ། སྔ་མ་ལྟར་བླང་བྱ་འབྱུང་བ་ཆེན་པོའི་སྔར། ལེན་པ་པོའི་བདག་མེད་པ་དེས་ཉེ་བར་ལེན་པ་མི་འཐད་པའི་ཕྱིར་རོ། །གཉིས་པ་དེས་ཉེ་བར་བླང་བྱ་ཁེགས་པར་བསྟན་པ་ནི། མདོ་སྡེ་པ་ལ་སོགས་པ་དག དེ་ལྟར་ཉེ་བར་ལེན་པ་པོའི་བདག་མེད་ཀྱང་། ལྟ་བ་ལ་སོགས་པ་ཉེ་བར་ལེན་པ་ཙམ་ཞིག་ཡོད་དོ་སྙམ་ན། ཉེ་བར་ལེན་པ་པོ་དེ་ལ་ལྟོས་པའི་བླང་བྱ་ལ་སོགས་པ་དེ་དག་ཀྱང་ནི་ཡོད་པ་མིན་ཏེ། གལ་ཏེ་དེ་དག་གི་ཉེ་བར་ལེན་པ་པོ་ཡོད་ན་ཉེ་བར་ལེན་པ་དེ་དག་ཀྱང་ཡོད་པར་འགྱུར་བ་ཞིག་ན་སྔར་བཤད་པའི་ཚུལ་གྱིས་ཉེ་བར་ལེན་པ་ལྟ་བ་དང་། ཉན་པ་ལ་སོགས་པ་དང་། ཚོར་བ་དག་ལ་སོགས་པ་ཡང་ལེན་པ་པོ་གང་གི་ཡིན་པ་སྟེ་ལེན་པ་པོའི་བདག་མེད་པའི་ཕྱིར། གསུམ་པ་དེ་གཉིས་ཀའི་དོན་བསྡུ་བ་ནི། དེ་ལྟར་ན་བླང་བྱ་དང་ལེན་པ་པོ་ཕན་ཚུན་ལྟོས་པ་ཉིད་ཀྱི་ཕྱིར་ལེན་པ་པོའི་བདག་གང་ཞིག་ལྟ་བ་ལ་སོགས་པའི་སྔ་རོལ་ན་མེད་དེ། བདག་ཏུ་གདགས་པའི་རྒྱུ་མེད་པའི་ཕྱིར་རོ། །ད་ལྟ་ལྷན་ཅིག་ཏུ་ཡང་མེད་དེ། སོ་སོར་མ་གྲུབ་པའི་ཕྱིར་དང་། ཕན་ཚུན་ལྟོས་མེད་དུ་འགྱུར་བའི་ཕྱིར་རོ། །ཕྱི་ནའང་མེད་དེ། ལེན་པ་པོ་མེད་པའི་བླང་བྱ་སྔར་གྲུབ་ན། དེ་རྒྱུ་མེད་དུ་འགྱུར་བའི་ཕྱིར་རོ། །དེ་བཞིན་དུ་བླང་བྱ་དང་། ལེན་པ་པོ་སྔ་ཕྱི་དང་། ལྷན་ཅིག་ཏུ་མ་གྲུབ་པའི་ལེན་པ་པོའི་བདག་དང་། བླང་བྱ་ལྟ་སོགས་དེ་ལ་རང་བཞིན་དུ་ཡོད་དོ་ཞེས་ཤེས་རབ་ཅན་སུ་ཞིག་རྟོག་པར་བྱེད། འོ་ན་མེད་པར་འདོད་དམ་ཞེ་ན། དེ་དག་རང་བཞིན་དུ་ཡོད་པར་བརྟགས་པ་བཀག་པ་ཙམ་ཡིན་གྱི་མེད་དོ་ཞེས་ཀྱང་སུ་ཞིག་རྟོགས་པར་བྱེད་དེ། རིག་པས་དཔྱད་ན་མ་རྙེད་པ་དེ་ལ་ཡོད་མེད་ཀྱི་རྟོག་པ་དག་ནི་ཐམས་ཅད་ལྡོག་པར་འགྱུར་བའི་ཕྱིར་རོ། །གཉིས་པ་ལུང་དང་སྦྱར་བ་ནི། འཕགས་པ་ཏིང་ངེ་འཛིན་གྱི་རྒྱལ་པོའི་མདོ་ལས། དེ་ཚེ་སྡིག་མེད་སྟོབས་བཅུ་ལྡན་པ་ཡི། །རྒྱལ་བ་དེ་ནི་ཏིང་འཛིན་མཆོག་འདི་འཆད། །སྲིད་པའི་འགྲོ་བ་རྨི་ལམ་ལྟ་བུ་སྟེ། །འདི་ལ་སུ་ཡང་མི་སྐྱེ་འཆི་བ་མེད། །སེམས་ཅན་མི་དང་སྲོག་ཀྱང་མི་རྙེད་དེ། །ཆོས་འདི་རྣམས་ནི་དབུ་བ་ཆུ་ཤིང་འདྲ། །སྒྱུ་མ་ལྟ་བུ་ནམ་མཁའི་གློག་འདྲ་སྟེ། །ཆུ་ཡི་ཟླ་བ་འདྲ་ཞིང་སྨིག་རྒྱུ་བཞིན། །མི་འགའ་འཇིག་རྟེན་འདིར་ཡང་ཤི་ནས་ནི། །འཇིག་རྟེན་གཞན་དུ་འཕོ་ཞིང་འགྲོ་མེད་ཀྱང་། །ལས་བྱས་རྣམས་ནི་ནམ་ཡང་ཆུད་མི་ཟ། །འཁོར་བ་ན་ཡང་དཀར་ནག་འབྲས་བུ་སྨིན། །རྟག་པ་མ་ཡིན་ཆད་པར་མི་འགྱུར་ཏེ། །ལས་བསགས་མེད་ཅིང་གནས་པ་དག་ཀྱང་མེད། །དེ་ཡང་བྱས་ན་རེག་པར་མི་འགྱུར་མིན། །གཞན་གྱི་བྱས་པ་ཚོར་བར་འགྱུར་བའང་མེད། །འཕོ་བ་མེད་ཅིང་ཕྱིར་ཡང་འོང་བ་མེད། །ཐམས་ཅད་ཡོད་པའང་མ་ཡིན་མེད་པའང་མིན། །འདི་ནི་ལྟ་གནས་འཇུག་པ་དག་པ་མིན། །སེམས་ཅན་སྤྱོད་པ་རབ་ཞི་འཇུག་པ་མེད། །བདེ་གཤེགས་སྤྱོད་ཡུལ་རྒྱལ་བའི་ཡོན་ཏན་ནི། །སྐྱེ་མེད་ཞི་བ་མཚན་མ་མེད་པའི་གནས། །སྟོབས་དང་གཟུངས་རྣམས་དང་ནི་སྟོབས་བཅུའི་སྟོབས། །འདི་ནི་སངས་རྒྱས་ཁྱུ་མཆོག་དམ་པའི་མཆོག །ཅེས་སོགས་གསུངས་ཏེ་བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། སྔ་རོལ་ན་གནས་པ་བརྟག་པ་ཞེས་བྱ་བ་སྟེ། རབ་ཏུ་བྱེད་པ་དགུ་པའི་རྣམ་པར་བཤད་པའོ།། །།གཉིས་པ་དེའི་སྒྲུབ་བྱེད་དགག་པ་ལ་གསུམ་སྟེ། དཔེ་མེ་དང་བུད་ཤིང་དགག བྱ་བ་འཁོར་བ་དགག རྟེན་སྡུག་བསྔལ་དགག་པའོ། །དང་པོ་ལ་གསུམ་ལས། རབ་ཏུ་བྱེད་པའི་འབྲེལ་ནི་དེ་ལྟར་ཉེ་བར་ལེན་པའི་ཕུང་པོ་དང་། ཉེ་བར་ལེན་པ་པོའི་བདག་གཉིས་ཕན་ཚུན་ལྟོས་ཀྱང་རང་བཞིན་གྱིས་ཡོད་པ་མི་འགལ་ཏེ། མེ་དང་བུད་ཤིང་ཕན་ཚུན་ལྟོས་ཀྱང་བསྲེག་བྱ་དང་སྲེག་པར་བྱེད་པ་རང་བཞིན་གྱིས་ཡོད་པ་བཞིན་ནོ་སྙམ་ན། དཔེ་མེ་དང་བུད་ཤིང་ཉིད་རང་བཞིན་གྱིས་མ་གྲུབ་པར་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་ཡང་གསུམ་སྟེ། མེ་དང་བུད་ཤིང་རང་བཞིན་གྱིས་གྲུབ་པ་དགག རིག་པ་དེ་ཆོས་གཞན་ལ་བསྒྲེ། བཀག་པའི་དོན་དུ་ལྟ་བ་སྨད་པའོ། །དང་པོ་ལ་གསུམ་སྟེ། མེ་དང་བུད་ཤིང་གི་ངོ་བོ་དགག་པ། དེའི་སྒྲུབ་བྱེད་དགག་པ། དེ་གཉིས་ཀའི་དོན་བསྡུ་བའོ། །དང་པོ་ལ་གཉིས་ཏེ། གཅིག་ཏུ་གྲུབ་པ་དགག གཞན་དུ་གྲུབ་པ་དགག་པའོ། །དང་པོ་ནི། གལ་ཏེ་མེ་དང་བུད་ཤིང་རང་བཞིན་གྱིས་ཡོད་ན་ངོ་བོ་གཅིག་གམ་ཐ་དད་དུ་ཡོད་དྲང་། གལ་ཏེ་བསྲེག་བྱའི་བུད་ཤིང་གང་ཡིན་པ་དེ་ཉིད། སྲེག་པར་བྱེད་པའི་མེ་ཡིན་པས་གཅིག་ཏུ་གྲུབ་ན་བྱེད་པ་པོ་དང་ལས་ངོ་བོ་གཅིག་ཏུ་འགྱུར་ཏེ། རྒྱུ་མཚན་མཚུངས་པའི་ཕྱིར། འདོད་མི་ནུས་ཏེ། རང་ལ་བྱ་བྱེད་འགལ་བའི་ཕྱིར་དང་། རྫ་མཁན་དང་བུམ་པ་ཡང་ངོ་བོ་གཅིག་ཏུ་ཐལ་བའི་ཕྱིར་རོ། །གཉིས་པ་ལ་གཉིས་ཏེ། མ་ལྟོས་པར་ཐལ་བས་དགག་པ། མ་ཕྲད་པར་ཐལ་བས་དགག་པའོ། །དང་པོ་ལ་གཉིས་ཏེ། ཐལ་བ་འགོད། ཉེས་སྤོང་དགག་པའོ། །དང་པོ་ནི། གལ་ཏེ་མེ་བུད་ཤིང་ལས་ངོ་བོ་གཞན་ཡིན་ན་ནི་ཤིང་ལ་ལྟོས་པ་མེད་པར་ཡང་འབྱུང་བར་འགྱུར་ཏེ། ཤིང་ལས་གཞན་ཡིན་པའི་ཕྱིར། གཞན་ཡང་ཤིང་ཡོད་མེད་ཀྱི་དུས་རྟག་ཏུ་མེ་ནི་འབར་བ་ཉིད་དུ་འགྱུར་ལ། འབར་བྱེད་རྒྱུ་ལས་མི་འབྱུང་ཞིང་། །རྩོམ་པ་དོན་མེད་ཉིད་དུ་འགྱུར། །དེ་ལྟ་ཡིན་ན་ལས་ཀྱང་མེད་པར་ཐལ་ལོ། །དེ་ཉིད་སྟོན་པ་ནི་འབར་བྱེད་ཀྱི་རྒྱུ་བུད་ཤིང་ལས་མི་འབྱུང་བར་འགྱུར་ཏེ། གཞན་ཡིན་པའི་ཕྱིར་ཁྱབ་སྟེ། རྒྱུ་བུད་ཤིང་ལས་གཞན་ཡིན་པའི་ཕྱིར་ན། བུད་ཤིང་ལ་ལྟོས་པ་མེད་པར་འགྱུར་ལ། ལྟོས་པ་མེད་པའི་ཕྱིར་ན་འབར་བ་དེ་འབར་བྱེད་ཀྱི་རྒྱུ་བུད་ཤིང་ལས་མི་འབྱུང་བར་འགྱུར་དགོས་པའི་ཕྱིར་རོ། །གཞན་ཡང་བུད་ཤིང་བསྐུལ་བ་ལ་སོགས་པའི་རྩོམ་པ་དོན་མེད་ཉིད་དུ་འགྱུར་ཏེ། བུད་ཤིང་ཡོད་མེད་ཀྱི་དུས་རྟག་ཏུ་འབར་བ་ཡིན་པའི་ཕྱིར་ནའོ། །གཉིས་པ་ནི། དེ་ལ་གལ་ཏེ་གཞན་དག་འདི་སྙམ་དུ་མེ་བུད་ཤིང་ལས་གཞན་ཡིན་ཡང་དེ་ལ་ལྟོས་པ་མི་འགལ་ཏེ་མེས་བསྲེག་བཞིན་པ་ཉིད་བུད་ཤིང་ཡིན་པས་བུད་ཤིང་མེ་ལ་ལྟོས་ལ་བུད་ཤིང་སྲེག་པ་པོ་ཉིད་མེ་ཡིན་པས་མེ་ཡང་བུད་ཤིང་ལ་ལྟོས་པས་དེ་གཉིས་ཕན་ཚུན་ལྟོས་བཅས་ཀྱི་གཞན་ཡིན་གྱི། བུམ་སྣམ་ལྟར་ལྟོས་མེད་ཀྱི་གཞན་མ་ཡིན་པས་ཐལ་བ་གཉིས་པོ་དེར་མི་འགྱུར་རོ་སྙམ་དུ་སེམས་ན། མེས་བུད་ཤིང་བསྲེག་ན་དེ་ལྟར་རིགས་པ་ཤིག་ཡིན་ན་ཡང་། འདི་ལྟར་བུད་ཤིང་ཆོས་ཅན། མེ་གང་གིས་ཁྱོད་བསྲེག་པར་བྱེད་དེ། མི་བྱེད་པར་ཐལ། གང་གི་ཚེ་སྟེ་གང་གི་ཕྱིར་ན་བསྲེག་བཞིན་པ་དེ་ཙམ་ཁྱོད་དེ་ཡིན་པའི་ཕྱིར། གཉིས་པ་མ་ཕྲད་པར་ཐལ་བས་དགག་པ་ལ་གཉིས་ཏེ། ཐལ་བ་འགོད། ཉེས་སྤོང་དགག་པའོ། །དང་པོ་ནི། མེ་དང་བུད་ཤིང་སྣང་བ་དང་མུན་པ་ལྟར་ཡུལ་དུས་གཅིག་ཏུ་མི་ཕྲད་པར་འགྱུར་ཏེ། རྫས་གཞན་ཡིན་པའི་ཕྱིར། ཕྲད་པ་མེད་པར་འདོད་ན། མེས་བུད་ཤིང་བསྲེགས་པར་མི་འགྱུར་ཞིང་། མེས་བུད་ཤིང་མི་བསྲེག་པའི་ཕྱིར་ན། བུད་ཤིང་རྒྱུན་ཆད་པས་ཀྱང་འཆི་བར་མི་འགྱུར་ལ། མི་འཆི་བའི་ཕྱིར་ན་བུད་ཤིང་རྒྱུན་ཆད་པ་ན་རང་གི་རྟགས་ཏེ། ཚ་ཞིང་བསྲེག་པ་དང་ལྡན་པར་གནས་པར་འགྱུར་རོ། །དེ་འདོད་པར་ནི་མི་ནུས་སྟེ་བུད་ཤིང་རྒྱུན་ཆད་པའི་ཚེ་ཚ་ཞིང་བསྲེག་པ་མ་དམིགས་པའི་ཕྱིར་རོ། །གཉིས་པ་ནི། གལ་ཏེ་མེ་དང་བུད་ཤིང་གཞན་ཡིན་ཡང་ཕྲད་པ་མི་འགལ་ཏེ། སྐྱེས་པ་དང་བུད་མེད་བཞིན་ནོ་སྙམ་ན། དཔེ་དེས་དོན་དེ་མི་འགྲུབ་སྟེ། ཅི་ལྟར་བུད་མེད་སྐྱེས་པ་དང་། སྐྱེས་པའང་ལྟོས་མེད་ཀྱི་གཞན་ཡིན་པས་བུད་མེད་དང་ཕྲད་པ་བཞིན། གལ་ཏེ་ཤིང་ལས་མེ་ལྟོས་མེད་ཀྱི་གཞན་ཡིན་ན་ཤིང་དང་ཕྲད་དུ་རུང་བར་འགྱུར་བར་ཞིག་ན། དེ་གཉིས་ལྟོས་མེད་ཀྱི་གཞན་དུ་མ་གྲུབ་པས་སོ། །དེ་ཉིད་བཤད་པ་ནི་སྐྱེས་པ་དང་། བུད་མེད་ཕྲད་པས་བུད་ཤིང་མེ་དང་ཕྲད་པར་བསྒྲུབ་མི་ནུས་ཏེ། གལ་ཏེ་མེ་དང་ཤིང་དག་ནི། སྐྱེས་པ་དང་བུད་མེད་ལྟར་གཅིག་གིས་གཅིག་བསལ་བ་སྟེ་ཕན་ཚུན་མི་ལྟོས་པར་གྱུར་ན་དུས་གཅིག་གི་ཚེ་ཕྲད་དུ་རུང་བས་ཤིང་ལས་མེ་གཞན་ཉིད་ཡིན་ན་ཡང་ཤིང་དང་མེ་ཕྲད་པར་འདོད་ལ་རེག་ན་དེ་གཉིས་སྐྱེས་པ་དང་བུད་མེད་ལྟར་ཕན་ཚུན་ལྟོས་མེད་ཀྱི་གཞན་དུ་མ་གྲུབ་པའི་ཕྱིར་རོ། །གཉིས་པ་སྒྲུབ་བྱེད་དགག་པ་ལ་གཉིས་ཏེ། སྒྲུབ་བྱེད་ལྟོས་པ་དགག སྒྲུབ་བྱེད་མངོན་སུམ་དགག་པའོ། །དང་པོ་ལ་བཞི་སྟེ། སྔ་ཕྱི་ལ་ལྟོས་པ་དགག དུས་མཉམ་ལ་ལྟོས་པ་དགག གྲུབ་མ་གྲུབ་ལ་ལྟོས་པ་དགག དོན་བསྡུ་བའོ། །དང་པོ་ནི། གལ་ཏེ་མེ་དང་བུད་ཤིང་ཕན་ཚུན་ལྟོས་མེད་ཀྱི་གཞན་དུ་མ་གྲུབ་མོད། ལྟོས་བཅས་ཡིན་པའི་ཕྱིར་ན། རང་བཞིན་གྱིས་ཡོད་པ་ཉིད་དེ། མོ་གཤམ་གྱི་བུ་ལྟར་མེད་པ་ནི་ལྟོས་པར་ཡང་མི་རུང་བས་སོ་སྙམ་ན། ལྟོས་པ་ཉིད་ཀྱང་རང་བཞིན་གྱི་མ་གྲུབ་སྟེ། གལ་ཏེ་མེ་འདི་ནི་བུད་ཤིང་འདིའི་བསྲེག་པར་བྱེད་པ་པོ་ཡིན་ནོ་ཞེས་བུད་ཤིང་ལ་ལྟོས་ནས་མེར་འཇོག་པ་ཡིན་ལ། གལ་ཏེ་བུད་ཤིང་འདི་ནི་མེ་འདིའི་བསྲེག་བྱའི་ལས་ཡིན་ནོ་ཞེས་མེ་ལ་ལྟོས་ནས་བུད་ཤིང་དུ་རྣམ་པར་འཇོག་པ་ཡིན་པས། དེའི་ཚེ་དང་པོ་བུད་ཤིང་གང་ལ་ལྟོས་ནས་མེ་གྲུབ་པར་འགྱུར་བ་ལ་བུད་ཤིང་སྔར་གྲུབ་པས་ཁྱབ་པ་ལས། བུད་ཤིང་དང་པོར་གྲུབ་པ་གང་ཞིག་ཡིན་ཏེ་མ་ཡིན་པའི་ཕྱིར་ཏེ་མེས་བསྲེག་བཞིན་པ་མ་ཡིན་པ་བུད་ཤིང་ཉིད་མ་ཡིན་པའི་ཕྱིར་རོ། །ཡང་མེ་གང་ལ་ལྟོས་ནས་བུད་ཤིང་གང་ཞིག་གྲུབ་པར་འགྱུར་བ་ལ་མེ་སྔར་གྲུབ་པས་ཁྱབ་པ་ལས་མེ་དང་པོར་གྲུབ་པ་གང་ཞིག་ཡིན་ཏེ། དང་པོར་གྲུབ་ན་རྒྱུ་མེད་དུ་འགྱུར་བའི་ཕྱིར་རོ། །གལ་ཏེ་བུད་ཤིང་ལ་ལྟོས་ནས་མེ་གྲུབ་པ་ཡིན་ན། མེ་གྲུབ་པ་ལ་བསྒྲུབ་པར་འགྱུར་ཏེ། མེ་མ་གྲུབ་ན་ལྟོས་ས་མེད་པས་ལྟོས་པར་མི་འཐད་པའི་ཕྱིར་རོ། །དེས་ན་གྲུབ་ཟིན་ན་ལྟོས་པ་དོན་མེད་པས་ཤིང་ལ་ལྟོས་ནས་མ་གྲུབ་པ་མེ་ཡིན་ན། མ་གྲུབ་པ་བསྒྲུབ་པར་འགྱུར་ཏེ། མེ་མ་གྲུབ་པ་ལྟོས་པའི་ཕྱིར། ཞེས་པའང་ཐོབ་བོ། །གཞན་ཡང་བུད་ཤིང་ལ་ལྟོས་ནས་མེ་གྲུབ་པ་ཡིན་ན། བུད་པར་བྱ་བའི་ཤིང་ལ་ཡང་། མེ་མེད་པར་ནི་འགྱུར་བ་ཡིན་ཏེ། བུད་ཤིང་མ་གྲུབ་ན་ལྟོས་པར་འགལ་ཞིང་མེ་གྲུབ་ན་ལྟོས་མི་དགོས་པས་སོ། །གཉིས་པ་ནི། དེ་གཉིས་སྔ་ཕྱིར་མ་གྲུབ་ཀྱང་དུས་མཉམ་ཁོ་ན་ཕན་ཚུན་ལྟོས་ནས་གྲུབ་པས་ཉེས་པ་དེར་མི་འགྱུར་རོ་སྙམ་ན། དེའང་མི་རུང་སྟེ། གལ་ཏེ་མེའི་དངོས་པོ་གང་ཞིག་བུད་ཤིང་ལ་ལྟོས་ནས་གྲུབ་ལ། མེའི་ལྟོས་བྱ་བུད་ཤིང་གང་ཡིན་པ་དེའང་མེ་དེ་ཉིད་ལ་ལྟོས་ནས་ནི་འགྲུབ་ན། བུད་ཤིང་གང་ལ་ལྟོས་ནས་མེ་གང་ཞིག་འགྲུབ་སྟེ། མེ་གྲུབ་ན་བུད་ཤིང་ལ་ལྟོས་མི་དགོས་ཤིང་། མ་གྲུབ་ན་ལྟོས་ས་བུད་ཤིང་ཡང་དེ་ཉིད་ལ་ལྟོས་པས་མི་འགྲུབ་པའི་ཕྱིར་རོ། །དེ་བཞིན་དུ་གལ་ཏེ་བུད་ཤིང་གི་དངོས་པོ་གང་མེ་ལ་ལྟོས་ནས་འགྲུབ་ལ། བུད་ཤིང་གི་ལྟོས་བྱ་མེ་གང་ཡིན་པ་དེ་ཡང་བུད་ཤིང་དེ་ཉིད་ལ་ལྟོས་ནས་ནི་འགྲུབ་ན། མེ་གང་ལ་ལྟོས་ནས་བུད་ཤིང་གང་ཞིག་འགྲུབ་སྟེ། བུད་ཤིང་གྲུབ་ན་མེ་ལ་ལྟོས་མི་དགོས་ལ། མ་གྲུབ་ན་ལྟོས་ས་མེ་དེ་ཡང་བུད་ཤིང་དེ་ཉིད་ལ་ལྟོས་པས་མི་འགྲུབ་པའི་ཕྱིར་རོ། །གསུམ་པ་ནི། གཞན་ཡང་མེའི་དངོས་པོ་བུད་ཤིང་ལ་ལྟོས་ནས་གྲུབ་པ་གང་ཡིན་པ་དེ་མེ་མ་གྲུབ་པའམ་གྲུབ་པ་ཞིག་ལྟོས་དྲང་། དང་པོ་ལྟར་ན་མེ་དེ་བུད་ཤིང་ལ་ཅི་ལྟར་ལྟོས་ཏེ། རང་ཉིད་མ་གྲུབ་པའི་ཕྱིར། ཅི་སྟེ་གཉིས་པ་ལྟར་མེ་གྲུབ་པ་ཞིག་བུད་ཤིང་ལ་ལྟོས་སོ་ཞེ་ན། མེ་དེ་ནི་བུད་ཤིང་ལ་ལྟོས་པར་མི་རིགས་ཏེ་གྲུབ་ཟིན་པའི་ཕྱིར་རོ། །བཞི་པ་ནི། ཤིང་ལ་ལྟོས་པའི་མེ་མེད་དེ། རྣམ་པར་དཔྱད་ན་ལྟོས་པ་ཉིད་མི་འཐད་པ་དེའི་ཕྱིར། འོ་ན་མ་ལྟོས་པ་ཡོད་དམ་སྙམ་ན། ཤིང་ལ་མ་ལྟོས་པའི་མེའང་མི་འཐད་དེ། རྒྱུ་མེད་དུ་འགྱུར་བའི་ཕྱིར་རོ། །དེ་བཞིན་དུ་རྣམ་པར་དཔྱད་ན་མེ་ལ་ལྟོས་པའི་ཤིང་ཡང་མེད་ཅིང་། མེ་ལ་མ་ལྟོས་པའི་ཤིང་ཡང་མི་འཐད་དེ། སྒྲུབ་བྱེད་བསྟན་ཟིན་ཏོ། །གཉིས་པ་ནི། གལ་ཏེ་མེ་དང་བུད་ཤིང་གཅིག་དང་ཐ་དད་དཔྱད་པས་ཅི་ཞིག་བྱ། མེས་བུད་ཤིང་བསྲེག་པ་མངོན་སུམ་གྱིས་མཐོང་བས་དེ་དག་རང་བཞིན་གྱིས་ཡོད་དོ་ཞེ་ན། དེ་ལྟར་མཐོང་བའི་མངོན་སུམ་ནི་བློ་འཁྲུལ་པ་ཡིན་པས། མེས་བུད་ཤིང་བསྲེག་པ་མི་འགྲུབ་ལ། རྣམ་པར་དཔྱད་པའི་ཚེ་བསྲེག་ན་གཞན་ནས་འོངས་པའི་མེའམ་སྔར་ནས་བུད་ཤིང་ལ་ཡོད་པའི་མེས་བུད་ཤིང་དེ་བསྲེག་དྲང་། དང་པོ་ལྟར་ན་མེ་ནི་བུད་ཤིང་ལས་མ་གཏོགས་པ་གཞན་ལས་མི་འོང་སྟེ། དེ་ལྟར་མ་དམིགས་པའི་ཕྱིར་རོ། །གཉིས་པ་ལྟར་ན། བུད་ཤིང་ལའང་མེ་ནི་སྔར་ནས་ཡོད་པ་མ་ཡིན་ཏེ། སྣང་རུང་མ་དམིགས་པའི་ཕྱིར་རོ། །གཞན་ཡང་དེ་བཞིན་དུ་མེས་བུད་ཤིང་བསྲེག་པ་སུན་འབྱིན་པའི་ལྷག་མ་ནི་སྔར་སོང་བ་དང་། མ་སོང་བ་དང་། བགོམ་པ་ལ་འགྲོ་བ་བཀག་པ་ཉིད་ཀྱིས་བསྟན་པ་ཡིན་ཏེ། རེ་ཤིག་བསྲེག་ལ་མི་བསྲེག་སྟེ་ཞེས་སོགས་འདོན་པ་བསྒྱུར་བར་བྱ་བ་ཡིན་པའི་ཕྱིར་རོ། །གསུམ་པ་དེ་གཉིས་ཀའི་དོན་བསྡུ་བ་ནི་ཤིང་ཉིད་མེ་ནི་མ་ཡིན་ཏེ། ཤིང་ལས་གཞན་ལ་མེའང་མེད་དེ། གཉིས་ཀ་སྔར་བཀག་པའི་ཕྱིར། རིག་པ་དེ་ཉིད་ཀྱིས་མེ་ནི་ཤིང་དང་ལྡན་པ་མ་ཡིན་ཞིང་། རྟེན་མེ་ལ་བརྟེན་པ་ཤིང་བརྟེན་པར་མེད་ལ། ཤིང་དེར་མེ་དེ་བརྟེན་པར་ཡང་མེད་དེ། ལྡན་པ་ལ་ཐ་དད་དང་ཐ་མི་དད་ཀྱིས་ཁྱབ་ཅིང་། རྟེན་དང་བརྟེན་པ་ལ་ཐ་དད་ཀྱིས་ཁྱབ་པས་སོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི། དེ་ལྟར་མེ་དང་ཤིང་རྣམ་པ་ལྔར་དཔྱད་ན་མེད་པ་དེ་ཉིད་ཀྱིས་ཉེ་བར་ལེན་པ་པོའི་བདག་དང་ནི། ཉེ་བར་བླང་བྱ་ཕུང་པོ་ལ་སོགས་པ་ཡང་རྣམ་པ་ལྔའི་རིམ་པ་ཀུན་མཚུངས་པ་རྣམ་པར་བཤད་དེ། དེ་གཉིས་ཀྱང་རྣམ་པ་ལྔར་དཔྱད་ན་མ་གྲུབ་པའི་ཕྱིར། མཚན་ཉིད་དང་མཚན་གཞི་དང་། ཡན་ལག་དང་ཡན་ལག་ཅན་དང་། རྒྱུ་དང་འབྲས་བུས་ཁྱབ་པའི་བུམ་སྣམ་སོགས་དང་ལྷན་ཅིག་ཏུ་མ་ལུས་པར་ནི་རྣམ་པ་ལྔ་པོའི་རིམ་པ་ཀུན་མཚུངས་པ་རྣམ་པར་བཤད་པ་ཡིན་ཏེ། ཡན་ལག་དང་ཡན་ལག་ཅན་ལ་སོགས་པ་རྣམ་པ་ལྔར་དཔྱད་ན་མི་རྙེད་ཀྱང་མ་དཔྱད་པར་ཕན་ཚུན་ལྟོས་ནས་ཐ་སྙད་དུ་གྲུབ་པ་ཙམ་ཡིན་པའི་ཕྱིར་རོ། །དབུ་མ་ལ་འཇུག་པར། བུམ་པ་སྣམ་བུ་རེ་ལྡེ་དམག་དང་ནགས་ཚལ་ཕྲེང་བ་ལྗོན་ཤིང་དང་། །ཞེས་སོགས་ཀྱི་ཚིགས་སུ་བཅད་པ་གཉིས་གསུངས་པ་ནི་ཚིགས་སུ་བཅད་པ་འདིའི་དོན་ལྟོས་བཅས་ཀྱི་དངོས་པོ་ཀུན་ལ་སྦྱར་ནས་རྣམ་པ་ལྔའམ་བདུན་དུ་བཙལ་ན་མི་རྙེད་ཀྱང་མ་དཔྱད་པར་ཕན་ཚུན་ལྟོས་ནས་གྲུབ་པའི་ཐུན་མོང་མ་ཡིན་པའི་བདེན་གཉིས་ཀྱི་འཇོག་ཚུལ་མཛད་པར་སྣང་བས་སྐལ་བ་དང་ལྡན་པ་དག་གིས་བླང་བར་བྱ་བ་ཡིན་ནོ། །གསུམ་པ་བཀག་པའི་དོན་དུ་ལྟ་བ་སྨད་པ་ནི། རང་གི་སྡེ་པ་གང་དག་ཉེ་བར་ལེན་པ་པོའི་བདག་དང་། འབྲས་བུ་དང་། ཡན་ལག་ཅན་དང་། མཚན་ཉིད་ལ་སོགས་པ་ལྟོས་བཅས་ཀྱི་དངོས་པོ་རྣམས་རང་གི་ལྟོས་ས་ཉེ་བར་ལེན་པའི་ཕུང་པོ་དང་། རྒྱུ་དང་། ཡན་ལག་དང་། མཚན་གཞི་ལ་སོགས་པ་ལས་དེ་བཅས་ཏེ་ངོ་བོ་གཅིག་པ་ཉིད་དང་། ངོ་བོ་ཐ་དད་པར་སྟོན་པ་དེ་དག་ཐུབ་པས་བསྟན་པ་རྟེན་ཅིང་འབྲེལ་པར་འབྱུང་བ་ཟབ་མོའི་དོན་ལ་མཁས་སོ་སྙམ་དུ་འཕགས་པ་ཀླུ་སྒྲུབ་བདག་མི་སེམས་སོ་ཞེས་པ་སྟེ། བསྟོད་པ་ལས། འགྲོ་བ་སྒྲ་བརྙན་དང་འདྲ་བར། །གཅིག་ཉིད་གཞན་ཉིད་དང་བྲལ་ཞིང་། །འཕོ་དང་འཇིག་པ་དང་བྲལ་བར། །སྨད་མེད་ཁྱོད་ཀྱིས་ཐུགས་སུ་ཆུད། །ཅེས་བཤད་པ་ལྟར་རོ། །གཉིས་པ་ལུང་དང་སྦྱར་བ་ནི། དེ་ལྟར་རྣལ་འབྱོར་པས་མེ་དང་བུད་ཤིང་བརྟགས་པས་ཆོས་ཀྱི་དེ་ཁོ་ན་ཉིད་ཁོང་དུ་ཆུད་པའི་ལུས་ནི་དུས་མཐའི་མེ་མདག་ལྟ་བུའམ་ཉོན་མོངས་པ་འདོད་ཆགས་སམ། ཞེ་སྡང་དང་། གཏི་མུག་གི་མེ་དག་གིས་འཚིག་པ་མ་ཡིན་ནོ། །ཇི་སྐད་དུ་བཅོམ་ལྡན་འདས་ཀྱིས། བསྐལ་པ་བརྒྱ་ཕྲག་མང་པོར་རབ་བསྲེགས་ཀྱང་། །ནམ་མཁའ་སྔོན་ཆད་ནམ་ཡང་མི་འཚིག་བཞིན། །ཆོས་རྣམས་ནམ་མཁའ་མཚུངས་པར་རྣམ་རིག་པས། །དེ་ནི་གཞར་ཡང་མེད་ནའང་ཡོང་མི་འཚིག །གལ་ཏེ་སངས་རྒྱས་ཞིང་རྣམས་འབར་འགྱུར་ལ། །འབར་བ་འདི་དག་མ་ལུས་ཞི་ཤོག་ཅེས། །ཏིང་འཛིན་གནས་ནས་སྨོན་ལམ་འདི་བཏབ་ན། །ས་རྣམས་ཞིག་ཀྱང་དེ་ལ་འགྱུར་བ་མེད། །ཞེས་གསུངས་པ་ལྟ་བུའོ། །དེ་བཞིན་དུ། ཇི་ལྟར་གཙུབ་ཤིང་དང་ནི་གཙུབ་གཏན་དང་། །ལག་པའི་རྩོལ་བ་འདི་གསུམ་འདུས་པ་ཡི། །རྐྱེན་འདི་དག་ལས་མེ་ནི་འབྱུང་འགྱུར་ཞིང་། །བྱུང་སྟེ་བྱ་བ་བྱས་ནས་མྱུར་དུ་འགག །དེ་ནས་འདི་ནི་གང་ནས་འོངས་ནས་གར། །སོང་ཞེས་མཁས་པ་གང་ཞིག་འཚོལ་བ་བྱེད། །ཕྱོགས་དང་ཕྱོགས་མཚམས་ཀུན་ཏུ་བཙལ་བ་ན། །འདི་ཡི་འགྲོ་དང་འོང་བ་རྙེད་མིན་བཞིན། །ཕུང་པོ་དག་དང་སྐྱེ་མཆེད་ཁམས་རྣམས་ནི། །ནང་ཡང་སྟོང་ལ་ཕྱི་རོལ་སྟོང་པ་སྟེ། །ཐམས་ཅད་བདག་གི་དབེན་ཞིང་གནས་མེད་ལ། །ཆོས་ཀྱི་མཚན་ཉིད་ནམ་མཁའི་ངོ་བོ་ཉིད། །ཆོས་ཀྱི་མཚན་ཉིད་འདི་འདྲ་འདི་དག་ནི། །མར་མེ་མཛད་པ་མཐོང་ནས་ཁྱོད་ཀྱིས་རྟོགས། །ཇི་ལྟར་ཉིད་ཀྱིས་རྗེས་སུ་རྟོགས་པ་ལྟར། །དེ་བཞིན་ལྷ་མིར་བཅས་པར་རྟོགས་པར་གྱིས། །ལོག་པ་ཡང་དག་མ་ཡིན་བརྟགས་པ་ཡི། །འདོད་ཆགས་ཞེ་སྡང་དུག་གིས་འགྲོ་བ་གདུངས། །ཐུགས་རྗེའི་སྤྲིན་ལས་ཞི་བ་བསིལ་བའི་ཆུ། །འདྲེན་པ་བདུད་རྩིའི་རྒྱུན་ནི་རབ་ཏུ་ཕོབ། །ཞེས་བྱ་བ་ལ་སོགས་པ་གསུངས་ཏེ་བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། མེ་དང་བུད་ཤིང་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཅུ་པའི་རྣམ་པར་བཤད་པའོ།། །།གཉིས་པ་བྱ་བ་འཁོར་བ་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་གང་ཟག་གི་བདག་གི་ངོ་བོ་དང་། དཔེ་མེ་དང་བུད་ཤིང་དག་བཀག་མོད་ཀྱི་མདོ་ལས། དགེ་སློང་དག སྐྱེ་བ་དང་རྒ་ཤིའི་འཁོར་བ་ལ་ནི་ཐོག་མ་དང་ཐ་མ་མེད་དོ་ཞེས་པའི་ཚུལ་གྱིས་འཁོར་བ་ཡོད་པས་འཁོར་བ་པོའི་བདག་ཀྱང་ཡོད་དོ་སྙམ་པ་ལ་འཁོར་བ་ཉིད་དཔྱད་ན་མ་གྲུབ་པས། འཁོར་བ་པོའི་བདག་ཀྱང་མ་གྲུབ་བོ་ཞེས་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་ཡང་གཉིས་ཏེ། འཁོར་བ་རང་བཞིན་གྱིས་གྲུབ་པ་དགག་པ། རིག་པ་དེ་གཞན་ལ་སྦྱར་བའོ། །དང་པོ་ལ་གཉིས་ཏེ། འཁོར་བ་ལ་ཐོག་མཐའ་དབུས་གསུམ་མ་གྲུབ་པ། སྐྱེ་རྒ་ལ་སྔ་ཕྱི་དང་ལྷན་ཅིག་མ་གྲུབ་པའོ། །དང་པོ་ནི། འཁོར་བ་རང་བཞིན་གྱིས་ཡོད་ན་དེའི་ཐོག་མཐའ་དབུས་གསུམ་ཡོད་དགོས་པ་ལས་འཁོར་བ་ལ་ཐོག་མ་དང་མཐའ་མེད་དེ། དེ་ལ་སྔོན་གྱི་ཆ་མེད་ཅིང་། ཕྱི་མའི་ཆ་མེད་པའི་ཕྱིར། གཏན་ཚིག་རང་སྡེ་ལ་ལུང་གི་བསྒྲུབ་པ་ནི། འཁོར་བའི་སྔོན་གྱི་མཐའ་མངོན་ནམ་ཞེས་ཞུས་པའི་ཚེ་ཐུབ་པ་ཆེན་པོས་སེམས་ཅན་མ་རིག་པའི་སྒྲིབ་པ་དང་ལྡན་པ་སྲིད་པའི་ཀུན་ཏུ་སྦྱོར་བ་ཅན། སྲེད་པའི་ལུ་གུ་རྒྱུད་ཀྱིས་བཅིངས་པ་འཁོར་ཞིང་རྒྱུག་པ་རྣམས་ཀྱི་སྔོན་གྱི་མཐའ་མི་མངོན་ནོ་ཞེས་དེའི་སྔོན་གྱི་མཐའ་ཡོད་པ་མིན་པར་གསུངས་པའི་ཕྱིར་རོ། །འདིར་འགྲེལ་པར་འཁོར་བའི་སྔོན་དང་ཕྱི་མ་གཉིས་ཀ་བཀག་ན། དགེ་སློང་དག་དེ་ལྟ་བས་ན་འཁོར་བ་ཟད་པར་བྱ་བའི་ཕྱིར། ནན་ཏན་དུ་བྱའོ་སྙམ་དུ་དེ་ལྟར་ཁྱོད་ཀྱིས་བསླབ་པར་བྱའོ། །ཞེས་པ་འདི་ཇི་ལྟར་གསུང་ཞེ་ན། སེམས་ཅན་མ་རིག་པའི་སྒྲིབ་པ་དང་ལྡན་པ་ཞེས་བྱ་བ་ལ་སོགས་པའི་ཁྱད་པར་ཉེ་བར་བཀོད་པས་དེ་དག་ཁོ་ནའི་འཁོར་བ་ལ་ཐོག་མ་དང་ཐ་མ་གཉིས་ཀའང་མེད་པ་ཡིན་གྱི། དེ་ཁོ་ན་ཉིད་ཀྱི་ཡེ་ཤེས་ཀྱི་རླུང་གི་ཤུགས་ཀྱིས་མ་རིགས་པའི་ལྗོན་ཤིང་དྲུང་ནས་ཕྱུང་བ་རྣམས་ཀྱི་འཁོར་བ་ལ་ནི་ཐ་མ་ཡོད་པ་དང་། དེ་བསྟན་པའི་དགོས་པ་དང་བཅས་པ་སྤྲོས་ནས་གསུངས་སོ། །དེ་ལྟ་ནའང་དེའི་དབུས་མ་བཀག་པས་ཡོད་དོ་སྙམ་ན། གང་ལ་ཐོག་མ་དང་ཐ་མ་མེད་པའི་འཁོར་བ་དེ་ལ་དབུས་ནི་ག་ལ་ཡོད་དེ། དེ་གཉིས་མེད་པས་དེ་གཉིས་ཀྱི་བར་ན་གནས་པ་མེད་པའི་ཕྱིར་རོ། །གཉིས་པ་ལ་གསུམ་སྟེ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། འཁོར་བ་ལ་ཐོག་མཐའ་དབུས་གསུམ་མེད་པ་དེའི་ཕྱིར་འཁོར་བའི་རང་བཞིན་སྐྱེ་བ་དང་རྒ་ཤི་དེ་ལ་སྔ་ཕྱི་དང་ལྷན་ཅིག་གི་རིམ་པ་མི་འཐད་དེ། སྒྲུབ་བྱེད་གཞུང་འོག་མས་སྟོན་ནོ། །གཉིས་པ་ལ་གཉིས་ཏེ། སྔ་ཕྱིར་གྲུབ་པ་དགག ལྷན་ཅིག་ཏུ་གྲུབ་པ་དགག་པའོ། །དང་པོ་ནི། གལ་ཏེ་སྐྱེ་བ་སྔ་བར་གྱུར་ལ། རང་ཉིད་དང་གཞན་གྱི་རྒ་ཤི་ཕྱི་བ་ཡིན་ན་ནི་སྐྱེ་བ་ཆོས་ཅན། རང་གི་རྒ་ཤི་མེད་པ་དང་། གཞན་དུ་མ་ཤི་བ་ཡང་འདིར་སྐྱེ་བར་འགྱུར་ཏེ། རང་ཉིད་སྔ་ཞིང་རང་དང་གཞན་གྱི་རྒ་ཤི་ཕྱི་བ་ཡིན་པའི་ཕྱིར། ཡང་གལ་ཏེ་སྐྱེ་བ་ཕྱི་བར་གྱུར་ལ། རྒ་ཤི་སྔ་བ་ཡིན་ན་ནི། སྐྱེ་བ་སྔར་མེད་པའི་རྒ་ཤི་ནི་ཆོས་ཅན། ཅི་ལྟར་ཡོད་པ་ཉིད་དུ་འགྱུར་ཏེ། རྒྱུ་མེད་པའི་ཕྱིར་རོ། །གཉིས་པ་ནི། སྐྱེ་བ་དང་ནི་རྒ་ཤི་དག་ཡུལ་གཅིག་ཏུ་དུས་གཅིག་གི་ཚེ་ལྷན་ཅིག་རུང་བ་མ་ཡིན་ཏེ། དེ་ལྟར་ན་སྐྱེ་བཞིན་པ་ན་འཆི་བར་འགྱུར་ཞིང་། ཕན་ཚུན་མི་ལྟོས་པས་གཉིས་ཀའང་རྒྱུ་མེད་པ་ཅན་དུ་འགྱུར་བའི་ཕྱིར་རོ། །གསུམ་པ་ནི། གང་ལ་སྔ་ཕྱི་དང་ལྷན་ཅིག་གི་རིམ་པ་དེ་དག་མི་སྲིད་པའི་སྐྱེ་བ་དེ་དང་རྒ་ཤི་དེ་ཆོས་ཅན། འཕགས་པ་རྣམས་ཡང་དག་པར་ཡོད་པ་དང་མེད་ཅེས་སྒྲ་རྟོག་གིས་ཅིའི་ཕྱིར་ན་སྤྲོ་བར་བྱེད་དེ་སྤྲོ་བར་མི་མཛད་དེ། ཡང་དག་པ་ཅི་ལྟ་བ་བཞིན་གཟིགས་པའི་ཕྱིར། བྱིས་པ་ལ་སྦྱར་ན་སྤྲོ་བར་མི་རིགས་ཏེ། རྣམ་པ་ཐམས་ཅད་དུ་མ་དམིགས་པའི་ཕྱིར་ཞེས་པའང་འགྲེལ་པར་བཤད་དོ། །གཉིས་པ་རིག་པ་དེ་ཆོས་གཞན་ལ་བསྒྲེ་བ་ནི། འཁོར་བའི་རང་བཞིན་སྐྱེ་བ་དང་རྒ་ཤི་འབའ་ཞིག་སྔོན་གྱི་མཐའ་ཡོད་པ་མ་ཡིན་པར་མ་ཟད་ཀྱི། རྒྱུ་དང་འབྲས་བུ་ཉིད་དང་ནི། །མཚན་ཉིད་དང་ནི་མཚན་གཞི་ཉིད། །ཚོར་དང་ཚོར་པོ་ཉིད་དང་ནི། །ཤེས་དང་ཤེས་བྱ་ལ་སོགས་པ། །དོན་ཡོད་གང་དག་ཅི་ཡང་རུང་། །ཕན་ཚུན་ལྟོས་པ་དང་བཅས་པའི་དངོས་པོ་ཐམས་ཅད་ཉིད་ལ་ཡང་ཆོས་ཅན། གཅིག་སྔོན་དུ་གྲུབ་པའི་སྔོན་གྱི་མཐའ་དང་། ལྷན་ཅིག་ཏུ་ནི་ཡོད་པ་མ་ཡིན་པས་དོན་དམ་པར་རང་བཞིན་མེད་པར་གྲུབ་སྟེ། སྐྱེ་བ་དང་རྒ་ཤི་ལ་སྔ་ཕྱི་དང་ལྷན་ཅིག་འགོག་པའི་རིག་པ་ཐམས་ཅད་མཚུངས་པའི་ཕྱིར། གཉིས་པ་ལུང་དང་སྦྱར་བ་ནི་འཕགས་པ་དཀོན་མཆོག་སྤྲིན་གྱི་མདོ་ལས། ཆོས་ཀྱི་འཁོར་ལོ་བསྐོར་བ་ན། །གཟོད་ནས་ཞི་ཞིང་མ་སྐྱེས་པ། །རང་བཞིན་མྱ་ངན་འདས་པ་ཡི། །ཆོས་རྣམས་མགོན་པོ་ཁྱོད་ཀྱིས་བསྟན། །ཞེས་འཕགས་པ་བྱང་ཆུབ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བས་བཅོམ་ལྡན་འདས་ལ་བསྟོད་པ་ཡིན་ནོ། །དེ་བཞིན་དུ་གཟོད་མ་ནས་ནི་སྟོང་ཞིང་མ་འོངས་ཆོས། །སོང་བ་མེད་ཅིང་གནས་མེད་གནས་ཀྱིས་དབེན། །སྒྱུ་མའི་རང་བཞིན་རྟག་ཏུ་སྙིང་པོ་མེད། །ཐམས་ཅད་དག་ཅིང་རྣམ་དག་ནམ་མཁའ་བཞིན། །རྒྱལ་བའི་ཆོས་ནི་གང་དག་རབ་སྟོན་པ། །དེ་ཡང་མི་ཟད་པས་ན་མི་མཐོང་སྟེ། །ཆོས་འདི་སྔ་ནས་བདག་མེད་སེམས་ཅན་མེད། །དེ་དག་རབ་ཏུ་སྟོན་ཀྱང་ཟད་མི་འགྱུར། །བཏག་པ་ཙམ་དུ་བརྟགས་ནས་བརྗོད་པ་ཡིན། །འཁོར་བ་ལ་ནི་མཐའ་མ་མི་རྙེད་དེ། །གང་དག་སྔོན་བྱུང་མཐའ་ནི་མཚན་ཉིད་མེད། །མ་འོངས་དུས་ཀྱང་ཤེས་པར་བྱ་བའི་ཕྱིར། །འདི་ཡི་འགྲོ་དང་འོང་བ་རྙེད་མིན་བཞིན། །ཕུང་པོ་དག་དང་སྐྱེ་མཆེད་ཁམས་རྣམས་ནི། །ནང་ཡང་སྟོང་ལ་ཕྱི་རོལ་སྟོང་པ་སྟེ། །ཐམས་ཅད་བདག་གིས་དབེན་ཞིང་གནས་མེད་པ། །ཆོས་ཀྱི་མཚན་ཉིད་ནམ་མཁའི་ངོ་བོ་ཉིད། །ཆོས་ཀྱི་མཚན་ཉིད་འདི་འདྲ་འདི་དག་ནི། །མར་མེ་མཛད་པ་མཐོང་ནས་ཁྱོད་ཀྱིས་རྟོགས། །ཇི་ལྟར་ཉིད་ཀྱིས་རྗེས་སུ་རྟོགས་པ་ལྟར། །དེ་བཞིན་ལྷ་མིར་བཅས་པར་རྟོགས་པར་གྱིས། །ལོག་པ་ཡང་དག་མ་ཡིན་བརྟགས་པ་ཡི། །འདོད་ཆགས་ཞེ་སྡང་དུག་གིས་འགྲོ་བ་གདུངས། །ཐུགས་རྗེའི་སྤྲིན་ལས་ཞི་བ་བསིལ་བའི་ཆུ། །འདྲེན་པ་བདུད་རྩིའི་རྒྱུན་ནི་རབ་ཏུ་ཕོབ། །ཞེས་གསུངས་ཏེ་བསྟན་ཚུལ་ནི་སྔ་མ་དང་འདྲའོ། །གསུམ་པ་ནི། དབུ་མ་རྩ་བའི་ཤེས་རབ་ཀྱི་རྣམ་བཤད་ཡང་དག་ལྟ་བའི་འོད་ཟེར་ལས། སྔོན་དང་ཕྱི་མའི་མཐའ་བརྟགས་པ་ཞེས་བྱ་བ་སྟེ་རབ་ཏུ་བྱེད་པ་བཅུ་གཅིག་པའི་རྣམ་པར་བཤད་པའོ།། །།གསུམ་པ་བརྟན་པ་སྡུག་བསྔལ་དགག་པ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་གང་ཟག་གི་བདག་བཀག་མོད་ཀྱི་འོན་ཀྱང་མདོ་ལས་སྐྱེ་བ་ནི་སྡུག་བསྔལ་ལོ། །རྒ་བ་དང་། ན་བ་དང་། འཆི་བ་ནི་སྡུག་བསྔལ་ལོ་ཞེས་བརྟེན་པ་སྡུག་བསྔལ་ཡོད་པར་གསུངས་པས། དེའི་རྟེན་གང་ཟག་གི་བདག་ཀྱང་ཡོད་དོ་ཞེ་ན། སྡུག་བསྔལ་ཉིད་མཐའ་བཞིར་སྐྱེ་བ་མེད་པས་དེའི་རྟེན་གང་ཟག་གི་བདག་ཀྱང་མེད་དོ་ཞེས་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས་དང་པོ་རིགས་པས་བསྒྲུབ་པ་ལ་ཡང་གཉིས་ཏེ། སྡུག་བསྔལ་མཐའ་བཞིར་གྲུབ་པ་དགག རིགས་པ་དེ་ཆོས་གཞན་ལའང་སྦྱར་བའོ། །དང་པོ་ལ་གཉིས་ཏེ། རྟོག་གེ་པའི་འདོད་པ་འགོད། དེ་ཉིད་སུན་དབྱུང་བའོ། །དང་པོ་ནི། སྡུག་བསྔལ་རང་བཞིན་གྱི་ཡོད་ན་མཐའ་བཞི་གང་རུང་ལས་སྐྱེ་དགོས་པས་གང་ལས་སྐྱེ་རྟོག་དྲང་། དེ་ལ་གྲངས་ཅན་པ་ཁ་ཅིག སྡུག་བསྔལ་བདག་གིས་བྱས་པ་དང་། རང་གི་སྡེ་པ་དག་སྡུག་བསྔལ་གཞན་གྱིས་བྱས་པ་དང་། གཅེར་བུ་པ་དག་གཉིས་ཀས་བྱས་པ་དང་། རྒྱང་འཕེན་པ་དག་རྒྱུ་མེད་ལས་བྱུང་བར་འདོད་དོ། །གཉིས་པ་ལ་གཉིས་ཏེ། དམ་བཅའ་མདོར་བསྟན། འཐད་པ་རྒྱས་པར་བཤད་པའོ། །དང་པོ་ནི། སྡུག་བསྔལ་མཐའ་བཞི་ལས་བྱུང་བ་དེ་ནི་བྱ་བར་མི་རུང་ངོ་ཞེས་པ་སྟེ་འཐད་པ་འོག་ནས་འཆད་དོ། །གཉིས་པ་ལ་གསུམ་སྟེ། བདག་གཞན་རེ་རེ་བས་བྱས་པ་དགག གཉིས་ཀས་བྱས་པ་དགག རྒྱུ་མེད་ལས་བྱུང་བ་དགག་པའོ། །དང་པོ་ལ་གསུམ་སྟེ། ཕུང་པོ་ལ་ལྟོས་པའི་བདག་བྱས་དང་གཞན་བྱས་དགག གང་ཟག་ལ་ལྟོས་པའི་བདག་བྱས་དང་གཞན་བྱས་དགག བདག་བྱས་མ་གྲུབ་པས་གཞན་བྱས་མི་འགྲུབ་པར་བསྟན་པའོ། །དང་པོ་ལ་གཉིས་ཏེ། བདག་བྱས་དགག་པ་དང་། གཞན་བྱས་དགག་པའོ། །དང་པོ་ནི། གལ་ཏེ་སྡུག་བསྔལ་ཉེར་ལེན་གྱི་ཕུང་པོ་འདི་ཕུང་པོ་བདག་ཉིད་ཀྱིས་བྱས་པར་གྱུར་ན་ཕུང་པོ་འདི་རྒྱུ་རྐྱེན་ལ་བརྟེན་ནས་འབྱུང་བར་མི་འགྱུར་ཏེ། རང་གྲུབ་ན་སྐྱེ་བ་དོན་མེད་ཅིང་། མ་གྲུབ་ན་སྐྱེ་བྱེད་མེད་པའི་ཕྱིར་རོ། །འདོད་པར་ནི་མི་ནུས་ཏེ། གང་གི་ཕྱིར་འགག་པའི་ཆར་གཏོགས་པའི་ཕུང་པོ་སྔ་མ་འདི་དག་ལ་བརྟེན་ནས་སྐྱེ་བའི་ཆར་གཏོགས་པའི་ཕུང་པོ་ཕྱི་མ་དེ་དག་འབྱུང་བར་མཐོང་བས་སོ། །གཉིས་པ་ནི། གལ་ཏེ་འབྲས་བུ་ཕུང་པོ་ཕྱི་མ་དེ་ལས་རྒྱུ་ཕུང་པོ་སྔ་མ་འདི་རྫས་གཞན་དུ་འགྱུར་ན་དེས་སྡུག་བསྔལ་བྱས་པ་རྒྱུ་གཞན་གྱིས་བྱས་པར་འགྱུར་ཞིང་། གལ་ཏེ་རྒྱུ་ཕུང་པོ་སྔ་མ་འདི་ལས་འབྲས་བུ་ཕུང་པོ་ཕྱི་མ་འདི་རྫས་གཞན་ཡིན་ན། རྒྱུ་གཞན་དེ་དག་གིས་སྡུག་བསྔལ་དེ་བྱས་པས་འབྲས་བུ་གཞན་བྱས་པར་འགྱུར་ན་ཡང་རྒྱུ་འབྲས་རྫས་གཞན་ཡིན་པ་ཉིད་མ་གྲུབ་སྟེ། ཅིག་ཆར་དུ་མེད་པའི་ཕྱིར་དང་། ཡོད་ན་ཕན་ཚུན་ལྟོས་པ་དོན་མེད་པས་རྒྱུ་འབྲས་ཉིད་མ་ཡིན་པར་ཐལ་བའི་ཕྱིར་རོ། །གཉིས་པ་ལ་གཉིས་ཏེ། བདག་བྱས་དགག་པ་དང་། གཞན་བྱས་དགག་པའོ། །དང་པོ་ནི། གལ་ཏེ་སྡུག་བསྔལ་དེ་སྡུག་བསྔལ་རང་གིས་བྱས་ནས་འདི་ལ་བྱིན་པ་མ་ཡིན་གྱི། སྡུག་བསྔལ་གང་གིས་གང་ཟག་དེར་བཏགས་པའི་གང་ཟག་དེ་ཉིད་ཀྱིས་སྡུག་བསྔལ་དེ་བྱས་པས་སྡུག་བསྔལ་བདག་གིས་ནི་བྱས་པ་ཡིན་ནོ་སྙམ་ན། དེ་ཡང་མི་རུང་སྟེ། སྡུག་བསྔལ་དེ་ཉིད་ལ་བཏགས་པའི་གང་ཟག་བདག་གིས་ནི་སྡུག་བསྔལ་དེ་བྱས་ན་མིའི་སྡུག་བསྔལ་བྱེད་པ་པོའི་གང་ཟག་བདག་གིས་མིའི་སྡུག་བསྔལ་བྱས་པའི་གང་ཟག་དེ་ཆོས་ཅན། མིའི་སྡུག་བསྔལ་ལས་མ་གཏོགས་པ་གང་ཞིག་ཡིན་ཏེ། ལོགས་སུ་ཡོད་པ་མི་འཐད་པར་ཐལ། དེ་ལས་ཐ་དད་དུ་མ་དམིགས་པའི་ཕྱིར། གཉིས་པ་ནི། གལ་ཏེ་ཚེ་སྔ་མའི་མི་དང་། ཕྱི་མའི་ལྷའི་གང་ཟག་གཉིས་གཅིག་པ་མ་ཡིན་གྱི་རྫས་གཞན་ཡིན་པས་མིའི་གང་ཟག་གིས་ལྷར་སྐྱེ་བའི་ལས་བསགས་པའི་སྒོ་ནས་ཕྱི་མའི་ལྷའི་སྡུག་བསྔལ་བྱས་ནས་ལྷའི་གང་ཟག་ལ་བྱིན་པས་སྡུག་བསྔལ་དེ་ལ་ལྷའི་གང་ཟག་ཏུ་འདོགས་པའི་ཕྱིར། སྡུག་བསྔལ་གང་ཟག་གཞན་གྱི་བྱས་པ་ཡིན་ནོ་ཞེ་ན། དེ་དགག་པ་ལ་གཉིས་ཏེ། ལེན་པ་པོའི་ངོས་ནས་དགག་པ། སྦྱིན་པ་པོའི་ངོས་ནས་དགག་པའོ། །དང་པོ་ནི། གལ་ཏེ་སྐྱེ་བ་སྔ་མའི་མིའི་གང་ཟག་གཞན་ལས་ནི་ཕྱི་མའི་ལྷའི་སྡུག་བསྔལ་འབྱུང་ན་མིའི་གང་ཟག་གཞན་ཞིག་གིས་ལྷའི་སྡུག་བསྔལ་དེ་བྱས་ནས་གང་ལ་སྦྱིན་པར་བྱ་བའི་ཡུལ་ལྷའི་གང་ཟག་དེ་ཆོས་ཅན། ལྷའི་སྡུག་བསྔལ་ལས་མ་གཏོགས་པ་ཅི་ལྟར་རུང་སྟེ། དེ་ལས་ཐ་དད་དུ་མ་དམིགས་པའི་ཕྱིར་རོ། །གཉིས་པ་ནི། གལ་ཏེ་དེ་ལྟར་མིའི་གང་ཟག་གཞན་ལས་ཕྱི་མའི་ལྷའི་སྡུག་བསྔལ་འབྱུང་ན་མིའི་གང་ཟག་གང་གིས་སྡུག་བསྔལ་དེ་བྱས་ནས་གཞན་ལྷའི་གང་ཟག་ལ་སྟེར་བ་པོའི་མིའི་གང་ཟག་གཞན་དེ་ཆོས་ཅན། མིའི་སྡུག་བསྔལ་ལས་མ་གཏོགས་པ་གང་ཞིག་ཡིན་ཏེ། དེ་ལས་ཐ་དད་དུ་མ་དམིགས་པའི་ཕྱིར་རོ། །གསུམ་པ་ལ་གཉིས་ཏེ། གང་ཟག་ལ་ལྟོས་པའི་བདག་བྱས་མ་གྲུབ་པས་གཞན་བྱས་མི་གྲུབ་པར་བསྟན་པ། ཕུང་པོ་ལ་ལྟོས་པའི་བདག་བྱས་མ་གྲུབ་པས་གཞན་བྱས་མི་གྲུབ་པའོ། །དང་པོ་ནི། སྡུག་བསྔལ་གཞན་གྱིས་བྱས་ཞེས་པའི་བྱེད་པ་པོའི་མིའི་གང་ཟག་ཆོས་ཅན། ལྷའི་སྡུག་བསྔལ་རང་ལས་གཞན་པ་ག་ལ་བྱེད་དེ། མིའི་སྡུག་བསྔལ་ལ་ལྟོས་ནས་གང་ཟག་བདག་གིས་བྱས་པར་མ་གྲུབ་པའི་ཕྱིར་རོ། །ཁྱབ་སྟེ། གང་ཟག་གཞན་གྱིས་སྡུག་བསྔལ་གང་བྱེད་པའི་གང་ཟག་དེ་ནི་གང་ཟག་དེའི་སྡུག་བསྔལ་གང་ཟག་བདག་གིས་བྱས་པར་འགྱུར་དགོས་པའི་ཕྱིར་རོ། །གཉིས་པ་ནི། རེ་ཞིག་སྡུག་བསྔལ་གཞན་བྱེད་པ་པོའི་མིའི་སྡུག་བསྔལ་གྱི་ཕུང་པོ་དེ་བདག་གིས་བྱས་པ་མ་ཡིན་ཏེ། རང་ལ་བྱ་བྱེད་འགལ་བས་དེ་ཉིད་ཀྱིས་ནི་དེ་མ་བྱས་པས་སོ། །སྡུག་བསྔལ་གཞན་བྱས་ག་ལ་འགྱུར་ཞེས་པ་དང་གྲུབ་པ་དེ་གཅིག་པ་མིའི་སྡུག་བསྔལ་ཆོས་ཅན། ལྷའི་སྡུག་བསྔལ་བྱེད་པར་ག་ལ་འགྱུར་ཏེ། དེའི་བྱེད་པ་པོ་གཞན་མིའི་སྡུག་བསྔལ་དེ་ཉིད་བདག་གིས་མ་བྱས་པའི་ཕྱིར་རོ། །གཉིས་པ་གཉིས་ཀས་བྱས་པ་དགག་པ་ནི། གལ་ཏེ་རང་གཞན་རེ་རེས་བྱས་པར་གྱུར་ན་སྡུག་བསྔལ་གཉིས་ཀས་བྱས་པར་འགྱུར་ན་ཡང་། གཉིས་ཀ་ཚོགས་པས་ཀྱང་མི་བྱེད་དེ། སྔར་རེ་རེ་བས་བྱས་པ་བཀག་ཟིན་པའི་ཕྱིར་རོ། །གསུམ་པ་རྒྱུ་མེད་ལས་བྱུང་བ་དགག་པ་ནི། སྡུག་བསྔལ་ཆོས་ཅན། གཞན་གྱིས་ཀྱང་མ་བྱས། བདག་གིས་ཀྱང་མ་བྱས། གཉིས་ཀས་ཀྱང་མ་བྱས་པས་རྒྱུ་མེད་དུ་ག་ལ་འགྱུར་ཏེ། རྒྱུ་མེད་ཡིན་ན་ཤེས་པའི་གཟུང་ཡུལ་དུ་མི་སྣང་བ་དང་། རེས་འགལ་བ་མ་ཡིན་པར་ཐལ་བའི་ཕྱིར་རོ། །གཉིས་པ་རིག་པ་དེ་ཆོས་གཞན་ལ་སྦྱར་བ་ནི། ཟིན་པའི་ཕུང་པོ་ལྔས་བསྡུས་པའི་སྡུག་བསྔལ་འབའ་ཞིག་རྣམ་པ་བཞི་ཡོད་པ་མ་ཡིན་པར་མ་ཟད་ཀྱི། དེ་བཞིན་དུ་ཕྱི་རོལ་བུམ་པ་ལ་སོགས་པའི་དངོས་པོ་རྣམས་ལ་ཡང་མཐའ་རྣམ་པ་བཞི་པོ་དག་ལས་སྐྱེ་བ་ཡོད་པ་མ་ཡིན་ཏེ། གལ་ཏེ་བདག་གིས་བྱས་གྱུར་ན་ཞེས་སོགས་ཀྱི་རིག་པ་མཚུངས་པའི་ཕྱིར་རོ། །གཉིས་པ་ལུང་དང་སྦྱར་བ་ནི། བཅོམ་ལྡན་འདས་ཀྱིས་ཀྱང་། ཀུན་རྫོབ་ཏུ་ནི་རྒྱལ་བས་ཆོས་བཤད་དེ། །འདུས་བྱས་འདུས་མ་བྱས་ཡིན་དེ་ལྟར་ལྟོས། །ཡང་དག་ཉིད་དུ་བདག་དང་མི་མེད་དེ། །འགྲོ་བ་ཀུན་གྱི་མཚན་ཉིད་འདི་འདྲའོ། །དགེ་དང་ནག་པོའི་ལས་རྣམས་མི་འཇིག་སྟེ། །བདག་གིས་བྱས་པ་བདག་གིས་མྱོང་བར་འགྱུར། །ལས་ཀྱི་འབྲས་བུ་འཕོ་བར་མི་འགྱུར་ཏེ། །རྒྱུ་མེད་པར་ཡང་མྱོང་བར་མི་འགྱུར་རོ། །སྲིད་པ་ཐམས་ཅད་སྒྱུ་མ་དབང་མེད་པ། །གསོག་དང་གསོབ་ཏུ་གྱུར་པ་དབུ་བ་བཞིན། །སྒྱུ་མ་སྨིག་རྒྱུ་ལྟ་བུར་རྟག་ཏུ་སྟོང་། །སྒྲ་ཡིས་བཤད་ཀྱང་དེ་དག་དབེན་པ་ཡིན། །བྲག་ཕུག་རི་དང་གཅོང་རོང་ཀླུང་རྣམས་སུ། །རྐྱེན་གྱིས་ཇི་ལྟར་བྲག་ཆ་འབྱུང་བ་ལྟར། །དེ་བཞིན་འདུས་བྱས་འདི་ཀུན་རིག་པར་གྱིས། །འགྲོ་བ་ཐམས་ཅད་སྒྱུ་མ་སྨིག་རྒྱུ་བཞིན། །ཞེས་བྱ་བ་ལ་སོགས་པ་གསུངས་ཏེ། བསྟན་ཚུལ་ནི་སྔ་མ་ལྟར་ཤེས་པར་བྱའོ། །གསུམ་པ་ནི། དབུ་མ་རྩ་བའི་རྣམ་བཤད་ཡང་དག་ལྟ་བའི་འོད་ཟེར་ལས། བདག་གིས་བྱས་པ་དང་གཞན་གྱིས་བྱས་པ་བརྟག་པ་ཞེས་བྱ་བ་སྟེ་རབ་ཏུ་བྱེད་པ་བཅུ་གཉིས་པའི་རྣམ་པར་བཤད་པའོ།། །།གསུམ་པ་རྟེན་འབྲེལ་དངོས་པོ་ཙམ་གྱི་རང་བཞིན་གྱིས་སྟོང་པ་ལ་གཉིས་ཏེ། དངོས་པོ་ཙམ་གྱི་ངོ་བོ་དགག་པ། དེའི་སྒྲུབ་བྱེད་དགག་པའོ། །དང་པོ་ལ་གསུམ་ལས། དང་པོ་རབ་ཏུ་བྱེད་པའི་འབྲེལ་ནི། དེ་ལྟར་ཕྱི་ནང་གི་ཆོས་རྣམས་མཐའ་བཞི་ལས་སྐྱེ་བ་བཀག་པས་ཡང་དག་པར་མ་སྐྱེས་པར་གྲུབ་བཞིན་དུ་མ་རིག་པའི་རབ་རིབ་ཅན་ལ་སྐྱེ་བ་ལ་སོགས་པར་སྣང་བས་འདུ་བྱེད་བསླུ་བའི་ཆོས་ཅན་དུ་གྲུབ་ལ། དེ་ལ་བརྫུན་པས་ཁྱབ་པ་ཉིད་དུ་བསྟན་པའི་ཕྱིར་རབ་ཏུ་བྱེད་པ་འདི་བཀོད་པ་ཡིན་ནོ། །གཉིས་པ་རབ་བྱེད་ཀྱི་གཞུང་ལ་གཉིས་ལས། དང་པོ་རིག་པས་བསྒྲུབ་པ་ལ་ཡང་གཉིས་ཏེ། ལུང་ལས་རང་བཞིན་མེད་པར་གྲུབ་པ། ལུང་དོན་གཞན་དུ་རྟོག་པ་དགག་པའོ། །དང་པོ་ནི། འདུ་བྱེད་ཕྱི་ནང་གི་དངོས་པོ་དེ་དག་སྒྱུ་མའི་སྐྱེས་བུ་ལྟར་བརྫུན་པ་རང་བཞིན་མེད་པ་ཡིན་ཏེ། འདུ་བྱེད་ཕྱི་ནང་གི་ཆོས་ཐམས་ཅད་སྔར་བཤད་པའི་རིག་པས་སྐྱེ་བ་མེད་པར་གྲུབ་བཞིན་དུ་མ་རིག་པའི་རབ་རིབ་ཅན་ལ་སྐྱེ་བའི་དངོས་པོར་སྣང་བས་བསླུ་བའི་ཆོས་ཅན་དུ་གྲུབ་པ་དེས་ན་སྟེ་དེའི་ཕྱིར། གཏན་ཚིགས་དང་ཁྱབ་པ་གཉིས་ཀ་གྲུབ་སྟེ། བཅོམ་ལྡན་འདས་ཀྱིས་དགེ་སློང་དག་འདུས་བྱས་བསླུ་བའི་ཆོས་ཅན་གང་ཡིན་པ་དེ་ནི་བརྫུན་པ་ཡིན་ལ། མི་བསླུ་བའི་ཆོས་ཅན་མྱ་ངན་ལས་འདས་པ་གང་ཡིན་པ་དེ་ནི་བདེན་པ་དམ་པའོ། །ཞེས་དང་། དེ་བཞིན་དུ་ནི་འདི་ནི་བསླུ་བར་བྱེད་པའི་ཆོས་ཅན་ནོ། །འདི་ནི་འཇིག་པའི་ཆོས་ཅན་ནོ་ཞེས་འདུས་བྱས་བསླུ་བར་ཡང་གསུངས་ཤིང་། ཆོས་གང་ཞིག་བསླུ་བ་དེ་ནི་བརྫུན་ཞེས་ཀྱང་གསུངས་པའི་ཕྱིར་རོ། །ལུང་འདི་དག་གི་དོན། མདོ་སེམས་གཉིས་ཀྱིས་སྲེད་པས་འཕངས་པའི་འདུས་བྱས་རྣམས་བདེ་བར་སྣང་ཡང་དོན་ལ་སྡུག་བསྔལ་ཡིན་པས། དེའི་ཆ་ནས་བསླུ་བ་དང་། བརྫུན་པར་འཇོག་ལ། མི་རྟག་པ་ཐམས་ཅད་སྡུག་བསྔལ་དུ་གསུངས་པའི་དོན་ཡང་མཚན་གཞི་དེ་ཉིད་ལ་འདོད་ཀྱི་འདུས་བྱས་ཐམས་ཅད་ལ་མི་འདོད་དོ། །དབུ་མ་པས་འདུས་བྱས་ཐམས་ཅད་ལ་མི་རྟག་པ་དང་། སྡུག་བསྔལ་དང་། བསླུ་བ་དང་། བརྫུན་པས་ཁྱབ་པས་ས་བཅུའི་མཉམ་བཞག་རང་ངོར་འདུས་བྱས་སྐད་ཅིག་གིས་སྐྱེ་འཇིག་མེད་པས་སྡུག་བསྔལ་མེད་ཀྱང་རྗེས་ཐོབ་ཏུ་འགག་དང་བཅས་པའི་སྐྱེ་བ་དང་། །ཞེས་པའི་ཚུལ་གྱིས་སྐྱེ་འགག་ཏུ་སྣང་བ་ཡོད་པས་མ་རིག་བག་ཆགས་ཀྱིས་དང་། ཟག་མེད་ཀྱི་ལས་ལ་བརྟེན་ནས་བྱུང་བའི་མི་རྟག་པ་ལ་སྡུག་བསྔལ་དུ་བྱས་པ་ས་བཅུ་པའི་རྗེས་ཐོབ་ཀྱི་བར་དུ་ཡོད་པར་བཞེད་ཅིང་། རྗེས་མ། >>>
རྩོམ་སྒྲིག་པ། ཕར་ནང་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com
དཔྱད་གཏམ་སྤེལ་མཁན་ལ་གསལ་བརྡ།