དབུ་མ་རྣམ་པར་ངེས་པའི་ཆོས་ཀྱི་བང་མཛོད་ལུང་དང་རིགས་པའི་རྒྱ་མཚོ།

༼ཕ༽༄༅། །དབུ་མ་རྣམ་པར་ངེས་པའི་ཆོས་ཀྱི་བང་མཛོད་ལུང་དང་རིགས་པའི་རྒྱ་མཚོ་ཞེས་བྱ་བའི་ལེའུ་དང་པོ་བཞུགས་སོ།།

ན་མོ་མཉྫུ་ཤྲཱི་ཡེ། ཐེག་པ་ཆེན་པོ་དབུ་མ་རྣམ་པར་ངེས་པའི་བང་མཛོད་ལུང་དང་རིགས་པའི་རྒྱ་མཚོ་ཞེས་བྱ་བ། དཔལ་ལྡན་སྲིད་གསུམ་ཉིན་མོར་བྱེད་པའི་མངའ་མདངས་གང་བའི་ལང་ཚོ་ཅན་དེ་བརྒྱ་བྱིན་གཙུག་གི་ནོར་བུའི་ཁྲི་ལ་ནམ་ཡང་བསྟི། །མེས་པོའི་སྙིང་ལ་ཉེར་སིམ་བྱེད་པའི་གསུང་གི་རྔ་ཆེན་དེས་ནི་འཕྲོག་བྱེད་སྙིང་ལ་རྟག་པར་ཞུགས་པའི་ཟུག་རྔུ་དྲུངས་ནས་ཕྱུང༌། །པ་སངས་སློབ་མས་རིང་ནས་མ་ཐོབ་བརྗོད་བྲལ་ཐུགས་ཀྱི་ཉིང་ཁུ་དེ་ཡང་བརྗོད་མེད་གསུང་གིས་ཡང་ཡང་འདོམས་པའི་ཞལ་གྱི་སྒོ། །བདུད་རྩིའི་འབབ་སྟེགས་ཅན་ཁྱོད་རྒྱ་མཚོ་ཇི་བཞིན་རབ་གང་ལྷ་ཡི་རྔ་བཞིན་ལེགས་འདོམས་ཉིན་མོར་བྱེད་པ་ཇི་བཞིན་ངང་གིས་འཆར། །ཀུན་དང་མཐུན་པའི་གསུང་དབྱངས་སྙན་པོ་ཡིས། །འཇིག་རྟེན་ཐམས་ཅད་ཐོག་མར་འདུན་མཛད་ནས། །གཞན་ལ་མེད་པའི་བདུད་རྩིའི་སྒོ་བརྒྱ་པོ། །དབྱེ་མཛད་སྟོན་པ་དེ་ཕྱག་བགྱི་འོ། །ལུས་མེད་ཀྱིས་བསྟན་ལམ་དུ་མི་འཇུག་པ། །དེ་དག་ཀུན་གྱི་སྙིང་ལ་རྗེས་ཞུགས་ནས། །ཆོས་ཀྱི་ཡིན་ལུགས་ཇི་བཞིན་སྟོན་མཁས་པ། །བརྩེ་ཆེན་འཇམ་པའི་དཔལ་གྱིས་བདག་ཟུངས་ཤིག །ཚངས་སོགས་སྨྲ་མཁས་བསྟན་བཅོས་ཀྱི། །རི་མོ་འགོད་མཁས་གཞན་དག་ལ། །མེད་པའི་ཆོས་ཀྱི་ཕྱག་རྒྱ་ནི། །རབ་བཙན་བཞི་པོ་དེར་ཕྱག་བྱ། །སྤྲོས་པའི་ཚོགས་ལ་ཀུན་ནས་མི་གཟིགས་ཤིང༌། །མཐར་འཛིན་ལམ་དུ་ནམ་ཡང་མི་གཤེགས་པར། །རྟག་ཏུ་དབུ་མའི་རྒྱ་མཚོར་ངལ་བསོ་བའི། །རྒྱལ་བ་གཉིས་པ་དེ་ལ་ཕྱག་འཚལ་ལོ། །དེ་ལས་བྱོན་པའི་ཕྲིན་ལས་ཆུ་བོ་བརྒྱས། །གང་ཐུགས་འཁོར་ཡུག་ཡངས་པར་གནས་བཅས་ནས། །ས་གསུམ་འགྲོ་བའི་འཕོངས་པ་སེལ་བརྩོན་པ། །བརྒྱུད་པའི་བཤེས་གཉེན་ཀུན་ལ་ཕྱག་བྱ་འོ། །སྙན་གྲགས་ཆུ་བོས་ཕྱོགས་བརྒྱར་དྲངས་གྱུར་ཀྱང༌། །ལུང་དང་རྟོགས་པའི་ཆུ་ཆེན་བཞིས་བཏུད་པས། །ཕྲིན་ལས་ཆར་ཆེན་ངང་གིས་འབེབས་གྱུར་པ། །བརྩེ་ཆེན་དགེ་བའི་བཤེས་དེས་མགོན་མཛོད་ཅིག །ཨེ་མ་སྣ་ཚོགས་རྟོག་པའི་ཚོན་བརྒྱས་རྣམ་པར་བཀྲ་བའི་ཡིད་ཀྱི་རོལ་རྩེད་མཁན་གང་དེ། །རང་གི་སྤྲུལ་པའི་ངོ་མཚར་སྒྱུ་མའི་དེ་ཉིད་མ་ཤེས་རྣམ་རོལ་དེ་ལ་ཆེར་སྲེད་པས། །ཉིན་དང་ཉིན་ལ་རྣམ་པར་གཡེངས་ནས་རྟག་ཏུ་ནང་གི་དེ་ཉིད་སེམས་པའི་སྐབས་བྲལ་བ། །ཡང་ཡང་བསམས་ནས་རང་གི་སྙིང་ལ་བག་ཡོད་བྱ་ཕྱིར་བདུད་རྩིའི་སྒོ་བརྒྱ་རྣམ་པར་དབྱེ། །རིག་གནས་གཞན་ལ་བལྟ་བའི་བློ་མིག་གིས། །ངོ་མཚར་ཡིད་འོང་ལྟད་མོས་ཚིམ་བྱས་ནས། །རྒྱལ་བའི་ཐུགས་ལས་གཞན་དུ་མ་འཁྲུངས་པའི་དེ་ཉིད་ཚོལ་ལ་དེང་འདིར་གཞོལ་བར་བྱ། །གང་དག་དངོས་པོར་སྨྲ་བ་ཡིས། །རྣམ་བརྟགས་རྟོག་གེའི་རིགས་པ་ལ། །དམ་པོར་ཞེན་ནས་ཟླ་བའི་ལུགས། །ཐུན་མོང་མིན་པར་འཆད་ཟེར་བ། །དེ་ཡིས་དེ་དོན་མི་ཤེས་པར། །མཐོང་ནས་ལུང་དང་རིགས་པའི་གནས། །གཟུ་བོའི་བློ་ཡིས་འདིར་འཆད་ཀྱི། །ཆགས་དང་སྡང་བས་མ་ཡིན་ནོ། །ཞེས་མཆོད་པར་བརྗོད་ཅིང་རྩོམ་པར་དམ་བཅའ་བ་སྔོན་དུ་བཏང་ནས། འདིར་གང་བཤད་པར་བྱ་བའི་ཆོས་ནི། རང་རེའི་སྟོན་པ་ཐུགས་རྗེ་ཆེན་པོ་ཅན་དེའི་བསྟན་པའི་ཉིང་ཁུ། རྒྱལ་བ་གཉིས་པ་ཀླུ་སྒྲུབ་ཞབས་ཀྱིས་གང་དུ་བཀྲལ་བ་དེ་ཉིད་ཡིན་ནོ། །བྱེད་པ་པོ་གང་གིས་འཆད་ན། ཡིད་ཆེས་པའི་ལུང་དང༌། དཔྱད་པས་རྣམ་པར་དག་པའི་རིགས་པ་དང༌། གངས་ཅན་གྱི་ལྗོངས་སུ་སྔོན་བྱོན་པའི་སྐྱེས་ཆེན་དམ་པ་དག་གི་བཤད་སྲོལ་གྱིས་སོ། །གང་ལ་བརྟེན་ནས་འཆད་ན། བདག་ཉིད་ཆེན་པོ་ཡབ་སྲས་གཉིས་ཀྱི་གཞུང་དང༌། ཐལ་རང་དུ་གྲགས་པའི་འགྲེལ་པ་དྲི་མ་མེད་པ་དག་ལ་བརྟེན་ནས་སོ། །ཆེད་དུ་བྱ་བ་གང་གི་ཕྱིར་དུ་འཆད་ན། རང་ཉིད་ཟབ་མོའི་དེ་ཁོ་ན་ཉིད་འཚོལ་བ་ལ་སེམས་གཞོལ་བ་དང༌། གངས་ཅན་གྱི་ལྗོངས་སུ་ཕྱིས་བྱོན་པའི་ཆེན་པོར་གྲགས་པ་དག་གིས་དབུ་མ་ཐལ་འགྱུར་བའི་ཐུན་མོང་མ་ཡིན་པའི་ལུགས་སུ་སྒྲོ་བཏགས་པ་དེ་ཉིད་དེའི་ལུགས་མ་ཡིན་པར་བསྟན་པའི་ཕྱིར་དང༌། རང་དང་སྐལ་བ་མཉམ་པའི་ཕྱི་མའི་དུས་ཀྱི་སྐྱེ་བོ་འགའ་ཞིག་ལ་ཕན་པར་གྱུར་ཅིག་པའི་བསམ་པ་ཉེ་བར་བཞག་ནས་སོ། །དེ་ལྟར་བཤད་པའི་མཐར་ཐུག་གི་གྲུབ་དོན་ཤིང་རྟ་ཆེན་པོ་སུ་ཞིག་གི་ལུགས་དང་མཐུན་པར་གྲུབ་ན། མཚན་འཛིན་གྱི་འཁྲུལ་པ་གཏིང་ནས་ཞིག་པས་ཀླུ་སྒྲུབ་ཞབས་ཀྱི་དགོངས་པ་འགྲེལ་པ་ལ་དོ་ཟླ་མེད་པ་མཚན་བརྗོད་པར་དཀའ་བ་བསྙེངས་བྲལ་ཟླ་བ་གྲགས་པའི་ཞབས་ཀྱི་བཞེད་གཞུང་ཇི་ལྟ་བ་བཞིན་དུའོ། །དེ་ལྟ་བུའི་བརྗོད་བྱ་དང་དགོས་པ་དེ་ཡང་འཆད་པར་འགྱུར་བའི་བསྟན་བཅོས་འདི་ལ་གནས་སོ་ཞེས་རྣམ་དབྱེ་བདུན་གྱི་སྒོ་ནས་ཐོག་མར་བྱ་བ་དག་བརྗོད་ཟིན་ནས། དགོས་སོགས་དེ་དང་ལྡན་པའི་བསྟན་བཅོས་དེ་ཡང་དོན་རྣམ་པ་གསུམ་གྱིས་བཤད་པར་བྱ་སྟེ། རྗོད་བྱེད་གཞུང་གི་དབུ་མ་ཇི་ལྟར་གསུངས་པའི་ཚུལ། བརྗོད་བྱ་དོན་གྱི་དབུ་མ་རྒྱས་པར་གཏན་ལ་ཕབ། བརྗོད་བྲལ་གྱི་དབུ་མ་ཤེས་པའི་ཕན་ཡོན་བསྟན་པས་མཇུག་བསྡུ་བའོ། །དང་པོ་ལ། སྟོན་པས་ཆོས་ཀྱི་འཁོར་ལོ་རིམ་པ་གསུམ་ཇི་ལྟར་བསྐོར་བའི་ཚུལ། དེ་དག་ལ་མགོན་པོ་ཀླུ་སྒྲུབ་ཀྱིས་ངེས་པའི་དོན་དུ་བཀྲལ་བའི་དོན་ངོས་བཟུང༌། ཀླུ་སྒྲུབ་ཀྱི་དགོངས་པ་འགྲེལ་བའི་སྲོལ་འབྱེད་ཇི་ལྟར་བྱུང་ཚུལ་ལོ། །དང་པོ་ལ། མདོ་སྡེ་དགོངས་འགྲེལ་ལས་འབྱུང་བ་དང༌། འཕགས་པ་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་ལས་འབྱུང་བ་དང༌། འཕགས་པ་ཡབ་སྲས་ཀྱི་གཞུང་ལས་གསུངས་པ་རྣམས་སོ། །དང་པོ་ནི། སློབ་དཔོན་འཕགས་པ་ཐོགས་མེད་ཀྱིས་རྣམ་པར་གཏན་ལ་དབབ་པ་བསྡུ་བར་དགོངས་འགྲེལ་གྱི་དོན་དམ་རྣམ་པར་ངེས་པའི་ལེའུ་རྒྱས་པར་དྲངས་ནས་དྲངས་ངེས་ཀྱི་ཚུལ་རྒྱས་པར་གཏན་ལ་ཕབ་པ་དེ་ཉིད་ཡིན་ལ། དེ་ལ་ཡང༌། གཞན་གྱིས་བརྟགས་པའི་མཐའ་འགོག་པའི་ཚུལ་དང༌། རང་ལུགས་ཀྱི་འཐད་པ་ཇི་ལྟར་འཇོག་པའི་ཚུལ། རྒྱ་ཆེར་གཞན་དུ་བསྟན་ཟིན་པས་ཡང་འདིར་མི་སྤྲོའོ། །གཉིས་པ་ནི། ཇི་སྐད་དུ། ཐེག་པ་ཆེན་པོ་རྒྱུད་བླ་མར། མི་རྟག་སྡུག་བསྔལ་བདག་མེད་དང༌། །ཞི་བའི་སྒྲ་ཡི་ཐབས་མཁྱེན་པ། །སེམས་ཅན་སྲིད་གསུམ་སྐྱོ་བསྐྱེད་ནས། །མྱ་ངན་འདས་ལ་རབ་འཇུག་མཛད། །ཞི་བའི་ལམ་ལ་རབ་ཞུགས་པ། །མྱ་ངན་འདས་ཐོབ་འདུ་ཤེས་ཅན། །དམ་ཆོས་པདྨ་དཀར་ལ་སོགས། །ཆོས་ཀྱི་དེ་ཉིད་བསྟན་པ་ཡིས། །དེ་དག་སྔར་འཛིན་ལས་བཟློག་སྟེ། །ཐབས་དང་ཤེས་རབ་ཡོངས་གཟུང་བས། །ཐེག་པ་མཆོག་ལ་སྨིན་མཛད་དེ། །བྱང་ཆུབ་མཆོག་ཏུ་ལུང་སྟོན་ཏོ། །ཞེས་གསུངས་པ་དེས་མདོ་དེའི་དགོངས་པ་ཉེ་བར་བསྡུས་ཏེ་བཤད་པ་ཡིན་ལ། དེའི་དོན་ཡང་འཁོར་ལོ་དང་པོར་ཆོས་ཀྱི་སྡོམ་བཞི་དང༌། འཁོར་ལོ་གཉིས་པར་རྣམ་པར་ཐར་པའི་སྒོ་གསུམ་དང༌། འཁོར་ལོ་གསུམ་པར་བདེ་བར་གཤེགས་པའི་སྙིང་པོ་སྟོན་པར་གསུངས་ཤིང༌། འཁོར་ལོ་ཐ་མ་ཉིད་ངེས་དོན་གྱི་འཁོར་ལོ་ཡིན་པར་གསུངས་སོ། །མདོ་དེ་དང་བསྟན་བཅོས་དེའི་དགོངས་པ་ལྟར་ན། འཁོར་ལོ་བར་པར་ནི་སྤྲོས་པའི་མཐའ་ཐམས་ཅད་བཀག་ཙམ་གྱི་མེད་པར་དགག་པ་དེ་ཉིད་བསྟན་ལ། དེ་ཡང་གནས་སྐབས་ཀྱི་ངེས་དོན་ཡིན་ཞིང༌། འཁོར་ལོ་ཐ་མར་ནི་དེ་ལྟར་བཀག་པས་ཁྱད་པར་དུ་བྱས་པའི་སེམས་རང་བཞིན་གྱིས་འོད་གསལ་བ་དེ་ཉིད་བསྟན་བྱའི་གཙོ་བོ་ཡིན་ལ། དེ་ཉིད་ལ་ངེས་པའི་དོན་མཐར་ཐུག་པ་དང༌། དེ་བཞིན་གཤེགས་པའི་ཆོས་ཉིད་དང༌། བདེ་བར་གཤེགས་པའི་སྙིང་པོ་ཞེས་གསུངས་སོ། །གསུམ་པ་ནི། ཇི་སྐད་དུ། སློབ་དཔོན་འཕགས་པ་ལྷས། བསོད་ནམས་མིན་པ་དང་པོར་བཟློག །བར་དུ་བདག་ནི་བཟློག་པ་དང༌། །ཐ་མར་ལྟ་ཞིག་ཀུན་བཟློག་པ། །གང་གིས་ཤེས་དེ་མཁས་པ་ཡིན། །ཞེས་གསུངས་པ་དེ་ནི་མགོན་པོ་ཀླུ་སྒྲུབ་ཀྱིས་ཇི་ལྟར་བཞེད་པའི་འཁོར་ལོ་གསུམ་གྱི་རིམ་པ་བསྟན་པ་ཡིན་ཏེ། ཇི་སྐད་དུ། རིན་པོ་ཆེ་ཕྲེང་བ་ལས། བརྡ་སྤྲོད་པ་དག་ཇི་ལྟ་བུར། །ཡི་གེ་ཕྱི་མོ་ཀློག་འཇུག་ལྟར། །དེ་བཞིན་སངས་རྒྱས་སེམས་ཅན་ལ། །ཇི་ཙམ་བཟོད་པའི་ཆོས་སྟོན་ཏོ། །ཁ་ཅིག་ལ་ནི་སྡིག་པ་ལས། །རྣམ་པར་བཟློག་ཕྱིར་ཆོས་སྟོན་ཏོ། །ཁ་ཅིག་བསོད་ནམས་འགྲུབ་བྱའི་ཕྱིར། །ཁ་ཅིག་ལ་ནི་གཉིས་བརྟེན་པ། །ཁ་ཅིག་ལ་ནི་གཉིས་མི་བརྟེན། །ཟབ་མོ་འཁུ་འཕྲིགས་ཅན་འཇིགས་པ། །སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་གསུངས་པ་དང༌། དབུ་མའི་རྩ་བ་ལས། བདག་གོ་ཞེས་ཀྱང་བཏགས་གྱུར་ཅིང༌། །བདག་མེད་ཅེས་ཀྱང་བསྟན་པར་གྱུར། །སངས་རྒྱས་རྣམས་ཀྱིས་བདག་དང་ནི། །བདག་མེད་འགའ་མེད་ཅེས་ཀྱང་བསྟན། །ཞེས་དང༌། ཡང་དེ་ཉིད་ལས། ཐམས་ཅད་ཡང་དག་ཡང་དག་མིན། །ཡང་དག་ཡང་དག་མ་ཡིན་ཉིད། །ཡང་དག་མིན་མིན་ཡང་དག་མིན། །དེ་ནི་སངས་རྒྱས་རྗེས་བསྟན་པའོ། །ཞེས་གསུངས་པ་དང༌། དེའི་སྔ་འགྲེལ་དུ་ཟླ་བའི་ཞབས་ཀྱིས། འདིར་སངས་རྒྱས་བཅོམ་ལྡན་འདས་རྣམས་ཀྱི་དེ་ཁོ་ན་ཉིད་ཀྱི་བདུད་རྩི་ལ་འཇུག་པའི་བསྟན་པའི་རིམ་པ་ནི། འདི་ཡིན་པར་ཤེས་པར་བྱ་སྟེ། ཞེས་གསུངས་པས་སོ། །དེ་ལྟར་བཤད་པ་རྣམས་ཀྱི་གྲུབ་པའི་དོན་ནི་སྤྲོས་པའི་མཐའ་ཐམས་ཅད་བཀག་པའི་མེད་པར་དགག་པ་དེ་ཉིད་ངེས་པའི་དོན་མཐར་ཐུག་པ་དང༌། འཁོར་ལོ་ཐ་མའི་བསྟན་བྱའི་གཙོ་བོ་ཡིན་ནོ། །ཞེས་བྱ་བ་འདི་ངེས་པ་ཡིན་ནོ། །དེ་ལ་འདི་སྙམ་དུ། འཁོར་ལོ་གསུམ་གྱི་རྣམ་པར་བཞག་པ་བཤད་མ་ཐག་པ་དེ་ནི་དགོངས་འགྲེལ་ལས་འབྱུང་བ་དང་མི་མཐུན་པས་ཆོས་འཁོར་གསུམ་གྱི་རྣམ་གཞག་འཆད་པ་མ་ཡིན་གྱི། སྤྱིར་རྒྱལ་བས་ཆོས་སྟོན་པའི་རིམ་པ་གསུམ་བྱུང་བ་དེ་བཤད་པ་ཡིན་ནོ། །སྙམ་དུ་སེམས་པ་དེ་ནི་ཡང་དག་པ་མ་ཡིན་ཏེ། རྒྱལ་བས་ཆོས་སྟོན་ཚུལ་གྱི་ཐེམ་སྐས་མི་འདྲ་བ་གསུམ་བྱུང་བ་དེ་ཉིད་ལ་འཁོར་ལོ་གསུམ་གྱི་ཐ་སྙད་འདོགས་པ་མ་ཡིན་ན། འཁོར་ལོ་གསུམ་གྱི་འཇོག་མཚམས་མི་རྙེད་པའི་ཕྱིར་དང༌། དགོངས་འགྲེལ་ལས་འབྱུང་བ་དང༌། མི་མཐུན་པ་ཙམ་གྱིས་རྣམ་གཞག་དེ་འཇོག་པར་ནུས་པ་མ་ཡིན་ན། དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོ་ལས། ཁམས་ཀྱི་དྲི་མ་སྦྱོང་ཚུལ་གསུམ་གསུངས་པ་དེས་ཀྱང༌། འཁོར་ལོ་གསུམ་གྱི་རྣམ་གཞག་མ་བསྟན་པར་ཐལ་བའི་ཕྱིར་དང༌། དེ་ཡང༌། དེ་ལྟ་ན། རྒྱུད་བླ་མར། མཆོག་གི་སྤྲུལ་པའི་སྐུས་ཆོས་ཀྱི་འཁོར་ལོ་ཇི་ལྟར་བསྐོར་བའི་ཚུལ་འཆད་པ་ན། འཇིག་རྟེན་ཞི་བའི་ལམ་ལ་འཇུག་པ་དང༌། རབ་ཏུ་སྨིན་དང་ལུང་སྟོན། ཞེས་གསུངས་པ་དེས་དོན་ཅི་ཞིག་བསྟན་པ་ཡིན། ཁྱེད་ཀྱིས་སྨྲ་དགོས་པའི་ཕྱིར་རོ། །དགོངས་འགྲེལ་ལས་གསུངས་པ་ཁོ་ན་དང༌། མཐུན་པར་དེའི་རྣམ་གཞག་འཆད་དགོས་ན། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ་ངེས་དོན་མཐར་ཐུག་མ་གསུངས་པར་ཐལ་བ་དང༌། བདེན་བཞིའི་ཆོས་འཁོར་གྱི་ནང་ན་ངེས་དོན་མཐར་ཐུག་མེད་པར་ཐལ་བ་དང༌། སྟོན་པས་སྐུ་ཚེའི་སྟོད་ལ་ཐེག་པ་ཆེན་པོའི་ཆོས་མ་གསུངས་པར་ཐལ་བ་རྣམས་འཇུག་ལ། དེ་ཡང་འདོད་ན་ནི། ཟླ་བའི་ཞབས་ཀྱིས་ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པའི་ཤེས་བྱེད་དུ་ལུང་དྲངས་པ་རྣམས་དང་འགལ་བར་ངེས་སོ། །དེའི་འཐད་པ་ཡང༌། བདེན་པ་བཞིའི་ཆོས་འཁོར་བསྐོར་བ་ན། རྒྱུན་དུ་ཞུགས་པ་ནས་དགྲ་བཅོམ་པའི་བར་མངོན་དུ་བྱས་པ་གྲངས་མེད་པ་ཞིག་ཡོད་པར་གསུངས་པ་དང༌། ཁྱད་པར་ཀུན་ཤེས་ཀཽ་ཌི་ནྱ་ལ་བདེན་བཞི་ལན་གསུམ་དུ་བཟླས་པས་མཐོང་ལམ་སྐྱེས་པར་བཤད་པ་དེར་ཆོས་ཀྱི་བདག་མེད་བསྟན་པ་མེད་ན། ཟླ་བ་གྲགས་པའི་ལུགས་ཁོ་ནས་ཀླུ་སྒྲུབ་ཞབས་ཀྱི་དགོངས་པ་འཆད་ནུས་པ་ཡིན་ནོ། །ཞེས་ཟེར་བ་དེ་ཡང་ཚིག་ཙམ་དུ་ཟད་པ་ཡིན་པས། དེ་བས་ན་འཁོར་ལོ་གསུམ་གྱི་རྣམ་པར་བཞག་པ་བྱེད་པ་དེ་ནི་སྟོན་པའི་སྐུ་ཚེ་སྟོད་སྨད་དང༌། འཁོར་ཉན་ཐོས་དང་བྱང་ཆུབ་སེམས་དཔའ་མང་ཉུང་གི་བྱེ་བྲག་དང༌། གནས་ཝ་ར་ཎ་སི་དང༌། བྱ་རྒོད་སྤུངས་པ་ལ་སོགས་པར་བསྐོར་བའི་བྱེ་བྲག་གིས་འབྱེད་པ་མ་ཡིན་གྱིས། གདུལ་བྱ་བློ་མཆོག་ཏུ་གྱུར་པ་མ་ཡིན་པ་རྣམས། དེ་ཁོ་ན་ཉིད་ཀྱི་བདུད་རྩི་ལ་རིམ་གྱིས་དྲང་བའི་རིམ་པ་མི་འདྲ་བ་གསུམ་ཡོད་པ་དེ་ལ་འཁོར་ལོ་གསུམ་གྱི་རྣམ་གཞག་མཛད་པ་འདི་ནི་འཕགས་པ་ཡབ་སྲས་ཀྱི་དགོངས་པ་མཐར་ཐུག་པར་གདོན་མི་ཟ་བ་ཡིན་ནོ། །དེ་ལ་གཞན་དག་ན་རེ། དེ་ལྟ་ན་ཤེར་ཕྱིན་གྱི་མདོ་འཁོར་ལོ་ཐ་མར་འགྱུར་ལ། དེ་ཡང་དེ་ལྟ་ན། ཡུམ་རྒྱས་པ་ལས། དེའི་ཚེ་ལྷའི་བུ་དུ་མས་ནམ་མཁའ་ལ་སྒྲ་ཕྱུང་སྟེ། ཀྱེ་མ་འཛམ་བུའི་གླིང་དུ་ཆོས་ཀྱི་འཁོར་ལོ་གཉིས་པ་བསྐོར་བ་མཐོང་ངོ༌། །ཞེས་སྒྲ་བསྒྲགས་པར་བཤད་པ་དང་འགལ་ལོ། །ཞེས་ཟེར་བ་དེས་ཀྱང་དོན་འདི་ལ་གནོད་པ་མ་ཡིན་ཏེ། ཤེར་མདོ་འཁོར་ལོ་བར་པར་འཆད་པ་མདོ་དགོངས་འགྲེལ་དང༌། སྙིང་རྗེ་ཆེན་པོ་བསྟན་པའི་མདོའི་དགོངས་པ་དང་མཐུན་པ་ཡིན་མོད། དེ་དང་ལུགས་འདི་སོ་སོ་བ་ཡིན་པའི་ཕྱིར་དང༌། ལུགས་འདི་འཆད་པ་ན་ཡང༌། དྲངས་མ་ཐག་པའི་ལུང་དེ་ནི་སྐབས་གསུམ་པར་གཞི་ཤེས་འཆད་པའི་མདོ་ཡིན་ལ། དེའི་དོན་ཡང་སྐབས་དང་པོར་མི་ཡི་གདུལ་བྱ་རྣམས་ལ་རྣམ་མཁྱེན་གྱི་དབང་དུ་བྱས་པའི་ཆོས་ཀྱི་འཁོར་ལོ་དང་པོར་བསྐོར་བའི་རྗེས་སུ། སྐབས་གཉིས་པར་གཙོ་བོར་ལྷའི་གདུལ་བྱ་གསར་དུ་ལྷགས་པ་རྣམས་ལ་ལམ་ཤེས་པ་ཉིད་ཀྱི་དབང་དུ་བྱས་པའི་ཆོས་ཀྱི་འཁོར་ལོ་བསྐོར་བ་མཐོང་ངོ་ཞེས་བྱ་བའི་དོན་ཡིན་ལ། དེའི་དུས་ཀྱི་ལྷའི་བུ་དེ་དག་ནི། གཞི་ཤེས་ཀྱི་མཐོང་ལམ་འཆད་པའི་དུས་སུ་སླེབ་པའི་གདུལ་བྱ་ཡིན་པས་མདོའི་དགོངས་པ་དེ་ལྟར་འཆད་ནུས་པའི་ཕྱིར་རོ། །གཉིས་པ་ལ་ངེས་དོན་མཐར་ཐུག་ངོས་བཟུང༌། དེ་འཁོར་ལོ་གང་གི་ནང་ནས་འབྱུང་བའི་ཚུལ། འཕགས་པ་ཡབ་སྲས་ཀྱི་བཞེད་པའི་དྲངས་ངེས་ཀྱི་རྣམ་གཞག་བཤད་པའོ། །དང་པོ་ནི། ཇི་སྐད་དུ། གཞན་ལས་ཤེས་མིན་ཞི་བ་དང༌། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མིན། །དེ་ནི་དེ་ཉིད་མཚན་ཉིད་དོ། །ཞེས་དང༌། བརྗོད་པར་བྱ་བ་བཟློག་པ་སྟེ། །སེམས་ཀྱི་སྤྱོད་ཡུལ་བཟློག་པས་སོ། །ཞེས་དང༌། བསྟན་པ་འཆི་མེད་ཡོད་མེད་ལས། །འདས་པ་ཟབ་མོ་ཞེས་བཤད་པ། །ཆོས་ཀྱི་ཁུད་པ་ཡིན་ཞེས་བྱ། །ཞེས་དང༌། རྒྱལ་བ་རྣམས་ཀྱི་སྟོང་པ་ཉིད། །ལྟ་ཀུན་ངེས་པར་འབྱིན་པར་གསུངས། །ཞེས་སོགས་རྒྱ་ཆེར་གསུངས་པའི་དོན་རྣམས་ལ་རྣམ་པར་བརྟགས་པ་ན། རྗོད་བྱེད་ཀྱི་སྒྲ་དང་རྣམ་པར་རྟོག་པའི་ཡུལ་ལས་འདས་ཤིང་ཡོད་མེད་དང༌། ཡིན་མིན་ལ་སོགས་པའི་མཐའ་གང་དུ་ཡང་བསམ་པ་དང་བརྗོད་པར་མི་ནུས་ལ། རྒྱལ་བས་ཀྱང་ཐ་སྙད་ཀྱི་སྒོ་ནས་སྒྲོ་བཏགས་ནས་སྟོན་པ་མ་གཏོགས་རང་གི་ངོ་བོ་ཇི་ལྟ་བ་བཞིན་དུ་བསྟན་པར་མི་ནུས་པའི་དབྱིངས་ནམ་མཁའ་ལྟ་བུ་ཞིག་ལ་ངེས་པའི་དོན་དང་དོན་དམ་པའི་བདེན་པ་དང༌། དེ་ཁོ་ན་ཉིད་ཅེས་བྱ་བའི་མིང་གིས་བཏགས་ནས་བསྟན་པ་ཡིན་ནོ། །འདི་ཡང་ཡུལ་གྱི་དབང་དུ་བྱས་པ་ཡིན་ལ། ཡུལ་ཅན་གྱི་དབང་དུ་བྱས་ན་དབྱིངས་དེ་དང་ངོ་བོ་ཐ་དད་པ་ལྟ་བཞོག ལྡོག་པའི་ཁྱད་པར་ཙམ་ཡང་ཀུན་མཁྱེན་གྱིས་མ་གཟིགས་པའི་ཡེ་ཤེས་དེ་ཉིད་ཀྱང་ངེས་པའི་དོན་དུ་འཆད་དགོས་པ་ཡིན་ཏེ། ཟླ་བའི་ཞབས་ཀྱིས་དོན་དམ་བདེན་པ་འཇོག་པའི་དུས་ཀྱི་དོན་དམ་པ་གང་ཡིན་པ་དེ་ཉིད་དོན་དམ་པའི་བདེན་པར་བཤད་པ་བཞིན་ནོ། །འདིའི་ལུང་དང་རིགས་པ་ཡང་འོག་ནས་འཆད་པར་འགྱུར་རོ། །གནས་འདི་ལ་གངས་ཅན་དུ་ཕྱིས་བྱོན་པའི་ཆེན་པོ་དག་ན་རེ། དོན་དམ་བདེན་པའི་མཚན་གཞི་ངོས་གཟུང་བར་མི་ནུས་པ་དང༌། དེ་སྨྲ་བསམ་བརྗོད་མེད་དུ་ཁས་ལེན་པ་དང༌། ཆོས་ཀྱི་དབྱིངས་ཡོད་མེད་ལ་སོགས་པའི་མཐའ་གང་དུ་ཡང་ཁས་མིན་ལེན་ཞིང༌། བསམ་བྱུང་གི་རིགས་པས་ཀྱང་དེ་དང་དེ་དག་ཏུ་ཡིད་ལ་མི་བྱེད་པར་འདོད་པ་དེ་དག་ནི། སྔོན་གངས་ཅན་དུ་ལོག་པའི་ཆོས་དུ་མ་བྱུང་བ་དག་ལས། ཧྭ་ཤང་གིས་བཤད་པའི་ཆོས་དཀར་པོ་ཆིག་ཐུབ་དང༌། གཞན་ཡང་ཞི་བྱེད་དང༌། རྫོགས་ཆེན་དང༌། ཕྱག་རྒྱ་པར་གྲགས་པ་དག་གི་ལུགས་བླ་ན་མེད་པ་ཡིན་པས་དབུ་མའི་ལྟ་བ་རྟོགས་པའི་གོལ་ས་ཆེན་པོ་ཡིན་ནོ། །དེའི་ཕྱིར་གནས་ལུགས་ཀྱི་དོན་མཐར་ཐུག་སེམས་པ་ལ་ཞུགས་པ་དེའི་ཚེ་ན། མྱུ་གུ་བདེན་སྟོང་ལྟ་བུ་དོན་དམ་པའི་མཚན་གཞི་དང༌། མྱུ་གུ་ལྟ་བུ་ཡང་བདེན་པས་སྟོང་པར་ཁས་ལེན་གྱི། དེ་དེས་སྟོང་པ་ཡིན་ནོ་ཞེས་བརྗོད་དུ་མི་རུང་བ་དང༌། བདེན་སྟོང་དེ་ཡང་ཡོད་པར་ཁས་ལེན་གྱི། དེ་ཡོད་པ་མ་ཡིན་ནོ། །ཞེས་བརྗོད་དུ་རུང་བ་མ་ཡིན་ཏེ། རྩོད་བཟློག་ལས། རང་བཞིན་མེད་པ་ཉིད་ལོག་ན། །རང་བཞིན་ཉིད་དུ་གྲུབ་པར་འགྱུར། །ཞེས་བཤད་པས་སོ། །ཞེས་གསུང་ངོ༌། །དེ་ལྟར་འཆད་པ་དེ་དག་ནི། ཀླུ་སྒྲུབ་ཡབ་སྲས་ཀྱི་བཞེད་པ་ལ། རྒྱལ་བས་ཆོས་སྟོན་ཚུལ་གྱི་རིམ་པ་གསུམ་འབྱུང་བ་དེའི་ནང་ནས། བར་དུ་བདག་བཟློག་པའི་ལུང་དང་རིགས་པ་གསུངས་པ་རྣམས་ཀྱི་དོན་དང་ཅུང་ཟད་ཉེ་བ་ཡིན་མོད། ཐ་མར་ལྟ་བ་ཀུན་བཟློག་པ་ཞེས་བྱ་བའི་ལུང་དང་རིགས་པ་རྣམས་ལས་ཆེས་ཤིན་ཏུ་རྒྱབ་ཀྱིས་ཕྱོགས་པར་གྱུར་པ་ཡིན་པས། དབུ་མའི་ལྟ་བ་རྒྱུད་ལ་སྐྱེ་བ་ལྟ་ཞོག གོ་ཡུལ་དུ་འཆར་བ་ཙམ་གྱིའང་གོལ་ས་བླ་ན་མེད་པ་ཡིན་ཏེ། ཇི་སྐད་དུ་ཡུམ་ལས། གཟུགས་སྟོང་ཞེས་བྱ་བར་སྤྱོད་ན་མཚན་མ་ལ་སྤྱོད་དོ། །མི་སྟོང་ཞེས་བྱ་བར་སྤྱོད་ན་མཚན་མ་ལ་སྤྱོད་དོ། །ཞེས་དང༌། སྡུད་པ་ལས། ཕུང་འདི་སྟོང་ཞེས་རྟོག་ནའང་བྱང་ཆུབ་སེམས་དཔའ་ནི། །མཚན་མ་ལ་སྤྱོད་སྐྱེ་མེད་གནས་ལ་དད་མ་ཡིན། །ཞེས་དང༌། ཟླ་བའི་ཞབས་ཀྱིས་ཚིག་གསལ་དུ་མདོ་དྲངས་པ་ལས། འོད་སྲུངས་གང་དག་བདག་ཏུ་ལྟ་བ་རི་རབ་ཙམ་ལ་གནས་པ་ནི་བླའི། སྟོང་པ་ཉིད་དུ་ལྟ་བ་ནི་དེ་ལྟ་མ་ཡིན་ནོ། །ཞེས་དང༌། འཕགས་པ་ཉིད་ཀྱིས། གང་དག་སྟོང་པ་ཉིད་ལྟ་བ། །དེ་དག་སྒྲུབ་ཏུ་མེད་པར་གསུངས། །ཞེས་དང༌། བླུན་པོ་མཁས་པའི་ང་རྒྱལ་ཅན། །སྟོང་ལ་མངོན་པར་ཞེན་མི་བྱ། །ཞེས་དང༌། བརྒྱ་པ་ལས། ཡོད་དང་མེད་དང་ཡོད་མེད་དང༌། །གཉིས་མིན་ཞེས་ཀྱང་བྱ་བ་སྟེ། །ནད་ཀྱི་དབང་གིས་ཐམས་ཅད་ཀྱང༌། །སྨན་ཞེས་བྱ་བར་འགྱུར་མིན་ནམ། །ཞེས་སོགས་རྒྱ་ཆེར་གསུངས་པ་རྣམས་ལས་ཕྱིན་ཅི་ལོག་ཏུ་གྱུར་པའི་ཕྱིར་རོ། །དེ་ལ་འདི་སྐད་ཅེས། གང་ལ་བདག་མེད་དོ་སྙམ་པའི་འཛིན་སྟངས་ཀྱི་ཤུགས་དྲག་པོ་མེད་པ་དེས་ནི། བདག་ཏུ་འཛིན་པའི་བློ་ལ་གནོད་པ་བྱེད་ནུས་པ་མ་ཡིན་ཏེ། དེ་དང་འཛིན་སྟངས་འགལ་བ་མེད་པའི་ཕྱིར་རོ། །གཞན་དུ་ན། གཉིད་འཐུག་པོ་དང་འདུ་ཤེས་མེད་པའི་སྙོམ་འཇུག་གིས་ཀྱང་དེ་ལ་གནོད་པ་ཧ་ཅང་ཐལ་ལོ། །དེ་བས་ན་མཉམ་གཞག་ཏུ་གང་ཟག་གི་བདག་དང་ཆོས་ཀྱི་བདག་གིས་སྟོང་ངོ༌། །ཞེས་པའི་རྣམ་པ་ཅན་གྱི་འཛིན་སྟངས་ཀྱི་ཤུགས་དང་མ་བྲལ་བ་བྱ་དགོས་ཏེ། རྗེ་བཙུན་གྱིས། ཇི་སྐད་དུ། ངེས་འབྱེད་ཡན་ལག་དང་མཐོང་བའི། །ལམ་དང་བསྒོམ་པའི་ལམ་ཉིད་ལ། །ཡང་དང་ཡང་དུ་སེམས་པ་དང༌། །འཇལ་དང་ངེས་རྟོག་སྒོམ་པའི་ལམ། །ཞེས་གསུངས་པ་ལས་གསལ་བ་ཡིན་ནོ། །ཞེས་འཆད་དོ། །དེ་ཡང་རིགས་པ་མ་ཡིན་ཏེ། ཇི་ལྟར། མགོན་པོ་ཀླུ་སྒྲུབ་རྗེས་འབྲང་དང་བཅས་པའི་གཞུང་ལས། བདེན་འཛིན་གྱི་སྤྲོས་པ་གཅོད་པའི་རིགས་པ་དང་བདེན་མེད་ཀྱི་སྤྲོས་པ་གཅོད་པའི་རིགས་པ་གཉིས་གསུང་པ་དང༌། རྗེ་བཙུན་བྱམས་པའི་གཞུང་ལས། རྫས་འཛིན་རྟོག་པའི་གཉེན་པོ་སྒོམ་པའི་རིམ་པ་དང༌། བཏགས་འཛིན་རྟོག་པའི་གཉེན་པོ་སྒོམ་པའི་རིམ་པ་གཉིས་གསུངས་པ་ལས། ཁྱེད་ཀྱི་འདོད་པ་དེ་རིམ་པ་དང་པོ་དེ་དང་དེའི་ནང་དུ་ཆུད་པ་ཙམ་ཡིན་ཀྱང༌། རིམ་པ་གཉིས་པ་དེ་དང་དེ་ལ་སྐུར་པ་བཏབ་པའི་རྒྱུ་མཚན་གྱིས་ལྟ་བའི་གནད་འཆུགས་པ་ཡིན་པས་སོ། །དེ་ཡང་ཇི་ལྟར་ཞེ་ན། ཇི་སྐད་དུ། སྤྱོད་འཇུག་ལས། སྟོང་ཉིད་བག་ཆགས་གོམས་པ་ཡིས། །དངོས་པོའི་བག་ཆགས་བཟློག་པར་འགྱུར། །ཞེས་པའི་གཞུང་གིས་བསྟན་པའི་དོན་ལ། ཁྱེད་ཀྱི་འདོད་པ་དེ་ཅུང་ཟད་ཉེ་བར་མཁོ་ཡང༌། ཅི་ཡང་མེད་ཅེས་གོམས་པ་ལས། །དེ་ཡང་ཕྱིས་ནས་སྤོང་བར་འགྱུར། །ཞེས་པའི་གཞུང་གི་དོན་ལ། ཁྱེད་འཆད་པའི་རིགས་པ་དེ་དག་གིས་སྐུར་པ་བཏབ་པའི་ཕྱིར་དང༌། དབུ་མའི་རྩ་བ་ལས། སྟོང་ངོ་ཞེས་ཀྱང་མི་བྱ་ཞིང༌། །མི་སྟོང་ཞེས་ཀྱང་མི་བྱ་ལ། །གཉིས་དང་གཉིས་མིན་མི་བྱ་སྟེ། །ཞེས་པ་ངེས་དོན་མཐར་ཐུག་གི་དབང་དུ་བྱས་པ་དང་ཐ་སྙད་ཀྱིས་སྟོན་པའི་ཚེ་ཇི་ལྟར་བྱ་སྙམ་པ་ལ། དེ་ཉིད་ལས། གདགས་པའི་དོན་དུ་བརྗོད་པར་བྱ། །ཞེས་གསུངས་པ་དེའི་དོན་ཟླ་བའི་ཞབས་ཀྱི་འགྲེལ་པ་ན། སྟོང་ངོ་ཞེས་ཀྱང་བརྗོད་བྱ་ལ། །མི་སྟོང་ཞེས་ཀྱང་བརྗོད་བྱ་སྟེ། །གཉིས་དང་གཉིས་མིན་བརྗོད་པར་བྱ། །ཞེས་བྱ་བའི་དོན་དུ་བཤད་པ་རྣམས་ཀྱིས། ཁྱེད་ཅག་གི་འདོད་པ་དེ་སུན་དབྱུང་བའི་ཕྱིར། བྱམས་པའི་གཞུང་གི་དོན་ཡང་ཁྱེད་ཀྱིས་ལེགས་པར་མ་བཤད་དེ། ཁྱེད་ཀྱིས་དབུ་མའི་ལྟ་བར་བཤད་པ་དེ་ནི་རྗེ་བཙུན་གྱི་བཞེད་པའི་བཏགས་འཛིན་རྟོག་པ་དེ་ཉིད་ལས་མ་འདས་པའི་ཕྱིར་དང་དེའི་གོ་དོན་ཡང་བཏགས་པ་ཙམ་དུ་བདེན་པར་འཛིན་པ་ལ་འཆད་ན། རྫས་འཛིན་རྟོག་པ་དང་ཁྱད་པར་མི་ཕྱེད་པའི་ཕྱིར་དང༌། ཇི་སྐད་དུ། མ་མཐོང་སྟོན་པར་མཛད་པ་དང༌། །ཞེས་སོ་སོར་རྟོག་པའི་ཤེས་རབ་ཀྱིས་ཅིར་ཡང་མ་མཐོང་བ་ལ། དེ་ཁོ་ནའི་དོན་མཐོང་བར་མིང་བཏགས་པ་ཡིན་གྱི། སྟོང་ངོ་སྙམ་དུ་མཐོང་དགོས་པར་མ་བཤད་པའི་ཕྱིར་དང༌། ངེས་འབྱེད་ཡན་ལག་ཅེས་སོགས་ཀྱི་དོན་ཡང་སྐབས་དེ་དང་དེར་སྤྲོས་པའི་མཐའ་གང་དུ་ཡང་མ་གཟིགས་པ་དེ་ཉིད་ལ་སེམས་པ་དང་འཇལ་བ་ལ་སོགས་པའི་དོན་ཡིན་གྱི། སྦྱོར་ལམ་དུ་གཟུགས་སོགས་བདེན་པས་སྟོང་པར་ཞེན་པའི་འཛིན་སྟངས་ཀྱི་རྒྱུན་ཡོད་པ་དེ་ཉིད་ལ། མཐོང་སྒོམ་ལམ་གྱིས་མཉམ་པར་འཇོག་དགོས་པར་སྟོན་པ་མ་ཡིན་ཏེ། ཇི་སྐད་དུ། རྣམ་པ་མངོན་ཞེན་ལ་སོགས་འགོག །ཅེས་སྐབས་དེར་ཡང་བདེན་སྟོང་དུ་ཞེན་པ་འགོག་དགོས་པར་གསུངས་པའི་ཕྱིར་རོ། །འོ་ན་བདེན་མེད་དུ་འཛིན་པའི་སྤྲོས་པ་གང་གིས་གཅོད་ཅེ་ན། ཇི་སྐད་དུ། རྩ་བ་ལས། གལ་ཏེ་སྟོང་མིན་ཅུང་ཟད་ཡོད། །སྟོང་པ་ཅུང་ཟད་ཡོད་པར་འགྱུར། །མི་སྟོང་ཅུང་ཟད་ཡོད་མིན་ན། །སྟོང་པ་ཡོད་པར་ག་ལ་འགྱུར། །ཞེས་དང༌། ཡེ་ཤེས་སྙིང་པོས། དགག་བྱ་ཡོད་པ་མ་ཡིན་པས། །ཡང་དག་ཏུ་ན་བཀག་མེད་གསལ། །ཞེས་དང༌། སྐྱེ་བ་ལ་སོགས་བཀག་པ་ཡང༌། །དམ་པའི་དོན་དང་མཐུན་ཕྱིར་འདོད། །དེ་བས་འདི་ནི་ཀུན་རྫོབ་སྟེ། །ཞེས་དང༌། རྒྱན་ལས། ཡང་དག་ཏུ་ན་སྤྲོས་པ་ཡི། །ཚོགས་རྣམས་ཀུན་ལས་དེ་གྲོལ་ཡིན། །ཞེས་སོགས་གསུངས་པའི་རིགས་པ་ལས་སོ། །དེ་ལ་ཡང་འདི་སྐད་ཅེས། སྐྱེ་སོགས་བཀག་པས་ཁྱད་པར་དུ་བྱས་པའི་མ་ཡིན་པར་དགག་པ་དེ་ཉིད་ཀུན་རྫོབ་བདེན་པར་སྟོན་པ་ཡིན་གྱི། སྐྱེ་སོགས་བདེན་གྲུབ་བཀག་པའི་མེད་དགག་དེ་དེར་སྟོན་པ་མ་ཡིན་ནོ། །ཞེས་ཟེར་རོ། །དེ་ཡང་མ་ཡིན་ཏེ། གཞུང་གི་འཕྲོས་དང་མི་མཐུན་པའི་ཕྱིར། ཇི་ལྟར་ཞེ་ན། གཞུང་དེའི་གོང་དུ། གྲུབ་མཐས་སྒྲོ་མ་བཏགས་པའི་སྐྱེ་བ་ཙམ་ཡང་དག་ཀུན་རྫོབ་དང༌། དེས་སྒྲོ་བཏགས་པའི་སྐྱེ་བ་ལ་སོགས་པ་ལོག་པའི་ཀུན་རྫོབ་ཏུ་བཤད་པ་ལ་འཕྲོས་ནས་དེ་བཀག་པའི་མེད་པར་དགག་པ་དེ་ཡང་ཡང་དག་པ་མ་ཡིན་པའི་ཀུན་རྫོབ་ཏུ་འགྱུར་རོ་སྙམ་པ་ལ། དགག་བྱ་བཀག་ཙམ་གྱི་ཆ་ནས་དོན་དམ་པ་དང་མཐུན་པ་དང༌། རིགས་པས་དཔྱད་མི་བཟོད་པའི་ཆ་ནས་ཀུན་རྫོབ་ཡིན་ཞེས་བྱ་བའི་དོན་དུ་གསལ་བར་བཤད་པའི་ཕྱིར་དང༌། སྐྱེ་བ་བདེན་གྲུབ་བཀག་པས་ཁྱད་པར་དུ་བྱས་པའི་མྱུ་གུ་ལྟ་བུ་དེ། མཐུན་པའི་དོན་དམ་ཡིན་ཞེས་ཟེར་བ་ཡེ་ཤེས་སྙིང་པོའི་རྨི་ལམ་དུ་ཡང་མི་རྨི་བའི་ཕྱིར་དང༌། ཁྱེད་ལྟར་ན། ཇི་སྐད་དུ། ཡང་དག་ཏུ་ན་བཀག་མེད་གསལ། །ཞེས་པའི་སྐབས་ཀྱི་བཀག་པ་དེ་མྱུ་གུ་ལྟ་བུ་མ་ཡིན་དགག་ཞིག་ལ་འཆད་དགོས་ལ། མེད་པར་གསལ་ཞེས་པའི་དོན་ཡང༌། བདེན་པར་མེད་ཅེས་པ་ལ་འཆད་དགོས་པས། དེ་ལྟ་ན། དགག་བྱ་ཡོད་པ་མ་ཡིན་པས། །ཞེས་སོགས་ཀྱི་གཞུང་གི་དོན་བདེན་གྲུབ་བཀག་པས་ཁྱད་པར་དུ་བྱས་པའི་མྱུ་གུ་བདེན་པར་མེད་དེ། དགག་བྱ་བདེན་གྲུབ་བདེན་པར་ཡོད་པ་མ་ཡིན་པའི་ཕྱིར། ཞེས་འཆད་དགོས་པས། བློ་དང་ལྡན་པ་སུ་ཞིག་ཡིད་ཆེས་པར་འགྱུར། གལ་ཏེ་འོ་ན། བདེན་མེད་དུ་འཛིན་པ་དང༌། སྤྲོས་བྲལ་དུ་འཛིན་པའི་མཚན་མ་ཡང་གཅོད་པ་དེའི་ཚེ། དོན་དམ་བདེན་པའི་མཚན་གཞི་ངོས་གཟུང་བར་མི་ནུས་པ་དང༌། གང་དོན་དམ་པའི་བདེན་པ་ཡིན་ན། བརྗོད་པ་ཐམས་ཅད་དང་བྲལ་དགོས་པ་དང༌། ཡོད་མེད་ལ་སོགས་པའི་མཐའ་གང་རུང་མ་ཡིན་དགོས་པ་འདི་ལ། ཡིད་ཆེས་པའི་ལུང་མེད་ན་སུ་ཞིག་མགུ་བར་འགྱུར་ཏེ། དོན་དེ་ཤིན་ཏུ་ལྐོག་ཏུ་གྱུར་པའི་ཕྱིར་སྙམ་ན། བཤད་པ། ཇི་སྐད་དུ། དབུ་མའི་རྩ་བ་ལས། དམིགས་པ་ཐམས་ཅད་ཉེར་ཞི་ཞིང༌། །སྤྲོས་པ་ཉེར་ཞི་ཞི་བ་སྟེ། །སངས་རྒྱས་རྣམས་ཀྱིས་གང་དུ་ཡང༌། །སུ་ལའང་ཆོས་འགའ་མ་བསྟན་ནོ། །ཞེས་དང༌། ཡེ་ཤེས་སྙིང་པོས། འཇམ་དཔལ་གྱིས་ནི་ཡང་དག་དྲིས། །རྒྱལ་བའི་སྲས་པོ་མི་གསུང་བཞུགས། །ཞེས་དང༌། ཟླ་བའི་ཞབས་ཀྱི་ཚིག་གསལ་དུ། འཕགས་པ་རྣམས་ཀྱི་དོན་དམ་པ་ནི་ཅི་ཡང་མི་གསུངས་པ་ཡིན་ནོ། །ཞེས་གསུངས་པ་རྣམས་ཀྱི་དོན་ལ་རྣམ་པར་བརྟགས་པས་ཡིད་ཆེས་པར་འགྱུར་རོ། །ཅི་སྟེ་དེ་དག་སྟོང་པ་ཉིད་ལ་མཉམ་པར་བཞག་པའི་ཤེས་ངོ་ལ་དགོངས་པ་ཡིན་ནོ། །ཞེས་ཟེར་མོད། དེའི་ཚེ་ཁོ་བོ་ཅག་གི་འདོད་པ་གྲུབ་ལ། ཁྱེད་ཅག་གི་གང་མི་འདོད་པ་དེ་ཉིད་ལག་ཏུ་ཐོབ་པར་འགྱུར་ཏེ། ཅི་ཡང་ཡིད་ལ་མི་སེམས་པ་ཞེས་བྱ་བ། ཧྭ་ཤང་གི་འདོད་པར་ཁྱོད་ཀྱིས་བསྒྲུབ་པ་དེ་ཉིད་སླར་འོངས་པའི་ཕྱིར། དོན་འདི་དག་འོག་ནས་རྒྱ་ཆེར་འཆད་པས། འདིར་ནི་རྣམ་པར་སྤྲོས་པའི་ངལ་བ་དེ་ཙམ་གྱིས་ཆོག་གོ །གཉིས་པ་གནས་ལུགས་ཀྱི་དོན་དེ་ཉིད་འཁོར་ལོ་གང་ནས་འབྱུང་བསམ་པ་ལ། ཆོས་ཀྱི་འཁོར་ལོ་རིམ་པ་གསུམ་གྱི་མཚན་གཞིའི་ཁྱད་ནི་འདི་ལྟ་སྟེ། དང་པོར་བསོད་ནམས་མ་ཡིན་པ་བཟློག་པའི་འཁོར་ལ།ོ བར་དུ་བདག་བཟློག་པའི་འཁོར་ལོ། མཐའ་མར་ལྟ་བ་མཐའ་དག་འགོག་པའི་འཁོར་ལོ་ཞེས་བྱ་བའམ། ཡང་ན། དང་པོ་མངོན་པར་མཐོ་བའི་ལམ་སྟོན་པའི་འཁོར་ལོ། བར་པ་ངེས་པར་ལེགས་པའི་ལམ་མཐུན་མོང་སྟོན་པའི་འཁོར་ལོ། ཐ་མ་མི་གནས་པའི་མྱང་འདས་སྟོན་པའི་འཁོར་ལོ། ཞེས་བྱ་བའི་མཚན་འདོགས་པར་གོང་དུ་འཕགས་པ་ཡབ་སྲས་ཀྱི་ལུང་དྲངས་པ་ལས་ཤེས་སོ། །མཚན་གཞི་ནི་ཤེར་ཕྱིན་གྱི་མདོ་ལྟ་བུ་གཅིག་ལ་མཚོན་ན། འཁོར་ལོ་དང་པོ་ནི། སེམས་སྐྱེད་དང་ཕར་ཕྱིན་དང་པོ་གསུམ་སྟོན་པའི་མདོ་ལྟ་བུའོ། །འཁོར་ལོ་གཉིས་པ་ནི། ཕྱི་དང་ནང་དང་གཉིས་ཀ་སྟོང་པ་ཉིད་སྟོན་པའི་མདོ་ལྟ་བུའོ། །འཁོར་ལོ་ཐ་མ་ནི། སྟོང་པ་ཉིད་སྟོང་པ་ཉིད་དང༌། རང་བཞིན་སྟོང་པ་ཉིད་སྟོན་པའི་མདོ་ལྟ་བུའོ། །དེ་ལྟར་ན། གོང་དུ་བཤད་མ་ཐག་པའི་གནས་ལུགས་ཀྱི་དོན་མཐར་ཐུག་པ་དེ་དང༌། དེ་རྟོགས་པའི་མཐར་ཐུག་གི་ལྟ་བ་དེ། ཀླུ་སྒྲུབ་ཞབས་ཀྱི་འཁོར་ལོ་ཐ་མ་ཉིད་ལས་ཕྱུང་བ་ཡིན་ཏེ། མཐར་ཐུག་གི་ལྟ་བ་དང་དེའི་ཡུལ་གསལ་བར་སྟོན་པ་ལ་ཆོས་ཀྱི་འཁོར་ལོ་གསུམ་པའི་གོང་ན་ཁྱད་པར་དུ་འཕགས་པ་གཞན་ཡོད་པ་མ་ཡིན་པའི་ཕྱིར་རོ། །དེ་ཡང་འདི་ལྟར། གང་འཁོར་ལོ་གསུམ་པ་ཡིན་ན། ངེས་དོན་མཐར་ཐུག་སྟོན་པའི་འཁོར་ལོ་ཡིན་པས་ཁྱབ། དཔེར་ན། རྣལ་འབྱོར་སྤྱོད་པའི་གཞུང་ལས་འཁོར་ལོ་ཐ་མ་ངེས་དོན་མཐར་ཐུག་གི་འཁོར་ལོར་བཤད་པ་དང༌། ཐེག་པ་ཆེན་པོ་རྒྱུད་བླ་མར། འཁོར་ལོ་ཐ་མ་ཁོ་ན་ངེས་དོན་མཐར་ཐུག་གི་འཁོར་ལོར་བཤད་པ་བཞིན། ངོ་བོ་ཉིད་མེད་པར་སྨྲ་བའི་གཞུང་ལས་ཀྱང༌། སྤྲོས་པ་ཐམས་ཅད་འགོག་པའི་འཁོར་ལོ་ལ་འཁོར་ལོ་ཐ་མར་བཤད་པ་ཡིན་ནོ་ཞེས་བྱ་བ་ནི་རིགས་པའོ། །འོ་ན། དགོངས་འགྲེལ་ལས་འཁོར་ལོ་ཐ་མར་བཤད་པ་དེ། ཀླུ་སྒྲུབ་ཞབས་ཀྱིས་ངེས་པའི་དོན་དུ་ཇི་ལྟར་འགྲེལ་ཞེ་ན། ངོ་བོ་ཉིད་མེད་པར་སྨྲ་བ་རང་ལུགས་ཀྱི་མཚན་ཉིད་གསུམ་གྱི་རྣམ་པར་བཞག་པ་སོ་སོར་ཕྱེ་ནས་སྟོན་པའི་ངེས་པའི་དོན་ནོ། །དེའི་ལུགས་ཀྱི་དེ་གསུམ་གྱི་རྣམ་པར་བཞག་པ་ཡང༌། འཇུག་འགྲེལ་ལས། རྟེན་འབྲེལ་གཟུགས་བརྙན་ལྟ་བུ་གཞན་དབང་དང༌། དེ་ལ་རང་བཞིན་དུ་སྒྲོ་བཏགས་པ་ཀུན་བཏགས་དང༌། དེ་རང་བཞིན་གྱིས་སྟོང་པ་ཡོངས་གྲུབ་ཏུ་བཤད་པ་ལྟར་ཁས་ལེན་དགོས་པ་ཡིན་ནོ། །འོ་ན་མདོ་དེར། འཁོར་ལོ་བར་པ་དྲང་དོན་དུ་བཤད་པ་ཡང་དྲང་དོན་ཁོ་ནར་འགྲེལ་ལམ་སྙམ་ན། དེ་ཡང་འཁོར་ལོ་གསུམ་པ་ལ་ལྟོས་ནས་དེར་བཀྲལ་བས་ཆོག་པ་ཡིན་ཏེ། ཤེས་ཕྱིན་གྱི་མདོ་ལྟ་བུ་ནས་གང་བཤད་ཐམས་ཅད་དྲང་དོན་དུ་ཁས་མི་ལེན་ཀྱང༌། དེ་ནས་བཤད་པའི་བདེན་གཉིས་ལྟ་བུའི་ལྡོག་པ་ནས་ཀུན་རྫོབ་བདེན་པར་ཁས་ལེན་དགོས་པའི་ཕྱིར། དེ་ལས་གཞན་དུ་ན་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་ཆོས་ཀྱི་འཁོར་ལོ་བསྐོར་བ་དེ་དྲང་དོན་ཡིན་ན། དེ་ལས་གཞན་དྲང་དོན་མ་ཡིན་པ་ཅི་ཞིག་ཡོད་ཅེས་བསམ་དགོས་པ་ཡིན་ལ། ཡང་ན་ནི། ཀླུ་སྒྲུབ་ཀྱི་རྗེས་སུ་འབྲང་བའི་ངོ་བོ་ཉིད་མེད་པར་སྨྲ་བ་རྣམས་ཀྱིས་དགོངས་འགྲེལ་དང༌། སྙིང་རྗེ་ཆེན་པོ་བསྟན་པའི་མདོ་ལས། འཁོར་ལོ་གསུམ་གྱི་རྣམ་པར་བཞག་པ་དེ་དང༌། དེ་ལྟར་བཤད་པ་དེ། བཏང་སྙོམས་སུ་འཇོག་པ་ཡིན་ནོ་ཞེས་བཤད་པར་བྱའོ། །གཉིས་པ་ལ། གཞན་གྱིས་བརྟགས་པའི་ལམ་དགག་པ་དང༌། རང་གི་འདོད་པ་བཞག་པ། དེ་ལྟར་བཤད་པས་གྲུབ་པའི་དོན་ནོ། །དང་པོ་ནི། དྲང་བ་དང་ངེས་པའི་དོན་རྣམ་པར་འབྱེད་པ་ཞེས་བྱ་བའི་བསྟན་བཅོས་མཛད་པ་ན་རེ། ཤིང་རྟའི་སྲོལ་འབྱེད་ཆེན་པོ་གཉིས་ཀྱི་དྲང་ངེས་ཀྱི་སྲོལ་འབྱེད་ཚུལ་ནི་མི་འདྲ་བ་གཉིས་ཁོ་ན་ཡིན་ཏེ། དེ་ཡང་འདི་ལྟར། ཐོགས་མེད་སྐུ་མཆེད་ཀྱིས་ནི། མདོ་དེ་དང་དེའི་དངོས་བསྟན་གྱི་དོན་དེ་དང་དེ་སྒྲ་ཇི་བཞིན་དུ་བཤད་དུ་རུང་བ་དང་མི་རུང་བ་ལ་འཆད་ལ། དེ་ཡང་དགོངས་པ་ངེས་པར་འགྲེལ་བའི་མདོ་ལ་བརྟེན་པའོ། །ཀླུ་སྒྲུབ་ཡབ་སྲས་ཀྱིས་ནི་ཀུན་རྫོབ་དང་དོན་དམ་པའི་བདེན་པ་དངོས་བསྟན་གྱི་བརྗོད་བྱའི་གཙོ་བོར་སྟོན་པ་ལ་དེ་དང་དེའི་དོན་དུ་འཆད་དོ། །དེ་ཡང་བློ་གྲོས་མི་ཟད་པ་བསྟན་པའི་མདོ་དང༌། ཏིང་ངེ་འཛིན་རྒྱལ་པོའི་མདོ་ལ་བརྟེན་པའོ། །དེ་ལྟར་དྲང་ངེས་དཔྱོད་པའི་གཞིར་གྱུར་པའི་མདོའི་མཚན་གཞི་ཡང༌། ཕུང་སོགས་རང་གི་མཚན་ཉིད་ཀྱིས་ཡོད་མཉམ་དུ་སྟོན་པའི་འཁོར་ལོ་དང་པོ་དང༌། དེ་མེད་མཉམ་དུ་སྟོན་པའི་འཁོར་ལོ་བར་པ་དང༌། རང་བཞིན་ཡོད་མེད་གསལ་བར་ཕྱེ་ནས་སྟོན་པའི་འཁོར་ལོ་ཐ་མ་རྣམས་ཡིན་གྱི། སྤྱིར་རྒྱལ་བའི་གསུང་རབ་མཐའ་དག་ལས་བཤད་མ་ཐག་པ་དེ་ལྟ་བུའི་སྒོ་ནས་དྲང་ངེས་ཀྱི་རྣམ་གཞག་འཇོག་པ་ནི་མ་ཡིན་ནོ། །ཞེས་གསུང༌། འདི་མི་འཐད་པ་ལ་གཉིས་ཏེ། ཤིང་རྟའི་སྲོལ་གཉིས་ཀྱི་དྲང་ངེས་ཀྱི་གོ་དོན་སོ་སོར་ངེས་པ་མི་འཐད། དྲང་ངེས་ཀྱི་མདོའི་མཚན་གཞི་འཛིན་ཚུལ་ལ་ཁས་བླངས་ནང་འགལ་ཞུགས་པའི་ཚུལ་ལོ། །དང་པོ་ནི། སྲོལ་འབྱེད་གཉིས་ཀྱི་དྲང་ངེས་ཀྱི་མདོའི་གོ་དོན་སོ་སོ་བ་དེ་ལྟར་འཆད་པ་མི་འཐད་དེ། གཉིས་ཀས་ཀྱང་གཉིས་ཀ་བཞེད་པའི་ཕྱིར་ཇི་ལྟར་ཞེ་ན། ཀླུ་སྒྲུབ་ཡབ་སྲས་ཀྱིས། སྒྲ་ཇི་བཞིན་པ་ཡིན་མིན་གྱི་སྒོ་ནས་དྲང་ངེས་སུ་བཞག་པ་ཡོད་དེ། ཇི་སྐད་དུ། འཇུག་པ་ལས། མདོ་སྡེ་གང་ལས་ཕྱི་རོལ་སྣང་ཡོད་མིན། །སེམས་ནི་སྣ་ཚོགས་སྣང་ངོ་ཞེས་གསུངས་པ། །གཟུགས་ལ་ཤིན་ཏུ་ཆགས་གང་དེ་དག་ལ། །གཟུགས་བཟློག་པ་སྟེ་དེ་ཡང་དྲང་དོན་ཉིད། །འདི་ནི་སྟོན་པས་དྲང་དོན་ཉིད་གསུངས་ཤིང༌། །འདི་ནི་དྲང་དོན་ཉིད་དུ་རིགས་པས་འཐད། །རྣམ་པ་དེ་ལྟའི་མདོ་སྡེ་གཞན་ཡང་ནི། །དྲང་དོན་ཉིད་དུ་ལུང་འདིས་གསལ་བར་བྱེད། །ཅེས་གསུངས་ཤིང༌། དེའི་སྐབས་ཀྱི་ལུང་དེ་ངོས་འཛིན་པ་ན། ཇི་ལྟར་ནད་པ་ནད་པ་ལ། །སྨན་པས་སྨན་ནི་གཏོང་བ་ལྟར། །དེ་བཞིན་སངས་རྒྱས་སེམས་ཅན་ལ། །སེམས་ཙམ་དུ་ཡང་གསུང་བར་མཛད། །ཅེས་པའི་མདོ་དྲངས་ཤིང༌། རིགས་པ་དེ་འཆད་པ་ན། ཤེས་བྱ་མེད་ན་ཤེས་པ་བསལ་བ་ནི། །བདེ་བླག་རྙེད་ཅེས་སངས་རྒྱས་རྣམས་ཀྱིས་གསུངས། །ཤེས་བྱ་མེད་ན་ཤེས་པ་བཀག་འགྲུབ་པས། །དང་པོར་ཤེས་བྱ་དགག་པར་མཛད་པ་ཡིན། །ཞེས་གསུངས་ལ། དེ་དག་གི་སྐབས་ཀྱི་དོན་ཡང༌། སེམས་ཙམ་པས་ཕྱི་རོལ་གྱི་དོན་མེད་ཅིང༌། རྣམ་པར་ཤེས་པ་རང་བཞིན་གྱིས་གྲུབ་པར་སྟོན་པའི་མདོ་དྲངས་པ་དེ་དག་སྒྲ་ཇི་བཞིན་དུ་ཁས་བླང་དུ་མི་རུང་བའི་ཕྱིར། དྲང་བའི་དོན་ཡིན་ནོ་ཞེས་བྱ་བའི་དོན་ཡིན་གྱི། ཀུན་རྫོབ་ཀྱི་བདེན་པ་དངོས་བསྟན་གྱི་བརྗོད་བྱའི་གཙོ་བོར་སྟོན་པའི་རྟགས་ཀྱིས་དྲང་དོན་དུ་བསྒྲུབས་ན། དབུ་མ་པ་རང་ལ་རྟགས་མི་འགྲུབ་པ་དང༌། སྐབས་ཀྱི་དོན་ལས་ཉམས་པར་འགྱུར་བའི་ཕྱིར་དང༌། ཇི་སྐད་དུ། ཀུན་གཞི་ཡོད་ཅིང་གང་ཟག་ཉིད་ཡོད་ལ། །ཕུང་པོ་འདི་དག་འབའ་ཞིག་ཉིད་ཡོད་ཅེས། །བསྟན་པ་འདི་ནི་དེ་ལྟར་ཆེས་ཟབ་དོན། །རིག་པར་མི་འགྱུར་གང་ཡིན་དེ་ལ་འོ། །ཞེས་དང༌། འཇིག་ཚོགས་ལྟ་དང་བྲལ་ཡང་སངས་རྒྱས་ཀྱིས། །ཇི་ལྟར་ང་དང་ང་ཡི་བསྟན་པ་ལྟར། །དེ་བཞིན་དངོས་རྣམས་རང་བཞིན་མེད་མོད་ཀྱི། །ཡོད་ཅེས་དྲང་དོན་ཉིད་དུ་བསྟན་པ་ཡིན། །ཞེས་གསུངས་པ་དེས་ཀྱང་སྒྲ་ཇི་བཞིན་པ་མ་ཡིན་པ་རྒྱུ་མཚན་དུ་བྱས་ནས་དྲང་དོན་དུ་བཤད་པ་ཡིན་ལ། དེ་ལས་གཞན་དུ་ཀུན་རྫོབ་ཀྱི་བདེན་པ་བརྗོད་བྱའི་གཙོ་བོར་བསྟན་པ་ལ་འཆད་ན། ཀུན་གཞི་དང་དངོས་པོ་རང་བཞིན་གྱིས་ཡོད་པ་སོགས་ཀུན་རྫོབ་བདེན་པར་ཁྱེད་ཀྱིས་ཁས་ལེན་དགོས་པས། ཁྱེད་ལ་ཁས་བླངས་ནང་འགལ་འབྱུང་བའི་ཕྱིར་དང༌། གཞུང་གི་དོན་ལས་ཀྱང་ཉམས་ཏེ། སེམས་ཙམ་དུ་སྨྲ་བའི་གྲུབ་པའི་མཐས་བཞག་པའི་དོན་དེ་ཉིད་ཟླ་བའི་ཞབས་ཀྱི་ཀུན་རྫོབ་བདེན་པར་ཁྱེད་ཀྱིས་འཆད་དགོས་ལ། དེ་ཡང་མི་རིགས་པའི་ཕྱིར། དེ་ལ་འདི་སྙམ་དུ་ཐོགས་མེད་སྐུ་མཆེད་ཀྱིས་བཞེད་པའི་དྲང་ངེས་ཀྱི་འཆད་ཚུལ་དེ། ཀླུ་སྒྲུབ་ཡབ་སྲས་ཀྱིས་མི་བཞེད་པར་ཁས་མ་བླངས་སོ། །ཞེས་ཟེར་ན་ནི་མངོན་སུམ་ལ་སྙོན་པ་ཡིན་མོད། དེ་ལྟ་ན་ཡང༌། དགག་བྱའི་ཁྱད་པར་མ་སྦྱར་བར་གཟུགས་མེད་ཅེས་སོགས་ཀྱི་ཤེར་ཕྱིན་གྱི་མདོ་ཆོས་ཅན། དྲང་དོན་གྱི་མདོར་ཐལ། སྒྲ་ཇི་བཞིན་པ་མ་ཡིན་པའི་མདོ་ཡིན་པའི་ཕྱིར། རྟགས་ཁས་བླངས་སོ། །ས་བོན་ལས་མྱུ་གུ་སྐྱེ་བ་དང༌། ལས་དཀར་ནག་ལས་འབྲས་བུ་བདེ་སྡུག་སྐྱེ་བར་ཚིག་ཟིན་ལ་སྟོན་པའི་མདོ་ཆོས་ཅན། ངེས་དོན་གྱི་མདོར་ཐལ། སྒྲ་ཇི་བཞིན་པའི་མདོ་ཡིན་པའི་ཕྱིར། ཞེས་སོགས་ཀྱི་ཉེས་པ་བཟློག་ཏུ་མེད་པ་དང༌། སྲོལ་འབྱེད་གཉིས་ཀྱི་དྲང་ངེས་ཀྱི་འབྱེད་ལུགས་ཀྱི་རྣམ་པར་བཞག་པ་ལེགས་པར་བཤད་པའི་སྙིང་པོར་ཁས་ལེན་པ་དེ་ལས་ཉམས་པས། ཁྱེད་ཀྱི་ཞེ་འདོད་ནི་དེ་མ་ཡིན་ནོ། །དེ་ལྟར་ན་ཀླུ་སྒྲུབ་རྗེས་འབྲང་དང་བཅས་པས། དགོངས་པ་ཅན་དང༌། ལྡེམ་པོར་དགོངས་པའི་མདོའི་མཚན་གཞིར་བཤད་པ་རྣམས་དང༌། དེའི་ལོག་ཕྱོགས་སྟོན་པའི་མདོ་རྣམས་དང༌། མཐར་ཐུག་ཐེག་པ་གསུམ་དང༌། གཅིག་སྟོན་པའི་མདོ་དང༌། རྒྱུ་དགེ་སྡིག་ལས་འབྲས་བུ་བདེ་སྡུག་འབྱུང་བ་དང༌། མི་འབྱུང་བར་སྟོན་པའི་མདོ་རྣམས་ལ་དྲང་ངེས་ཀྱི་ཁྱད་པར་མི་རྙེད་པར་འགྱུར་ཏེ། མདོ་དེ་དང་དེ་དག་གི་བསྟན་བྱའི་གཙོ་བོ་ལ་གནས་ལུགས་ཀྱི་དོན་ཡིན་མིན་གྱི་ཁྱད་པར་མི་རྙེད་པའི་ཕྱིར་དང༌། མདོ་དེ་དག་ཐམས་ཅད་ལ་ཁྱེད་འདོད་པའི་དྲང་དོན་གྱི་མདོའི་མཚན་གཞི་ཁོ་ན་ཞུགས་ཀྱི། ངེས་དོན་གྱི་མདོའི་མཚན་གཞི་ཞུགས་པའི་སྐབས་མི་རྙེད་པའི་ཕྱིར་རོ། །ཞེས་བྱ་བ་འདིས་ནི། ཀླུ་སྒྲུབ་ཡབ་སྲས་ཀྱི་བཞེད་པའི་དྲང་ངེས་ཀྱི་འཇོག་ཚུལ། གཞན་དག་འདོད་པ་དེ་ཁོ་ནར་ངེས་པ་མ་ཡིན་ནོ། །ཞེས་རྣམ་པར་བཤད་པ་ཡིན་ནོ། །ཐོགས་མེད་སྐུ་མཆེད་ཀྱིས་བཞེད་པའི་དྲང་ངེས་འཇོག་ཚུལ་ཡང་དེ་ཁོ་ན་ལྟར་ངེས་པ་མ་ཡིན་ཏེ། དེ་ལྟར་འཆད་པའི་ལུང་གི་ཁུངས་མེད་པའི་ཕྱིར་དང༌། ཐོགས་མེད་སྐུ་མཆེད་ཀྱིས། ཡུམ་ཤེར་ཕྱིན་གྱི་མདོ་དྲང་དོན་གྱི་མདོ་ཡིན་པར་འཆད་དོ་ཞེས་ཟེར་བ་ནི་ཆེས་ཤིན་ཏུ་ཐ་ཆད་པ་ཡིན་པའི་ཕྱིར་དང༌། དེའི་བཞེད་པ་ལ། དགོངས་ལྡེམ་དགོངས་བརྒྱད་ཀྱི་ནང་ན་ངེས་དོན་གྱི་མདོ་མེད་པར་ཐལ་བའི་ཕྱིར་དང༌། དེ་ཡང་དེ་ལྟ་ན། དེ་བརྒྱད་པོ་གང་རུང་གི་ནང་དུ་སངས་རྒྱས་ཀྱི་གསུང་རབ་ཐམས་ཅད་འདུས་པར་ཐེག་བསྡུས་ལས་གསལ་བར་གསུངས་པ་དང་འགལ་ལོ། །དེ་ཡང་ཇི་ལྟར་ཞེ་ན། འཁོར་ལོ་བར་པ་མཚན་ཉིད་མེད་པའི་ཆོས་འཁོར་ཆོས་ཅན། སྒྲ་ཇི་བཞིན་པ་མ་ཡིན་ཀྱང་ངེས་དོན་གྱི་མདོ་ཡིན་ཏེ། ཆེད་དུ་བྱ་བའི་གདུལ་བྱ་ཐེག་པ་ཆེན་པོའི་རིགས་ཅན་འབའ་ཞིག་ལ་ངེས་དོན་མཐར་ཐུག་སྟོན་པའི་མདོ་ཡིན་པའི་ཕྱིར་ཏེ། དེ་ལ་དོན་དམ་པའི་བདེན་པ་ཁོ་ན་བསྟན་བྱའི་གཙོ་བོར་སྟོན་པའི་མདོ་ཡིན་པའི་ཕྱིར་རོ། །སྔ་མ་ལ་ཁྱབ་པ་མེད་ན། ངེས་དོན་ཁོ་ན་སྟོན་པའི་མདོ་ལ་ངེས་དོན་གྱི་མདོར་མི་བྱེད་ན། གཞན་གང་ཞིག་ལ་དེར་བྱེད། སྦྱོར་བ་གཉིས་པ་ལ་ཁྱབ་པ་མེད་ན། ཤེར་མདོའི་བསྟན་བྱའི་གཙོ་བོར་གྱུར་པའི་དོན་དམ་བདེན་པ་གང་དང་གང་ཡིན་པ་དེ་ཆོས་ཅན། ཀུན་རྫོབ་བདེན་པར་ཐལ། དྲང་དོན་ཡིན་པའི་ཕྱིར། ཞེས་བྱ་བའི་ཐལ་བ་བཟློག་པར་མི་ནུས་སོ། །མདོ་དེས་དོན་དམ་པའི་བདེན་པ་གཙོ་བོར་སྟོན་པར་མི་འདོད་ན་ནི། ཐེག་པ་ཆེན་པོ་མདོ་སྡེའི་རྒྱན་རྩ་འགྲེལ་དུ། ཐེག་པ་ཆེན་པོ་བཀར་སྒྲུབ་པའི་རིགས་པ་རྒྱ་ཆེར་གསུངས་པ་རྣམས་དང༌། ཐེག་པ་ཆེན་པོ་བསྡུས་པར་རྣམ་གཡེང་གི་རྣམ་པར་རྟོག་པ་བཅུའི་གཉེན་པོ་ཤེར་ཕྱིན་གྱི་མདོ་དང་སྦྱར་ནས་གསུངས་པ་རྣམས་དང་འགལ་ལོ། །གལ་ཏེ་འོ་ན་ཤེར་ཕྱིན་གྱི་མདོ་ཆོས་ཅན། དྲང་དོན་གྱི་མདོ་ཡིན་པར་ཐལ། སྒྲ་ཇི་བཞིན་པ་མ་ཡིན་པའི་མདོ་ཡིན་པའི་ཕྱིར། ཞེས་པའི་ཐལ་བ་ཁྱེད་ཀྱིས་བཟློག་པར་མི་ནུས་ཤིང༌། དགོངས་འགྲེལ་ལས་ཤེར་ཕྱིན་གྱི་མདོ་དྲང་དོན་དུ་གསུངས་པའི་ལུང་གི་དགོངས་པ་ཡང་ཁྱེད་ཀྱིས་འཆད་པར་མི་ནུས་སོ་ཞེ་ན། བཤད་པ། སྒྲ་ཇི་བཞིན་པ་མ་ཡིན་པའི་ལུང་ཡིན་པ་ཙམ་གྱིས། ཀུན་རྫོབ་བདེན་པ་གཙོ་བོར་ཁས་ལེན་པ་དེའི་ཚེ་དྲང་དོན་གྱི་ལུང་དུ་བཞག་ནུས་ཀྱང༌། སྤྱིར་དེ་ཙམ་གྱིས་དེར་གཞག་ནུས་པ་མ་ཡིན་ཏེ། དོན་དམ་པའི་བདེན་པ་གཙོ་བོར་ཁས་ལེན་པ་དེའི་ཚེ། ངེས་དོན་གྱི་མདོ་ལ་སྒྲ་ཇི་བཞིན་པ་མ་ཡིན་པ་ཁོ་ན་གཙོ་ཆེ་བའི་ཕྱིར། དེ་སྐད་དུ་ཡང༌། མདོ་སྡེའི་རྒྱན་ལས། ཇི་ལྟར་སྣམས་ན་རབ་དཀུ་ལ། །མྱང་ན་ཞིམ་པའི་སྨན་བཞིན་དུ། །ཆོས་ཀྱང་དེ་བཞིན་གཉིས་སུ་གནས། །དོན་དང་ཡེ་གེར་བཤད་པར་བྱ། །ཞེས་དང༌། གཉེན་པོ་དང་ནི་སྒྲ་གཞན་ཕྱིར། །ཞེས་གསུངས་སོ། །དགོངས་འགྲེལ་ལས། དེ་ལྟར་བཤད་པའི་ལུང་གི་དོན་ཡང་འཆད་པར་མི་ནུས་པ་མ་ཡིན་ཏེ། འཁོར་ལོ་བར་པའི་དགོངས་དོན་གྱི་གཙོ་བོ་ངེས་པའི་དོན་དང༌། རྩོད་པ་མ་མཆིས་པ་དང༌། བླ་ན་མ་མཆིས་པ་ཡིན་ཀྱང༌། སྒྲ་ཇི་བཞིན་པའི་དོན་ནི་དྲང་བའི་དོན་དང་རྩོད་པ་དང་བཅས་པ་དང༌། བླ་ན་མ་མཆིས་པ་ཡིན་པའི་ཕྱིར་རོ། །དེའི་འཐད་པ་ཡང༌། ཡོངས་གྲུབ་བདེན་པར་མེད་པ། ཀུན་རྫོབ་ཀྱི་བདེན་པ་ཡིན་པ་ལ་ཐུག་གོ །དེ་ལྟར་བཤད་པ་ན། སྒྲ་ཇི་བཞིན་པའི་ཚིག་ཟིན་གྱི་དོན་དང༌། དགོངས་དོན་གྱི་གཙོ་བོ་གཉིས་གང་དབང་བཙན་ཞེས་ཤེས་རབ་ཀྱིས་རྣམ་པར་བརྟགས་པ་ན། འཁོར་ལོ་བར་པའི་དྲང་ངེས་ཤེས་པར་འགྱུར་ལ། དེའི་ཚེ་དེའི་དགོངས་དོན་གྱི་གཙོ་བོ་ནི་ངོ་བོ་ཉིད་མེད་པ་རྣམ་པ་གསུམ་དུ་ངེས་ལ། གསུམ་པོ་དེ་ཡང་དོན་དམ་པའི་བདེན་པར་འཆད་པ་ལ་རྩོད་པ་མེད་པ་ཡིན་ཏེ། ཇི་སྐད་དུ། སུམ་ཅུ་པ་ལས། ངོ་བོ་ཉིད་ནི་རྣམ་གསུམ་གྱི། །ངོ་བོ་ཉིད་མེད་རྣམ་གསུམ་ལ། །དགོངས་ནས་ཆོས་རྣམས་ཐམས་ཅད་ཀྱི། །ངོ་བོ་ཉིད་མེད་བསྟན་པ་ཡིན། །ཞེས་གསུངས་པའི་ཕྱིར་རོ། །རིགས་པ་མཁྱེན་པས་ཀྱང༌། རྣལ་འབྱོར་སྤྱོད་པའི་གཞུང་གི་དགོངས་པ་ལས་བརྩམས་ཏེ་འཆད་པ་ན། འཁོར་ལོ་དང་པོ་དྲང་དོན་དུ་བཤད་པ་ཡིན་གྱི། བར་པ་དྲང་དོན་དུ་བཤད་པ་ནི་ཡོད་པ་མ་ཡིན་ཏེ། ཇི་སྐད་དུ། མ་རིག་གིས་བསླད་བདག་ཉིད་ལ། །ཞེས་སོགས་ཀྱིས་འཁོར་ལོ་དང་པོ་དྲང་དོན་དུ་བསྟན་ཞིང༌། གཟུང་དང་འཛིན་པའི་རྣམ་པ་ལས། །ཞེས་སོགས་ཀྱིས་འཁོར་ལོ་བར་པ་དང་ཐ་མ་དགོངས་པ་གཅིག་ཏུ་བཤད་པ་ལ་སུས་ཀྱང་བསྙོན་པར་མི་ནུས་པའི་ཕྱིར་རོ། །གཉིས་པ་ལ་གསུམ་སྟེ། སྤྱིར་དྲང་ངེས་ཀྱི་མདོའི་མཚན་གཞིའི་འཛིན་ཚུལ་རྒྱ་ཆུང་པའི་ཉེས་པ། བྱེ་བྲག་ཏུ་ཐོགས་མེད་སྐུ་མཆེད་ཀྱི་ལུགས་ལ་མི་འཐད་པའི་ཚུལ་དང༌། ཀླུ་སྒྲུབ་ཡབ་སྲས་ཀྱི་ལུགས་ལ་མི་འཐད་པའི་ཚུལ་ལོ། །དང་པོ་ནི། ཁྱེད་ཅག་གི་མདོའི་མཚན་གཞི་དེ་ལྟར་འཛིན་པ་མི་རིགས་ཏེ། མཚན་གཞི་རྒྱ་ཆུང་པ་དང༌། མཚན་གཞི་ངེས་པ་ཅན་གཞག་པ་དང༌། མཚན་ཉིད་འཇོག་ཚུལ་ལ་ནང་འགལ་ཞུགས་པའི་ཕྱིར། རྒྱ་ཆུང་བ་ཇི་ལྟར་ཞེ་ན། འཁོར་ལོ་བར་པ་དང༌། ཐ་མའི་མཚན་གཞི་འཛིན་ཚུལ་དེ་ལྟར་ཡིན་དུ་ཆུག་ཀྱང༌། དགོངས་འགྲེལ་དུ་དྲང་ངེས་དཔྱོད་པའི་གཞིར་གྱུར་པའི་འཁོར་ལོ་དང་པོའི་མཚན་གཞི་ཕུང་སོགས་ཐམས་ཅད་རང་གི་མཚན་ཉིད་ཀྱིས་ཡོད་མཉམ་དུ་སྟོན་པའི་མདོ་ཁོ་ན་ལ་བྱེད་ན། འཕགས་པའི་བདེན་གཞི་གཙོ་བོར་སྟོན་པའི་མདོ་སྡེ་དྲན་པ་ཉེར་བཞག་དང་འདུལ་བ་ལུང་ལ་སོགས་པ་རྣམས་ལ། དགོངས་འགྲེལ་དུ་དྲང་ངེས་ཀྱི་དཔྱད་པ་མ་མཛད་པར་འགྱུར་ཏེ། དེ་དག་གིས་ཐམས་ཅད་རང་གི་མཚན་ཉིད་ཀྱིས་ཡོད་མཉམ་དུ་སྟོན་པ་མ་ཡིན་པའི་ཕྱིར་རོ། །འདོད་ན་ནི། མདོ་དེ་ཉིད་ལས། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ། འཕགས་པའི་བདེན་པ་བཞིའི་རྣམ་པ་བསྟན་པས། ཞེས་དེ་ལྟར་སྟོན་པའི་མདོ་དེ་དང་དེ་དྲང་ངེས་དཔྱོད་པའི་གཞིར་གསུངས་པ་དང་འགལ། དེ་དག་གིས་ཀྱང་དེ་བསྟན་པར་འདོད་ན་ནི། ཐམས་ཅད་རང་གི་མཚན་ཉིད་ཀྱིས་ཡོད་མཉམ་དུ་མི་སྟོན་པའི་འཁོར་ལོ་དང་པོའི་མཚན་གཞིར་ཁྱེད་རང་གིས་ཁས་བླངས་པའི། ཝ་ར་ཎ་སིར། ལྔ་སྡེ་ལ་ཤམ་ཐབས་ཟླུམ་པོར་བསྒོ་བར་བྱའོ། །ཞེས་གསུངས་པ་དེས་ཀྱང་དེ་ཅིའི་ཕྱིར་མི་སྟོན་ཞེས་དྲི་བར་བྱའོ། །ཡང་དྲང་ངེས་དཔྱོད་པའི་གཞིར་གྱུར་པའི་འཁོར་ལོ་དང་པོ་གཉིས་ཀྱི་བསྟན་བྱའི་གཙོ་བོ་གཉིས་པོ་ཕན་ཚུན་སྤངས་པའི་དངོས་འགལ་ཡིན་པར་འགྱུར་ཏེ། གཅིག་གིས་ནི་ཐམས་ཅད་རང་གི་མཚན་ཉིད་ཀྱིས་ཡོད་མཉམ་དུ་བསྟན། གཅིག་ཤོས་ཀྱིས་ནི་མེད་མཉམ་དུ་བསྟན་པའི་ཕྱིར་རོ། །དེ་ཡང་དེ་ལྟ་ན་ནི། འཕགས་པ་ཐོགས་མེད་ཀྱིས། གཉིས་ཀ་སྒྲ་ཇི་བཞིན་པ་མ་ཡིན་པར་བཤད་པས་དངོས་འགལ་ཞལ་གྱིས་བཞེས་པར་འགྱུར་རོ། །མཚན་ཉིད་དང༌། མཚན་གཞི་ལ་ནང་འགལ་བ་ཇི་ལྟར་ཡོད་ཅེ་ན། ཕུང་སོགས་ཐམས་ཅད་རང་གི་མཚན་ཉིད་ཀྱིས་ཡོད་མཉམ་དུ་མི་སྟོན་པའི་འཁོར་ལོ་དང་པོའི་མདོ་གང་ཡིན་པ་དེ་དང༌། དེ་མེད་མཉམ་དུ་མི་སྟོན་པའི་འཁོར་ལོ་བར་པའི་མདོ་གང་ཡིན་པ་དེ་དང༌། ལེགས་པར་ཕྱེ་ནས་མི་སྟོན་པའི་འཁོར་ལོ་ཐ་མའི་མདོ་གང་ཡིན་པ་དེ་དག་ཆོས་ཅན། དགོངས་འགྲེལ་དུ་དྲང་ངེས་ཕྱེ་བའི་དྲང་དོན་དང༌། ངེས་དོན་གྱི་མདོ་གང་རུང་དུ་ཐལ། རེ་རེ་ནས་དེ་དང་དེའི་མཚན་ཉིད་ཁྱེད་རང་འདོད་པ་དེ་ཞུགས་པའི་ཕྱིར། གསུམ་ཅར་ཁས་བླངས་སོ། །གལ་ཏེ་དྲང་ངེས་དཔྱོད་པའི་གཞི་མ་ཡིན་ཡང༌། དེ་དང་དེར་ཁས་བླངས་པ་ལ་ཉེས་པ་མེད་དོ་སྙམ་ན། དེ་ལྟར་ན་དེ་དུས་ཀྱི་དང་པོ་གཉིས་ངེས་དོན་དང༌། ཐ་མ་དྲང་དོན་དུ་ཁས་བླངས་པས། འཁོར་ལོ་དང་པོའི་མདོ་ཕལ་ཆེ་བ་ངེས་དོན་དུ་ཁས་བླངས་པས་རྩ་བའི་དམ་བཅའ་ཉམས་སོ། །ཡང༌། ཁྱེད་ཀྱིས་ཇི་སྐད་དུ། ཕུང་སོགས་ཐམས་ཅད་ཡོད་མཉམ་དུ་སྟོན་པའི་འཁོར་ལོ་དང་པོ་ཁོ་ན་དྲང་ངེས་དཔྱོད་པའི་གཞིར་གྱུར་པའི་འཁོར་ལོ་དང་པོར་ཁས་ལེན་པ་དང༌། ཡང༌། སྐབས་དེའི་དེ་མ་ཐག་ཞིག་ཏུ་འཁོར་ལོ་དང་པོར་ཕུང་སོགས་ཀྱི་ཆོས་ཉུང་ཤས་གཅིག་མ་གཏོགས་ཤས་ཆེར་བདེན་ཡོད་མ་བཀག་པ་དེ་དྲང་དོན་ཏུ་འཇོག་རྒྱུའི་མཚན་གཞིར་འཛིན་པ་ནི་ནང་འགལ་བ་ཡིན་ཏེ། ཐམས་ཅད་བདེན་ཡོད་དུ་བསྟན་པ་དང་འགའ་ཞིག་བདེན་མེད་དུ་བསྟན་པ་གཉིས་མདོ་གཅིག་གི་སྟེང་དུ་འགལ་བའི་ཕྱིར་རོ། །ཡང་བདག་མེད་སྟོན་ཚུལ་མི་འདྲ་བ་གསུམ་གྱི་སྒོ་ནས་འཁོར་ལོ་གསུམ་གྱི་དྲང་ངེས་འཇོག་ཅེས་ཟེར་བ་དང༌། འཁོར་ལོ་དང་པོ་སྒྲ་ཇི་བཞིན་པ་མ་ཡིན་པའི་དྲང་དོན་དུ་འཆད་པ་ཡང་ནང་འགལ་བ་ཡིན་ཏེ། འཁོར་ལོ་དང་པོར་གང་ཟག་གི་བདག་མེད་བསྟན་པ་དེ་སྒྲ་ཇི་བཞིན་པ་མ་ཡིན་ན། གང་ཟག་གི་བདག་ཡོད་པར་ཐལ་བའི་ཕྱིར་རོ། །མདོར་ན་འཁོར་ལོ་དང་པོར་གང་ཟག་གི་བདག་མེད་པ་ཙམ་ཞིག་བསྟན་ཞིང༌། ཆོས་ཀྱི་བདག་མེད་པ་ཉན་ཐོས་རྣམས་ལ་མ་བསྟན་ནོ། །ཞེས་བྱ་བ་འདི་ཙམ་ཞིག་འཕགས་པ་ཐོགས་མེད་ཀྱི་བཞེད་པ་ལ་ཡོད་པ་ཡིན་ལ། དེ་ཙམ་གྱིས་འཁོར་ལོ་དང་པོ་སྒྲ་ཇི་བཞིན་པ་མ་ཡིན་པའི་དྲང་དོན་དུ་འཆད་མི་ནུས་སོ། །དེའི་ཕྱིར་སྒྲ་བཞིན་པ་ཡིན་མིན་གྱི་སྒོ་ནས་དྲང་ངེས་འབྱེད་པ་ནི། འཁོར་ལོ་ཕྱི་མ་གཉིས་ལ་སྦྱར་ན་འགྲིག་ཙམ་ཡིན་ཡང༌། དང་པོ་ལ་ཇི་ལྟར་སྦྱར་ཡང༌། མ་འགྲིག་པས་ཤིན་ཏུ་ནོངས་པ་ཡིན་ནོ། །གཉིས་པ་ནི། མཚན་གཞི་འཛིན་ཚུལ་དེ་ལྟར་བྱེད་པ་ཐོག་མེད་ཀྱི་དགོངས་པར་མི་རུང་སྟེ། སློབ་དཔོན་དེའི་ལུགས་ལ་འཁོར་ལོ་དང་པོར་ཕྱི་རོལ་གྱི་དོན་ཡོད་པར་གསུངས་པ་སྒྲ་ཇི་བཞིན་པ་མ་ཡིན་པའི་དྲན་དོན་དུ་འཆད་པ་ཡིན་གྱི། ཕུང་སོགས་ཐམས་ཅད་རང་གི་མཚན་ཉིད་ཀྱིས་ཡོད་པར་གསུངས་པ་དྲང་དོན་དུ་འཆད་མི་དགོས་པའི་ཕྱིར་ཏེ། དེ་ལས་དེ་ལྟར་གསུངས་པ་མེད་པའི་ཕྱིར་ཏེ། འཁོར་ལོ་དང་པོར་ཆོས་འགའ་ཞིག་རང་གི་མཚན་ཉིད་ཀྱིས་མ་གྲུབ་པར་གསུངས་པའི་ཕྱིར་དང༌། གཞི་དེ་ལ་བདེན་ཡོད་མ་བཀག་པ་ཙམ་གྱིས་བདེན་གྲུབ་ཏུ་བཤད་པར་འགྱུར་ན་ཧ་ཅང་ཐལ་བའི་ཕྱིར། གཞན་ཡང༌། ཁྱེད་ལྟར་ན་དགོངས་འགྲེལ་དུ་འཁོར་ལོ་དང་པོ་དྲང་དོན་དུ་བཀྲལ་བ་ལས་ལོགས་སུ་བར་པ་དྲང་དོན་དུ་འགྲེལ་པ་དང༌། ཐ་མ་ངེས་དོན་དུ་འགྲེལ་བའི་འབད་པ་མཛད་མི་དགོས་པར་འགྱུར་ཏེ། འཁོར་ལོ་དང་པོར་ཕུང་སོགས་ཐམས་ཅད་རང་གི་མཚན་ཉིད་ཀྱིས་ཡོད་པར་གསུངས་པ་དེ་སྒྲ་ཇི་བཞིན་པ་མ་ཡིན་པར་བཀྲལ་བ་དེ་ཉིད་ཀྱིས་དོན་ཕྱི་མ་དེ་དག་བདེ་བླག་ཏུ་འགྲུབ་པའི་ཕྱིར། དེས་དེ་འགྲུབ་པར་མི་འདོད་ན། འཁོར་ལོ་དང་པོ་སྒྲ་ཇི་བཞིན་པ་མ་ཡིན་པར་འགྲེལ་ཚུལ་ཇི་ལྟར་བྱེད་དྲིས་པས་ཤེས་སོ། །གཞན་ཡང་འཁོར་ལོ་དང་པོའི་མདོ་འགའ་ཞིག་ཏུ་ཐམས་ཅད་བདེན་པར་ཡོད་མཉམ་དུ་བསྟན། འཁོར་ལོ་དང་པོའི་འགའ་ཞིག་ཏུ་བདེན་མེད་བསྟན་པར་ཁྱེད་ཀྱིས་འདོད་པས། སྤྱི་ལྡོག་ནས་འཁོར་ལོ་དང་པོའི་བསྟན་བྱའི་གཙོ་བོ་གང་ལ་བྱེད། དང་པོ་དེ་དེར་འདོད་པ་ལྟར་ན། དེ་ལྟར་སྟོན་པའི་འཁོར་ལོ་དང་པོ་དེ་ཆོས་ཅན། རང་གི་བསྟན་བྱའི་དོན་ལ་མི་སླུ་བར་ཐལ། དཔྱད་པ་གསུམ་གྱིས་རྣམ་པར་དག་པའི་ལུང་ཡིན་པའི་ཕྱིར། རྟགས་ཁས་བླངས། འདོད་ན། ཐམས་ཅད་བདེན་ཡོད་དུ་ཐལ་ལོ། །གཉིས་པ་ལྟར་ན་ནི། བདེན་མེད་འཁོར་ལོ་དང་པོའི་བསྟན་བྱའི་གཙོ་བོ་ཡིན་ན། ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པར་ཧ་ཅང་ཐལ་ལོ། །འཁོར་ལོ་དང་པོ་སྤྱི་ལྡོག་ནས། དེ་དང་དེ་དག་གང་རུང་བསྟན་བྱའི་གཙོ་བོར་བྱེད་པ་མ་ཡིན་གྱི། འཕགས་པའི་བདེན་པ་བཞི་པོ་ཙམ་ཞིག་བསྟན་བྱའི་གཙོ་བོར་བྱེད་པ་ཡིན་ནོ་ཞེ་ན། དེ་ནི་ལེགས་པར་སྨྲས་པ་ཡིན་མོད། ཁྱེད་ལྟར་ན་ཐོགས་མེད་ཞབས་ཀྱི་བཞེད་པ་ལ། འཁོར་ལོ་གསུམ་པོའི་སྤྱི་ལྡོག་ནས་དྲང་ངེས་ཀྱི་འཇོག་མཚམས་མ་ཤེས་པས། རྣམ་པར་འཕོངས་པ་ཡིན་ནོ། །གཞན་ཡང་འཁོར་ལོ་དང་པོ་གཉིས་སུ་བདེན་པར་ཡོད་མཉམ་དང་མེད་མཉམ་དུ་བཤད་པའི་བདེན་པ་དང༌། འཁོར་ལོ་ཐ་མར་ཆོས་འགའ་ཞིག་བདེན་མེད་དུ་བཤད་པའི་དུས་ཀྱི་མེད་རྒྱུའི་བདེན་པ་དེ་དག་དོན་གཅིག་ལ་འདུ་བར་ཐལ། ཆོས་འཁོར་གསུམ་གྱི་དྲང་ངེས་ཀྱི་འཇོག་མཚམས་བདེན་ཡོད་དང་བདེན་མེད་ལེགས་པར་ཕྱེ་མ་ཕྱེ་ལ་བྱེད་པར་ཁྱེད་ཀྱིས་ཁས་བླངས་པའི་ཕྱིར། འདོད་ན། གཏན་ལ་དབབ་པ་བསྡུ་བ་སོགས་རྣམ་རིག་པའི་གཞུང་རྣམས་སུ་ཆོས་ཅན་ཚད་མས་གྲུབ་པ་གཅིག་གི་སྟེང་དུ་བདེན་མེད་མཚན་ཉིད་དང་ལྡན་པ་གཅིག་བསྟན་པར་ཐལ་ལོ། །ཞེས་འཕངས་ན། ཐལ་ཆོས་ལ་ཡང༌། ཁས་བླངས་ཀྱི་བསལ་བ་ཞུགས་སོ།།  །།གསུམ་པ་མགོན་པོ་ཀླུ་སྒྲུབ་ཀྱི་ལུགས་ལ་ཡང༌། མཚན་གཞི་འཛིན་ཚུལ་དེ་ལྟར་མི་འཐད་པ་ནི། ཁྱེད་འདོད་པའི་འཁོར་ལོ་གསུམ་གྱི་མཚན་གཞི་འཛིན་ཚུལ་དེ་ལྟར་འཆད་པ་དེ་ནི། བདག་ཉིད་ཆེན་པོ་ཀླུ་སྒྲུབ་ཀྱི་ལུགས་ལ་རུང་བ་མ་ཡིན་ཏེ། དེའི་བཞེད་པ་ལ་འཁོར་ལོ་དང་པོ་གདུལ་བྱ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ་ཕུང་སོགས་ཐམས་ཅད་རང་གི་མཚན་ཉིད་ཀྱིས་ཡོད་མཉམ་དུ་སྟོན་པ་མ་ཡིན་པའི་ཕྱིར་ཏེ། གདུལ་བྱ་དེ་ལ་ཆོས་ཀྱི་བདག་མེད་སྟོན་དགོས་པ་སློབ་དཔོན་དེ་ཉིད་ཀྱིས་བཞེད་པ་ཡིན་པར་ཟླ་བའི་ཞབས་ཀྱིས་བསྒྲུབས་པའི་ཕྱིར་དང༌། དེའི་བཞེད་པ་ལ་འཁོར་ལོ་གསུམ་པར་བདེན་ཡོད་དང་བདེན་མེད་ཀྱི་ཕྱེ་གསལ་མཛད་པ་མེད་པའི་ཕྱིར། ཅི་སྟེ་ཁོ་བོ་ཅག་དེ་ལྟར་མི་འདོད་དོ་ཞེ་ན། འོ་ན་དེ་ཕྱིན་ཆད་དེའི་ལུགས་ཀྱི་འཁོར་ལོ་གསུམ་པའི་མཚན་གཞི་གང་ཡིན་ཁྱེད་རང་གི་འདོད་པ་གཞན་དང་མ་འདྲེས་པ་ཞིག་གསལ་བར་སྟོན་དགོས་སོ། །ཡང༌། ཁྱེད་ཅག་གིས་མགོན་པོ་ཀླུ་སྒྲུབ་ཀྱི་ལུགས་ལ། སྔར་བཤད་པའི་འཁོར་ལོ་ཐོག་མཐའ་གཉིས་དྲང་དོན་དང༌། བར་པ་ཁོ་ན་ངེས་དོན་གྱི་འཁོར་ལོ་ཡིན་ནོ། །ཞེས་ཟེར་བ་སྣང་བས། ཁྱེད་རང་གི་འཁོར་ལོ་ཐོག་མཐའ་གཉིས་ཀྱི་མཚན་གཞིར་གཟུང་བ་དེ་དག་ཆོས་ཅན། ཀུན་རྫོབ་བདེན་པ་དངོས་བསྟན་གྱི་བརྗོད་བྱའི་གཙོ་བོར་སྟོན་པའི་མདོ་ཡིན་པར་ཐལ། དྲང་དོན་གྱི་མདོ་ཡིན་པའི་ཕྱིར། རྟགས་དང་ཁྱབ་པ་ཁས་བླངས་ཤིང༌། འདོད་ན། ཕུང་སོགས་ཐམས་ཅད་རང་གི་མཚན་ཉིད་ཀྱིས་ཡོད་པ་དེ་ཀུན་རྫོབ་བདེན་པར་ཐལ་བ་དང༌། གཞན་དབང་དང་ཡོངས་གྲུབ་བདེན་པར་ཡོད་པ་དེ་ཡང་ཀུན་རྫོབ་བདེན་པར་ཐལ་ལོ། །ཅི་སྟེ་ཐལ་བ་ཕྱི་མ་འདི་ནི་ཁྱེད་ལ་ཡང་མཚུངས་པ་མ་ཡིན་ནམ། ཁོ་བོ་ཅག་གི་ཕྱོགས་ལ་དེ་དང་དེ་དག་མདོ་དེ་དང་དེའི་དངོས་བསྟན་གྱི་བསྟན་བྱའི་གཙོ་བོར་མི་འདོད་དོ་ཅེ་ན། འོ་ན་གཞན་གང་ཞིག་དེར་འདོད། གལ་ཏེ་ཕུང་སོགས་རང་གི་མཚན་ཉིད་ཀྱིས་གྲུབ་པར་སྟོན་པའི་དངོས་བསྟན་གྱི་བསྟན་བྱའི་གཙོ་བོ་ཕུང་སོགས་ཉིད་ཡིན་པ་དང༌། ལེགས་པར་རྣམ་པར་ཕྱེ་བའི་མདོའི་དངོས་བསྟན་གྱི་བསྟན་བྱའི་གཙོ་བོ་མཚན་ཉིད་གསུམ་ཡིན་པར་འདོད་དོ་སྙམ་ན། ཁོ་བོ་ཅག་གི་འདོད་པ་ནི་ཁྱེད་ཀྱིས་བཤད་པ་དེ་ཉིད་ཡིན་པས། ཁོ་བོ་ཅག་ལ་ཐལ་བ་དེ་ག་ལ་མཚུངས། དེའི་ཕྱིར་ཁོ་བོ་ཅག་ནི་དྲང་དོན་གྱི་སྒྲ་ཇི་བཞིན་པ་མ་ཡིན་པའི་མདོ་དེ་དང༌། དེའི་བསྟན་བྱའི་དོན་གྱི་གཙོ་བོ་ཀུན་རྫོབ་བདེན་པར་ཁས་ལེན་ཀྱང༌། བརྗོད་བྱའི་དོན་གྱི་གཙོ་བོ་ཀུན་རྫོབ་བདེན་པར་ཁས་མི་ལེན་ནོ། །ཁྱེད་ལ་ནང་འགལ་འབྱུང་བའི་ཚུལ་འདི་ལྟར། འཁོར་ལོ་དང་པོར་ཕུང་སོགས་རང་གི་མཚན་ཉིད་ཀྱིས་ཡོད་མཉམ་དུ་སྟོན་པའི་མདོ་དང༌། འཁོར་ལོ་ཐ་མར་ཀུན་བཏགས་བདེན་པར་མེད་ཅིང༌། གཞན་དབང་དང་ཡོངས་གྲུབ་བདེན་གྲུབ་ཏུ་སྟོན་པའི་མདོ་ཆོས་ཅན། མདོ་ཁྱོད་ཀྱི་དགོངས་པ་མདོ་གཞན་གྱིས་བཤད་པ་ལ་མ་ལྟོས་པར། མདོ་རང་གི་དངོས་ཀྱི་བསྟན་ཚོད་ལྟར་གཟུང་དུ་རུང་བར་ཐལ། གོ་རིམ་བཞིན་དུ་ཕུང་སོགས་དང་མཚན་ཉིད་གསུམ་པོ་མདོ་ཁྱོད་ཀྱི་དངོས་བསྟན་གྱི་བརྗོད་བྱའི་གཙོ་བོ་གང་ཞིག དེ་དང་དེ་ཀླུ་སྒྲུབ་རང་ལུགས་ལ་ཞལ་གྱིས་བཞེས་པའི་ཕྱིར། རྟགས་ཕྱི་མ་ཁས་བླངས། འདོད་ན་ནི། དེ་དང་དེ་ཆོས་ཅན། སྒྲ་ཇི་བཞིན་པའི་མདོར་ཐལ། ཞེས་འཕངས་ན་འཁོར་གསུམ་ཚང་བ་ཡིན་ནོ། །མདོར་ན། མདོ་དེ་དང་དེའི་དངོས་བསྟན་གྱི་གཙོ་བོ་གཞི་མ་གྲུབ་པའི་རྒྱུ་མཚན་གྱིས་སྒྲ་ཇི་བཞིན་པ་མ་ཡིན་པར་འདོད་པ་དང༌། དེ་དང་དེའི་དངོས་བསྟན་གྱི་གཙོ་བོ་ཀུན་རྫོབ་བདེན་པར་འདོད་པ་ནི་ཁྱེད་ལ་ནང་འགལ་བ་ཡིན་ནོ། །དེ་བཞིན་དུ་ཀུན་བཏགས་བདེན་པར་མེད་ཅིང་གཞན་དབང་དང་ཡོངས་གྲུབ་བདེན་པར་ཡོད་པ་དེ་ལེགས་པར་རྣམ་པར་ཕྱེ་བའི་ཆོས་འཁོར་གྱི་བསྟན་བྱའི་གཙོ་བོ་ཡིན་ནམ་མ་ཡིན། ཡིན་ན་ནི། དེ་ཀླུ་སྒྲུབ་ཞབས་ཀྱིས་ཀུན་རྫོབ་བདེན་པར་ཞལ་གྱིས་བཞེས་པར་འགྱུར་ལ། མ་ཡིན་ན་ནི། འཕགས་པ་ཐོགས་མེད་ཀྱིས་མདོ་དེ་ངེས་པའི་དོན་ཅན་དུ་བཞེད་པའི་རྒྱུ་མཚན་ཁྱེད་ལ་མེད་པས་ནང་འགལ་ལོ། །མདོ་དེའི་བསྟན་བྱའི་དོན་གྱི་གཙོ་བོ་ངོས་འཛིན་ལ། ཤིང་རྟ་ཆེན་པོ་གཉིས་མི་འདྲའོ་སྙམ་ན་ནི། དེ་སྐད་སྨྲ་བར་རིགས་ཀྱི་སྲོལ་འབྱེད་གཉིས་པོའི་དྲང་ངེས་ཀྱི་མདོའི་མཚན་གཞི་གཅིག་ཏུ་ཁས་བླངས་ནས། མཚན་ཉིད་མི་མཐུན་པར་སྨྲ་བའི་གྲུབ་པའི་མཐའ་གཏིང་ནས་ཉམས་སོ། །གཞན་ཡང་ཤེར་ཕྱིན་མདོ་ཆོས་ཅན། དོན་དམ་པའི་བདེན་པར་དངོས་བསྟན་གྱི་བརྗོད་བྱའི་གཙོ་བོར་སྟོན་པར་ཐལ། ངེས་དོན་གྱི་མདོ་ཡིན་པའི་ཕྱིར། ཁྱབ་པ་ཁས་བླངས། འདོད་ན། ཁྱེད་ལ་ནང་འགལ་བ་འབྱུང་སྟེ། ཤེར་ཕྱིན་གྱི་མདོའི་དངོས་བསྟན་གྱི་གཙོ་བོ་སྒྲ་ཇི་བཞིན་དུ་ཁས་ལེན་དུ་རུང་བར་འགྱུར་ལ། དེ་མི་རུང་བ་ཡང་ཁྱེད་ཀྱི་ཁས་བླངས་པ་ཡིན་ནོ། །དེས་ན་ཤིང་རྟའི་སྲོལ་འབྱེད་གཉིས་ཀའི་སྐབས་སུ་ཐུན་མོང་དུ་འདི་དྲི་བར་བྱ་སྟེ། ཐེག་པ་ཆེན་པོ་རྒྱུད་བླ་མས་ངེས་དོན་དུ་བཀྲལ་བའི་མདོ་རྣམས་ཁྱེད་འདོད་པའི་འཁོར་ལོ་གསུམ་གྱི་ནང་ནས་གང་ཡིན། གང་ཡང་མ་ཡིན་ན། བཀའ་འཁོར་ལོ་རིམ་པ་གསུམ་པོ་གང་རུང་གི་ནང་དུ་མ་གཏོགས་པར་འགྱུར་ཏེ། དེར་མི་འདོད་པ་གང་ཞིག དེ་ལས་གཞན་པའི་འཁོར་ལོ་གསུམ་གྱི་རྣམ་གཞག་ཁྱེད་ཀྱིས་ཁས་མི་ལེན་པའི་ཕྱིར་ཏེ། གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་ལས་འབྱུང་བའི་རིམ་པ་གསུམ་པོ་དེས། གདུལ་བྱ་གཅིག་ཉིད་ཀྱི་ཁམས་ཀྱི་དྲི་མ་སྦྱོང་ཚུལ་སྟོན་པ་ཡིན་གྱི། འཁོར་ལོ་གསུམ་གྱི་རྣམ་གཞག་འཆད་པ་མ་ཡིན་ཞེས་ཁྱེད་ཀྱིས་གསལ་བར་སྨྲས་པའི་ཕྱིར། དེ་ཡང་འདོད་ན། ཇི་སྐད་དུ། སྔར་ནི་དེ་ལྟར་རྣམ་གཞག་ནས། །སླར་ཡང་བླ་མའི་རྒྱུད་འདིར་ནི། །ཉེས་པ་ལྔ་དག་སྤང་བའི་ཕྱིར། །ཁམས་ཡོད་ཉིད་ཅེས་བཤད་པ་ཡིན། །ཞེས་གསུངས་པ་དང་འགལ་ལོ། །ཅི་སྟེ་དེ་དག་སྔར་བཤད་པའི་འཁོར་ལོ་ཐ་མའོ་སྙམ་ན། འོ་ན་དེ་དག་ཆོས་ཅན། ཀླུ་སྒྲུབ་ཀྱི་བཞེད་པ་ལྟར་ན་དྲང་དོན་གྱི་མདོ་དང༌། ཐོགས་མེད་ལྟར་ན་གཞན་དབང་དང་ཡོངས་གྲུབ་བདེན་གྲུབ་ཏུ་སྟོན་པའི་མདོར་ཐལ། དགོངས་འགྲེལ་དུ་དྲང་ངེས་དཔྱོད་པའི་གཞིར་གྱུར་པའི་འཁོར་ལོ་ཐ་མ་དེ་ཡིན་པའི་ཕྱིར། ཞེས་འཕངས་ན་འཁོར་གསུམ་ཚང་བའི་ཐལ་བའོ། །གཉིས་པ་རང་ལུགས་བཞག་པ་ལ་གསུམ་སྟེ། དྲང་ངེས་ཀྱི་འཇོག་ལུགས་སྤྱིར་བཤད་པ་དང༌། ཤིང་རྟའི་སྲོལ་འབྱེད་གཉིས་ཀྱི་བཞེད་པ་དང་སོ་སོར་སྦྱར་བ། དེས་ན་སྲོལ་འབྱེད་གཉིས་ཀྱི་བཞེད་ཚུལ་མི་འགལ་བར་གྲུབ་པའོ། །དང་པོ་ལ་གཉིས་ཏེ། གསུང་རབ་ཐམས་ཅད་མཐར་ཐུག་གི་བརྗོད་བྱ་ལ་ལྟོས་ནས་ངེས་པའི་དོན་ཅན་ཁོ་ནར་སྒྲུབ། གནས་སྐབས་ཀྱི་བརྗོད་བྱ་ལ་ལྟོས་ནས་དྲང་ངེས་སོ་སོར་ཕྱེ་བའོ། །དང་པོ་ནི། ཇི་སྐད་དུ། ཏིང་ངེ་འཛིན་རྒྱལ་པོའི་མདོ་ལས། འཇིག་རྟེན་ཁམས་ནི་སྟོང་ཕྲག་ཏུ། །ང་ཡིས་མདོ་རྣམས་གང་བཤད་པ། །ཡི་གེ་ཐ་དད་དོན་གཅིག་སྟེ། །ཡོངས་སུ་བསྒྲག་པར་ནུས་མ་ཡིན། །དངོས་པོ་གཅིག་ནི་བསམ་བྱས་ན། །དེ་དག་ཐམས་ཅད་གོམས་འགྱུར་ཏེ། །སངས་རྒྱས་ཀུན་གྱིས་ཆོས་མང་པོ། །ཇི་སྙེད་རབ་ཏུ་བསྟན་པ་རྣམས། །ཆོས་རྣམས་ཀུན་གྱི་བདག་མེད་ཡིན། །མི་གང་དོན་ལ་མཁས་རྣམས་ཀྱིས། །གནས་འདི་ལ་ནི་བསླབ་བྱས་ནས། །སངས་རྒྱས་ཆོས་རྣམས་རྙེད་མི་དཀའ། །ཞེས་གསུངས་སོ། །གཉིས་པ་ལ། འཇིག་རྟེན་པ་དང་ཉན་ཐོས་པ་དག་ལ་ཡང༌། དྲང་བ་དང་ངེས་པའི་དོན་གྱི་རྣམ་པར་བཞག་པ་ཡོད་མོད། དེ་འདིར་མི་འཆད་པར་ཐེག་པ་ཆེན་པོ་ལས་བྱུང་བ་ཉིད་བརྗོད་པར་བྱ་སྟེ། འདི་ལྟར་དྲང་བ་དང་ངེས་པའི་དོན་ཅན་གྱི་རྣམ་པར་བཤད་པ་འདི་ནི་སངས་རྒྱས་ཀྱི་ཆོས་སྟོན་ཚུལ་ལས་རྣམ་པར་ཕྱེ་བ་ཡིན་ལ། དེ་ལ་ཡང་ཚུལ་མི་འདྲ་བ་གཉིས་ཏེ། ཇི་སྐད་དུ། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །ཞེས་གསུངས་པའི་ཕྱིར་རོ། །དེ་ལྟར་ན། དྲང་བའི་དོན་ཅན་གྱི་གསུང་རབ་ཀྱི་མཚན་ཉིད་ནི། གདུལ་བྱའི་ཁྱད་པར་གནས་སྐབས་ཀུན་རྫོབ་ཀྱི་བདེན་པ་གཙོ་བོར་སྟོན་དགོས་པའི་གདུལ་བྱ་ལ། བསྟན་བྱའི་ཁྱད་པར་ཀུན་རྫོབ་ཀྱི་བདེན་པ་ཉིད་གནས་སྐབས་ཀྱི་བསྟན་བྱའི་གཙོ་བོར་སྟོན་པའི་གསུང་རབ་བོ། །ངེས་པའི་དོན་ཅན་གྱི་གསུང་རབ་ཀྱི་མཚན་ཉིད་ནི། གདུལ་བྱའི་ཁྱད་པར་དོན་དམ་པའི་བདེན་པ་སྟོན་པ་སྐབས་སུ་བབ་པའི་གདུལ་བྱ་ལ་བསྟན་བྱའི་ཁྱད་པར་དོན་དམ་པ་ཉིད་གནས་སྐབས་དང་མཐར་ཐུག་གི་བསྟན་བྱའི་གཙོ་བོར་བྱས་ནས་སྟོན་པའི་གསུང་རབ་བོ། །དེ་རེ་རེ་ལའང་གཉིས་གཉིས་ཏེ། སྒྲ་ཇི་བཞིན་པ་དང༌། ཇི་བཞིན་པ་མ་ཡིན་པའོ། །ཕྱི་མ་དེ་རེ་རེ་ལ་ཡང་གཉིས་གཉིས་ཏེ། དགོངས་པ་ཅན་དང༌། དགོངས་པ་ཅན་མ་ཡིན་པའོ། །དང་པོ་དྲང་དོན་གྱི་སྒྲ་ཇི་བཞིན་པ་ནི། འདུས་བྱས་མི་རྟག་པར་སྟོན་པའི་མདོ་ལྟ་བུའོ། །གཉིས་པ་སྒྲ་ཇི་བཞིན་པ་མ་ཡིན་པ་ལ་གཉིས་ལས། དགོངས་པ་ཅན་ནི་འོ་སྐོལ་གྱི་སྟོན་པས་ང་དེའི་ཚེ་སངས་རྒྱས་རྣམ་གཟིགས་སུ་གྱུར་ཏོ། །ཞེས་གསུངས་པ་ལྟ་བུའོ། །དགོངས་པ་ཅན་མ་ཡིན་པ་ནི། ཕྱི་རོལ་པ་བསྟན་པ་ལ་གཞུག་པའི་དོན་དུ་བདག་ཡོད་པར་གསུངས་པ་ལྟ་བུའོ། །གཉིས་པ་ངེས་དོན་གྱི་སྒྲ་ཇི་བཞིན་པ་ནི། ཆོས་ཐམས་ཅད་བདག་མེད་དུ་སྟོན་པའི་མདོ་ལྟ་བུའོ། །གཉིས་པ་སྒྲ་ཇི་བཞིན་པ་མ་ཡིན་པ་ལ་གཉིས་ལས། དགོངས་པ་ཅན་ནི་བདག་དམ་པའི་ཕ་རོལ་ཏུ་ཕྱིན་པ་སྟོན་པའི་མདོ་ལྟ་བུའོ། །དགོངས་པ་ཅན་མ་ཡིན་པ་ནི། སྙིང་པོ་མེད་ལ་སྙིང་པོར་ཤེས། །ཞེས་གསུངས་པ་ལྟ་བུའོ། །དེ་ཡང༌། གནས་སྐབས་སུ་ཀུན་རྫོབ་བདེན་པ་སྟོན་དགོས་པའི་གདུལ་བྱ་ནི་གཉིས་ཏེ། ངེས་དོན་གྱི་སྣོད་དུ་མ་གྱུར་པ་དང༌། གྱུར་ཀྱང་ཐབས་ཀྱི་ཆ་སྟོན་དགོས་པའོ། །སྟོན་ཚུལ་ལ་གཉིས་ཏེ། བསྟན་བྱའི་དོན་གྱི་གཙོ་བོར་སྟོན་པ་དང༌། བརྗོད་བྱའི་དོན་གྱི་གཙོ་བོར་སྟོན་པའོ། །འདི་གཉིས་ཀྱི་མི་འདྲ་བའི་ཁྱད་པར་ཅི་ཞེ་ན། བསྟན་བྱའི་གཙོ་བོ་ནི་ཞེ་འདོད་ཀྱི་གཙོ་བོ་ལ་བྱ་ལ། བརྗོད་བྱ་ནི་དངོས་དང་ཞེན་པའི་བརྗོད་བྱ་གང་རུང་ཁོ་ནའོ། །དེ་ལྟར་ན་བརྗོད་བྱ་ཡིན་ལ་བསྟན་བྱ་མ་ཡིན་པ་ནི། བདག་ཡོད་པ་དེ་བདག་ཡོད་དོ་ཞེས་པའི་མདོའི་ཞེན་པའི་བརྗོད་བྱར་བཞག་དགོས་པ་ལྟ་བུའོ། །དེའི་ཕྱིར་སྒྲ་ཇི་བཞིན་པ་ཡིན་མིན་ནི་བརྗོད་བྱའི་ངོས་ནས་བཞག་ལ། དྲང་ངེས་ཀྱི་འཇོག་མཚམས་ནི། བསྟན་བྱའི་དོན་གྱི་གཙོ་བོ་ལས་རྣམ་པར་ཕྱེ་བ་ཡིན་ནོ། །ཡང་གང་ལ་དོན་དམ་པ་སྟོན་པའི་གདུལ་བྱ་ལ་ཡང་གནས་སྐབས་དང་མཐར་ཐུག་གི་དབྱེ་བས་གཉིས་ཡོད་ཀྱང༌། མཐར་ཐུག་དོན་དམ་པའི་བདེན་པ་སྟོན་མི་དགོས་པའི་གདུལ་བྱ་མི་སྲིད་ལ། གནས་སྐབས་གདུལ་བྱ་དམན་པའི་རིགས་ཅན་ལ། དམན་པ་ཉིད་ལ་ལྟོས་པའི་ངེས་དོན་སྟོན་ཚུལ་དང༌། ཐེག་པ་ཆེན་པོའི་རིགས་ཅན་ལ་ཐེག་པ་ཆེན་པོ་ལ་ལྟོས་པའི་ངེས་དོན་སྟོན་ཚུལ་གཉིས་ལས། དང་པོ་ནི། སྲོལ་འབྱེད་གཉིས་པོ་གང་གི་ལུགས་ལྟར་ན་ཡང༌། འཁོར་ལོ་དང་པོར་བསྟན་ལ། སྟོན་ཚུལ་གཉིས་པ་ནི་འཁོར་ལོ་གཉིས་པ་ཕན་ཆད་ནས་སྟོན་པ་ཡིན་ནོ། །དེ་ལྟར་དྲང་ངེས་གཉིས་ལ། སྒྲ་ཇི་བཞིན་པ་ཡིན་མིན་སོགས་བཞི་བཞི་ཕྱེ་བ་དེ་བཞིན་དུ། གཞན་བཞི་པོ་ལའང་དྲང་ངེས་སོགས་བཞི་བཞི་འབྱེད་དགོས་པ་ཤེས་པར་བྱས་ནས་འདི་ལྟར་བཤད་པར་བྱ་སྟེ། རྗོད་བྱེད་གསུང་རབ་ལ་དྲང་དོན་གྱི་དྲང་དོན་དང༌། དྲང་དོན་གྱི་ངེས་དོན་གཉིས་དང༌། ཡང༌། ངེས་དོན་གྱི་དྲང་དོན་དང༌། ངེས་དོན་གྱི་ངེས་དོན་གཉིས་ཏེ་བཞིའོ། །བརྗོད་བྱ་བདེན་པ་གཉིས་ལའང་དེ་བཞིན་དུ་བཞི་སྟེ། སྔ་མ་བཞི་དང་གོ་རིམ་བཞིན་དུ་བཤད་བྱ་དང་འཆད་བྱེད་དུ་སྦྱར་བར་བྱ་བ་ཡིན་ནོ། །རྣམ་གཞག་དེ་ལྟར་སྟོན་པའི་ལུང་གི་ཁུངས་ནི། འཕགས་པ་བློ་གྲོས་མི་ཟད་པ་བསྟན་པའི་མདོ་ལས། དེ་ལ་ངེས་པའི་དོན་གྱི་མདོ་སྡེ་ནི་གང༌། དྲང་བའི་དོན་གྱི་མདོ་སྡེ་ནི་གང་ཞེ་ན། མདོ་སྡེ་གང་དག་ཀུན་རྫོབ་བསྒྲུབ་པ་བསྟན་པ་དེ་དག་ནི། དྲང་བའི་དོན་ཞེས་བྱའོ། །མདོ་སྡེ་གང་དག དོན་དམ་པའི་བདེན་པ་བསྒྲུབ་པ་བསྟན་པ་དེ་དག་ནི་ངེས་པའི་དོན་ཞེས་བྱའོ། །ཞེས་གསུངས་པ་དེ་ལས་ནི་བརྗོད་བྱ་བདེན་པ་གཉིས་ཀྱི་སྒོ་ནས་དྲང་ངེས་ཀྱི་རྣམ་གཞག་མཛད་པའོ། །ཡང་མདོ་སྡེ་དེ་ཉིད་ལས། མདོ་སྡེ་གང་དག བདག་དང༌། སེམས་ཅན་དང༌། སྲོག་དང༌། གསོ་བ་དང༌། སྐྱེས་བུ་དང༌། གང་ཟག་དང༌། ཤེད་ལ་སྐྱེས་དང༌། ཤེད་བུ་དང༌། བྱེད་པ་པོ་དང༌། ཚོར་བ་པོ། སྐད་སྣ་ཚོགས་ཀྱིས་བཤད་པར་བྱ་བ་བདག་པོ་མེད་པ་ལ་བདག་པོ་ལྟ་བུར་བསྟན་པ་དེ་དག་ནི་དྲང་པའི་དོན་ཞེས་བྱའོ། །མདོ་སྡེ་གང་དག སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། མངོན་པར་འདུ་བྱེད་པ་མེད་པ་དང༌། སྐྱེ་བ་མེད་པ་དང༌། མ་སྐྱེས་པ་དང༌། སེམས་ཅན་མེད་པ་དང༌། སྲོག་མེད་པ་དང༌། གང་ཟག་མེད་པ་དང༌། བདག་པོ་མེད་པ་རྣམ་པར་ཐར་པའི་སྒོ་སྟོན་པ་དེ་དག་ནི་ངེས་པའི་དོན་ཞེས་བྱ་སྟེ། ཞེས་གསུངས་པ་འདིས་ནི། རྗོད་བྱེད་སྒྲ་ཇི་བཞིན་པ་ཡིན་མིན་གྱི་སྒོ་ནས་དྲང་ངེས་གཞག་པའོ། །དེ་ཡང་མདོ་སྔ་མ་གཉིས་ཀྱིས་ནི། ངེས་དོན་གྱི་ངེས་དོན་དང༌། དྲང་དོན་གྱི་ངེས་དོན་གཉིས་བཤད་ལ། མདོ་ཕྱི་མ་གཉིས་ཀྱིས་ནི་ངེས་དོན་གྱི་དྲང་དོན་དང༌། དྲང་དོན་གྱི་དྲང་དོན་གཉིས་བཤད་དོ། །དེ་ཡང༌། བདག་དང་སེམས་ཅན་སོགས་ཡོད་པར་སྟོན་པའི་མདོ་དང༌། དེའི་བརྗོད་བྱ་ནི་དྲང་དོན་གྱི་དྲང་དོན་ནོ། །འདིར་དྲང་དོན་དངོས་ནི། ཡང་དག་ཀུན་རྫོབ་དང༌། དྲང་དོན་གྱི་ཡང་དྲང་དོན་ནི་ལོག་པའི་ཀུན་རྫོབ་ལ་བྱེད་པ་ཡིན་ལ། དེའི་ཚེ་དྲང་དོན་གྱི་ཡང་དྲང་དོན་གྱི་མདོའི་བརྗོད་བྱ་ལོག་པའི་ཀུན་རྫོབ་དང༌། དེའི་བསྟན་བྱའི་གཙོ་བོ་ཡང་དག་པའི་ཀུན་རྫོབ་ལ་བྱེད་དགོས་པར་ཤེས་པར་བྱ་ལ། དེ་ཡང་སངས་རྒྱས་ཀྱི་གསུངས་དགོངས་འགྲེལ་དང་བཅས་པའི་དབང་དུ་བྱས་པ་ཡིན་གྱི་གཞན་ལ་ནི་མ་ཡིན་ནོ། །ཡང་བདག་དང་སེམས་ཅན་སོགས་མེད་པར་སྟོན་པའི་མདོ་དང་དེའི་བརྗོད་བྱ་ནི་ངེས་དོན་གྱི་དྲང་དོན་ནོ། །དེ་ཡང་གང་ཟག་གི་བདག་མེད་གནས་སྐབས་ཀྱི་ངེས་དོན་ཡིན་པ་ནི། སྲོལ་འབྱེད་གཉིས་ཀའི་ལུགས་ལ་འདྲ་བར་ཁས་ལེན་དགོས་པ་ཡིན་ཏེ། དེ་ཉན་ཐོས་དང་ཐུན་མོང་པའི་ངེས་དོན་ཡིན་གྱི། ཐེག་ཆེན་ཐུན་མོང་མ་ཡིན་པའི་ངེས་དོན་མཐར་ཐུག་ཏུ་མི་བཞེད་པར་མཚུངས་པའི་ཕྱིར་རོ། །ཡང་མཐར་ཐུག་གི་དོན་དམ་པའི་བདེན་པ་སྟོན་པའི་གསུང་རབ་དང༌། དེའི་བརྗོད་བྱ་ནི་ངེས་དོན་གྱི་ངེས་དོན་དང༌། ཡང་དག་པའི་ཀུན་རྫོབ་སྟོན་པའི་གསུང་རབ་དང་དེའི་བརྗོད་བྱ་ནི། དྲང་དོན་གྱི་ངེས་དོན་ནོ། །འོ་ན་དྲང་ངེས་ཀྱི་ཚུལ་བཞི་པོ་དེ་ལས་གང་དབང་བཙན་པར་བྱེད་ཅེ་ན། བཤད་པ། ཀུན་རྫོབ་ཀྱི་བདེན་པ་གཙོ་བོར་སྟོན་པའི་གསུང་རབ་ཚད་མར་ཁས་བླངས་ནས། ཀུན་རྫོབ་ཀྱི་བདེན་པ་རྣམ་པར་འཇོག་པ་དེའི་ཚེ། དྲང་དོན་ཉིད་གཞིར་བྱས་པའི་དྲང་ངེས་གཉིས་པོ་དབང་བཙན་པར་བྱེད་དགོས་པ་ཡིན་ཏེ། དེའི་ཚེ་ཅིག་ཤོས་གཉིས་པོ་ཚད་མར་བྱས་ན། ཐ་སྙད་ཀྱི་བདེན་པ་འཇོག་མི་ཤེས་པ་དང་ཐབས་ཀྱི་ཆ་རྣམས་དོར་བ་དང༌། ཀུན་རྫོབ་ཀྱི་བདེན་པ་རིགས་པས་དཔྱད་བཟོད་དུ་ཐལ་བ་སོགས་ཀྱི་ཉེས་པས་གོས་པར་འགྱུར་རོ། །ཡང་དོན་དམ་པའི་བདེན་པ་གཙོ་བོར་གཏན་ལ་འབེབས་པའི་གསུང་རབ་ཚད་མར་བྱས་ནས་དོན་དམ་པའི་བདེན་པ་རྣམ་པར་འཇོག་པ་དེའི་ཚེ། ངེས་དོན་ཉིད་གཞིར་བྱས་པའི་དྲང་ངེས་ཀྱི་ཚུལ་གཉིས་པོ་ཁོ་ན་ཁས་ལེན་དགོས་པ་ཡིན་ཏེ། དེའི་ཚེ་གཞན་གཉིས་པོ་ཚད་མར་ཁས་བླངས་ན་དོན་དམ་པའི་བདེན་པ་ལས་ཉམས་པར་འགྱུར་བའི་ཕྱིར། དཔེར་ན་མྱུ་གུ་སྐྱེ་མེད་དུ་ཁས་ལེན་དགོས་པ་དེའི་ཚེ། མྱུ་གུ་སྐྱེ་བར་སྟོན་པའི་ལུང་རྣམས་ཁས་བླང་དུ་མི་རུང་བ་བཞིན་ནོ། །དོན་དེ་ཉིད་ཐུགས་ལ་ཉེ་བར་བཞག་ནས། རྗེ་བཙུན་ས་སྐྱ་པཎྜི་ཏས་ལྟ་བའི་ལུང་སྦྱོར་དང༌། སྤྱོད་པའི་ལུང་སྦྱོར་མ་འདྲེས་པར་བྱེད་དགོས་པར་གསུངས་སོ། །འོ་ན་དྲང་དོན་གྱི་ཚུལ་གཉིས་ཀས་དྲང་དོན་གྱི་གོ་ཆོད་པ་དང༌། ངེས་དོན་གྱི་ཚུལ་གཉིས་ཀས་ངེས་དོན་གྱི་གོ་ཆོད་པར་ཁས་ལེན་པ་ཡིན་ནམ་ཞེ་ན། སྤྱི་ཙམ་ནས་དྲང་ངེས་ཀྱི་རྣམ་པར་གཞག་པ་བྱེད་པ་དེའི་ཚེ། དེས་དེའི་གོ་ཆོད་པ་ཡིན་ཏེ། དེའི་ཚེ་དབྱེ་བའི་ཡ་གྱལ་དེ་དང་དེ་ཡིན་ན། དབྱེ་གཞི་དེ་དང་དེ་ཡིན་དགོས་པའི་ཕྱིར། བདེན་པ་གཉིས་ཀྱི་རྣམ་གཞག་ཁས་ལེན་ཚུལ་ཤས་ཆེ་ཆུང་གི་ཁྱད་པར་ཡོད་པ་དེའི་ཚེ་ནི། དེས་དེའི་གོ་ཆོད་པའི་ངེས་པ་ཡོད་པ་མ་ཡིན་ཏེ། དཔེར་ན། ངེས་དོན་གྱི་དྲང་དོན་ཡིན་ན། དོན་དམ་བདེན་པ་འཇོག་པའི་དུས་ཀྱི་དྲང་དོན་ཡིན་དགོས་པ་བཞིན། དེའི་འཐད་པ་ཡང༌། གང་ཟག་གི་བདག་མེད་དེ་ཉེར་ལེན་གྱི་ཕུང་པོ་ལྔ་ལ་ལྟོས་ནས་སམ། སྤྱི་ཙམ་ནས་དོན་དམ་བདེན་པ་ཡིན་ཡང༌། ཆོས་ཀྱི་བདག་མེད་ལ་ལྟོས་ནས་དྲང་དོན་དུ་འཆད་དགོས་པ་ནི། ཤིང་རྟའི་སྲོལ་གཉིས་ཀ་ལ་འདྲ་བ་ཡིན་པས་སོ། །མདོར་ན། ཐོགས་མེད་སྐུ་མཆེད་ཀྱི་ལུགས་ལ་ཡང༌། དྲང་ངེས་ཀྱི་གོ་དོན་འཇོག་པའི་ལུང་ཁུངས་ནི། བློ་གྲོས་མི་ཟད་པ་དང༌། ཏིང་ངེ་འཛིན་རྒྱལ་པོའི་མདོ་ནས་བཤད་པ་དེ་ཉིད་ལ་བརྟེན་པ་ཡིན་གྱི། དེ་ལས་གོ་དོན་ལོགས་པ་གཞན་ཡོད་པ་མ་ཡིན་ཏེ། སྐུ་མཆེད་གཉིས་ཀྱི་དགོངས་འགྲེལ་ལ་བརྟེན་ནས་དྲང་ངེས་ཕྱེ་བ་ཡིན་ནོ། །ཞེས་ཟེར་བ་བརྟགས་ན་སྙིང་པོ་མི་སྣང་བའི་ཕྱིར་དང༌། དབྱིག་གཉེན་ཞབས་ཀྱིས་དྲང་མ་ཐག་པའི་མདོ་དེ་ཉིད་ལ་བརྟེན་ནས་དྲང་ངེས་མཛད་པའི་ཕྱིར་རོ། །གཉིས་པ་ལ་གཉིས་ཏེ། ཐོགས་མེད་སྐུ་མཆེད་ཀྱི་བཞེད་པ་ལས་བརྩམས་ནས་བཤད་པ་དང༌། ཀླུ་སྒྲུབ་ཡབ་སྲས་ཀྱི་བཞེད་པ་ལས་བརྩམས་ནས་ཕྱེ་བའོ། །དང་པོ་ལ། མདོ་སྡེ་དགོངས་པ་ངེས་འགྲེལ་གྱི་དོན་འཆད་ཚུལ་དང༌། གཟུངས་དབང་གི་རྒྱལ་པོས་ཞུས་པའི་མདོའི་དོན་འཆད་ཚུལ་ལོ། །དང་པོ་ལ། བཤད་བྱའི་དོན་ནི། ཇི་སྐད་དུ། བཅོམ་ལྡན་འདས་ཀྱིས་དང་པོར་ཡུལ་ཝ་ར་ན་སི་དྲང་སྲོང་སྨྲ་བ་རི་དྭགས་ཀྱི་ནང་དུ། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ། ཞེས་སོགས་ཀུན་གྱིས་འདོན་པ་དེ་ཉིད་ཡིན་ལ། དེའི་དོན་འཆད་པ་ལ། རང་གི་འདོད་པ་དང༌། གཞན་གྱིས་བརྟགས་པའི་མཐའ་དགག་པའོ། །དང་པོ་ནི། འདི་ལྟར། བཀའ་དང་པོ་བདེན་པ་བཞིའི་ཆོས་འཁོར་ནི་དྲང་བའི་དོན་ཅན་ཡིན་ཏེ། གདུལ་བྱ་ཀུན་རྫོབ་ཀྱི་བདེན་པ་གཙོ་བོར་སྟོན་དགོས་པའི་རིགས་ཅན་ལ། དེ་ཉིད་བསྟན་བྱའི་གཙོ་བོར་སྟོན་པའི་འཁོར་ལོ་ཡིན་པའི་ཕྱིར། རྒྱུ་མཚན་དེ་ཉིད་ཀྱིས་ན་འཁོར་ལོ་འདི་ལ། བླ་ན་མཆིས་པ་དང༌། སྐབས་མཆིས་པ་དང༌། རྩོད་པའི་གཞིར་གྱུར་པ་ཞེས་ཀྱང་བྱའོ། །འདི་ལ་ཡང༌། ལས་རྒྱུ་འབྲས་སྟོན་པ་ལྟ་བུ་དྲང་དོན་གྱི་ངེས་དོན་དང༌། ཕྱི་རོལ་གྱི་དོན་ཡོད་པར་གསུངས་པ་ལྟ་བུ་དྲང་དོན་གྱི་དྲང་དོན་གཉིས་སོ། །འཁོར་ལོ་འདིའི་སྤྱི་ལྡོག་ནས་དྲང་པའི་དོན་ཅན་ཡིན་ཀྱང༌། དེའི་ནང་ཚན་དུ་གྱུར་པའི་ངེས་པའི་དོན་ཅན་མེད་པ་ནི་མ་ཡིན་ཏེ། གང་ཟག་གི་བདག་མེད་པར་སྟོན་པའི་མདོ་རྣམས་ངེས་པའི་དོན་ཅན་དུ་ཁས་ལེན་དགོས་པའི་ཕྱིར། དགོངས་འགྲེལ་དུ། དོན་དམ་ཡང་དག་འཕགས་ཀྱིས་སྟོན་པ་ལ་དྲི་བ་ཞུས་པ་ཡང་འཁོར་ལོ་དང་པོར་སྐྱེ་འགག་ལ་སོགས་པའི་ཀུན་རྫོབ་བདེན་པ་རྣམས་ཡོད་པར་གསུངས་པ་དང༌། འཁོར་ལོ་བར་པར་ཆོས་ཐམས་ཅད་སྐྱེ་འགག་མ་མཆིས་པ་ལ་སོགས་པར་གསུངས་པའི་དགོངས་པ་གང་ཡིན་ཞུས་པ་ཡིན་ལ། དེ་ལ་སྟོན་པས་ལན་འདེབས་པའི་ཚེ་ཡང༌། སྔ་མ་ཀུན་རྫོབ་ཀྱི་དབང་དུ་བྱས་པ་དང༌། ཕྱི་མ་དོན་དམ་གྱི་དབང་དུ་བྱས་པའི་ལན་མཛད་པ་ཡིན་ཏེ། མདོ་དེའི་དོན་ཉེ་བར་བསྡུས་པ་ན། ཉི་ཤུ་པ་ལས། གཟུགས་སོགས་སྐྱེ་མཆེད་ཡོད་པར་ནི། །དེས་འདུལ་བ་ཡི་སྐྱེ་བོ་ལ། །དགོངས་པའི་དབང་གིས་གསུངས་པ་སྟེ། །ཞེས་སོགས་དང༌། སུམ་ཅུ་པ་ལས། ངོ་བོ་ཉིད་ནི་རྣམ་གསུམ་གྱི། །ཞེས་སོགས་གསུངས་པ་ཡིན་ནོ། །མདོར་ན་འཁོར་ལོ་འདིས་ཀུན་རྫོབ་བདེན་པ་གཙོ་བོར་སྟོན་པའི་ཆ་ནས་དྲང་བའི་དོན་དང་བླ་ན་མཆིས་པ་ཞེས་བྱ་ལ། སྒྲ་ཇི་བཞིན་པ་མ་ཡིན་པ་མང་པོ་བཤད་པའི་ཆ་ནས་སྐབས་མཆིས་པ་དང༌། རྩོད་པའི་གཞིར་གྱུར་པ་ཞེས་བྱའོ། །ཡང་འཁོར་ལོ་ཕྱི་མ་གཉིས་ནི་ངེས་པའི་དོན་ཅན་ཞེས་བྱ་སྟེ། ཆེད་དུ་བྱ་བའི་གདུལ་བྱ་ཐེག་པ་ཆེན་པོའི་རིགས་ཅན་ལ། བསྟན་བྱའི་གཙོ་བོ་དོན་དམ་པའི་བདེན་པ་ཁོ་ན་གཙོ་བོར་སྟོན་པའི་འཁོར་ལོ་ཡིན་པའི་ཕྱིར། འདི་ལ་གཉིས་ཏེ། ངེས་དོན་གྱི་དྲང་དོན་འཆད་པའི་འཁོར་ལོ་དང༌། ངེས་དོན་གྱིའང་ངེས་དོན་ཉིད་འཆད་པའི་འཁོར་ལོའོ། །དང་པོ་ནི། ངེས་དོན་སྒྲ་ཇི་བཞིན་པ་མ་ཡིན་པའི་སྒོ་ནས་འཆད་པའི་འཁོར་ལོ་སྟེ། འཁོར་ལོ་གཉིས་པའོ། །འཁོར་ལོ་གཉིས་པ་འདི་ཆོས་ཅན། རྗོད་བྱེད་ཀྱི་སྒོ་ནས་དྲང་བའི་དོན་ཅན་ཞེས་བྱ་སྟེ། རང་གི་བསྟན་བྱའི་དོན་དེ་ཉིད་སྒྲ་ཇི་བཞིན་པ་མ་ཡིན་པའི་སྒོ་ནས་འཆད་པའི་འཁོར་ལོ་ཡིན་པའི་ཕྱིར། དེ་ཉིད་ཀྱི་ཕྱིར། བླ་ན་མཆིས་པ་དང༌། སྐབས་མཆིས་པ་དང༌། རྩོད་པའི་གཞིར་གྱུར་པ་ཞེས་ཀྱང་བྱའོ། །དེ་དག་གི་དོན་ཡང༌། མདོ་སྡེ་འདིའི་བསྟན་བྱའི་དོན་ལས་ཁྱད་པར་དུ་འཕགས་པའི་དོན་གཞན་ཞིག་སྟོན་པའི་ཆོས་ཀྱི་འཁོར་ལོ་ཡོད་པར་སྟོན་པ་མ་ཡིན་གྱི། འོ་ན་ཅི་ཞེ་ན། འཁོར་ལོ་གཉིས་པ་སྒྲ་ཇི་བཞིན་པ་མ་ཡིན་པའི་སྒོ་ནས་བསྟན་པའི་ངེས་དོན་མཐར་ཐུག་དེ་ཉིད་སྒྲ་ཇི་བཞིན་པའི་སྒོ་ནས་འཆད་པའི་འཁོར་ལོ་གསུམ་པ་བསྐོར་དགོས་པའི་ཕྱིར། བླ་ན་མཆིས་པ་དང༌། དྲང་བའི་དོན་ཞེས་བྱ་ལ། དེའི་སྒྲ་ཇི་བཞིན་པ་ལ་ཐེག་པ་ཆེ་ཆུང་གཉིས་ཀའི་རྩོད་པ་འབྱུང་བའི་ཕྱིར། སྐབས་མཆིས་པ་དང༌། རྩོད་པའི་གཞིར་གྱུར་པ་ཞེས་བྱའོ། །དེ་ལྟར་བྱས་ན། འཁོར་ལོ་བར་པ་འདིའི་བསྟན་བྱའི་དོན་ནི། ངེས་དོན་དོན་དམ་པའི་བདེན་པ་མཐར་ཐུག་ཡིན་པ་དང༌། སྒྲ་ཇི་བཞིན་པའི་བརྗོད་བྱ་ནི། སྤྱིར་ཀུན་རྫོབ་དང༌། ཁྱད་པར་ལོག་པའི་ཀུན་རྫོབ་ཏུ་བཞག་དགོས་པ་ཡིན་ནོ། །དེའི་ཕྱིར་སྟོན་བྱེད་ཚིག་གི་སྒོ་ནས་དྲང་དོན་གྱི་འཁོར་ལོ་དང༌། བསྟན་བྱ་དོན་གྱི་སྒོ་ནས་ངེས་དོན་གྱི་འཁོར་ལོར་བཞག་དགོས་པ་ཡིན་ནོ། །དེ་ལས་གཞན་དུ་ན། མདོ་དེ་ཉིད་ཀྱིས་དངོས་བསྟན་ལ་འགལ་བ་ཞུགས་པ་འགྱུར་རོ། །ཅི་ལྟར་ཞེ་ན། བཅོམ་ལྡན་འདས་ཀྱིས་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་ཆེས་ངོ་མཚར་རྨད་དུ་བྱུང་བ་དང་ལྡན་པའི་ཆོས་ཀྱི་འཁོར་ལོ་གཉིས་པ་བསྐོར་བ་དེ་དྲང་བའི་དོན་ཅན་ཡིན་ན། དེ་ལས་གཞན་གང་ཟག་ཐེག་པ་དམན་པ་ལ་ཞུགས་པ་འགའ་ཞིག་ལ། ཆེས་ངོ་མཚར་རྨད་དུ་བྱུང་བ་མ་ཡིན་པའི་འཁོར་ལོ་ཞིག་ངེས་དོན་དུ་འཆད་དགོས་པར་འགྱུར་བའི་ཕྱིར་རོ། །འཁོར་ལོ་གཉིས་པའི་སྤྱི་ལྡོག་ནས་སྒྲ་ཇི་བཞིན་པ་མ་ཡིན་ཀྱང༌། དེའི་ནང་ཚན་ཐམས་ཅད་ལ་དེར་མ་ངེས་ཏེ། ཀུན་རྫོབ་ཀྱི་ཆ་སྟོན་པ་རྣམས་དང༌། བྱམས་ཞུས་ཀྱི་ལེའུ་ལྟ་བུ་སྒྲ་ཇི་བཞིན་པར་ཁས་ལེན་དགོས་པ་ཡང་དུ་མ་དམིགས་པའི་ཕྱིར་རོ། །འོ་ན་ལུགས་འདིར་ཤེས་ཕྱིན་གྱི་མདོ་ངེས་དོན་དུ་ཁས་ལེན་ན། དགོངས་པ་ཅན་ཡིན་པར་འགལ་ལོ། །སྙམ་དུ་དོགས་པར་མི་བྱ་སྟེ། སྤྱིར་དགོངས་པ་ཅན་གྱི་མདོ་ལ། དགོངས་གཞི་དེ་ངེས་དོན་ཡིན་མིན་གཉིས་ལས། གང་མདོ་དེའི་དགོངས་གཞིའི་གཙོ་བོ་ངེས་དོན་མཐར་ཐུག་པ་ལ་དགོངས་ནས་གསུངས་པའི་མདོ་ཡིན་ན། ངེས་དོན་གྱི་མདོ་ཡིན་པས་ཁྱབ། དཔེར་ན་དེ་བཞིན་གཤེགས་པའི་སྙིང་པོའི་མདོ་བཞིན། ཤེས་ཕྱིན་གྱི་མདོར་ཆོས་ཐམས་ཅད་ངོ་བོ་ཉིད་མེད་པར་གསུངས་པའི་དགོངས་པ་ཡང༌། ངོ་བོ་ཉིད་མེད་པ་རྣམ་པ་གསུམ་ལ་དགོངས་པ་ཡིན་ནོ། །ཞེས་བྱ་བ་ནི་རིགས་པའོ། །དེ་ལས་གཞན་དུ་ན། དགོངས་པ་ཅན་དང་ལྡེམ་པོར་དགོངས་པ་བརྒྱད་པོ་གང་རུང་གི་ནང་ན་ངེས་དོན་གྱི་མདོ་མེད་པར་འགྱུར་ལ། དེ་ཡང༌། དེ་ལྟ་ན་ཐེག་བསྡུས་ལས། ཡང་དགོངས་པ་བཞི་དང་ལྡེམ་པོར་དགོངས་པ་བཞིས་སངས་རྒྱས་ཀྱིས་གསུངས་པའི་ཆོས་ཐམས་ཅད་ཁོང་དུ་ཆུད་པར་བྱའོ། །ཞེས་གསུངས་པ་དང་ཇི་ལྟར་མི་འགལ། དེའི་ཚེ་མཚན་ཉིད་ལྡེམ་དགོངས་ཀྱི་མཚན་གཞི། ཤེས་ཕྱིན་གྱི་མདོ་ལ་བྱེད་པར་ཐེག་བསྡུས་ལས་གསུངས་ཤིང༌། མདོ་སྡེ་རྒྱན་གྱི་འགྲེལ་པར། ཤེས་ཕྱིན་གྱི་མདོ་དོན་གཞན་ལ་དགོངས་པའི་མཚན་གཞིར་བཤད་པ་ཡིན་ནོ། །དེ་ལྟར་འཁོར་ལོ་བར་པ་ངེས་དོན་གྱི་དྲང་བའི་དོན་ཅན་དུ་བསྒྲུབས་ཟིན་ནས། ད་ནི་འཁོར་ལོ་ཐ་མ། ལེགས་པར་རྣམ་པར་ཕྱེ་བའི་འཁོར་ལོ་ཆོས་ཅན། ངེས་དོན་མཐར་ཐུག་པ་ཡིན་ཏེ། གདུལ་བྱ་གནས་སྐབས་ངེས་དོན་གྱི་སྣོད་དུ་གྱུར་པ་ལ། ངེས་དོན་མཐར་ཐུག་པ་དེ་ཉིད་སྒྲ་ཇི་བཞིན་པའི་སྒོ་ནས་སྟོན་པའི་འཁོར་ལོ་ཡིན་པའི་ཕྱིར། དེའི་ཕྱིར། བླ་ན་མ་མཆིས་པ་དང༌། སྐབས་མ་མཆིས་པ་དང༌། རྩོད་པའི་གནས་སུ་མ་གྱུར་པ་ཞེས་བྱའོ། །འོ་ན་འཁོར་ལོ་ཐ་མའི་མཚན་གཞི་གང་ཡིན། མདོ་སྡེ་དགོངས་འགྲེལ་གྱིས་འཁོར་ལོ་དང་པོ་གཉིས་དྲང་དོན་དུ་བཀྲལ་བའི་ཚུལ་ཇི་ལྟ་བུ་ཞེ་ན། འཁོར་ལོ་ཐ་མའི་མཚན་གྱི་རྣམ་གྲངས་ལ། ལེགས་པར་རྣམ་པར་ཕྱེ་བ་ཞེས་འབྱུང་བ་ལྟར་ན། མཚན་ཉིད་གསུམ་དུ་ཕྱེ་ནས་སྟོན་པའི་མདོ་སྡེ་དགོངས་འགྲེལ་ལྟ་བུ་ལ་བྱ་ལ། དོན་དམ་རྣམ་ངེས་ཤེས་བྱའི་མཚན་གྱིས་བསྟན་པ་ལྟར་ན། སྔ་མ་ཁོ་ནར་མ་ཟད་མདོ་སྡེ་ས་བཅུ་པ་དང༌། ལང་ཀར་གཤེགས་པ་དང༌། དེ་བཞིན་གཤེགས་པའི་སྙིང་པོ་བསྟན་པའི་མདོ་སྡེ་དང༌། མྱ་ངན་ལས་འདས་པ་ཆེན་པོའི་མདོ་ལ་སོགས་པ་རྣམས་ཀྱང་འདིའི་མཚན་གཞིར་རུང་བ་ཡིན་ཏེ། ཇི་སྐད་དུ། ཟླ་བའི་ཞབས་ཀྱིས། རྣམ་པ་དེ་ལྟའི་མདོ་སྡེ་གཞན་ཡང་ནི། །དྲང་དོན་ཉིད་དུ་ལུང་འདིས་གསལ་བར་བྱེད། །ཅེས་སེམས་ཙམ་པས། མདོ་དེ་དག་ངེས་དོན་གྱི་སྒྲ་ཇི་བཞིན་པ་ཉིད་དུ་འདོད་པར་བཤད་པའི་ཕྱིར། དྲི་བ་གཉིས་པའི་ལན་ནི། དགོངས་འགྲེལ་གྱིས་འཁོར་ལོ་བར་པའི་དགོངས་པ་མཐར་ཐུག་ངོས་བཟུང་ནས། དེ་སྒྲ་ཇི་བཞིན་པ་མ་ཡིན་པར་འཆད་པ་ཡིན་གྱི། འཁོར་ལོ་དང་པོའི་དགོངས་པའི་གཙོ་བོ་ངོས་བཟུང་ནས། དེ་སྒྲ་ཇི་བཞིན་པ་མ་ཡིན་པར་འགྲེལ་བ་ནི་མ་ཡིན་ཏེ། མདོ་དེ་ཉིད་ལས་དེ་ལྟར་གསལ་བའི་ཕྱིར། དོན་དེ་ལ་དགོངས་ནས། དོན་ཟབ་དགོངས་པ་ངེས་འགྲེལ་ཞེས་ཀྱང་གསུངས་སོ། །འོ་ན་དགོངས་འགྲེལ་དུ། འཁོར་ལོ་དང་པོར་ཕྱི་རོལ་གྱི་དོན་ཡོད་པར་གསུངས་པ་དེ་དགོངས་པ་ཅན་དུ་བཀྲལ་བ་མ་ཡིན་ནམ་ཞེ་ན། དེ་ལྟར་བཀྲལ་མོད་ཕྱི་རོལ་གྱི་དོན་ཡོད་པ་ཉིད་འཁོར་ལོ་དང་པོའི་དགོངས་པར་བཤད་ན། དེས་གདུལ་བྱ་རིམ་གྱིས་བཀྲི་བའི་དོན་ཅན་དུ་འཆད་པ་ཡིན་གྱི། ཕྱི་རོལ་གྱི་དོན་མེད་པ་ཉིད་འཁོར་ལོ་དང་པོའི་དགོངས་པར་མི་འཆད་པས། འཁོར་ལོ་བར་པའི་དགོངས་པ་འགྲེལ་ཚུལ་དང་མི་འདྲ་བ་ཡིན་ནོ། །དེའི་ཕྱིར་འཁོར་ལོ་དང་པོའི་དགོངས་པ་ཡིན་པ་དང༌། རྒྱལ་བའི་དགོངས་པ་ཡིན་པ་གཉིས་ལ། ཕྲ་རགས་ཀྱི་ཁྱད་པར་ཅུང་ཟད་ཡོད་པ་དེ་མ་འདྲེས་པར་བྱའོ། །དེ་ལས་དོན་ཅི་ཞིག་འགྲུབ་ཅེ་ན། ཕྱི་རོལ་གྱི་དོན་ཡོད་པ་དེ་འཁོར་ལོ་དང་པོའི་ཕྱོགས་གཅིག་གི་དགོངས་པར་བྱས་ནས། དེ་གདུལ་བྱ་རིམ་གྱིས་དཀྲི་བའི་ཐབས་ཡིན་ནོ་ཞེས་བཤད་པ་ན། འཁོར་ལོ་དང་པོས་ཀུན་རྫོབ་ཀྱི་བདེན་པ་བསྟན་བྱའི་གཙོ་བོར་བྱས་པར་གྲུབ་པ་ཡིན་ནོ། །དེ་ལས་གཞན་དུ་ན། ཕྱི་དོན་མེད་པ་ཉིད་འཁོར་ལོ་དང་པོའི་དགོངས་པར་བཤད་ན་ནི། འཁོར་ལོ་ཐ་མར་འཁོར་ལོ་དང་པོ་ཡང་ངེས་དོན་དུ་བཤད་པར་ཐལ་བ་དང༌། འཁོར་ལོ་གསུམ་ཀ་དགོངས་པ་གཅིག་ཏུ་འཆད་པར་ཐལ་ལོ། །དགོངས་འགྲེལ་གྱིས་འཁོར་ལོ་ཕྱི་མ་གཉིས་ནི་དགོངས་པ་གཅིག་ཏུ་འཆད་པ་ཡིན་ཏེ། གཉིས་ཀའི་དགོངས་པའི་གཙོ་བོ་ངོ་བོ་ཉིད་མེད་པ་གསུམ་ཡིན་པར་འཆད་པའི་ཕྱིར་རོ། །དེ་ལྟ་ན་ཡང༌། དགོངས་པ་གཅིག་པུ་དེ་སྟོན་ཚུལ་སྒྲ་ཇི་བཞིན་པ་ཡིན་མིན་ནི་འཁོར་ལོ་ཕྱི་མ་གཉིས་ཀྱི་ཁྱད་པར་རོ། །ཞེས་བྱ་བ་འདི་ནི་གྲུབ་པ་ཡིན་ནོ། །དེས་གྲུབ་པའི་དོན་གཉིས་པ་ཞིག་ཀྱང་འབྱུང་བ་ནི། འཁོར་ལོ་བར་པར་ལུགས་འདིའི་ཤེས་སྒྲིབ་ཀྱི་གཙོ་བོ་རྣམ་གཡེང་གི་རྣམ་པར་རྟོག་པ་བཅུའི་གཉེན་པོ་རྒྱས་པར་གསུངས་པས། འཁོར་ལོ་དང་པོ་སྤྱིར་དྲང་བའི་དོན་ཅན་དང༌། བྱེ་བྲག་ཏུ་གཞན་དབང་ཀུན་རྫོབ་ཀྱི་བདེན་པ་གཙོ་བོར་སྟོན་པའི་འཁོར་ལོ་དང་པོ་ཀུན་རྫོབ་བདེན་པའི་ཡུལ་ཅན་དུ་གྲུབ་ཅིང་རྣམ་གཡེང་གི་རྣམ་པར་རྟོག་པ་བཅུ་ཤེས་བྱའི་སྒྲིབ་པ་ཡིན་པ་དང༌། དེའི་གཉེན་པོར་སྒྲུབ་པ་རང་གི་ངོ་བོ་ལ་འདོམས་པའི་གདམས་ངག་སོགས་ཀྱི་དོན་ལ་རིམ་གྱིས་འཇུག་དགོས་པ་ཁོང་དུ་ཆུད་པར་འགྱུར་རོ། །འཁོར་ལོ་ཐ་མར་ཕྱི་རོལ་གྱི་དོན་མེད་པར་བཤད་པས་ཀུན་བཏགས་བརྗོད་བྱའི་གཙོ་བོར་སྟོན་པའི་འཁོར་ལོ་དང་པོ་དྲང་བའི་དོན་ཅན་དུ་གྲུབ་ཅིང་གཟུང་འཛིན་རྫས་གཞན་དུ་ཞེན་པའི་རྟོག་པ་ཤེས་བྱའི་སྒྲིབ་པ་ཡིན་པར་ཁོང་དུ་ཆུད་ནས་གཟུང་འཛིན་གཉིས་སྟོང་གི་དེ་ཁོ་ན་ཉིད་ལ་འཇུག་དགོས་པ་བདེ་བླག་ཏུ་ཤེས་པར་འགྱུར་རོ། །ཡང་དེ་ལས་བྱུང་བའི་གྲུབ་དོན་གསུམ་པ་ནི། འཁོར་ལོ་ཐ་མར་ཀུན་བཏགས་ཀྱི་རང་གི་མཚན་ཉིད་མེད་པ་དང༌། གཞན་དབང་སྒྱུ་མ་ལྟ་བུར་བསྟན་པས་འཁོར་ལོ་དང་པོའི་བརྗོད་བྱ་ཀུན་བཏགས་དང་གཞན་དབང་གཉིས་པོ་དེའི་ཀུན་རྫོབ་ཀྱི་གནས་ཚུལ་གཏན་ལ་ཕབ། ཡོངས་གྲུབ་གཅིག་པུ་བདེན་གྲུབ་ཏུ་བཤད་པས་འཁོར་ལོ་བར་པའི་བརྗོད་བྱ་དོན་དམ་པའི་བདེན་པ་ངོས་བཟུང་ནས་དེའི་རང་བཞིན་གཏན་ལ་ཕབ། དེ་ལྟ་བུའི་ཕྱེ་གསལ་ལེགས་པར་གཏན་ལ་ཕེབས་པ་དེ་འཁོར་ལོ་ཐ་མའི་བསྟན་བྱའི་གཙོ་བོར་དོན་གྱིས་གྲུབ་པ་ཡིན་ནོ། །དེ་ལྟར་བཤད་པའི་གྲུབ་དོན་བཞི་པ་ནི། འཁོར་ལོ་དང་པོའི་བསྟན་བྱའི་གཙོ་བོ་ཀུན་བཏགས་དང་གཞན་དབང་ཡིན་པ་དང༌། གཉིས་པའི་བསྟན་བྱའི་གཙོ་བོ་ཡོངས་གྲུབ་ཡིན་པ་དང༌། དེ་གཉིས་ཀྱི་བསྟན་བྱའི་གཙོ་བོ་དེ་ལྟར་ཡིན་པ་དོན་ལ་གནས་ཀྱང༌། སོ་སོར་ཕྱེ་བ་མེད་པས་དེ་ལྟ་བུའི་དམིགས་བསལ་སོ་སོར་ཕྱེ་ནས་ཀུན་བཏགས་ཀྱི་སྤྱིའི་མཚན་ཉིད་དང༌། གཞན་དབང་གི་ཐ་སྙད་ཀྱི་རང་གི་མཚན་ཉིད་ཀུན་རྫོབ་བདེན་པ་ཡིན་པ་དང༌། ཡོངས་གྲུབ་གཅིག་པུ་ཁོ་ན་དོན་དམ་བདེན་པའོ། །ཞེས་གསལ་བར་སྟོན་པ་ནི་འཁོར་ལོ་ཐ་མའོ་ཞེས་བྱ་བ་འདི་ངེས་པའོ། །གངས་ཅན་པ་གཞན་དག་འདོད་པ་ལྟར། འཁོར་ལོ་ཐ་མར་གཞན་དབང་བདེན་གྲུབ་ཏུ་བསྟན་པ་ཡིན་ན་ནི། དེས་འཁོར་ལོ་དང་པོ་ངེས་པའི་དོན་ཅན་དུ་བསྒྲུབས་པར་འགྱུར་ཏེ། གཟུང་འཛིན་གཉིས་སྣང་གི་ཤེས་པ་དོན་དམ་པའི་བདེན་པར་བསྒྲུབས་པའི་ཕྱིར། གཉིས་པ་གཞན་གྱིས་བཏགས་པའི་མཐའ་མི་འཐད་པ་ནི། གངས་ཅན་དུ་ཕྱིས་བྱོན་པའི་ཆེན་པོ་དག་ན་རེ། ལུགས་འདི་ལ་གཞན་དབང་བདེན་པར་གྲུབ་པ་ཡིན་ནོ། །ཞེས་གསུངས་སོ། །དེ་ནི་ཐོགས་མེད་ཞབས་ཀྱི་དགོངས་པ་མ་ཡིན་ཏེ། ལུང་དང་འགལ་བ་དང་རིགས་པས་གནོད་པའི་ཕྱིར་རོ། །དང་པོ་ནི། རྗེ་བཙུན་བྱམས་པའི་གཞུང་བར་པ་གསུམ་ཅར་ལས། གཞན་དབང་སྒྱུ་མ་ལྟ་བུར་གསུངས་པ་ཤ་སྟག་ཏུ་སྣང་གི་བདེན་པར་གསུངས་པ་གཅིག་ཀྱང་མི་སྣང་བའི་ཕྱིར་དང༌། གཏན་ལ་དབབ་པ་བསྡུ་བ་ལས་ཀྱང༌། གཞན་དབང་ཀུན་རྫོབ་ཏུ་ཡོད་པ་ཡིན་གྱི་དོན་དམ་པར་ཡོད་པ་མ་ཡིན་པར་གསུངས་པའི་ཕྱིར། ཐེག་བསྡུས་ལས་ཀྱང༌། གཞན་དབང་ལ་གཉིས་ཀའི་ཆར་གཏོགས་པ་ཞེས་བཤད་ནས། གཉིས་སྣང་གི་ཆ་ཀུན་བཏགས་དང༌། གསལ་རིག་གི་ཆ་ཡོངས་གྲུབ་ཏུ་བསྡུས་ནས་བཤད་པ་ཡིན་གྱི། དེ་གཉིས་ལས་ལོགས་སུ་བདེན་གྲུབ་ཏུ་གསུངས་པ་མེད་པའི་ཕྱིར་རོ། །རིགས་པ་དང་ཇི་ལྟར་འགལ་ཞེ་ན། བཤད་པ། གཞན་དབང་བདེན་པར་གྲུབ་ན་དོན་དམ་པའི་བདེན་པར་འགྱུར་ཏེ། ཀུན་རྫོབ་བདེན་པ་དང་དོན་དམ་པར་བདེན་གྲུབ་ཀྱི་གཞི་མཐུན་ཁས་ལེན་པ་ནི། ཆོས་འདི་པའི་གྲུབ་མཐའ་སྨྲ་བ་སུ་ལ་ཡང་མེད་པའི་ཕྱིར། དེ་ཡང་དེ་ལྟ་ན་ནི། མདོ་སྡེ་རྒྱན་ལས། དོན་དམ་བདེན་པའི་མཚན་ཉིད་འཆད་པ་ན། །ཡོད་མིན་མེད་མིན་དེ་བཞིན་མིན་གཞན་མིན། །སྐྱེ་དང་འཇིག་མེད་བྲི་བར་མི་འགྱུར་ཏེ། །འཕེལ་བ་མེད་ཅིང་རྣམ་པར་དག་པའང་མེད། །རྣམ་པར་དག་འགྱུར་དེ་ནི་དོན་དམ་མཚན། །ཞེས་ཁྱད་པར་ལྔ་ལྡན་དུ་བཤད་པ་དང༌། དབུས་མཐའ་ལས། དམ་པའི་དོན་ནི་གཅིག་པུ་འོ། །ཞེས་ཡོངས་གྲུབ་ཁོ་ན་ལ་བཤད་པ་དང༌། མངོན་པ་ཀུན་ལས་བཏུས་ལས་ཀྱང༌། དོན་དམ་པའི་བདེན་པ་ལ་རྣམ་དག་གི་དམིགས་པས་ཁྱབ་པར་བཤད་པའི་ཕྱིར་ན་ལུགས་དེ་ནི་ཡང་དག་པ་མ་ཡིན་ནོ། །གལ་ཏེ་དབུ་མ་འཇུག་པར། དེ་ཕྱིར་གཞན་གྱི་དབང་གི་ངོ་བོ་གང༌། །དངོས་པོ་བརྟགས་པ་ཡོད་པའི་རྒྱུར་འགྱུར་ཞིང༌། །ཕྱི་རོལ་གཟུང་བ་མེད་པར་འབྱུང་གྱུར་ལ། །ཡོད་དང་སྤྲོས་ཀུན་ཡུལ་མིན་རང་བཞིན་ཡོད། །ཅེས་བཤད་པ་མ་ཡིན་ནམ་ཞེ་ན། ཁྱེད་ཅག་གི་འཁྲུལ་གཞི་ཐམས་ཅད་དོན་དེ་ལས་བྱུང་བ་ཡིན་མོད། དེ་ལྟར་བཤད་པ་དེ་ནི་རྣམ་བདེན་པའི་ལུགས་དབང་བཙན་པར་བྱས་པ་ཡིན་ཏེ། ཕྱི་རོལ་དོན་དུ་སྣང་བ་སེམས་སུ་འདོད་པའི་སེམས་ཙམ་པའི་འདོད་པ་འཆད་པའི་སྐབས་ཡིན་པའི་ཕྱིར། སྤྱིར་སྣང་བ་སེམས་སུ་ཁས་མི་ལེན་པའི་རྣལ་འབྱོར་སྤྱོད་པ་ཡང་ཡོད་དམ་ཞེ་ན། བཤད་པ་གནས་འདི་ནི་ཁྱོད་དང་ཁྱོད་ཀྱི་སྔོན་གྱི་སློབ་དཔོན་དག་གིས་ཇི་ལྟ་བ་བཞིན་དུ་མ་བརྟགས་པར་སྣང་བས་བཤད་པར་བྱ་སྟེ། ཇི་སྐད་དུ། ལང་ཀར་གཤེགས་པ་ལས། སེམས་ཙམ་ལ་ནི་བརྟེན་ནས་སུ། །ཕྱི་རོལ་དོན་ལ་མི་རྟོག་གོ །ཡང་དག་གནས་པ་ལ་བརྟེན་ནས། །སེམས་ཙམ་ལས་ཀྱང་ཤིན་ཏུ་འདའ། །ཞེས་དང༌། མདོ་སྡེ་རྒྱན་ལས། སེམས་ལས་གཞན་མེད་པར་ནི་བློས་རིག་ནས། །དེ་ནས་སེམས་ཀྱང་མེད་པ་ཉིད་དུ་རྟོགས། །ཞེས་དང༌། དབུས་དང་མཐའ་རྣམ་པར་འབྱེད་པ་ལས། དམིགས་པ་ལ་ནི་བརྟེན་ནས་སུ། །མི་དམིགས་པ་ནི་རབ་ཏུ་སྐྱེ། །མི་དམིགས་པ་ལ་བརྟེན་ནས་སུ། །མི་དམིགས་པ་ནི་རབ་ཏུ་སྐྱེ། །ཞེས་དང༌། དེ་བཞིན་སུམ་ཅུ་པའི་རབ་ཏུ་བྱེད་པ་དང༌། སློབ་དཔོན་སེང་གེ་བཟང་པོས་རྣལ་འབྱོར་ས་བཞིའི་སྐབས་དང༌། ཚད་མ་རྣམ་འགྲེལ་ལ་སོགས་པ་རྣམས་སུ་མཐུན་པར་རྣལ་འབྱོར་སྤྱོད་པ་པ་གཞིར་བྱས་པ་ལ། དོན་སྣང་གི་ཤེས་པ་བདེན་པར་ཡོད་པ་དང༌། དེ་བདེན་པར་མེད་པའི་རིམ་པ་གཉིས་ཕྱེ་ནས། ཕྱི་མ་རང་ལུགས་མཐར་ཐུག་ཏུ་བསྒྲུབས་པའི་ཕྱིར་རོ། །འོན་ཀྱང་ཁྱད་པར་ཅུང་ཟད་ནི་གཟུང་རྣམ་དེ་ཤེས་པར་འདོད་པ་དང་མི་འདོད་པ་ཙམ་ཡིན་ལ། དེ་གཉིས་གང་ལྟར་ནའང༌། གཞན་དབང་གི་གཙོ་བོ་ནི་གཉིས་སྣང་གི་དྲི་མའི་ཆ་ནས་འཇོག་པ་ཡིན་གྱི། ངོ་བོ་གསལ་རིག་གི་ཆ་ནས་འཇོག་པ་མ་ཡིན་ཏེ། དེ་ནི་ཡོངས་གྲུབ་ཀྱི་གཙོ་བོ་ཡིན་པའི་ཕྱིར་རོ། །གཞན་དབང་གི་ངོ་བོ་བདེན་གྲུབ་ཏུ་བཤད་པས་དེ་ཉིད་བདེན་གྲུབ་ཏུ་མི་འགྲུབ་སྟེ། དེའི་དོན་དམ་པའི་ངོ་བོ་ནི་ཡོངས་གྲུབ་ལས་མ་འདས་པའི་ཕྱིར། དེ་ལྟར་གཞན་དབང་ལ་ལོག་པར་རྟོག་པ་བསལ་ནས། ཡང༌། ཆེན་པོར་གྲགས་པ་དེ་དག་གིས་ཡོངས་གྲུབ་ཀྱི་ངོས་འཛིན་ལ་ཡང་ལོག་པར་རྟོག་པ་འདི་ལྟ་སྟེ། བདག་མེད་པ་གཉིས་དང༌། འགྱུར་བ་མེད་པའི་ཡོངས་གྲུབ་ཀྱི་ངོས་འཛིན་ནི། དགག་བྱ་དེ་དང་དེ་བཀག་ཙམ་གྱི་མེད་པར་དགག་པ་ལ་འཆད་དགོས་པ་ཡིན་གྱི། མ་ཡིན་པར་དགག་པ་ནི་གཞན་དབང་ཡིན་པའི་ཕྱིར། ཡོངས་གྲུབ་ཏུ་མི་འཐད་དོ། །ཞེས་ཟེར་བ་དེ་ཡང༌། རྣལ་འབྱོར་སྤྱོད་པའི་ལུགས་ཡང་དག་མ་ཡིན་ཏེ། རིགས་པ་དང་མི་མཐུན་པ་དང༌། ལུང་དང་འགལ་བའི་ཕྱིར་རོ། །དང་པོ་ནི། དེ་འདྲའི་མེད་པར་དགག་པ་དེ་ལྡོག་པ་གཞན་སེལ་ལས་མ་འདས་པས། སྤྱི་མཚན་ཡིན་པའི་ཕྱིར། དོན་དམ་པའི་བདེན་པ་དང་བདེན་གྲུབ་ཏུ་འགལ་ལོ། །དེ་མངོན་སུམ་དུ་རྟོགས་པའི་མཐོང་ལམ་ལྟ་བུ་ཡང༌། དངོས་པོར་སྨྲ་བའི་ལུགས་འདི་ལ་མངོན་སུམ་མ་ཡིན་པར་འགྱུར་ཏེ། སྤྱི་མཚན་སྣང་ཡུལ་དུ་བྱེད་པའི་ཕྱིར་རོ། །ལུང་དང་འགལ་བ་ཇི་ལྟར་ཞེ་ན། ཇི་སྐད་དུ། ཕྱོགས་ཀྱི་གླང་པོས། རྣལ་འབྱོར་རྣམས་ཀྱི་བླ་མས་བསྟན། །མ་འདྲེས་པ་ཡི་དོན་ཙམ་མཐོང༌། །ཞེས་གསུངས་ལ། མ་འདྲེས་པ་ཞེས་བྱ་བ་ཡང་རང་མཚན་གྱི་མིང་གི་རྣམ་གྲངས་ཡིན་པའི་ཕྱིར་དང༌། ཕྱོགས་ཀྱི་གླང་པོའི་བཞེད་པ་དེ་ལྟར་ཡིན་པ་ཡང༌། ཟླ་བ་གྲགས་པས་རིགས་པ་དྲུག་ཅུ་པའི་འགྲེལ་པར་རྒྱས་པར་གསུངས་པའི་ཕྱིར་དང༌། སློབ་དཔོན་དུལ་བ་ལྷས། ཉི་ཤུ་པའི་འགྲེལ་བཤད་དུ། དེ་ལྟར་ཆོས་ལ་བདག་མེད་པ་ཞེས་བྱ་བའི་སྒྲ་ནི། མེད་པ་ཙམ་ལ་མི་བྱའི་གནས་ཀྱི་ཁྱད་པར་ལ་བྱའོ། །འདི་ལྟར་འདི་ཉིད་ལ་ཚིག་འདི་ལྟར་རྣམ་པར་སྦྱར་ཏེ། གཞན་གྱི་དབང་དང་ཡོངས་སུ་གྲུབ་པའི་དངོས་པོ་གཟུང་བ་དང་འཛིན་པའི་མཚན་ཉིད་ཀྱི་བདག་དང་བྲལ་བ་དེའི་དངོས་པོ་ནི་བདག་མེད་པའོ། །ཆོས་རྣམས་ལ་བདག་མེད་པ་ནི། གཞན་གྱི་དབང་དང་ཡོངས་སུ་གྲུབ་པའི་ཆོས་རྣམས་ལ་གཟུང་བ་དང་འཛིན་པ་མེད་པ་ཞེས་བྱ་བའི་ཐ་ཚིག་གོ །དེ་བས་ན་གཟུང་བ་དང་འཛིན་པ་དང་བྲལ་བའི་སེམས་དང་སེམས་ལས་བྱུང་བ་རྣམས་ལ་ཆོས་ལ་བདག་མེད་པ་ཞེས་བསྟན་པ་ཡིན་གྱི། མེད་པ་ཙམ་ནི་མ་ཡིན་ནོ། །གང་ཟག་ལ་བདག་མེད་པ་ཡང༌། གང་ཟག་མེད་པ་ཙམ་འབའ་ཞིག་མ་ཡིན་གྱི། འདུ་བྱེད་རྣམས་ལ་གཞན་གྱིས་ཡོངས་སུ་བརྟགས་པའི་གང་ཟག་མེད་པ་ཉིད་དོ། །ཞེས་གསུང་པ་དང༌། དེ་ཕྱིར་གཉིས་སྟོང་གང་ཡིན་པ། །དེ་ནི་དེའི་ཡང་དེ་ཉིད་ཡིན། །ཞེས་པའི་འགྲེལ་བཤད་དུ་ཤཱཀྱ་བློས། གཟུང་འཛིན་གཉིས་མེད་ཀྱི་ཤེས་པ་དེ་ཁོ་ན་ཉིད་ཡིན་པ་རང་ལུགས་སུ་བཤད་ན། སོ་སོ་སྐྱེ་བོས་ཀྱང་དེ་ཁོ་ན་ཉིད་རྟོགས་པར་ཐལ་བའི་རྩོད་པ་སྤོང་བ་དང་བཅས་པ་ཡང་བཤད་དོ། །མཁས་པ་ཆེན་པོ་ཤཱནྟི་པས། ཤེར་ཕྱིན་གྱི་མན་ངག་ཏུ། གང་གི་ཕྱིར་འདི་གཉིས་པོ་མེད་ཅིང༌། གཉིས་ཀྱིས་སྟོང་པའི་རྣམ་པར་རིག་པ་ཙམ་ཡིན་པ་ཉིད་ཀྱིས་ན། མ་ཡིན་པར་དགག་པ་ཡིན་ནོ། །ཅི་སྟེ་མེད་པར་དགག་པ་ཡིན་ན་ནི། གཅིག་ཁོ་ནར་མེད་པ་ཡིན་ནོ། །དེ་ལྟར་ན་ཀུན་ཏུ་བཏགས་པར་འགྱུར་ལ། གཞན་དུ་ན་མ་ཡིན་དགག་པ་ཁོ་ནའོ། །ཞེས་གསལ་བར་གསུངས་སོ། །དེར་མ་ཟད་འགྱུར་མེད་ཡོངས་གྲུབ་མེད་པར་དགག་པ་ཁོ་ནར་འདོད་པ་དང༌། སྤྱི་མཚན་ལ་ཀུན་བཏགས་ཀྱིས་ཁྱབ་པར་ཁས་ལེན་པར་ཡང་ཁས་བླངས་ནང་འགལ་བས་ཁྱེད་ཀྱི་དམ་བཅའ་དེ་ཡང་དག་མ་ཡིན་ནོ། །འོ་ན། ཁྱེད་ཀྱི་འདོད་པ་འཆད་དགོས་སོ་ཞེ་ན། ཁོ་བོས་ནི་རྣལ་འབྱོར་སྤྱོད་པའི་གཞུང་རྒྱ་མཚོ་ལྟ་བུའི་དོན་ལ་རྣམ་པར་བརྟགས་པ་ན་དོན་འདི་འབྱུང་བ་ཡིན་ཏེ། བག་ཆགས་ཀྱི་དབང་གིས་གཟུང་འཛིན་གཉིས་སུ་སྣང་བའི་ཤེས་པ་འདི་ཁོ་ན་གཞན་དབང་ཡིན་ལ། དེ་ལ་ཇི་ལྟར་སྣང་བ་དེ་ཉིད་ལ་བདག་ཏུ་འཛིན་པ་གཉིས་དང་རྣམ་གཡེང་གི་རྣམ་པར་རྟོག་པ་བཅུས་དེ་དང་དེར་སྒྲོ་བཏགས་པའི་བཏགས་ཆ་དེ་ལ་ཀུན་བཏགས་པ་ཞེས་བྱ་ཞིང༌། དེ་དེས་སྟོང་པའི་གཉིས་མེད་ཀྱི་ཤེས་པ་རང་རིག་རང་གསལ་དེ་ལ་འགྱུར་བ་མེད་པའི་ཡོངས་གྲུབ་ཅེས་བྱ་བར་ངེས་སོ། །དེའི་ཚེ་ཀུན་བཏགས་སུ་བཤད་པ་གང་ཡིན་པ་དེ་ཐམས་ཅད་ནི། སྤྱིའི་མཚན་ཉིད་དུ་ཡོད་པ་ཡིན་གྱི། རང་གི་མཚན་ཉིད་དུ་ཡོད་པ་མ་ཡིན་ཏེ། རྟོག་པ་འཁྲུལ་པའི་ཤེས་པ་ཁོ་ནས་ཡོད་པར་སྒྲོ་བཏགས་པ་ཡིན་གྱི། མངོན་སུམ་གྱིས་ཚད་མས་མི་འགྲུབ་པའི་ཕྱིར་རོ། །དཔེར་ན་བདག་གཉིས་ཀྱི་སྤྱིའི་མཚན་ཉིད་ཡོད་ཀྱང༌། རང་གི་མཚན་ཉིད་མེད་པ་བཞིན་དང༌། གཟུགས་རུང་གཟུགས་ཀྱི་ངོ་བོ་ཡིན་པ་དང༌། མི་རྟག་པ་དེའི་ཁྱད་པར་ཡིན་པ་སོགས་ཀྱི་སྤྱིའི་མཚན་ཉིད་རྟོག་ངོར་ཡོད་ཀྱང༌། རང་གི་མཚན་ཉིད་མངོན་སུམ་གྱིས་མི་དམིགས་པ་བཞིན་ནོ། །དོན་དེ་ཉིད་ཀྱང་ཇི་སྐད་དུ། རྣམ་འགྲེལ་ལས། གཟུང་དང་འཛིན་པའི་རྣམ་པ་ལས། །ཞེས་དང༌། ཕུང་པོ་ལ་སོགས་བྱེ་བྲག་གིས། །ཞེས་པའི་ཚིགས་སུ་བཅད་པ་གཉིས་ཀྱིས་བཤད་དོ། །ཡང་དེའི་དུས་ཀྱི་གཞན་དབང་དེ་ནི་སྤྱིའི་མཚན་ཉིད་ཀྱི་སྒོ་ནས་ཡོད་པར་མ་ཟད། རང་གི་མཚན་ཉིད་ཀྱི་སྒོ་ནས་ཀྱང་ཡོད་པ་ཡིན་ཏེ། དོན་བྱེད་ནུས་པའི་ཕྱིར་རོ། །དོན་བྱེད་ནུས་པ་དེ་ལའང་གཉིས་ཏེ། ཀུན་རྫོབ་ཙམ་དུ་དང༌། དོན་དམ་པར་དོན་བྱེད་ནུས་པའོ། །གཞན་དབང་དུ་བཤད་པ་གང་ཡིན་པ་དེ་ནི། ཀུན་རྫོབ་ཙམ་དུ་དོན་དམ་པར་དོན་བྱེད་ནུས་པ་ཡིན་ཏེ། འཇིག་རྟེན་པའི་མངོན་སུམ་གྱི་ཚད་མས་དམིགས་པའི་ཕྱིར་རོ། །དེ་ཡང་རང་རིག་པའི་མངོན་སུམ་ཁོ་ནས་ཡིན་གྱི་དོན་རིག་པའི་མངོན་སུམ་ནི་འདིར་ཁས་མི་ལེན་ཏེ། ཕྱི་རོལ་གྱི་དོན་མེད་པའི་ཕྱིར་རོ། །གཉིས་པ་དོན་དམ་པར་དོན་བྱེད་ནུས་པ་ནི་བཤད་མ་ཐག་པའི་ཡོངས་གྲུབ་གཅིག་པུ་དེ་ཁོ་ནར་ངེས་པ་ཡིན་ཏེ། འཇིག་རྟེན་ལས་འདས་པའི་མངོན་སུམ་གྱི་སྤྱོད་ཡུལ་ནི་དེ་ལས་གཞན་ཡོད་པ་མ་ཡིན་པའི་ཕྱིར། དེ་ལའང་རྣམ་པ་གསུམ་སྟེ། དབུས་མཐའ་ལས། དོན་དང་ཐོབ་དང་སྒྲུབ་པ་ནི། །དོན་དམ་རྣམ་པ་གསུམ་དུ་འདོད། །ཅེས་གསུངས་སོ། །དེའི་ཚེ་མྱ་ངན་ལས་འདས་པ་ཡང༌། ཉན་ཐོས་པ་ལྟར་མེད་པར་དགག་པ་ཁོ་ན་ལ་བྱེད་པ་མ་ཡིན་གྱི། སྡུག་ཀུན་འགགས་པའི་དབྱིངས་གསལ་རིག་དེ་ཁོ་ན་ལ་འཆད་པ་ཡིན་ནོ། །དེའི་ཕྱིར་རྣལ་འབྱོར་སྤྱོད་པའི་གཞུང་ན། མཐར་ཐུག་གི་རང་མཚན་བདེན་གྲུབ་དང༌། དོན་དམ་པའི་བདེན་པ་ནི་ཡོངས་གྲུབ་གསུམ་དུ་བཤད་པ་འདི་ཁོ་ན་ལས་གཞན་ཡོད་པ་མ་ཡིན་ནོ། །འོ་ན་གཞན་དབང་གི་རང་བཞིན་དེ་ལ་རྣལ་འབྱོར་སྤྱོད་པ་ཐམས་ཅད་འཆད་ཚུལ་མཐུན་པ་ཡིན་ནམ་ཞེ་ན། བཤད་པ་འདི་ལ་རྣལ་འབྱོར་སྤྱོད་པའི་དབུ་མ་པ་དང༌། སེམས་ཙམ་པའི་འདོད་པ་མི་འདྲ་བ་གཉིས་ལས། དེ་ཡང་སེམས་ཙམ་པས་ནི་ཀུན་གཞིའི་སྟེང་གི་བག་ཆགས་ཡོངས་སུ་སྨིན་པའི་མཐུ་ལས་བྱུང་བའི་ཁམས་གསུམ་པའི་རྣམ་པ་ཅན་དུ་སྣང་བ་གང་ཡིན་པ་ཐམས་ཅད་སེམས་དང་ཤེས་པ་ཁོ་ན་ཡིན་པས། ཀུན་བཏགས་མ་ཡིན་ལ། འཇིག་རྟེན་ལས་འདས་པའི་ཡེ་ཤེས་ཀྱི་ཡུལ་དུ་མི་རུང་བའི་ཕྱིར། ཡོངས་གྲུབ་ཀྱང་མ་ཡིན་པས་གཞན་དབང་ཁོ་ནའོ། །དེ་ཡང་ཕྱི་རོལ་གྱི་དོན་ལ་མ་ལྟོས་པར་བག་ཆགས་སད་པ་ལས་བྱུང་བའི་ཕྱིར། ཕྱི་རོལ་གྱི་དོན་ལ་ལྟོས་པའི་གཟུང་འཛིན་རྫས་གཞན་ནི་མེད་ཀྱི། འོན་ཀྱང༌། ཁམས་གསུམ་པའི་རྣམ་པ་ཅན་གྱི་གཟུང་རྣམ་དེ་དང་དེ་འཇལ་བར་བྱེད་པའི་འཛིན་རྣམ་གཉིས་པོ་དེ་ཤེས་རྒྱུད་གཅིག་ལ་དུས་མཉམ་རྫས་གཞན་དུ་ཡོད་པས་ན་ཤེས་པ་ལ་ལྟོས་པའི་གཟུང་འཛིན་རྫས་གཞན་ཞེས་བྱ་བ་གཅིག་ཁས་ལེན་པ་ཡིན་ཏེ། ཇི་སྐད་དུ། སློབ་དཔོན་ཕྱོགས་ཀྱི་གླང་པོས། ནང་གི་ཤེས་བྱའི་ངོ་བོ་ནི། །ཕྱི་རོལ་ལྟར་སྣང་གང་ཡིན་པ། །དོན་ཡིན་རྣམ་ཤེས་ངོ་བོའི་ཕྱིར། །དེ་རྐྱེན་ཉིད་ཀྱང་ཡིན་ཕྱིར་རོ། །ཞེས་གསུངས་སོ། །དོན་དེ་ལ་དགོངས་ནས། སློབ་དཔོན་ཟླ་བས། གཞན་གྱི་ལྟར་ན་རྫས་ལ་ཆགས་པ་ཡི། །ཞེས། གཞན་དབང་རྫས་ཡོད་དུ་འདོད་པ་རྣལ་འབྱོར་སྤྱོད་པའི་འདོད་པར་གསུངས་སོ། །གཉིས་པ་རྣལ་འབྱོར་སྤྱོད་པ་པའི་དབུ་མ་པ་རྣམས་ཀྱི་བཞེད་པ་ནི། ཁམས་གསུམ་པའི་རྣམ་པ་ཅན་གྱི་ཤེས་པ་འདི་ལ་ཆ་ཤས་རྣམ་པ་གཉིས་སུ་ཕྱེ་བར་བྱ་སྟེ། ཀུན་བཏགས་པའི་ཆ་དང༌། ཡོངས་གྲུབ་ཀྱི་ཆའོ། །དང་པོ་ནི་ཁམས་གསུམ་པའི་རྣམ་པ་ཅན་དུ་སྣང་ཙམ་དེའོ། །གཉིས་པ་ནི། མྱོང་བ་གསལ་རིག་གི་ཆ་དེའོ། །དེ་ལྟར་གཉིས་ལས། དང་པོ་དེ་ལས། རྣམ་བདེན་རྫུན་རྩོད་པའི་ཚེ་གཟུང་རྣམ་ཞེས་བྱ་ཞིང༌། དེ་ཡང༌། རྣམ་འགྲེལ་མཛད་པས། གཅིག་དང་དུ་བྲལ་གྱི་གཏན་ཚིགས་དང༌། ཐོགས་མེད་སྐུ་མཆེད་ཀྱིས། གཟུང་བ་མེད་ན་དེ་འཛིན་མེད་པའི་རིགས་པས་བདེན་མེད་དུ་གཏན་ལ་འབེབས་ནུས་པས། དངོས་པོར་མེད་པའི་ཕྱིར། རྟོག་པས་བརྟགས་པ་ཙམ་ཁོ་ན་ཡིན་པས། འཛིན་པ་ཀུན་བཏགས་ཞེས་བྱའོ། །དེ་ལྟར་ཆ་གཉིས་སུ་ཕྱེ་བ་ན། མཚན་ཉིད་གཞན་གཉིས་ལས་ལོགས་སུ་གཞན་དབང་གི་དངོས་པོ་ཞིག་ངོས་གཟུང་རྒྱུ་མ་བྱུང་བས། བདེན་པར་མེད་པའི་ཕྱིར། སྒྱུ་མའི་དཔེ་བརྒྱད་དང་སྦྱོར་བའི་ཚུལ་ཐེག་བསྡུས་ལས་རྒྱས་པར་གསུངས་སོ། །དེ་ལྟར་བཤད་པ་ན། རྣམ་བདེན་པས་ནི་གཟུང་བ་ཀུན་བཏགས་ཁས་ལེན་ཀྱང༌། འཛིན་པ་ཀུན་བཏགས་ཀྱི་རྣམ་གཞག་ཁས་མི་ལེན། རྣམ་རྫུན་པར་གྲགས་པའི་དབུ་མ་པས་ནི། ཁམས་གསུམ་པའི་རྣམ་པ་ཅན་གྱི་གཟུང་འཛིན་གཉིས་ཀ་ཀུན་བཏགས་སུ་ཞལ་གྱིས་བཞེས་པས། གཞན་དབང་བདེན་གྲུབ་ཏུ་སྟོན་པའི་གོ་སྐབས་མེད་དོ། །དོན་དེ་དག་ཀྱང༌། ཇི་སྐད་དུ། མདོ་སྡེ་རྒྱན་དང༌། དབུས་མཐའ་དང༌། སུམ་ཅུ་པ་རྣམས་སུ། གཟུང་བ་མེད་ན་དེ་འཛིན་མེད། །ཅེས་པའི་རིགས་པ་དང༌། རིགས་པ་མཁྱེན་པས། དེ་ལ་གཅིག་ནི་མེད་པས་ཀྱང༌། །གཉིས་ཀའང་ཉམས་པར་འགྱུར་བ་ཡིན། །ཞེས་དང༌། གང་གིས་དངོས་པོ་རྣམ་དཔྱད་ན། །ཞེས་སོགས་ཀྱིས་བསྟན་པའི་དགོངས་པ་དང༌། སློབ་དཔོན་སེང་གེ་བཟང་པོས་བཤད་པའི་རྣལ་འབྱོར་གྱི་ས་གསུམ་པའི་རྣམ་གཞག་མཛད་པ་དང༌། རྗེ་བཙུན་ས་སྐྱ་པཎྜི་ཏས། རྣམ་རྫུན་པའི་སྐབས་སུ་གཟུང་རྣམ་སྒྲོ་བཏགས་སུ་བཤད་པ་རྣམས་ལས་བདེ་བླག་ཏུ་རྟོགས་པར་ནུས་པ་ཡིན་ནོ། །དེ་ལྟར་ཆ་ཤས་གཉིས་སུ་ཕྱེ་ནས་དཔྱད་པ་ན་གཞན་དབང་གི་ངོ་བོ་གཟུང་དུ་མེད་ཀྱང་མ་དཔྱད་པའི་ཀུན་རྫོབ་ཏུ་དངོས་པོར་ཁས་ལེན་དགོས་པ་ཡིན་ཏེ། དབུས་མཐར། ངོ་བོ་ཉིད་གསུམ་རྟག་མེད་དང༌། །ཡོད་ཀྱང་ཁོ་ན་མ་ཡིན་དང༌། །ཞེས་དང༌། ཐེག་བསྡུས་སུ། བྱུང་རྟེན་སྒྱུ་མ་ལ་སོགས་བསྟན། །ཞེས་དང༌། བསྡུ་བ་ལས་ཀྱང༌། གཞན་དབང་དོན་དམ་དུ་ཡོད་པ་མ་ཡིན་ཞིང༌། ཀུན་རྫོབ་ཏུ་ཡོད་པར་གསུངས་སོ། །འོ་ན་གཞན་དབང་གི་དངོས་པོ་ལ། མཚན་ཉིད་གཞན་གཉིས་ཀྱི་ཆ་ཤས་སུ་སོ་སོར་ཕྱེ་ནས། དེའི་ངོ་བོ་ལོགས་སུ་གཟུང་དུ་མི་ནུས་པ་འདི་ལ་ལུང་དུ་བྱ་བ་ཅི་ཞིག་ཡོད་ཅེ་ན། བཤད་པ། ཐེག་པ་ཆེན་པོ་བསྡུས་པ་ལས། གཞན་གྱི་དབང་གི་ངོ་བོ་ཉིད་ནི། ཀུན་ཏུ་བཏགས་པ་དང༌། ཡོངས་སུ་གྲུབ་པའི་ངོ་བོ་ཉིད་ཡིན་པའི་ཕྱིར། འཁོར་བ་དང་མྱ་ངན་ལས་འདས་པ་བྱེ་བྲག་མེད་པ་ལ་དགོངས་ནས། དེ་བཞིན་གཤེགས་པས། འཁོར་བ་ཡང་མ་དམིགས། མྱ་ངན་ལས་འདས་པ་ཡང་མ་དམིགས་ཞེས་བསྟན་ཏེ། འདི་ལྟར་གཞན་གྱི་དབང་གི་ངོ་བོ་ཉིད་དེ་ཉིད་ཀུན་ཏུ་བཏགས་པའི་ཆ་ཤས་ནི་འཁོར་བའོ། །ཡོངས་སུ་གྲུབ་པའི་ཆ་ནས་ནི་མྱ་ངན་ལས་འདས་པའོ། །ཆོས་མངོན་པའི་མདོ་ལས། ཆོས་ནི་གསུམ་སྟེ། འཁོར་བ་དང༌། མྱ་ངན་ལས་འདས་པ་དང༌། དེ་གཉིས་ཀའི་ཆར་གཏོགས་པའོ། །ཞེས་བཅོམ་ལྡན་འདས་ཀྱིས་གང་གསུངས་པ་ཅི་ལ་དགོངས་ཏེ། གསུངས་ཤེ་ན། གཞན་དབང་གི་ངོ་བོ་ཉིད་ལ་ཀུན་ཏུ་བཏགས་པའི་ངོ་བོ་ཉིད་ཡོད་པ་ནི་ཀུན་ནས་ཉོན་མོངས་པའི་ཆར་གཏོགས་པའོ། །ཡོངས་སུ་གྲུབ་པའི་ངོ་བོ་ཉིད་ཡོད་པ་ནི་རྣམ་པར་བྱང་བའི་ཆར་གཏོགས་པའོ། །ཞེས་བྱ་བ་འདི་ལ་དགོངས་ནས་བཀའ་སྩལ་ཏོ། །དོན་འདི་ལ་དཔེ་ཅི་ཡོད་ཅེ་ན། དཔེ་ནི་སའི་ཁོངས་ན་གསེར་ཡོད་པ་སྟེ། སའི་ཁམས་དང་ས་དང་གསེར་དང་གསུམ་དམིགས་སོ་དེ་ལ་སའི་ཁམས་ལ་ནི་མེད་པའི་ས་དམིགས་ལ། ཡོད་པའི་གསེར་མི་དམིགས་ཏེ། འདི་ལྟར་མེས་རེག་ན། ས་ནི་མི་སྣང་ལ། གསེར་ནི་སྣང་ངོ༌། །སའི་ཁམས་ནི་སར་སྣང་བ་ན་ལོག་པར་སྣང་ངོ༌། །གསེར་དུ་སྣང་བ་ན་དེ་བཞིན་ཉིད་དུ་སྣང་ངོ༌། །དེ་ལྟ་བས་ན་སའི་ཁམས་ནི་གཉིས་ཀའི་ཆར་གཏོགས་པའོ། །དེ་བཞིན་དུ་རྣམ་པར་རིག་པ་ལ་རྣམ་པར་མི་རྟོག་པའི་ཡེ་ཤེས་ཀྱི་སེམས་མེས་མ་རེག་ན། རྣམ་པར་རིག་པ་དེ་ཡང་དག་པ་མ་ཡིན་པ་ཀུན་ཏུ་བཏགས་པའི་ངོ་བོ་ཉིད་དུ་སྣང་གི ཡང་དག་པ་ཡོངས་སུ་གྲུབ་པའི་ངོ་བོ་ཉིད་དུ་མི་སྣང་ལ། རྣམ་པར་རིག་པ་ལ་རྣམ་པར་མི་རྟོག་པའི་ཡེ་ཤེས་ཀྱི་མེས་རེག་པ་ན། རྣམ་པར་རིག་པ་དེ་ཡང་དག་པ་ཡོངས་སུ་གྲུབ་པའི་ངོ་བོ་ཉིད་དུ་སྣང་གི ལོག་པར་ཀུན་ཏུ་བཏགས་པའི་ངོ་བོ་ཉིད་དུ་མི་སྣང་ངོ༌། །དེ་ལྟ་བས་ན། གཉིས་ཀའི་ཆར་གཏོགས་པ་ཡིན་ཏེ་ས་ཁམས་བཞིན་ནོ། །ཞེས་རྒྱས་པར་གསུངས་པ་དང༌། དེ་ཉིད་ཀྱི་རྩ་བ་ནི། རྗེ་བཙུན་ཉིད་ཀྱི་མདོ་སྡེའི་རྒྱན་དུ། ཇི་ལྟར་སྒྱུ་མ་དེ་བཞིན་དུ། །ཡང་དག་མ་ཡིན་ཀུན་རྟོག་བརྗོད། །སྒྱུ་མ་བྱས་པ་ཅི་ལྟ་བར། །དེ་བཞིན་གཉིས་སུ་འཁྲུལ་པ་བརྗོད། །ཇི་ལྟར་དེ་ལ་དེ་མེད་པ། །དེ་བཞིན་དུ་ནི་དོན་དམ་འདོད། །ཇི་ལྟར་དུ་ནི་དམིགས་པ་ལྟར། །དེ་བཞིན་དུ་ནི་ཀུན་རྫོབ་ཉིད། །ཅེས་གསུངས་ལ། དེའི་དགོངས་པ་ཡང༌། གཞན་དབང་གི་སྟེང་གི་གསལ་རིག་གི་ཆ་ནི་རྡོ་ཤིང་སོགས་དང་འདྲའོ། །དེའི་སྟེང་གི་གཟུང་འཛིན་གཉིས་སྣང་གི་ཆ་ནི་སྒྱུ་མའི་རྟ་གླང་དང་འདྲའོ། །དེས་དེ་སྟོང་པ་ནི་དེའི་དོན་དམ་པའོ། །དེ་ལ་དེར་དམིགས་པ་ནི་དེའི་ཀུན་རྫོབ་བོ། །དེ་ལྟར་བདེན་པ་གཉིས་ཟུང་དུ་འཇུག་པ་དེ་ལ་གཞན་དབང་ཞེས་བྱའོ། །ཞེས་བྱ་བའི་དོན་ཡིན་ནོ། །འདིར་ཆེན་པོར་གྲགས་པ་དག་གིས་གཞན་དབང་དང་སྒྱུ་མའི་འཁྲུལ་གཞི་དཔེ་དོན་དུ་སྦྱར་བ་ནི་ཚིག་དོན་གང་ལ་ཡང་མ་ཞུགས་པ་ཡིན་ཏེ། དེ་ལྟ་ན་གཞན་དབང་དང་སྒྱུ་མ་དཔེ་དོན་དུ་མི་སྦྱོར་བར་གཟུང་འཛིན་ཀུན་བཏགས་གཉིས་དང་སྒྱུ་མ་དཔེ་དོན་དུ་སྦྱར་བར་སོང་བའི་ཕྱིར་དང༌། གཞན་དབང་ནི་འཁྲུལ་པ་དངོས་ཡིན་གྱི་འཁྲུལ་གཞི་མ་ཡིན་པའི་ཕྱིར། ཡང་ཁྱེད་གཞན་དབང་བདེན་གྲུབ་ཏུ་འདོད་པ་དང༌། རྒྱན་ལས་སྤང་བྱར་བཤད་པ་འགལ་ཏེ། བདེན་པར་གྲུབ་ན་གཉེན་པོས་སྤང་དུ་མེད་པས་ཁྱབ་པ་ནི། ཐེག་པ་ཆེན་པོ་ཆོས་སུ་སྨྲ་བ་དེ་དག་གི་སྤྱིའི་ལུགས་ཡིན་པའི་ཕྱིར་རོ། །རྣལ་འབྱོར་སྤྱོད་པའི་དབུ་མ་པ་དག་གི་བཞེད་པ་གཞན་དབང་གི་ངོ་བོ་བདེན་པར་གྲུབ་ཀྱང༌། གཞན་དབང་བདེན་པར་མ་གྲུབ་པ་དེ་ལྟར་ཡིན་པ་ཐུགས་ལ་བཞག་ནས་དཔལ་ལྡན་ཟླ་བའི་ཞབས་ཀྱིས་ཀྱང༌། དེ་ཕྱིར་གཞན་གྱི་དབང་གི་ངོ་བོ་གང༌། །ཞེས་དང༌། ཡོད་དང་སྤྲོས་ཀུན་ཡུལ་མིན་རང་བཞིན་ཡོད། །ཅེས་ཕྱོགས་སྔ་མ་ལེགས་པར་ཐུགས་སུ་ཆུད་ནས་དྲངས་པ་ཡིན་ནོ་དེ་ལྟར་ན། གཞན་གྱིས་ཇི་ལྟ་བ་བཞིན་དུ་བཤད་པར་མ་ནུས་པའི་ཡོངས་གྲུབ་དང༌། གཞན་དབང་གི་རྣམ་པར་གཞག་པ་ཕྱོགས་ཙམ་བཤད་ཟིན་ནས། ཀུན་ཏུ་བཏགས་པའི་ངོ་བོ་ཉིད་མདོ་ཙམ་བཤད་པར་བྱ་སྟེ། དེ་ཡང་ཀུན་ཏུ་བཏགས་པ་ལ་ནི། ངོ་བོ་ཉིད་མེད་པ་ལ་ངོ་བོ་ཉིད་ཅེས་སྙད་ཅིང་བཏགས་པ་ཡིན་ཏེ། དཔེར་ན་ཅི་ཡང་མ་མཐོང་བ་ལ་ནམ་མཁའ་མཐོང་ཞེས་བཏགས་པ་བཞིན་ནོ། །འདི་ལ་ངོ་བོ་ཉིད་མེད་པ་ཅི་ཞེ་ན། རང་གི་མཚན་ཉིད་མེད་པའི་ཕྱིར་རོ། །འདི་ལ་མཚན་ཉིད་ངོ་བོ་ཉིད་མེད་པ་ཞེས་བཤད་པ་ཡང༌། སྤྱིའི་མཚན་ཉིད་མེད་པ་ནི་མ་ཡིན་ཏེ། དེ་ལྟ་ན་བདག་གཉིས་ཀྱི་དོན་སྤྱི་གཞི་མ་གྲུབ་པར་ཐལ་བའི་ཕྱིར་རོ། །དེ་ལྟ་ཡིན་པ་འོ་ན་བདག་གཉིས་པོ་ཀུན་བཏགས་སུ་འཆད་ན། མོ་གཤམ་གྱི་བུ་སོགས་ཀྱང་དེར་འཆད་དགོས་པ་མ་ཡིན་ནམ་ཞེ་ན། མ་ཡིན་ཏེ། དེ་དག་ནི་ཤེས་བྱ་མ་ཡིན་པའི་ཕྱིར་རོ། །འོ་ན་ཀུན་བཏགས་ལ་རང་གི་མཚན་ཉིད་མེད་པ་ཅི་ཞེ་ན། རིགས་པའི་གཞུང་ལྟར་ན་བདག་གཉིས་ཀྱི་དོན་སྤྱིའམ། རྣལ་འབྱོར་སྤྱོད་པའི་མདོ་ལྟར་ན་བདག་གཉིས་སུ་སྒྲོ་བཏགས་པའི་ཆ་གང་ཡིན་པ་དེ་ནི་ཀུན་བཏགས་ཀྱི་མཚན་གཞིར་འཇོག་ལ། དེ་ལ་ནི་རང་གི་མཚན་ཉིད་ཡོད་པ་མ་ཡིན་ཏེ། མངོན་སུམ་ལ་མི་སྣང་བའི་ཕྱིར་དང༌། དེའི་རང་མཚན་ཡོད་ན་བདག་གཉིས་ཡོད་པར་ཐལ་བའི་ཕྱིར་རོ། །དེའི་སྤྱི་མཚན་ནི་མེད་པ་མ་ཡིན་ཏེ། དེ་ཉིད་སྤྱི་མཚན་ཡིན་པའི་ཕྱིར་རོ། །དོན་དེ་ལ་དགོངས་ནས་མདོ་དང་སྡུ་བ་སོགས་ལས། འདི་ལ་ནམ་མཁའི་མེ་ཏོག་གི་དཔེས་བསྟན་པ་ཡིན་ནོ། །གངས་ཅན་གྱི་ཆེན་པོར་རློམ་པ་གང་དག མཚན་ཉིད་ཡོངས་སུ་ཆད་པའི་ཀུན་བརྟགས་དང༌། རྣམ་གྲངས་པའི་དེ་གཉིས་སུ་ཕྱེ་ནས། དང་པོ་དེ་བཏགས་པ་བ་དང་གཉིས་པ་དེ་མཚན་ཉིད་པར་སྨྲ་ཞིང༌། མཚན་གཞི་ཡང་རིམ་པ་བཞིན་མོ་གཤམ་གྱི་བུ་དང་བུམ་པའི་དོན་སྤྱི་ལྟ་བུ་ལ་འཆད་པ་དག་ནི། གང་ཡང་མ་ཡིན་པས་ཅིར་ཡང་རུང་བ་མ་ཡིན་ཏེ། ཀུན་བཏགས་ཡིན་ན་རང་གི་མཚན་ཉིད་ཆད་པས་ཁྱབ་པའི་ཕྱིར་དང༌། རྣམ་གྲངས་པ་ཞེས་པའི་མིང་དེ་ཉིད་ཀྱིས་མཚན་ཉིད་པ་མ་ཡིན་པར་གྲུབ་པའི་ཕྱིར་དང༌། ཐེག་བསྡུས་སུ་བདག་ཏུ་འཛིན་པའི་རྟོག་པ་ལ་ཀུན་བཏགས་སུ་བཤད་པའི་སྐབས་ཤིག་ཡོད་པ་དེ་ལ་རྗེས་སུ་དཔག་ནས་བོད་སྔ་མ་དག་གིས་རྣམ་གྲངས་པའི་ཀུན་བཏགས་ཞེས་ཟེར་གྱིན་འདུག་པ། དེའི་ཚིག་ཟུར་མ་གོ་བའི་བབ་ཅོལ་དུ་སྣང་བའི་ཕྱིར་དང༌། མོ་གཤམ་གྱི་བུའི་དོན་སྤྱི་ལྟ་བུ་རིགས་པའི་གཞུང་ལྟར་ན་སྤྱི་མཚན་དུ་འདུས་པས། ཀུན་བཏགས་སུ་བསྡུས་ཀྱང་ལྕེ་མ་ཆད་ཙམ་འོང་མོད་རྣལ་འབྱོར་སྤྱོད་པའི་གཞུང་གི་དགོངས་པ་མ་ཡིན་ཏེ། རི་བོང་གི་རྭ་དང་མོ་གཤམ་གྱི་བུ་ལ་སོགས་པར་སྣང་བའི་ཡང་དག་པ་མ་ཡིན་པའི་ཀུན་ཏུ་རྟོག་པ་མི་འཆད་པའི་ཕྱིར་དང༌། དེ་དེས་སྟོང་པ་ཡོངས་གྲུབ་གོ་ཆོད་པོར་མི་འཆད་པའི་ཕྱིར་རོ། །འདིར་སྨྲས་པ། མི་མཁས་བཞིན་དུ་ཆེར་བཅོས་པའི། །སློབ་དཔོན་མེད་ཀྱང་འདི་ཙམ་གྱིས། །རྣལ་འབྱོར་སྤྱོད་གཞུང་རྒྱ་མཚོ་ཡི། །ཕ་རོལ་སོན་པར་གདོན་མི་ཟ། །ཞེས་གསལ་བར་རྟོགས་ནས་རྗེས་སུ་འཇུག་པ་དག་ལ་འདོམས་པ་ཡིན་ནོ། །གཉིས་པ་དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོ་ལས་འབྱུང་བའི་འཁོར་ལོ་གསུམ་གྱི་དྲང་ངེས་འཆད་ཚུལ་ལ། བཤད་བྱའི་མདོ་ནི། རིགས་ཀྱི་བུ་འདི་ལྟ་སྟེ། དཔེར་ན་ནོར་བུ་མཁན་མཁས་པ་ནོར་བུ་སྦྱོང་བའི་ཚུལ་ལེགས་པར་ཤེས་པ་དེས། ཡོངས་སུ་མ་དག་པའི་ནོར་བུ་རིན་པོ་ཆེའི་རིགས་ནས་ནོར་བུ་རིན་པོ་ཆེ་བླངས་ཏེ་ཞེས་སོགས་ཀུན་ལ་གྲགས་པ་དེ་ཉིད་དོ། །མདོ་དེར་འཁོར་ལོ་གསུམ་གྱི་བརྗོད་བྱའི་ཁྱད་པར་ལ། ཆོས་ཀྱི་སྡོམ་བཞིའི་སྒོ་ནས། འཕགས་པའི་ཆོས་འདུལ་བ་ལ་འཛུད་པར་མཛད་པ་དང༌། རྣམ་ཐར་སྒོ་གསུམ་གྱི་གཏམ་གྱིས་དེ་བཞིན་གཤེགས་པའི་ཚུལ་རྟོགས་པར་མཛད་པ་དང༌། ཕྱིར་མི་བཟློག་པ་འཁོར་ལོའི་གཏམ་གྱིས། དེ་བཞིན་གཤེགས་པའི་སྤྱོད་ཡུལ་ལ་འཇུག་པར་མཛད་པ་ཞེས་བྱ་བ་རྣམ་པ་གསུམ་གསུངས་ལ། དེ་དག་གི་ནང་ནས་འཁོར་ལོ་དང་པོ་གཉིས་ཀྱི་བརྗོད་བྱ་དང་དྲང་ངེས་ནི། དགོངས་འགྲེལ་ལས་འབྱུང་བའི་འཁོར་ལོ་དང་པོ་གཉིས་དང་མཐུན་པ་ཡིན་ཏེ། མི་རྟག་ལ་སོགས་བཅུ་དྲུག་དང༌། ཆོས་ཀྱི་སྡོམ་རྣམ་པ་བཞི་པོ་དོན་གཅིག་ལ་འདུ་བའི་ཕྱིར་དང༌། དེ་བཞིན་གཤེགས་པའི་ཚུལ་ཞེས་པ་ཡང༌། བདེན་པ་གཉིས་ཟུང་དུ་འཇུག་པའི་ཚུལ་ལ་བྱ་བར་ཚུལ་གསུམ་སྒྲོན་མ་ཞེས་བྱ་བའི་བསྟན་བཅོས་དང༌། རྣམ་སྣང་མངོན་བྱང་ལས་གསལ་བའི་ཕྱིར། དེའི་དུས་ཀྱི་ཚུལ་གསུམ་ནི། བདེན་པ་བཞིའི་ཚུལ་དང༌། བདེན་པ་གཉིས་ཀྱི་ཚུལ་དང༌། སྔགས་ཀྱི་ཚུལ་ཞེས་བྱ་བ་ཡིན་པར་བཤད་ལ། དེ་དག་ཀྱང་གོ་རིམ་བཞིན་དུ་ཉན་ཐོས་ཀྱི་ཚུལ་དང༌། བྱང་ཆུབ་སེམས་དཔའི་ཚུལ་དང༌། ཚུལ་ཆེན་པོ་ཞེས་བྱ་བ་རྣམས་ལ་ངོས་བཟུང་བའོ། །འདིའི་འཁོར་ལོ་ཐ་མ་དང༌། དགོངས་འགྲེལ་གྱི་འཁོར་ལོ་ཐ་མའི་ངོས་འཛིན་ཚུལ་མི་འདྲ་ཡང༌། ཐོགས་མེད་ཞབས་ཀྱི་བཞེད་པ་ལྟར་ཡིན་པར་མངོན་ཏེ། འཁོར་ལོ་དང་པོ་གཉིས་ཀྱི་ངོས་འཛིན་ཚུལ་དང་བརྗོད་བྱ་ནི། དགོངས་འགྲེལ་ནས་འབྱུང་བ་དང༌། མདོ་འདི་ནས་འབྱུང་བ་གཉིས་ལ་མི་འདྲ་བའི་ཁྱད་པར་ཡོད་པ་མ་ཡིན་ཏེ། གཉིས་ཀས་ཀྱང་འཁོར་ལོ་དང་པོར་ཀུན་རྫོབ་བདེན་པ་སྟོན་པ་དང༌། འཁོར་ལོ་བར་པར་ངེས་དོན་མཐར་ཐུག་དེ་ཉིད་སྒྲ་ཇི་བཞིན་པ་མ་ཡིན་པའི་སྒོ་ནས་སྟོན་ནོ་ཞེས་འཆད་པར་འདྲ་བའི་ཕྱིར། འཁོར་ལོ་ཐ་མའི་མཚན་གཞི་ལ་ནི་གཉིས་ཏེ། ལེགས་པར་རྣམ་པར་ཕྱེ་བའི་མདོ་དང༌། ཐེག་པ་ཆེན་པོ་རྒྱུད་བླ་མའི་མདོའོ། །དང་པོ་ནི་སྒྲ་ཇི་བཞིན་པ་ཉིད་དུ་གྱུར་པའི་ངེས་པའི་དོན་ཅན་དུ་བསྒྲུབས་ཟིན་ཅིང༌། གཉིས་པའི་མཚན་གཞི་ནི། ལྷག་པའི་བསམ་པ་བསྟན་པའི་མདོ་ལ་སོགས་པ་སྙིང་པོའི་མདོ་བཅུར་གྲགས་པ་དེ་དག་ཀྱང་ངེས་དོན་མཐར་ཐུག་པའི་མདོ་ཡིན་ཏེ། རང་གི་བསྟན་བྱའི་གཙོ་བོ་རྡོ་རྗེ་ལྟ་བུ་རྣམ་པ་བདུན་གང་རུང་ངམ་ཐམས་ཅད་སྟོན་པའི་མདོ་ཡིན་པའི་ཕྱིར། འོ་ན་འཁོར་ལོ་ཐ་མའི་བསྟན་བྱ་ངེས་དོན་མཐར་ཐུག་དེ་གང་ཡིན། དེ་འཁོར་ལོ་བར་པར་སྒྲ་ཇི་བཞིན་པ་མ་ཡིན་པའི་སྒོ་ནས་བསྟན་པའི་ཚུལ་ཇི་ལྟ་བུ་ཞེ་ན། འདིར་ངེས་དོན་མཐར་ཐུག་པ་ནི་བདེ་བར་གཤེགས་པའི་སྙིང་པོ་ཞེས་བྱ་བའི་མིང་ཅན་སེམས་རང་བཞིན་གྱིས་འོད་གསལ་བ་དེ་ཉིད་ཡིན་ལ། འདི་ཡང་མ་ཡིན་པར་དགག་པ་ཡིན་གྱི། མེད་པར་དགག་པ་ནི་མ་ཡིན་ཏེ། རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་ཅེས་བྱ་བའི་དོན་དུ་བཤད་པའི་ཕྱིར་དང༌། དེའི་དོན་ཡང༌། སངས་རྒྱས་ཀྱི་ཆོས་གངྒཱའི་རླུང་གི་བྱེ་མ་སྙེད་དབྱེར་མེད་དུ་ལྡན་པ་ལ་བྱེད་པར་བཤད་པའི་ཕྱིར། དེ་སྐད་དུ་ཡང༌། རྗེ་བཙུན་གྱིས། སངས་རྒྱས་ཆོས་དབྱེར་མེད་པ་དང༌། །ཞེས་དང༌། བླ་མེད་ཆོས་ཀྱི་སྟོང་མ་ཡིན། །ཞེས་གསུངས་སོ། །དེ་ལས་གཞན་དུ་བདེ་བར་གཤེགས་པའི་སྙིང་པོའི་གོ་དོན་ལ། བོད་ཕྱི་རབས་པ་དག ཆོས་ཉིད་མེད་དགག་ཁོ་ནར་འཆད་པ་ནི། ཐོགས་མེད་ཀྱི་ལུང་དང་མི་མཐུན་ཞིང་རིགས་པ་དང་འགལ་ལོ། །ལུང་དང་མི་མཐུན་པ་ཇི་ལྟར་ཞེ་ན། འདི་ལ་བསལ་བྱ་ཅི་ཡང་མེད། །ཅེས་པའི་འགྲེལ་པར། དེ་ལྟར་ན་གང་ཞིག་གང་ན་མེད་པ་དེ་ནི་དེས་སྟོང་ངོ་ཞེས་ཡང་དག་པར་རྗེས་སུ་མཐོང་ལ། གང་ཞིག་ལྷག་མར་གྱུར་པ་དེ་ནི་དེ་ལ་རྟག་པར་ཡོད་དོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །ཞེས་དགག་བྱ་བཀག་ཤུལ་དུ་ཆོས་གཞན་འཕེན་པར་གསུངས་པའི་ཕྱིར། རིགས་པ་དང་འགལ་བ་ནི། སེམས་བདེན་སྟོང་ཙམ་སྙིང་པོར་འཇོག་ན། ཤེས་བྱ་ཐམས་ཅད་ལ་སྙིང་པོས་ཁྱབ་པར་ཐལ་བའི་ཕྱིར་དང༌། ཡང་གཞན་དག བེམས་པོ་དང་ནམ་མཁའ་ལ་སོགས་པ་རྒྱུད་ཀྱིས་མ་བསྡུས་པའི་ཆོས་ཉིད་མཐའ་དག་སྙིང་པོར་འདོད་པ་ནི་རིགས་པ་མ་ཡིན་ཏེ། དེ་དག་ནི་དོན་རྣམ་པ་གསུམ་དང་རྣམ་གཞག་རྣམ་པ་བཅུ་དང༌། དཔེ་རྣམ་པ་དགུ་པོ་གང་གི་སྒོ་ནས་ཀྱང་གཏན་ལ་འབེབས་ཏུ་མི་རུང་བའི་ཕྱིར་དང༌། རྗེ་བཙུན་གྱི་བསྟན་བཅོས་ཀྱི་བརྗོད་བྱའི་གཙོ་བོ་དྲི་བཅས་དེ་བཞིན་ཉིད་དང༌། དྲི་མེད་དེ་བཞིན་ཉིད་གཉིས་ཀ་རྒྱུད་ཡིན་པར་བཤད་པའི་ཕྱིར་དང༌། རྒྱུད་ཀྱི་དོན་ཡང་རྒྱུན་ཆགས་པ་ཡིན་ལ། དེ་ཡང་མྱོང་བ་གསལ་རིག་གི་ཆ་ལས་གཞན་ལ་བཤད་དུ་མེད་པའི་ཕྱིར་རོ། །དེ་ལྟ་བུའི་ངེས་དོན་མཐར་ཐུག་དེ་འཁོར་ལོ་བར་པར་ནི་སྒྲ་ཇི་བཞིན་པའི་སྒོ་ནས་བཤད་པ་མ་ཡིན་ཏེ། དེ་འདྲ་དེ་དངོས་བསྟན་ལ་མེད་པར་དགག་པའི་ཆ་ནས་བཤད་པ་ཡིན་གྱི། མ་ཡིན་པར་དགག་པའི་ཆ་ནས་མ་བཤད་པའི་ཕྱིར། དཔེར་ན་ཆོས་འཕགས་ཀྱི་ལེའུ་ལས། དེ་བཞིན་གཤེགས་པ་ངོས་འཛིན་པ་ན་སྤྲོས་པ་ཐམས་ཅད་བཀག་ཙམ་གྱི་མེད་པར་དགག་པ་ལ་འཆད་པའི་ཚུལ་རྒྱས་པར་འབྱུང་བ་བཞིན་ནོ། །མདོར་ན། ཐོགས་མེད་ཞབས་ཀྱིས་ནི། རྗེ་བཙུན་གྱི་གཞུང་བར་པ་གསུམ་གྱི་དགོངས་པ་ལ་གནས་ནས། རྣལ་འབྱོར་སྤྱོད་པའི་གྲུབ་པའི་མཐའ་འཆད་པ་ན། དོན་དམ་པའི་བདེན་པ་མ་ཡིན་པར་དགག་པའི་ཆ་ནས་འཆད་ལ། རྗེ་བཙུན་གྱི་གཞུང་ཕྱི་མའི་དགོངས་པ་ཉེ་བར་བཟུང་ནས། ངོ་བོ་ཉིད་མེད་པར་སྨྲ་བའི་གྲུབ་པའི་མཐའ་འཇོག་པ་དེའི་ཚེ་ཡང༌། དོན་དམ་པའི་བདེན་པ་མཐར་ཐུག་ནི་མ་ཡིན་པར་དགག་པའི་སྒོ་ནས་འཆད་པ་ལ་ཁྱད་པར་མེད་དོ། །ཞེས་བྱ་བ་འདི་ནི་ངེས་པ་ཡིན་ནོ། །འདིར་འཁོར་ལོ་ཕྱི་མའི་བརྗོད་བྱ་ལ། ཕྱིར་མི་བཟློག་པའི་འཁོར་ལོའི་གཏམ་ཞེས་གསུངས་པ་ནི། སེམས་ཅན་ཐམས་ཅད་བདེ་བར་གཤེགས་པའི་སྙིང་པོ་ཅན་དུ་སྟོན་པ། ཟེར་བ་ཡིན་ལ། དེ་ཡང་ཐོགས་མེད་ཞབས་ཀྱིས་རྣལ་འབྱོར་སྤྱོད་པའི་གཞུང་འཆད་པ་ན། སྒྲ་ཇི་བཞིན་པའི་གཞུང་དུ་འཆད་པ་ཡིན་ཏེ། དེས་དེར་སེམས་ཅན་ཐམས་ཅད་སྙིང་པོ་ཅན་ཡིན་པ་དང༌། སྙིང་པོ་དེ་ཡང་དོན་དམ་པའི་བདེན་པར་བཞེད་པའི་ཕྱིར། སློབ་དཔོན་འདིས་རྒྱུད་བླ་མའི་འགྲེལ་པ་མཛད་པ་ན་འཁོར་ལོ་ཕྱི་མ་འདི་སྒྲ་ཇི་བཞིན་པ་མ་ཡིན་པའི་ངེས་དོན་དུ་བཞེད་པའི་ཚུལ་ནི་འོག་ནས་འཆད་པར་འགྱུར་བ་བཞིན་ནོ། །འདི་ན་ཆེན་པོར་རློམ་པ་གང་དག་མདོ་འདི་ལས་འབྱུང་བ་ནི་གདུལ་བྱ་གཅིག་ཉིད་ཀྱི་ཁམས་ཀྱི་དྲི་མ་སྦྱོང་བའི་དབང་དུ་བྱས་པའི་ཕྱིར། སྤྱིར་འཁོར་ལོ་གསུམ་གྱི་རྣམ་པར་བཞག་པ་སྟོན་པ་མ་ཡིན་ནོ། །ཞེས་ཟེར་བ་དེ་དག་གིས་ནི་ལེགས་པར་སྨྲས་པ་མ་ཡིན་ཏེ། སྤྱིར་དབུ་མའི་ལུགས་ལ་འཁོར་ལོ་དང་པོའི་ཆེད་དུ་བྱ་བའི་གདུལ་བྱ་དེ་ཡིན་ན། དེ་ལ་འཁོར་ལོ་ཕྱི་མ་གཉིས་ངེས་པར་བསྐོར་དགོས་པས་ཁྱབ་པའི་ཕྱིར་དང༌། འཁོར་ལོ་ཕྱི་མ་གཉིས་ལ་མ་བརྟེན་པའི་ཤེས་སྒྲིབ་ཀྱི་གཉེན་པོར་གྱུར་པའི་ཆོས་ཀྱི་བདག་མེད་རྒྱས་པ་རྟོགས་པའི་ཐབས་མེད་པའི་ཕྱིར། ཁྱེད་རང་ལྟར་ནའང་ཕུང་སོགས་ཐམས་ཅད་རང་གི་མཚན་ཉིད་ཀྱིས་ཡོད་མཉམ་དུ་བཤད་དགོས་པའི་གདུལ་བྱ་དེ་ལ་འཁོར་ལོ་ཐ་མ་མ་བཤད་ན་དོན་ཅི་ཡང་སྟོན་པར་མི་ནུས་པའི་ཕྱིར་དང༌། འཁོར་ལོ་བར་པར་དེ་ཐམས་ཅད་མེད་མཉམ་དུ་བཤད་དགོས་པའི་གདུལ་བྱ་དེ་ལ་ཡང་འཁོར་ལོ་ཐ་མ་མ་བཤད་ན་དོན་དུ་མི་འགྱུར་བའི་ཕྱིར་དང༌། དགོངས་པ་འགྲེལ་བ་ལས་གསུངས་པའི་འཁོར་ལོ་གསུམ་གྱི་གདུལ་བྱ་རིགས་ཐ་དད་པ་ཁོ་ནར་ངེས་ན་འཁོར་ལོ་ཐ་མ་ཐེག་པ་ཐམས་ཅད་ལ་ཡང་དག་པར་ཞུགས་པ་རྣམས་ལ་བསྐོར་བར་གསུངས་པ་དང་འགལ་བ་དང༌། འཁོར་ལོ་དང་པོའི་ཆེད་དུ་བྱ་བའི་གདུལ་བྱ་དེ་ཡིན་ན། གནས་སྐབས་ཉན་ཐོས་སུ་རིགས་ངེས་པས་ཁྱབ་པར་ཐལ་བའི་ཕྱིར་རོ། །ངེས་ན་མདོ་གཉིས་ཀྱིས་བསྟན་པའི་འཁོར་ལོ་གསུམ་གྱིས་གདུལ་བྱ་རིགས་གཅིག་དང་ཐ་དད་ཀྱི་རྣམ་པར་དབྱེ་བ་སུས་ཀྱང་དབྱེ་བར་མི་ནུས་པས་རྣམ་པ་ཀུན་ཏུ་མཚུངས་པ་ཡིན་ཏེ། དཔེར་ན། དགོངས་འགྲེལ་གྱི་འཁོར་ལོ་དང་པོ་ཉན་ཐོས་ཀྱི་ཐེག་པ་ལ་ཞུགས་པ་རྣམས་ལ་བསྐོར་བར་གསུངས་པ་བཞིན་དུ། མདོ་འདིར་ཡང་འཁོར་ལོ་དང་པོ་གང་ཟག་གི་བདག་མེད་སྟོན་དགོས་པའི་ཆེད་དུ་བྱ་བའི་གདུལ་བྱ་དེ་ལ་བསྐོར་དགོས་པར་གསུངས་པ་བཞིན་ནོ། །འོ་ན། ཐེག་པ་ཆེན་པོ་རྒྱུད་བླ་མའི་བསྟན་བཅོས་འདིར། སེམས་ཅན་ཐམས་ཅད་བདེ་བར་གཤེགས་པའི་སྙིང་པོ་ཅན་ཡིན་པར་བཤད་པ་བཞིན་དུ་འཕགས་པ་ཐོགས་མེད་ཀྱང་དེ་ལྟར་བཞེད་དམ་ཞེ་ན། འདི་ལ་གཉིས་ཏེ། རྗེ་བཙུན་གྱི་གཞུང་ལས་དེ་ལྟར་མ་བཤད་པའི་ཚུལ་དང༌། ཐོགས་མེད་ཀྱི་བཞེད་པ་སོ་སོར་ཕྱེ་བའོ། །དང་པོ་ནི། རྗེ་བཙུན་གྱི་གཞུང་གི་དགོངས་པ་སེམས་ཅན་ཐམས་ཅད་ལ། བདེ་བར་གཤེགས་པའི་སྙིང་པོ་དངོས་ཡོད་པར་སྟོན་པ་མ་ཡིན་ཏེ། མདོ་ལས་དེ་ལྟར་གསུངས་པ་དེ། སྒྲ་ཇི་བཞིན་པ་མ་ཡིན་པའི་དགོངས་པ་ཅན་དུ་རྗེ་བཙུན་གྱི་གཞུང་གིས་འགྲེལ་བའི་ཕྱིར་རོ། །ཇི་ལྟར་འགྲེལ་ཞེ་ན། འགྲེལ་ཚུལ་གསུམ་སྟེ། རྣམ་གཞག་རྣམ་པ་བཅུའི་སྒོ་ནས་དེ་དགོངས་པ་ཅན་དུ་འགྲེལ་བ་དང༌། དོན་རྣམ་པ་གསུམ་གྱི་སྒོ་ནས་དེ་འགྲེལ་བ་དང༌། དཔེ་རྣམ་པ་དགུའི་སྒོ་ནས་དེ་འགྲེལ་བའོ། །དང་པོ་ནི། མདོ་ལས་དེ་ལྟར་གསུངས་པའི་དགོངས་གཞི་ནི། དྲི་བཅས་དེ་བཞིན་ཉིད་དོ། །དགོས་པ་ནི། སེམས་ཞུམ་སེམས་ཅན་དམན་ལ་བརྙས་པ་སོགས་སོ། །དངོས་ལ་གནོད་བྱེད་ནི། གང་ཕྱིར་དེ་ནི་ཆོས་སྐུ་དེ་ནི་དེ་བཞིན་གཤེགས། །ཞེས་སོགས་ཀྱིས་འཆད་དོ། །དེ་དེའི་དགོངས་གཞིར་འཇོག་པའི་རྒྱུ་མཚན་ཡང༌། དེ་ལ་རྣམ་གཞག་རྣམ་པ་བཅུ་ཚང་བའི་རྒྱུ་མཚན་གྱིས་སོ། །དགོས་པ་དེ་ལྟར་འབྱུང་བའི་རྒྱུ་མཚན་ཡང་སེམས་ཅན་ཐམས་ཅད་ཀྱི་རྒྱུད་ལ་སྙིང་པོ་དེ་བཞིན་གཤེགས་པ་རེ་རེ་ཡོད་པར་བཤད་པས་དགོས་པ་དེ་དག་འགྲུབ་པའི་ཕྱིར་རོ། །འདི་ན་གང་དག སེམས་ཀྱི་ཆོས་དབྱིངས་སྙིང་པོ་དངོས་དང༌། དེ་བདེན་སྟོང་དེའི་ཆོས་དབྱིངས་སུ་འདོད་པ་དེ་དག་གི་ལྟར་ན། སེམས་ཅན་ཐམས་ཅད་ཀྱི་རྒྱུད་ལ་སེམས་བདེན་སྟོང་ཡོད་པར་བསྒྲུབས་པས་དགོས་པའི་ཁྱད་པར་དེ་དང་དེ་དག་ཇི་ལྟར་འགྲུབ། ཁྱད་པར་སེམས་ཅན་ཐམས་ཅད་ལ་སྟོན་པ་བཞིན་དུ་གུས་པ་ཇི་ལྟར་སྐྱེད་བསམ་དགོས་པ་ཡིན་ནོ། །གཞུང་དེས་དངོས་ལ་གནོད་བྱེད་བསྟན་པའི་རྒྱུ་མཚན་ཡང༌། འཕེལ་འགྲིབ་མེད་པ་ཉིད་བསྟན་པའི་མདོ་ལས། ཤཱ་རིའི་བུ། དེ་བཞིན་གཤེགས་པའི་སྙིང་པོ་ཞེས་བྱ་བ་ནི་ཆོས་ཀྱི་སྐུའི་ཚིག་བླ་གདགས་སོ། །ཞེས་དེ་གཉིས་མིང་གི་རྣམ་གྲངས་སུ་བཤད་པས་སོ། །འོ་ན་སེམས་ཅན་གྱི་ཁམས་ལ་ཡང་དེར་བཤད་པ་མ་ཡིན་ནམ་ཞེ་ན། དེ་ལྟར་བཤད་མོད། བཤད་པ་དེ་ཉིད་ཀྱི་ནང་ན་ཆོས་ཀྱི་སྐུ་སྙིང་པོ་དངོས་ཡིན་པ་ལ་རྩོད་པ་མེད་ལ། སེམས་ཅན་གྱི་ཁམས་ལ་སྙིང་པོས་མ་ཁྱབ་པར་ཁྱེད་རང་ཡང་འདོད་པའི་ཕྱིར། དེ་མི་འདོད་ཅེ་ན། འོ་ན་སེམས་ཅན་གྱི་ཁམས་དེ་ཅི། དེའི་སེམས་བདེན་པས་སྟོང་པའམ། དེའི་སེམས་གསལ་རིག་གི་ཆ་དེ་ཡིན། དེ་གཉིས་ལས་གཞན་ནི་དེ་ན་མེད་དོ། །དང་པོ་ལྟར་ན། སྔོན་མེད་པའི་སེམས་ཅན་གསར་བྱུང་སྲིད་པར་འགྱུར་ལ། གཉིས་པ་ལྟར་ན། གསལ་རིག་གི་ཆ་དེ་དོན་དམ་བདེན་པར་ཁྱེད་ཅག་གིས་མི་འདོད་བཞིན་དུ་ཁས་བླངས་སོ། །མདོར་ན། དྲི་བཅས་དེ་བཞིན་ཉིད་ལ་གནས་སྐབས་གཉིས་ཡོད་པ་ལས། ཉན་རང་དང་སོ་སོ་སྐྱེ་བོའི་དེ་ལ་ནི་སྙིང་པོ་ཡོངས་སུ་རྫོགས་པ་ལྟ་ཞོག དེའི་ཆ་ཤས་ཙམ་ཡང་མེད་དོ། །གཉིས་པ་དོན་རྣམ་པ་གསུམ་གྱི་སྒོ་ནས་འཆད་ཚུལ་ནི། འགྲེལ་པ་ལས། སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ནོ། །ཞེས་གསུངས་པ་གང་ཡིན་པ་དེ། དོན་གང་གིས་ཡིན་ཞེ་ན། རྫོགས་སངས་སྐུ་ནི་འཕྲོ་ཕྱིར་དང༌། །ཞེས་སོགས་གསུངས་ལ། རྐང་པ་བཞི་པོ་དེ་ཡང་མདོ་ཉིད་ལས་འབྱུང་བ་ཡིན་ཏེ། འགྲེལ་པར་མདོ་དྲངས་པ་ལས། སངས་རྒྱས་ཡེ་ཤེས་སེམས་ཅན་ཚོགས་བཞུགས་ཕྱིར། །རང་བཞིན་དྲི་མེད་དེ་ནི་གཉིས་མེད་དེ། །སངས་རྒྱས་རིགས་ལ་དེ་འབྲས་ཉེར་བཏགས་ཕྱིར། །འགྲོ་ཀུན་སངས་རྒྱས་སྙིང་པོ་ཅན་དུ་གསུངས། །ཞེས་སོགས་འབྱུང་ངོ༌། །དེའི་དོན་ཡང༌། འགྲོ་བ་ཀུན་ཆོས་ཅན། སངས་རྒྱས་ཀྱི་སྙིང་པོ་ཅན་དུ་མདོ་ལས་གསུངས་པའི་རྒྱུ་མཚན་ཡོད་དེ། རྒྱུ་མཚན་གསུམ་པོ་དེ་ཉིད་ཀྱི་ཕྱིར་རོ། །དེ་ཡང་རྫོགས་པའི་སངས་རྒྱས་ཀྱི་ཆོས་སྐུ་ནི་སྙིང་པོ་དངོས་ཡིན་ཡང༌། འཕྲོ་ཕྱིར་ཞེས་པ་སྒྲ་ཇི་བཞིན་པར་ཁས་ལེན་མི་ནུས། རིགས་ཡོད་ཕྱིར་ཞེས་པ་སྒྲ་ཇི་བཞིན་པ་ཁས་ལེན་ནུས་ཀྱང༌། རིགས་དེ་སྙིང་པོ་དངོས་མ་ཡིན་པར་ལུང་དང་རིགས་པ་གཉིས་ཀྱིས་གྲུབ། ལུང་ནི་ཉེར་བཏགས་ཕྱིར་ཞེས་དྲངས་མ་ཐག་པ་དེ་ཉིད་དོ། །རིགས་པ་ནི། རིགས་ཡོད་ཕྱིར་ན་ཞེས་པའི་ཁྱབ་འབྲེལ། རིགས་དེ་སྙིང་པོ་དངོས་ཡིན་པ་ལ་འཆད་ན། དེའི་རྒྱས་བཤད་དུ་རིགས་ལ་ལྔ་བཤད་པས། ལྔ་ཀ་ཡང་སྙིང་པོར་ཁས་ལེན་དགོས་པས་ཧ་ཅང་ཐལ་ལོ། །དེ་བཞིན་ཉིད་དབྱེར་མེད་ཕྱིར་ཞེས་པའི་ཁྱབ་འབྲེལ་ཡང༌། སེམས་ཅན་གྱི་དེ་བཞིན་ཉིད་དེ་སྙིང་པོ་དངོས་ཡིན་པ་ལ་འཆད་པ། རྔོག་ལོ་ཆེན་པོ་རྗེས་འབྲང་དང་བཅས་པ་བཞེད་པ་དེ་ལྟར་དུ་ཁས་ལེན་ན། ཤེས་བྱ་ཐམས་ཅད་སངས་རྒྱས་ཀྱི་སྙིང་པོ་ཅན་དུ་ཐལ་བར་འགྱུར་རོ། །དེ་ཡང་དེ་ལྟ་ན་འཚང་རྒྱ་བ་ལྟ་ཞོག སངས་རྒྱ་བར་རུང་བ་ཙམ་ཡང་མ་ཡིན་པའི་དོན་རྣམས་སངས་རྒྱས་ཀྱི་སྙིང་པོ་ཅན་དུ་འཆད་པ་ནི། ཕར་ཕྱིན་ཐེག་པའི་ལུགས་འདི་ལ་རུང་བ་མ་ཡིན་ནོ། །དེའི་ཕྱིར་ལུས་ཅན་ཀུན་རྟག་ཏུ་སངས་རྒྱས་ཀྱི་སྙིང་པོ་ཅན་ཞེས་པ་སྒྲ་ཇི་བཞིན་པ་ཡིན་ན། སྦྱོར་བ་དང་པོའི་རྟགས་མི་འགྲུབ་ཅིང༌། ཕྱི་མ་གཉིས་ལ་ཡང་ཁྱབ་འབྲེལ་མེད་དོ། །དེས་ན་རྣམ་པར་མ་བསླབ་པ་དག་གིས་ནི་བསྒྲུབ་བྱ་སྒྲ་ཇི་བཞིན་པར་བཟུང་ཡང༌། སྒྲུབ་བྱེད་ལ་དོགས་པ་མ་ཞུགས་པས་རྣམ་པར་འཁྱམས་སོ། །གསུམ་པ་དཔེ་དགུའི་སྒོ་ནས་དེ་དགོངས་པ་ཅན་དུ་འགྲེལ་བ་ནི། ཇི་སྐད་དུ། སངས་རྒྱས་པད་ངན་སྦྲང་རྩི་སྦྲང་མ་ལ། །ཞེས་སོགས་རྒྱས་པར་གསུངས་པའི་དོན་ཡང༌། བསྒྲུབ་བྱ་སངས་རྒྱས་གྱི་སྙིང་པོ་ལ་དགུར་ཕྱེ་ནས་དེ་སེམས་ཅན་ལ་ཡོད་པར་སྟོན་པ་མ་ཡིན་ནོ། །འོ་ན་ཅི་ཞེ་ན། སྒྲུབ་བྱེད་དོན་གསུམ་པོ་དེ་ལ་དགུར་ཕྱེ་ནས་སེམས་ཅན་ལ་གནས་པར་བསྒྲུབས་པ་ཡིན་ནོ། །འོ་ན་གཉིས་པོ་སྙིང་པོ་དངོས་མ་ཡིན་པས་དེ་ལ་རྒལ་དུ་ཅི་ཞིག་ཡོད། སེམས་ཅན་ལ་སངས་རྒྱས་ཀྱི་ཆོས་སྐུ་གནས་པར་བསྒྲུབས་ན། དེ་ཉིད་ཀྱིས་ཁོ་བོ་ཅག་གི་འདོད་པའི་དོན་གང་ཡིན་པ་དེ་ཡང་གྲུབ་པ་ཡིན་ནོ་སྙམ་ན། དེ་ཡང་གྲུབ་པ་མ་ཡིན་ཏེ། རྫོགས་སངས་སྐུ་ནི་འཕྲོ་ཕྱིར་དང༌། །ཞེས་པས་བསྟན་པའི་ཆོས་སྐུ་དེ་ནི་འབྲས་དུས་ཀྱི་ཆོས་སྐུ་ལ་བྱེད་དགོས་པར་རྔོག་ལོ་ཆེན་པོ་བཞེད་པ་ལྟར་ཕལ་ཆེར་འདོད་པ་མཐུན་པར་སྣང་ལ། དེ་སེམས་ཅན་ཐམས་ཅད་ལ་འཕྲོ་བའི་ཚུལ་འཆད་པ་ན། ཆོས་སྐུ་དེ་ལ་གསུམ་དུ་འབྱེད་པར་གཞུང་ཉིད་ལས་གསུངས་པ་ཡིན་ལ། ཆོས་ཀྱི་སྐུ་ལ་གསུམ་དུ་འབྱེད་པ་དེའི་ཚེ། ཇི་སྐད་དུ། ཆོས་དབྱིངས་ཤིན་ཏུ་དྲི་མེད་དང༌། །དེ་ཡི་རྒྱུ་མཐུན་ཟབ་པ་དང༌། །སྣ་ཚོགས་ཚུལ་ནི་སྟོན་པ་འོ། །ཞེས་རང་བཞིན་རྣམ་དག་གི་ཆ་དང༌། ལུང་གི་བསྟན་པ་གཉིས་ལ་བཤད་ལ། དེ་ལའང་སངས་རྒྱས་ཀྱི་ཐུགས་རྒྱུད་ལ་བཞུགས་པ་དང༌། སེམས་ཅན་གྱི་རྒྱུད་ལ་ཡོད་པ་གཉིས་ངོ་བོའི་སྒོ་ནས་དབྱེ་བ་མ་ཕྱེ་བ་ལ་ཆོས་སྐུ་འཕྲོ་བའི་དོན་དུ་བཤད་པ་ཡིན་ཏེ། དཔེར་ན་སྟོན་པའི་ཐུགས་རྒྱུད་ལ་བཞུགས་པའི་མདོ་བརྒྱད་སྟོང་པ་དང༌། ཉན་ཐོས་ཀྱི་རྒྱུད་ལ་ཡོད་པའི་མདོ་བརྒྱད་སྟོང་པ་བཞིན་ནོ། །དེ་ལས་གཞན་དུ་ན་ཁྱེད་ཅག་རང་རང་སོ་སོའི་འདོད་པ་མི་མཐུན་པ་དུ་མ་སྨྲ་བ་དེ་དག་ལ་ཆོས་སྐུ་འཕྲོ་བའི་དོན་དྲི་བར་བྱའི། གསལ་བར་ལུང་བསྟན་དུ་གསོལ་ཞེས་ཐལ་མོ་སྦྱོར་རོ། །གཉིས་པ་ཐོགས་མེད་ཞབས་ཀྱི་བཞེད་པ་ལ། སློབ་དཔོན་དེས་རྣལ་འབྱོར་སྤྱོད་པའི་གཞུང་གི་དོན་རྣམ་པར་འགྲེལ་བ་དེའི་ཚེ། སེམས་ཅན་ཐམས་ཅད་སྤྱིར་སངས་རྒྱས་ཀྱི་སྙིང་པོ་ཅན་དང༌། བྱེ་བྲག་ཏུ་ཀུན་གཞིའི་སྟེང་གི་ཟག་པ་མེད་པའི་ས་བོན་ཞེས་བྱ་བ་དེ་ཉིད་ལ་བདེ་གཤེགས་སྙིང་པོར་ངོས་འཛིན་ཅིང༌། ནུས་པ་དེའི་སྟེང་ན་སྟོབས་དང༌། མི་འཇིག་པ་ལ་སོགས་པའི་སངས་རྒྱས་ཀྱི་ཡོན་ཏན་རྣམས་ས་བོན་གྱི་ཚུལ་དུ་ཡོད་པ་ལ་ཁྱད་པར་མེད་ལ་དེ་ཡང་ཐོས་པའི་བག་ཆགས་ཀྱིས་བསོས་བཏབ་པའི་ཚེ་དབང་དང་ལྡན་པ་དང༌། སྒྲིབ་པ་མ་ལུས་པར་སྤངས་བའི་ཚེ་མངོན་དུ་འགྱུར་བ་ཡིན་ནོ། །མདོར་ན་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀྱི་ས་བོན་ཀུན་གཞིའི་སྟེང་ན་མི་གསལ་བའི་ཚུལ་གྱིས་ཚང་བ་ཡིན་ནོ། །ཞེས་ཞལ་གྱིས་བཞེས་པ་ཡིན་ལ། དེའི་ཚེ་ནི། སེམས་ཅན་ཐམས་ཅད་ཀྱི་རྒྱུད་ལ་ཡོན་ཏན་ཐམས་ཅད་ས་བོན་གྱི་ཚུལ་གྱིས་ཚང་བའི་སངས་རྒྱས་ཀྱི་སྐུ་རེ་རེ་ས་བོན་གྱི་ཚུལ་དུ་བཞུགས་པ་ཡིན་ནོ། །དེ་ཙམ་གྱིས་རིགས་ཆད་ཀྱི་སེམས་ཅན་མི་བཞེད་པར་མི་འགྲུབ་སྟེ། མདོ་སྡེ་རྒྱན་དུ། རང་ལུགས་ལ། རིགས་ཆད་ཡོད་པ་དང་སེམས་ཅན་ཐམས་ཅད་ལ་སྙིང་པོས་ཁྱབ་པ་དེ་གཉིས་ཀ་གསལ་བར་གསུངས་པ་བཞིན་དང༌། དབུ་མ་སྣང་བ་ལས་ཀྱང༌། སེམས་ཙམ་པའི་ངོར་བདེ་བར་གཤེགས་པའི་སྙིང་པོ་ཅན་ཡིན་པ་རྟགས་སུ་བཀོད་ནས། སེམས་ཅན་ཐམས་ཅད་སངས་རྒྱས་ཀྱི་རིགས་ཅན་དུ་བསྒྲུབས་པ་ཡིན་པས་སོ། །དོན་དེ་ཉིད་ཐུགས་ལ་བཞག་ནས། ཟླ་བའི་ཞབས་ཀྱིས་ཀྱང༌། རྣལ་འབྱོར་སྤྱོད་པའི་འདོད་པ་འགོག་པ་ན། རྣམ་པ་དེ་ལྟའི་མདོ་སྡེ་གཞན་ཡང་ནི། །དྲང་དོན་ཉིད་དུ་ལུང་འདིས་གསལ་བར་བྱེད། །ཅེས་གསུངས་ལ། དེའི་དོན་ཡང༌། རྣལ་འབྱོར་སྤྱོད་པ་པས་སྒྲ་ཇི་བཞིན་པར་འདོད་པ་ས་བོན་ཐམས་ཅད་པའི་ཀུན་གཞི་དང༌། ཡོངས་གྲུབ་བདེན་པར་གྲུབ་པ་དང༌། སེམས་ཅན་ཐམས་ཅད་སྙིང་པོ་ཅན་དུ་སྟོན་པ་རྣམས་སོ། །དེ་སྒྲ་ཇི་བཞིན་པ་མ་ཡིན་པར་སྒྲུབ་པ་ལ་ལུང་གཉིས་ཏེ། ཇི་ལྟར་ནད་པ་ནད་པ་ལ། །ཞེས་སོགས་དང༌། སྙིང་པོ་སྒྲ་ཇི་བཞིན་པ་མ་ཡིན་པར་སྟོན་པའི་ལང་ཀར་གཤེགས་པའི་མདོ་ཚན་པ་གཅིག་སྟེ་ལུང་རྣམ་པ་གཉིས་འདྲེན་པར་མཛད་དོ། །དེ་ཡང༌། རྣལ་འབྱོར་སྤྱོད་པ་པའི་ལུགས་འདི་ལ། བདེ་བར་གཤེགས་པའི་སྙིང་པོ་གང་ཡིན་པ་དེ་ཐམས་ཅད། མཚན་སོ་གཉིས་དང་ལྡན་པར་ཁས་བླངས་ནས། དེ་སེམས་ཅན་ཐམས་ཅད་ལ་ཡོད་པར་འཆད་པ་ཡིན་གྱི། སེམས་རང་བཞིན་གྱི་འོད་གསལ་བ་ལ་སྙིང་པོར་འཇོག་པ་མ་ཡིན་ཏེ། ཡིན་ན་དེ་འདྲ་སྟོན་པའི་མདོ་སྡེ་ཟླ་བའི་ཞབས་ཀྱིས་སྒྲ་ཇི་བཞིན་པ་མ་ཡིན་པའི་དྲང་དོན་དུ་བསྒྲུབས་པ་ལ་དགོས་པ་ཅི་ཡང་མི་སྣང་བའི་ཕྱིར་རོ། །ཡང་ལུགས་འདི་ལ། ཉན་རང་ལྷག་མེད་དུ་མྱ་ངན་ལས་འདས་པ་དེའི་ཚེ། གནས་སྐབས་དེ་ན་བདེ་བར་གཤེགས་པའི་སྙིང་པོ་ཡོད་ཀྱང༌། སངས་མི་རྒྱ་བ་ནི་དེ་ལ་སྒྲིབ་བྱེད་ཀྱི་དྲི་མ་སེལ་བྱེད་ཀྱི་གཉེན་པོ་མེད་པ་ལ་ཐུག་པ་ཡིན་གྱི། སྙིང་པོ་མེད་པའི་རྒྱུ་མཚན་གྱིས་ནི་མ་ཡིན་ཏེ། དུས་དེར་སྔར་གྱི་ཀུན་གཞིའི་སྟེང་གི་ཟག་པ་མེད་པའི་ས་བོན་ཞེས་བྱ་བའི་མིང་ཅན་ཆོས་ཉིད་ཀྱི་ཐོབ་པ་དེ་བཟློག་པའི་རྐྱེན་གང་ཡང་མ་བྱུང་བའི་ཕྱིར། མདོར་ན་རྣལ་འབྱོར་སྤྱོད་པ་པས། ཀུན་གཞིའི་སྟེང་གི་ཟག་མེད་ཀྱི་ས་བོན་དེ། བདེ་བར་གཤེགས་པའི་སྙིང་པོ་དངོས་ཡིན་པར་འདོད་ཅིང༌། དེ་ཡང་གསལ་རིག་གི་ཆ་ལ་འདོད་པ་མ་ཡིན་གྱི་ས་བོན་ནམ་བག་ཆགས་ལྡན་པ་མ་ཡིན་པའི་འདུ་བྱེད་ཀྱི་ངོ་བོར་གནས་པ་དེ་ལ་འཆད། རྒྱུད་བླ་མ་རྩ་འགྲེལ་ལས། དྲི་མ་དང་བཅས་པའི་སེམས་གསལ་རིག་གི་ཆ་དེ་སྙིང་པོ་དངོས་མ་ཡིན་ཀྱང་སྙིང་པོའི་དགོངས་གཞིར་འཆད། སློབ་དཔོན་ཟླ་བས་ནི། དྲི་མ་དང་བཅས་པའི་སེམས་ཀྱི་སྟོང་ཆ་དེ། སྙིང་པོ་དངོས་མ་ཡིན་ཡང༌། སྙིང་པོའི་དགོངས་གཞིར་འཆད། བོད་ཀྱི་ཤིང་རྟ་ཆེན་པོ་རྔོག་ལོ་ཙཱ་བ་ནི། དེའི་སྟོང་ཆ་དེ་ཉིད་སྙིང་པོ་དངོས་ཡིན་ཞིང༌། འོད་གསལ་ཞེས་བྱ་བ་ཡང་སྟོང་ཆ་དེ་ལ་ཟེར་བ་ཡིན་གྱི། གསལ་ཆ་དེ་ལ་འཆད་པ་རྒྱུད་བླ་མའི་དགོངས་པ་མ་ཡིན་པར་འཆད། གངས་ཅན་དུ་བྱོན་པའི་གཞན་སྟོང་ཞལ་གྱིས་བཞེས་པ་དག་གིས་ནི། སྙིང་པོའི་མདོ་རྣལ་འབྱོར་སྤྱོད་པས་སྒྲ་ཇི་བཞིན་པར་བཀྲལ་བ་དེ་ཉིད་དང་མཐུན་པར། སྒྲ་ཇི་བཞིན་པ་ཁོ་ནར་ཁས་ལེན་ཞིང༌། ཟླ་བ་གྲགས་པས་མདོ་དེ་དག་དགོངས་པ་ཅན་དུ་བཀྲལ་ཀྱང༌། སློབ་དཔོན་དེ་རྩོད་ལྡན་གྱི་པཎྜི་ཏ་ཡིན་པས་ཚད་མར་མི་བྱེད་དོ། །ཞེས་གསུངས། རྗེ་བཙུན་ས་སྐྱ་པཎྜི་ཏའི་བཞེད་པ་ནི། ཐེག་པ་ཆེན་པོ་རྒྱུད་བླ་མའི་བསྟན་བཅོས་ཀྱིས། རྣལ་འབྱོར་སྤྱོད་པ་པས་སྒྲ་ཇི་བཞིན་པར་འདོད་པའི་སྙིང་པོའི་མདོ་དེ་དག སྒྲ་ཇི་བཞིན་པ་མ་ཡིན་པའི་དགོངས་པ་ཅན་དུ་བཀྲལ་བར་བཞེད། དེ་ཡང་ཇི་ལྟར་ཞེ་ན། ལང་ཀར་གཤེགས་པའི་མདོ་ལྟར་ན། སེམས་ཅན་ཐམས་ཅད་ལ་སྙིང་པོ་ཡོད་པར་གསུངས་པའི་དགོངས་གཞི་ནི། སྟོང་ཉིད་མཚན་མེད་སྨོན་མེད་སོགས་ལ་དགོངས། དགོས་པ་ནི། བྱིས་པ་རྣམས་བདག་མེད་པས་འཇིག་པ་སྤང་བའི་དོན་དུ་གསུངས། དངོས་ལ་གནོད་བྱེད་ནི། དེ་ལྟར་ཁས་བླངས་ན་མུ་སྟེགས་རྟག་སྨྲ་བའི་བདག་འདོད་ཚུལ་དང་མཚུངས་པའོ། །ཐེག་པ་ཆེན་པོ་རྒྱུད་བླ་མ་ལྟར་ན། དགོངས་གཞི་ནི། སྟོང་ཉིད་དོ། །དགོས་པ་ནི་སྐྱོན་ལྔ་སྤང་བའི་ཕྱིར་དུའོ། །དངོས་ལ་གནོད་བྱེད་ནི། ངེས་པའི་དོན་གྱི་མདོ་སྡེ་དང་འགལ་བའོ། །ཇི་ལྟར་འགལ་ཞེ་ན། ཤེས་ཕྱིན་ལས་ཡང་དག་པའི་མཐའ་དང༌། མྱ་ངན་ལས་འདས་པ་ཡང༌། སྤྲིན་དང་རྨི་ལམ་དང་སྒྱུ་མའི་དཔེ་གསུངས་པ་དེའོ། །དེ་ཡང་ངག་དོན་དུ་དྲིལ་ན། དྲི་བཅས་དེ་བཞིན་ཉིད་ཆོས་ཅན། སྙིང་པོ་དངོས་མ་ཡིན་ཏེ། ཉོན་མོངས་པ་དང་ལས་དང་རྣམ་པར་སྨིན་པ་གསུམ་དང་མ་བྲལ་བའི་ཕྱིར་ཞེས་པ་ཡིན་ལ། དོན་དེ་ཡང༌། ཇི་སྐད་དུ། སྤྲིན་དང་རྨི་ལམ་སྒྱུ་བཞིན་དེ་དང་དེར། །ཞེས་སོགས་ཀྱིས་གསལ་བར་ཕྱེ་བ་ཡིན་ནོ། །ཞེས་པ་ནི། རྗེ་བཙུན་དམ་པའི་བཞེད་པ་ཡིན་ནོ། །ཇི་སྐད་དུ། འོན་ཀྱང་མདོ་སྡེ་འགའ་ཞིག་དང༌། །ཐེག་པ་ཆེན་པོ་རྒྱུད་བླ་མར། སྙིང་པོའི་མདོ་སྡེ་སོགས་རྣམས་སུ། །གོས་རུལ་ནང་ན་རིན་ཆེན་ལྟར། །སེམས་ཅན་རྣམས་ལ་སངས་རྒྱས་ཀྱི། །སྙིང་པོ་ཡོད་པར་གསུངས་པ་ནི། །དགོངས་པ་ཡིན་པར་བཤད་ཤེས་བྱ། །ཞེས་སོགས་རྒྱས་པར་གསུངས་པ་ཡིན་ནོ། །ཕྱི་རབས་པ་དག་གིས་ནི། དོན་འདི་དག་གི་རྣམ་པར་དབྱེ་བ་མ་ཕྱེད་པས་རྣམ་པར་ཁྱམས་པ་ཡིན་ནོ། །ཐོགས་མེད་ཞབས་ཀྱི་བཞེད་ཚུལ་གཉིས་པ་ནི། སློབ་དཔོན་འདིས། ངོ་བོ་ཉིད་མེད་པར་སྨྲ་བའི་དབུ་མ་པའི་ལུགས་འཆད་པ་ན། སེམས་ཅན་ཐམས་ཅད་སངས་རྒྱས་ཀྱི་སྙིང་པོ་ཅན་དུ་སྟོན་པའི་མདོ་དེ་དང་དེ་སྒྲ་ཇི་བཞིན་པ་མ་ཡིན་པའི་དགོངས་པ་ཅན་དུ་འགྲེལ་བ་ཡིན་ཏེ། སློབ་དཔོན་འདིའི་བཞེད་པ་ལ་རྒྱུད་བླ་མའི་བསྟན་བཅོས་ཀྱིས། སྙིང་པོ་སྟོན་པའི་མདོ་དགོངས་པ་ཅན་དུ་འགྲེལ་བར་འཆད་པའི་ཕྱིར་རོ། །དེ་ཡང་དགོངས་གཞི་ནི་དྲི་བཅས་དེ་བཞིན་ཉིད་དོ། །དེ་ཆོས་ཅན། ཁྱོད་ལ་སངས་རྒྱས་དང་དེ་བཞིན་གཤེགས་པའི་མིང་གིས་འདོགས་སུ་རུང་སྟེ། འདོགས་པའི་ཆོས་གསུམ་ཚང་བའི་ཕྱིར། རྒྱུ་མཚན་ནི། དེ་དང་དེའི་ཆོས་ཉིད་ཡིན་པའོ། །དགོས་པ་ནི་སྐྱོན་ལྔ་སྤང་བ་དང༌། ཡོན་ཏན་ལྔ་སྐྱེད་པའོ། །དངོས་ལ་གནོད་བྱེད་ནི། དེ་ཆོས་ཅན། སངས་རྒྱས་ཀྱི་སྙིང་པོ་དངོས་མ་ཡིན་ཏེ། རྣམ་ཀུན་མཆོག་ལྡན་གྱི་སྟོང་པ་ཉིད་མ་ཡིན་པའི་ཕྱིར་དང༌། ཆོས་ཀྱི་སྐུ་ལ་སོགས་པའི་མིང་གི་རྣམ་གྲངས་བཞི་པོ་དེ་དང་མི་ལྡན་པའི་ཕྱིར། ཞེས་བཞེད་པ་ཡིན་ནོ། །རྣམ་ཀུན་མངོན་པར་བྱང་ཆུབ་དང༌། །ཞེས་སོགས་དང༌། དེས་ན་སངས་རྒྱས་མ་ཐོབ་པར། །ཞེས་སོགས་ཀྱི་དཔེ་དོན་དང༌། མངའ་བདག་རྒྱལ་པོའི་གཟུགས་རི་མོར་འབྲི་བའི་དཔེ་དོན་སྦྱོར་ཚུལ་སྟོན་པའི་འགྲེལ་པ་ལས་གསལ་བའི་ཕྱིར། མདོར་ན། སློབ་དཔོན་འདིའི་བཞེད་པ་ལ། སྙིང་པོ་དངོས་ཡིན་ན། ཆོས་སྐུ་དང་མྱ་ངན་ལས་འདས་པ་དང༌། སྟོབས་སོགས་ཡོན་ཏན་རྣམས་དང་དབྱེར་མེད་ཡིན་པས་ཁྱབ་པར་སྟོན་པ་ནི་ཤིན་ཏུ་གསལ་ཞིང༌། ཉན་རང་རྣམས་ལ་ཡང་མྱ་ངན་ལས་འདས་པ་ཡོད་པས་སྙིང་པོ་དངོས་ཡོད་དམ་སྙམ་པའི་དོགས་པ་གསལ་བའི་ཕྱིར་དུ། དེས་ན་སངས་རྒྱས་མ་ཐོབ་བར། །མྱ་ངན་ལས་འདས་པ་མི་ཐོབ་སྟེ། །ཞེས་གསུངས་པར་གསལ་བ་དང༌། གཞུང་རྩ་བ་ཉིད་ན་ཡང༌། སངས་རྒྱས་པད་ངན་སྦྲང་རྩི་སྦྲང་མ་ལ། །ཞེས་པ་ལྟ་བུ། མདོ་ཡི་དངོས་བསྟན་སོར་བཞག་པ་རེ་དང༌། འདིའི་རང་བཞིན་ཆོས་སྐུ་དང༌། །ཞེས་པ་ལྟ་བུ། དེའི་དགོངས་པ་འགྲེལ་བའི་གཞུང་རྗེ་བཙུན་ཉིད་ཀྱིས་སྦྱར་བ་རེ་དང་གཉིས་གཉིས་ཡོད་པ་མ་འདྲེས་པར་བྱ་དགོས་པ་དང༌། ཡང༌། རྫོགས་སངས་སྐུ་ནི་འཕྲོ་ཕྱིར། །ཞེས་པའི་སྒྲུབ་བྱེད་གསུམ་པོ་སྒྲ་ཇི་བཞིན་པ་ཡིན་པ་དང༌། ལུས་ཅན་ཀུན་རྟག་ཏུ་སངས་རྒྱས་སྙིང་པོ་ཅན་ཞེས་པའི་བསྒྲུབ་བྱ་སྒྲ་ཇི་བཞིན་པ་མ་ཡིན་པར་འཆད་པ་དང༌། སངས་རྒྱས་ཀྱི་སྐུ་འཕྲོ་བའི་དོན་ཡང༌། སངས་རྒྱས་ཀྱི་ཆོས་ཉིད་ཀྱིས་ཁྱབ་པ་དང༌། ལུང་གི་བསྟན་པ་འཕྲོ་བའི་དོན་ལ་འཆད་པ་ནི་སློབ་དཔོན་དེའི་འགྲེལ་པའི་དོན་དུ་ལེགས་པར་གསལ་བས། དུས་ཕྱིས་འབྱོན་པར་འགྱུར་བའི་རྣམ་དཔྱོད་དང་ལྡན་པ་དག་གིས་ངག་ཉུང་ངུ་འདི་ཙམ་ཞིག་ལ་བརྟེན་ནས། རྒྱུད་བླ་མའི་བསྟན་བཅོས་རྩ་འགྲེལ་དེ་དག་གི་བཤད་བྱའི་མདོ་དང་བཅས་པའི་དགོངས་པ་འགྲེལ་པ་ལ་བསྙེངས་པ་མེད་པའི་སྤོབས་པ་ཐོབ་པར་བྱོས་ཤིག གཉིས་པ་མགོན་པོ་ཀླུ་སྒྲུབ་རྗེས་འབྲང་དང་བཅས་པའི་འཁོར་ལོ་གསུམ་གྱི་དྲང་ངེས་ཀྱི་མཚན་གཞི་འཛིན་ཚུལ་ནི་འདི་ལྟར། དང་པོར་བསོད་ནམས་མ་ཡིན་པ་བཟློག་པའི་འཁོར་ལོ་ཆོས་ཅན། དྲང་བའི་དོན་ཅན་ཡིན་ཏེ། ཀུན་རྫོབ་ཀྱི་བདེན་པ་གཙོ་བོར་སྟོན་དགོས་པའི་གདུལ་བྱ་ལ། དེ་ཉིད་བསྟན་བྱའི་གཙོ་བོར་སྟོན་པའི་འཁོར་ལོ་ཡིན་པའི་ཕྱིར། ཇི་སྐད་དུ། འཕགས་པ་ལྷས། གང་ཞིག་གང་གང་ལ་དགའ་བ། །དེ་ཡི་དེ་དེ་སྔར་བཤད་བྱ། །ཉམས་པར་གྱུར་པ་དམ་ཆོས་ཀྱི། །སྣོད་ནི་ཅིས་ཀྱང་མ་ཡིན་ནོ། །ཞེས་གསུངས་པ་ལྟར་རོ། །གཉིས་པ་བར་དུ་བདག་བཟློག་པའི་འཁོར་ལོ་དང༌། ཐ་མར་སྤྲོས་པ་ཀུན་བཟློག་པའི་འཁོར་ལོ་ཆོས་ཅན། ངེས་པའི་དོན་ཡིན་ཏེ། དོན་དམ་པའི་བདེན་པ་སྟོན་པའི་སྣོད་དུ་རུང་བའི་གདུལ་བྱ་ལ། དེ་ཉིད་གཙོ་བོར་སྟོན་པའི་འཁོར་ལོ་ཡིན་པའི་ཕྱིར། དེ་གཉིས་ཀྱི་ནང་ནས་ཀྱང་བར་དུ་བདག་བཟློག་པའི་འཁོར་ལོ་ཆོས་ཅན། ངེས་དོན་གྱི་དྲང་བའི་དོན་ཅན་ཡིན་ཏེ། ངེས་དོན་དེ་ཉིད་སྒྲ་ཇི་བཞིན་པ་མ་ཡིན་པའི་སྒོ་ནས་སྟོན་པའི་མདོ་ཡིན་པའི་ཕྱིར། དེས་ན། གཟུགས་སྟོང་པའོ་ཞེས་པའི་མདོ་ལྟ་བུའམ། བྱང་ཆུབ་སེམས་དཔའ་ཡོད་བཞིན་ཡང་དག་པར་རྗེས་སུ་མ་མཐོང་ཞེས་པའི་མདོ་ལྟ་བུའོ། །དེ་ཡང་སྒྲ་ཇི་བཞིན་པ་མ་ཡིན་ཏེ། ཇི་སྐད་དུ། ཡུམ་གྱི་མདོ་ཉིད་ལས། གཟུགས་སྟོང་ཞེས་བྱ་བར་སྤྱོད་ན་མཚན་མ་ལ་སྤྱོད་དོ་ཞེས་དང༌། ཕུང་འདི་སྟོང་ཞེས་རྟོག་ནའང་བྱང་ཆུབ་སེམས་དཔའ་ནི། །མཚན་མ་ལ་སྤྱོད་སྐྱེ་མེད་གནས་ལ་དད་མ་ཡིན། །ཞེས་དང༌། དབུ་མ་རྩ་བ་ལས་ཀྱང༌། སྟོང་ངོ་ཞེས་ཀྱང་མི་བྱ་སྟེ། །ཞེས་འབྱུང་བ་བཞིན་ནོ། །གཉིས་པ་ཐ་མར་སྤྲོས་པ་ཐམས་ཅད་བཟློག་པའི་འཁོར་ལོ་ཆོས་ཅན། ངེས་དོན་གྱི་ངེས་པའི་དོན་ཅན་ཡིན་ཏེ། ངེས་དོན་དེ་ཉིད་སྒྲ་ཇི་བཞིན་པའི་སྒོ་ནས་སྟོན་པའི་མདོ་ཡིན་པའི་ཕྱིར། ཇི་ལྟར་སྟོན་ཞེ་ན། གཟུགས་ནས་རྣམ་པ་ཐམས་ཅད་མཁྱེན་པ་ཉིད་ལ་ཐུག་པའི་བར་གྱི་ཆོས་ཐམས་ཅད་ཡོད་མེད་ལ་སོགས་པའི་མཐའ་གང་དུ་ཡང་ཡོད་པ་མ་ཡིན་པར་སྟོན་པའི་མདོ་རྣམས་སོ། །དེ་ལྟར་སྟོན་པའི་མདོ་དེ་སྒྲ་ཇི་བཞིན་པ་ཡིན་མོད། དེས་སྟོན་པའི་དོན་དེ་ཉིད་ངེས་དོན་མཐར་ཐུག་ཡིན་ནོ། །ཞེས་ཀྱང་བརྗོད་པར་མི་ནུས་ཏེ། གང་ངེས་དོན་མཐར་ཐུག་ཡིན་ན། རྗོད་པ་དང་བྲལ་བས་ཁྱབ་པའི་ཕྱིར། ཇི་སྐད་དུ། ཚིག་གསལ་འཇུག་གཉིས་སུ་མདོ་དྲངས་པ་ལས། ལྷའི་བུ་དོན་དམ་པའི་བདེན་པ་ལ་ནི་སེམས་ཀྱི་རྒྱུ་བ་ཡང་མེད་ན། ཡི་གེ་རྣམས་ལྟ་ཅི་སྨོས་ཞེས་དྲངས་སོ། །གལ་ཏེ་འོ་ན་དོན་དམ་པའི་བདེན་པ་བརྗོད་བྲལ་ཡིན་ནོ་ཞེས་ཟེར་བ་དང༌། འཁོར་ལོ་གསུམ་གྱི་བསྟན་བྱར་ཁས་ལེན་པ་འགལ་ལོ། །སྙམ་ན་འགལ་བ་མ་ཡིན་ཏེ། དོན་དམ་པའི་བདེན་པ་ངོས་གཟུང་བར་མི་ནུས་སོ་ཟེར་བ་དང༌། འཁོར་ལོ་ཐ་མར་གཟུགས་ནས་རྣམ་མཁྱེན་གྱི་བར་ཐམས་ཅད་སྤྲོས་པའི་མཐའ་གང་དུ་ཡང་ཡོད་པ་མ་ཡིན་ནོ་ཞེས་གསུངས་པ་གཉིས་པོ་དོན་གཅིག་ལ་འདུ་བའི་ཕྱིར། གངས་ཅན་གྱི་ཆེན་པོ་དག ཤེས་ཕྱིན་གྱི་མདོ་ལས། གཟུགས་སོགས་ཡོད་པ་མ་ཡིན་པར་གསུངས་པ་ཐམས་ཅད་སྒྲ་ཇི་བཞིན་པ་མ་ཡིན་པའོ། །ཞེས་ཟེར་བ་དེ་དག་ནི། དེའི་བཞེད་པ་མ་ཡིན་ཞིང༌། དངོས་པོར་སྨྲ་བའི་དུག་གིས་ཟིན་པ་ཡིན་ཏེ། གནས་ཚུལ་མཐར་ཐུགས་སེམས་པ་ལ་ཞུགས་པ་དེའི་ཚེ། སྤྲོས་པའི་མཐའ་གང་ཡང་ཞལ་གྱིས་མི་བཞེས་པ་ནི་དེའི་བཞེད་པ་མཐར་ཐུག་ཡིན་པའི་ཕྱིར། དེ་བས་ན་འཁོར་ལོ་ཐ་མ་གཉིས་སུ་དོན་དམ་པའི་བདེན་པ་སྟོན་ཚུལ་ལ་གཉིས་ཏེ། གནས་སྐབས་ཀྱི་ངེས་དོན་བརྗོད་བཅས་ཀྱི་སྒོ་ནས་བསྟན་པ་དང༌། མཐར་ཐུག་གི་ངེས་དོན་བརྗོད་བྲལ་གྱི་སྒོ་ནས་བསྟན་པའོ། །དང་པོ་ནི། སྟོང་ཉིད་དང༌། སྤྲོས་བྲལ་ལ་སོགས་པའི་མིང་གིས་བསྟན་པ་དེའོ། །གཉིས་པ་ནི། བརྗོད་བྲལ་དུ་ཡང་བརྗོད་པར་མི་ནུས་མོད། འོན་ཀྱང་སྒྲོ་བཏགས་ནས་བརྗོད་པ་ཐམས་ཅད་བྲལ་ལོ་ཞེས་བསྟན་པའོ། །གཉིས་ཀའི་མཐར་ཐུག་གི་དགོངས་པ་བརྗོད་བྲལ་ལ་ཐུག་ན་ཡང༌། གཅིག་གིས་ནི་བདེན་སྟོང་སོགས་སུ་བརྗོད་དགོས་པར་བཤད་ལ། གཅིག་ཤོས་ཀྱིས་ནི་བདེན་སྟོང་སོགས་སུའང་བརྗོད་མི་ནུས་པར་བཤད་པ་ནི། འཁོར་ལོ་ཕྱི་མ་གཉིས་ཀྱི་ཁྱད་པར་ཡིན་ནོ། །འོ་ན་ལུགས་འདི་ལ་རྒྱུད་བླ་མའི་བཤད་བྱའི་མདོ་རྣམས་འཁོར་ལོ་གང་དུ་དྲང་ཞེ་ན། དེ་ཉིད་ལ་ཡང་གསུམ་ཀ་ཡོད་པར་འཆད་དགོས་ཏེ། དེ་ཉིད་ལ་བདག་ཡོད་པར་འཆད་པ་དང༌། མེད་པར་འཆད་པ་དང༌། སྤྲོས་བྲལ་དུ་འཆད་པ་གསུམ་ཀ་སྣང་བའི་ཕྱིར་རོ། །དཔེར་ན་ཤེས་ཕྱིན་གྱི་མདོ་བརྒྱད་སྟོང་པ་ལྟ་བུ་གཅིག་ལ་གསུམ་ཀ་དམིགས་པ་བཞིན་ནོ། །དེ་ལྟ་མོད་ཀྱི་ལུགས་འདི་ལ་ཡང༌། ལེགས་པར་རྣམ་པར་ཕྱེ་བའི་འཁོར་ལོ་དང༌། ཕྱིར་མི་བཟློག་པའི་གཏམ་གྱི་འཁོར་ལོ་གཉིས་ཀྱི་སྤྱི་ལྡོག་ནས་ངེས་དོན་དང༌། བྱེ་བྲག་ཏུ་སྒྲ་ཇི་བཞིན་པ་མ་ཡིན་པའི་ངེས་དོན་དུ་ཁས་བླངས་ན་བདེ་བ་ཡིན་ནོ། །གསུམ་པ་ལུགས་གཉིས་མི་འགལ་བར་གྲུབ་པ་ནི། མདོར་བསྡུ་ན། ཤིང་རྟའི་སྲོལ་འབྱེད་གཉིས་ཀྱི་དྲང་ངེས་ཀྱི་མདོའི་མཚན་ཉིད་འཇོག་ལུགས་མཐུན་པ་ཁོ་ན་ཡིན་ཅིང༌། མཚན་གཞི་ལ་ཡང་འཁོར་ལོ་དང་པོ་དྲང་དོན་དང༌། ཕྱི་མ་གཉིས་ངེས་དོན་དུ་འཇོག་པར་མཐུན་ནོ། །དེ་ལྟ་མོད་ཀྱི་མི་མཐུན་པའི་ཁྱད་པར་ནི། འཁོར་ལོ་ཕྱི་མའི་མཚན་གཞི་དང༌། དོན་དམ་བདེན་པའི་མཚན་གཞི་འཛིན་ཚུལ་མི་མཐུན་པ་ཡིན་ཏེ། ཀླུ་སྒྲུབ་ཞབས་ཀྱིས་ནི། ཤེས་ཕྱིན་གྱི་མདོའི་བདག་མེད་ཙམ་དུ་སྟོན་པ་རྣམས་འཁོར་ལོ་བར་པ་དང༌། མཐའ་བྲལ་དུ་སྟོན་པ་རྣམས་འཁོར་ལོ་ཐ་མར་འཆད་པའི་ཕྱིར་དང༌། མདོ་དེའི་ནང་གི་བདེན་གཉིས་ཟུང་འཇུག་ཏུ་སྟོན་པ་རྣམས་འཁོར་ལོ་བར་པ་དང༌། དོན་དམ་པ་རྐྱང་པ་སྟོན་པའི་མདོ་རྣམས་འཁོར་ལོ་ཐ་མར་འཆད་པའི་ཕྱིར་དང༌། ལུགས་སྔ་མས་དོན་དམ་བདེན་པའི་མཚན་གཞིར་ཁས་ལེན་པ་གང་ཡིན་དེ་ཐམས་ཅད་མ་ཡིན་དགག་དང༌། བདེན་གྲུབ་ཏུ་ཁས་ལེན་པའི་ཕྱིར་དང༌། ཅིག་ཤོས་ཀྱིས་ནི་དེ་ལས་བཟློག་པའི་ཕྱིར། བྱེ་བྲག་ཏུ་ཤེས་ཕྱིན་གྱི་མདོ་ངེས་དོན་གྱི་མདོར་ཞལ་གྱིས་བཞེས་པ་ནི་ཐོགས་མེད་སྐུ་མཆེད་ཀྱི་བཞེད་པ་དྲི་མ་མེད་པ་ཡིན་ཏེ། ཇི་སྐད་དུ། རྣམ་བཤད་རིགས་པ་ལས། ཤེས་ཕྱིན་གྱི་མདོ་སངས་རྒྱས་ཀྱི་བཀའ་ཡིན་པར་བསྒྲུབས་པའི་སྐབས་སུ་འདི་སྐད་དུ་གསུངས་པ་ཡིན་ཏེ། ཇི་ལྟར་སངས་རྒྱས་གསུངས་མ་ཡིན། །འགལ་བའི་ཕྱིར་རོ་གཞན་དེ་བཞིན། །དེ་ངེས་དོན་ཡིན་རིལ་མི་ཤེས། །ངེས་དོན་མེད་པར་ཇི་ལྟར་ཤེས། །དེ་སྒྲ་བཞིན་དོན་མ་ཡིན་ནོ། །འགལ་བའི་རོ་ཉམས་བྱེད་པ་མིན། །ལྟ་བ་མི་བཟང་བཀག་ཕྱིར་རོ། །ཕན་པའི་ཐབས་ཀྱང་བསྟན་ཕྱིར་རོ། །དེ་ནི་ངེས་པའི་དོན་གྱི་ཐེག་པ་ཆེན་པོ་ལ་ནི་ངེས་པའི་དོན་མེད་དོ། །ཞེས་སྨྲས་པ་གང་ཡིན་པ་དེ་ཡང་ཐོས་པ་ཉུང་བའི་ཕྱིར། དེ་སྐད་སྨྲས་པ་ཡིན་ཏེ། དགོངས་པ་ངེས་པར་འགྲེལ་པའི་མདོ་ལས། ཆོས་ཐམས་ཅད་ནི་ངོ་བོ་ཉིད་མེད་པ་ཞེས་བྱ་བདེ་ལྟ་བུ་ལ་སོགས་པ། དེ་ཐམས་ཅད་ངེས་པའི་དོན་ཡིན་པར་འབྱུང་ལ། མདོ་སྡེ་གཞན་གྱི་ཁྱད་པར་མང་པོ་དག་ལས་ཀྱང༌། དོན་དེ་ཉིད་ཡོངས་སུ་བསྟན་ནོ། །ཞེས་གསལ་བར་གསུངས་པས། མདོ་སྡེ་དགོངས་འགྲེལ་གྱིས་ཤེས་ཕྱིན་གྱི་མདོ་ངེས་དོན་དུ་བཀྲལ་བར་གསུངས་པའི་ཕྱིར་རོ། །གསུམ་པ་དེ་ཐམས་ཅད་ཀྱི་གྲུབ་དོན་བསྟན་པ་ནི། དེ་ལྟར་དྲང་ངེས་ཀྱི་གསུང་རབ་ལ་ཐོས་སོགས་ཀྱིས་འཇུག་པའི་རིམ་པ་ཇི་ལྟ་བུ་ཞེ་ན། མདོ་སྡེ་དཀོན་མཆོག་བརྩེགས་པ་ལས། རྟོན་པ་བཞིའི་རིམ་པས་འཇུག་པར་གསུངས་ཏེ། དེ་ཡང་འདི་ལྟར། དང་པོ་ཐོས་པ་ཚོལ་བའི་དུས་སུ་ནི། ཆོས་ལ་རྟོན་གྱི་གང་ཟག་ལ་མི་རྟོན། ཆོས་ལའང་ཚིག་དོན་གཉིས་ལས། ཐོས་པའི་དོན་སེམས་དཔའ་ལ་གཞོལ་བ་དེའི་ཚེ། དོན་ལ་རྟོན་གྱི་ཚིག་ལ་མི་རྟོན། དོན་ལ་ཡང་ངེས་པའི་དོན་དང་དྲང་བའི་དོན་གཉིས་ལས། བསམ་པའི་དོན་ཚུལ་བཞིན་དུ་ཡིད་ལ་བྱེད་པ་དེའི་ཚེ། ངེས་པའི་དོན་ལ་རྟོན་གྱི་དྲང་བའི་དོན་ལ་མི་རྟོན། ངེས་དོན་ལའང་རྣམ་ཤེས་ཀྱིས་མཐོང་བ་མཐུན་པའི་ངེས་དོན་དང༌། ཡེ་ཤེས་ཀྱི་མཐོང་བ་དོན་དམ་པའི་ངེས་དོན་གཉིས་ལས། ཡིད་ལ་བྱས་པའི་དོན་མཐོང་བ་དེའི་ཚེ། ཡེ་ཤེས་ལ་རྟོན་གྱི་རྣམ་ཤེས་ལ་མི་རྟོན་པའོ། དེ་ལ་རྟོན་པ་ཞེས་བྱ་བ་ནི་ཡིད་རྟོན་པ་སྟེ། ཡིད་གཏོད་པར་བྱེད་པའོ། །འོ་ན་སྒྲ་ཇི་བཞིན་པ་ཡིན་མིན་དང༌། དགོངས་པ་ཅན་ཡིན་མིན་གཉིས་གང་ཞིག་ལ་གཙོ་བོར་རྟོན་ཞེ་ན། རེ་རེ་ལའང་གཉིས་གཉིས་ཏེ་ཀུན་རྫོབ་བདེན་པ་བརྗོད་བྱར་བྱེད་པའི་སྒྲ་ཇི་བཞིན་པ་ཡིན་མིན་དང༌། དོན་དམ་པའི་བདེན་པར་བརྗོད་བྱར་བྱེད་པའི་དེ་ཡིན་མིན་གཉིས་དང༌། ཀུན་རྫོབ་ཀྱི་བདེན་པ་དགོངས་གཞིར་བཟུང་པའི་དང༌། དོན་དམ་པའི་བདེན་པ་དགོངས་གཞིར་བཟུང་བའི་དགོངས་པ་ཅན་གཉིས་དང༌། ཀུན་རྫོབ་བདེན་པ་སྟོན་པའི་ངག་ལྡེམ་པོ་དང༌། དོན་དམ་པའི་བདེན་པ་སྟོན་པའི་ངག་ལྡེམ་པོ་གཉིས་ལས། དོན་དམ་བདེན་པའི་དབང་དུ་བྱས་པའི་དེ་དང་དེ་ལ་གཙོ་བོར་རྟོན་པ་ཡིན་ནོ། །ཇི་སྐད་བཤད་པ་འདི་དག་ཀྱང༌། རང་རང་ལ་ལྟོས་པའི་མཐར་ཐུག་གི་དབང་དུ་བྱས་པ་ཡིན་གྱི། གནས་སྐབས་ཀྱི་དབང་དུ་བྱས་ན། རྟོན་པ་དང་པོའི་སྐབས་སུ་དང་པོར་གང་ཟག་ལ་རྟོན། རྟོན་པ་གཉིས་པའི་ཚེ་དང་པོར་ཚིག་ལ་རྟོན། གསུམ་པའི་ཚེ་དང་པོར་དྲང་དོན་ལ་རྟོན། བཞི་པའི་ཚེ་དང་པོར་རྣམ་ཤེས་ལ་རྟོན་དགོས་པ་ཡིན་ཏེ། དེ་དག་སྔ་མ་སྔ་མ་ལ་ཡིད་རྟོན་པ་མེད་ན། ཕྱི་མ་ཕྱི་མ་ལ་ཡིད་རྟོན་པ་མི་འབྱུང་བའི་ཕྱིར། ཇི་སྐད་དུ། སློབ་མ་བཟང་པོ་བླ་མ་གུས་ལྡན་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང༌། །ཞེས་དང༌། ཐ་སྙད་ལས་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །ཞེས་དང༌། མདོ་སྡེའི་རྒྱན་ལས། འདི་ན་དང་པོར་ཐོས་ལ་བརྟེན་ནས་ཡིད་ལ་བྱེད་པ་འབྱུང༌། །ཞེས་གསུངས་པའི་ཕྱིར་རོ། །འོ་ན་རྣམས་ཤེས་དང༌། ཡེ་ཤེས་ཀྱི་ཁྱད་པར་ཅི་ཞེ་ན། དང་པོ་ནི་མ་རིག་པའི་བསླད་པ་ཞུགས་པའི་དབང་གིས་གཟུང་འཛིན་གཉིས་སུ་སྣང་བའོ། །གཉིས་པ་ནི། དེ་དང་བྲལ་བའི་དབང་གིས་གནས་ཚུལ་ཇི་ལྟ་བ་བཞིན་རྟོགས་པའི་བློའོ། །དེ་ལའང་གཉིས་ཏེ། མཉམ་གཞག་རྣམ་པར་མི་རྟོག་པའི་ཡེ་ཤེས་དང༌། རྗེས་ཐོབ་དག་པ་འཇིག་རྟེན་པའི་ཡེ་ཤེས་སོ། །དང་པོ་རྣམ་པར་ཤེས་པ་ལའང་དབྱེ་བ་ནི། ཇི་སྐད་དུ། དབུས་མཐའ་ལས། དོན་དང་སེམས་ཅན་བདག་རྣམ་རིག །སྣང་བའི་རྣམ་པར་ཤེས་པ་ནི། །རབ་ཏུ་སྐྱེའོ། །ཞེས་གསུངས་པ་ལྟར་རོ། །གངས་ཅན་གྱི་ཕྱི་རབས་པ་དག གཙོ་བོ་རྣམ་རིག་གང་ཡིན་ཐམས་ཅད་རྣམ་ཤེས་སུ་ཁས་ལེན་དགོས་པ་ཡིན་གྱི། རྣམ་ཤེས་དང༌། ཡེ་ཤེས་གཉིས་ཀྱི་རྣམ་གཞག་འདི་ནི། རྨོངས་པ་ངོ་མཚར་བསྐྱེད་པའི་གཏམ་དུ་བྱ་བ་ཡིན་ནོ། །ཞེས་ཟེར་བ་དེ་དག་གིས་ནི་མདོ་རྒྱུད་དང༌། དབུ་སེམས་ཀྱི་སྲོལ་འབྱེད་གཉིས་པོ་གང་གི་ཡང་ལུགས་མ་ཡིན་ཏེ། ཇི་སྐད་དུ། སྒྱུ་འཕྲུལ་དྲ་བ་ལས། རྣམ་པར་ཤེས་པའི་ཆོས་ཉིད་འདས། །ཡེ་ཤེས་གཉིས་མེད་ཚུལ་འཆང་བ། །ཞེས་དང༌། མདོ་ལས། རྣམ་ཤེས་ལ་མི་རྟོན་ཡེ་ཤེས་ལ་རྟོན་པར་གསུངས་པ་དང༌། སུམ་ཅུ་པའི་རབ་ཏུ་བྱེད་པ་ལས། བདག་དང་ཆོས་སུ་ཉེར་འདོགས་པ། །སྣ་ཚོགས་དག་ནི་གང་བྱུང་བ། །དེ་ནི་རྣམ་པར་ཤེས་པར་གྱུར། །ཞེས་པ་རྣམ་ཤེས་ངོས་བཟུང་ཤིང༌། ཡང་དེ་ཉིད་ལས། གཟུང་བ་མེད་པས་དེ་འཛིན་མེད། །དེ་ནི་སེམས་མེད་མི་དམིགས་པ། །འཇིག་རྟེན་འདས་པའི་ཡེ་ཤེས་ཏེ། །གནས་ཀྱང་གཞན་དུ་གྱུར་པ་སྟེ། །གནས་ངན་ལེན་གཉིས་སྤངས་པ་འོ། །ཞེས་པས་ཡེ་ཤེས་ངོས་བཟུང་བའི་ཕྱིར་དང༌། དབུ་མ་ཚིག་གསལ་ལས། དེ་ལྟ་བུའི་མྱ་ངན་ལས་འདས་པ་དེ་ཡོད་པར་གང་གིས་གཅོད་པར་བྱེད། རྣམ་པར་ཤེས་པས་སམ། ཡེ་ཤེས་ཀྱིས་ཡིན་དྲང་ན། གལ་ཏེ་རྣམ་པར་ཤེས་པས་ཡིན་པར་རྟོག་ན་དེ་ནི་མི་རིགས་སོ། །ཅིའི་ཕྱིར་ཞེ་ན། འདི་ལྟར་རྣམ་པར་ཤེས་པ་ནི་མཚན་མ་ལ་དམིགས་པ་ཡིན་ན། མྱ་ངན་ལས་འདས་པ་ལ་ནི་མཚན་མ་ཅུང་ཟད་ཀྱང་ཡོད་པ་མ་ཡིན་ནོ། །དེའི་ཕྱིར་དེ་ནི། རེ་ཤིག་རྣམ་པར་ཤེས་པས་དམིགས་པར་བྱེད་པ་མ་ཡིན་ནོ། །ཡེ་ཤེས་ཀྱིས་ཀྱང་གཅོད་པར་བྱེད་པ་མ་ཡིན་ཏེ། ཡེ་ཤེས་ནི་སྟོང་པ་ཉིད་ལ་དམིགས་པར་འགྱུར་དགོས་ལ། དེས་མྱ་ངན་ལས་འདས་པ་དངོས་པོ་མ་ཡིན་ཞིང༌། དངོས་པོ་མེད་པའང་མ་ཡིན་ཞེས་བྱ་བར་ཇི་ལྟར་འཛིན་པར་བྱེད་དེ། ཡེ་ཤེས་ནི་སྤྲོས་པ་ཐམས་ཅད་ལས་འདས་པའི་རང་བཞིན་ཡིན་ནོ་ཞེས་གསལ་བར་གསུངས་པ་དག་གི་དོན་ལ་རྣམ་པར་བརྟགས་ན་རྣམ་དཔྱོད་དང་ལྡན་པ་དག་གིས་ལེགས་པར་བཤད་པའི་ཚོགས་རྣམས་བདེ་བླག་ཏུ་རྙེད་པར་འགྱུར་བའི་ཕྱིར་རོ། །འདིར་སྨྲས་པ། དབུ་སེམས་ཤིང་རྟའི་གྲུ་ཆེན་ལ་ཞོན་ནས། །ཐེག་ཆེན་རྒྱ་མཚོའི་ཕ་མཐར་སོན་འདོད་ན། །རྣམ་དཔྱོད་རྟ་བརྒྱ་འཛིན་པའི་ཁ་ལོས་པས། །ལམ་སྲོལ་ཚུལ་བཞིན་ཕྱེ་བ་འདིར་ཞུགས་ཤིག །ཅེས་ཐེག་པ་ཆེན་པོ་དབུ་མ་རྣམ་པར་ངེས་པའི་ནང་གི་མཛོད་ཆེན་པོ་གསལ་བར་ཕྱེ་བ་ལས། དབུ་སེམས་ཀྱི་ཤིང་རྟའི་སྲོལ་རྣམ་པར་ངེས་པའི་ལེའུ་སྟེ་དང་པོའོ།།  །། ༈ བལ་ཡུལ་མཆོད་རྟེན་རིན་པོ་ཆེ་བྱ་རུང་ཁ་ཤོར་གྱི་ཉེ་འགྲམ་རྒྱལ་ཡོངས་ས་ཆེན་ཞེས་པ་གློག་ཀླད་དཔར་ཁང་ལས། བདེར་གཤེགས་༧སྐྱབས་རྗེ་བཅོ་བརྒྱད་ཁྲི་ཆེན་རྡོ་རྗེ་འཆང་མཆོག་གི་ཐུགས་དགོངས་རྫོགས་ཆེད། སྐྱབས་འོག་པ་ཚར་གྲྭ་གུ་རུས་གློག་ཀླད་ཕྱག་དེབ་ཆེད་འགྲེམ་སྤེལ་ཞུས་པའི་དགེ་འབྲས་སངས་རྒྱས་ཞིང་དུ་བསྔོའོ།།  །།

རྩོམ་སྒྲིག་པ། ཕར་ནང་དཀོན་མཆོག་དར་རྒྱས།
ནང་དོན་འདིའི་དཔར་དབང་རྒྱལ་ཡོངས་ས་ཆེན་དྲ་བར་ཡོད་པས་ཡོངས་རྫོགས་སམ་ཆ་ཤས་གང་ཞིག་ཆོག་མཆན་མེད་པར་རང་དགར་སུས་དགོལ་མི་ཆོག ། གལ་སྲིད་དགོལ་ན་ཡོང་ཁུངས་གསལ་པོ་དང་སྦྲེལ་ཐག་ངེས་པར་དུ་འགོད་དགོས།
དྲ་བའི་སྦྲེལ་ཐག www.gyalyongsachen.com

དཔྱད་མཆན།

དཔྱད་གཏམ་སྤེལ་མཁན་ལ་གསལ་བརྡ།

ཁྱེད་ཀྱི་གློག་འཕྲིན་ས་གནས་ཀུན་པོར་མི་བསྒྲགས།


*